ଭୁଲ୍ ଟ୍ରେନ୍ରେ ଚଢ଼ିଲେ ମହିଳା ଯାତ୍ରୀ । ବ୍ୟସ୍ତ ହୋଇ ଛୁଆଙ୍କୁ ଧରି ଡେଇଁ ପଡ଼ିବାରୁ ଛୁଆଙ୍କ ଆଗରେ ଚାଲିଗଲା ମା ର ଜୀବନ । ଏଭଳି ଏକ ହୃଦୟ ବିଦାରକ ଘଟଣା ଘଟିଛି ବଲାଙ୍ଗୀର ଜିଲ୍ଲା ସଇଁତଲା ଥାନା ଅନ୍ତର୍ଗତ ବଡ଼ମାଳ ରେଳ ଷ୍ଟେସନରେ । ମହିଳା ଜଣକ ଏକ ପାସେଞ୍ଜର ଟ୍ରେନ୍ରେ ଘରକୁ ଯିବା ବଦଳରେ ସେ ଏକ୍ସପ୍ରେସ୍ ଟ୍ରେନ୍ରେ ଚଢ଼ି ଯାଇଥିଲେ। ତାଙ୍କର ଗନ୍ତବ୍ୟସ୍ଥଳରେ ଏକ୍ସପ୍ରେସ୍ ଟ୍ରେନ୍ ନଅଟକିବାରୁ ବ୍ୟସ୍ତ ହୋଇ ଟ୍ରେନ୍ରୁ ଡେଇଁପଡ଼ିଥିଲେ। ଫଳରେ ଘଟଣା ସ୍ଥଳରେ ମହିଳାଙ୍କ ମୃତ୍ୟୁ ଘଟିଛି । ମୃତ ମହିଳା ଜଣକ ହେଲେ ରଜନୀ ମହାନନ୍ଦ । ସୂଚନା ଅନୁଯାୟୀ ଦେଓଗାଁ ଥାନାର ଜରାସିଂହା ଗାଁର ରଜନୀ ମହାନନ୍ଦ ମେଡିକାଲ କାମରେ ବଲାଙ୍ଗୀର ଯାଇଥିଲେ। ଗତକାଲି ରାଜ୍ୟବ୍ୟାପି ଘରୋଇ ବସ୍ ଧର୍ମଘଟ ଥିବାରୁ ସେ ଘରକୁ ଫେରିବା ପାଇଁ ବଲାଙ୍ଗୀର ଷ୍ଟେସନରେ ଟ୍ରେନ୍କୁ ଅପେକ୍ଷା କରିଥିଲେ। ସାଙ୍ଗରେ ତାଙ୍କର ଦୁଇ ଓ ୩ ବର୍ଷର ଝିଅ ଥିଲେ। ହେଲେ ଟିଟିଲାଗଡ଼ ପଟକୁ ଆସିବାକୁ ଥିବା ବିଲାସପୁର-ଟିଟିଲାଗଡ଼-ରାୟପୁର ପାସେଞ୍ଜର ଟ୍ରେନ୍ରେ ଚଢ଼ିବା ବଦଳରେ ସେ ଦୀନଦୟାଲ ଏକ୍ସପ୍ରେସ୍ ଟ୍ରେନ୍ରେ ଭୁଲ ବଶତଃ ଚଢ଼ିଯାଇଥିଲେ। ତାଙ୍କୁ ଦେଓଗାଁ ଷ୍ଟେସନ୍ରେ ଓହ୍ଲାଇବାର ଥିଲା। କିନ୍ତୁ ଏକ୍ସପ୍ରେସ୍ ଟ୍ରେନ୍ର ଷ୍ଟପେଜ ଏଠାରେ ନଥିବାରୁ ଏହା ଆଗକୁ ବଢ଼ିଥିଲା। ଟ୍ରେନ୍ଟି ନ ଅଟକି ବାରୁ ଭୁଲ ଗାଡ଼ିରେ ଆସିଥିବା ଭାବିଥିଲେ। ରଜନୀ (ଝରଣା) ସଇଁତଲା ଷ୍ଟେସନ ପରେ ବଡ଼ମାଲ ଷ୍ଟେସନ୍ରେ ଟ୍ରେନ୍ଟି ଟ୍ରାକ ବଦଳାଉ ଥିବା ବେଳେ ତଳକୁ ଡେଇଁ ପଡି ଟ୍ରେନ୍ ତଳେ ପଡିଯାଇଥିଲେ। ଫଳରେ ତାଙ୍କର ମୃତ୍ୟୁ ହେଇଥିଲା । ଆଉ ଅଳ୍ପକେବର୍ତ୍ତି ଯାଇଛନ୍ତି ଦୁଇ ଶିଶୁକନ୍ୟା। ଟ୍ରେନ୍ର ଅନ୍ୟ ଯାତ୍ରୀମାନେ ଘଟଣା ସଂପର୍କରେ ଅବଗତ ହେଲା ପରେ ୨ ଶିଶୁଙ୍କୁ ବଡ଼ମାଳ ଷ୍ଟେସନରେ ଓହ୍ଲାଇ ଜିଆରପିକୁ ହସ୍ତାନ୍ତର କରିଥିଲେ। ଅନ୍ୟପଟେ ଟିଟିଲାଗଡ଼ ଜିଆରପି ପୁଲିସ ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ କରୁଥିବା ସୂଚନା ମିଳିଛି।