ଟିଟିଲାଗଡ଼ର ସମାଜସେବୀ ହସ୍ତା ବିଶିଙ୍କୁ ସ୍ୱଦେଶ ଫେରାଇ ଆଣିବା ପାଇଁ ଚାଲିଥିବା ଆଇନଗତ ଲଢ଼େଇରେ ଏକ ବଡ଼ ସଫଳତା ମିଳିଛି। ଓଡ଼ିଶା ହାଇକୋର୍ଟ ଏହି ମାମଲାରେ ହସ୍ତକ୍ଷେପ କରିବା ପରେ, ବିଦେଶ ମାଟିରେ ଅସହାୟ ଭାବେ ପଡ଼ିରହିଥିବା ହସ୍ତାଙ୍କ ଘରକୁ ଫେରିବା ବାଟ ଏବେ ପ୍ରାୟ ପରିଷ୍କାର ହୋଇଯାଇଛି। କୋର୍ଟ ମାମଲାର ଶୁଣାଣି କରି ହସ୍ତା ବିଶିଙ୍କ ପାସପୋର୍ଟ, ଭିସା ଏବଂ ଅନ୍ୟାନ୍ୟ ଜରୁରୀ କାଗଜପତ୍ର ସଲିସିଟର ଜେନେରାଲ ଅଫ୍ ଇଣ୍ଡିଆଙ୍କ ନିକଟରେ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ମାମଲାର ଗୁରୁତ୍ୱକୁ ଦୃଷ୍ଟିରେ ରଖି ହାଇକୋର୍ଟ ପରବର୍ତ୍ତୀ ଶୁଣାଣିକୁ ମେ’ ୧୧ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦେଇଛନ୍ତି। ଟିଟିଲାଗଡ଼ ଡିଏସପି ସମସ୍ତ ଆବଶ୍ୟକୀୟ ନଥିପତ୍ର ଡେପୁଟୀ ସଲିସିଟର ଅଫ୍ ଇଣ୍ଡିଆଙ୍କ ନିକଟରେ ଦାଖଲ କରିସାରିଛନ୍ତି, ଯାହାକି ପ୍ରକ୍ରିୟାକୁ ତ୍ୱରାନ୍ୱିତ କରିଛି। ହସ୍ତା ବିଶିଙ୍କ ବାପା-ମାଆ ନିଜ ଝିଅକୁ ଉଦ୍ଧାର କରିବା ପାଇଁ ପ୍ରଥମେ ଟିଟିଲାଗଡ଼ ପୋଲିସ ଓ ଉପଜିଲ୍ଲାପାଳଙ୍କ ଦ୍ୱାରସ୍ଥ ହୋଇଥିଲେ। କିନ୍ତୁ ପ୍ରଶାସନିକ ସ୍ତରରେ କୌଣସି ଆଖିଦୃଶିଆ ସୁଫଳ ମିଳିନଥିଲା।
ଏହାପରେ: ସମାଜସେବୀ ରଞ୍ଜୁ ରାଏମନ ଏବଂ ହାଇକୋର୍ଟର ଆଇନଜୀବୀ ଆଶିଷ ମିଶ୍ର ଏହି ସମ୍ବେଦନଶୀଳ ମାମଲାକୁ ହାଇକୋର୍ଟକୁ ନେଇଥିଲେ। ପ୍ରଥମ ପର୍ଯ୍ୟାୟରେ କେନ୍ଦ୍ର ସରକାରଙ୍କ ପକ୍ଷରୁ ସଠିକ୍ ତଥ୍ୟ ପ୍ରଦାନ କରାଯାଇନଥିବାରୁ କୋର୍ଟ ଅସନ୍ତୋଷ ପ୍ରକାଶ କରିଥିଲେ। ତେବେ ବର୍ତ୍ତମାନ ସମସ୍ତ କାଗଜପତ୍ର ଦାଖଲ ହେବା ପରେ ହସ୍ତାଙ୍କ ଓଡ଼ିଶା ଫେରିବା ସୁନିଶ୍ଚିତ ମନେହେଉଛି। ସୂଚନାଯୋଗ୍ୟ ଯେ, ଅନେକ ସମୟରେ ଓଡ଼ିଶାରୁ ଯୁବକଯୁବତୀମାନେ ଭଲ ଚାକିରି ଆଶାରେ ଦୁବାଇ ବା ଅନ୍ୟ ଉପସାଗରୀୟ ଦେଶକୁ ଯାଇଥାନ୍ତି। କିନ୍ତୁ ସେଠାରେ ଏଜେଣ୍ଟଙ୍କ ପ୍ରତାରଣା କିମ୍ବା ଆଇନଗତ ସମସ୍ୟା ଯୋଗୁଁ ସେମାନଙ୍କ ପାସପୋର୍ଟ ଜବତ ହୋଇଯାଏ, ଯାହାଫଳରେ ସେମାନେ ନିଜ ଦେଶକୁ ଫେରିପାରନ୍ତି ନାହିଁ। ହସ୍ତାଙ୍କ କ୍ଷେତ୍ରରେ ମଧ୍ୟ ସମାନ ପରିସ୍ଥିତି ଉପୁଜିଥିଲା। ବର୍ତ୍ତମାନ ବୈଦେଶିକ ମନ୍ତ୍ରଣାଳୟ ଏହି ନିର୍ଦ୍ଦେଶ ଆଧାରରେ ଦୁବାଇ ସ୍ଥିତ ଭାରତୀୟ ଦୂତାବାସ ସହ ଯୋଗାଯୋଗ କରି ହସ୍ତାଙ୍କୁ ‘ଏମରଜେନ୍ସି ସାର୍ଟିଫିକେଟ୍’ କିମ୍ବା ଟ୍ରାଭେଲ ଡକ୍ୟୁମେଣ୍ଟ ପ୍ରଦାନ କରିବେ। ଖୁବଶୀଘ୍ର ସେ ନିଜ ପରିବାର ପାଖକୁ ଫେରିବେ ବୋଲି ଆଶା କରାଯାଉଛି।