ଓଡ଼ିଶା ପାଇଁ ଆସିଛି ଏକ ଗର୍ବର ଖବର। ନିଜ ସୁମଧୁର କଣ୍ଠର ଯାଦୁରେ ସାରା ଦେଶର ହୃଦୟ ଜିତିଛନ୍ତି ଓଡ଼ିଆ ଝିଅ ଜ୍ୟୋତିର୍ମୟୀ। ସେ ଇଣ୍ଡିଆନ୍ ଆଇଡଲ୍ର ବିଜେତା ହୋଇ ଓଡ଼ିଶାର ନାଁକୁ ଜାତୀୟ ସ୍ତରରେ ଗୌରବାନ୍ୱିତ କରିଛନ୍ତି। ତାଙ୍କ ଏହି ସଫଳତା ପାଇଁ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି।
ଇଣ୍ଡିଆନ୍ ଆଇଡଲ୍ ମଞ୍ଚରେ ଆରମ୍ଭରୁ ହିଁ ନିଜ ଅନନ୍ୟ ସଙ୍ଗୀତ ପରିବେଷଣ ମାଧ୍ୟମରେ ବିଚାରକ ଓ ଦର୍ଶକଙ୍କ ମନ ଜିତିଥିଲେ ଜ୍ୟୋତିର୍ମୟୀ। ପ୍ରତ୍ୟେକ ପର୍ଯ୍ୟାୟରେ ତାଙ୍କ ଅସାଧାରଣ ପ୍ରଦର୍ଶନ ତାଙ୍କୁ ଫାଇନାଲ୍ ପର୍ଯ୍ୟନ୍ତ ପହଞ୍ଚାଇଥିଲା। ଶେଷରେ ଦେଶବାସୀଙ୍କ ଭଲପାଇବା ଓ ଭୋଟ୍ରେ ସେ ହୋଇଛନ୍ତି ଏହି ଲୋକପ୍ରିୟ ସଙ୍ଗୀତ ପ୍ରତିଯୋଗିତାର ବିଜେତା।
ଜ୍ୟୋତିର୍ମୟୀଙ୍କ ଏହି ସଫଳତା ପରେ ସାରା ଓଡ଼ିଶାରେ ଖୁସିର ମାହୋଲ ସୃଷ୍ଟି ହୋଇଛି। ସୋସିଆଲ୍ ମିଡିଆରେ ତାଙ୍କୁ ଶୁଭେଚ୍ଛାର ସୁଅ ଛୁଟିଛି। ବିଭିନ୍ନ କ୍ଷେତ୍ରର ବିଶିଷ୍ଟ ବ୍ୟକ୍ତିବିଶେଷ, କଳାକାର ଓ ରାଜନେତାମାନେ ମଧ୍ୟ ତାଙ୍କ ସଫଳତାକୁ ସ୍ୱାଗତ କରିଛନ୍ତି।
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ନିଜ ଶୁଭେଚ୍ଛା ବାର୍ତ୍ତାରେ କହିଛନ୍ତି ଯେ, ଜ୍ୟୋତିର୍ମୟୀଙ୍କ ଏହି ସଫଳତା ସମଗ୍ର ଓଡ଼ିଶା ପାଇଁ ଗର୍ବର ବିଷୟ। ତାଙ୍କ କଠିନ ପରିଶ୍ରମ, ପ୍ରତିଭା ଓ ନିଷ୍ଠା ଅନେକ ଯୁବ ପ୍ରତିଭାଙ୍କ ପାଇଁ ପ୍ରେରଣା ହେବ ବୋଲି ସେ ଆଶା ପ୍ରକାଶ କରିଛନ୍ତି। ଆଗାମୀ ଦିନରେ ଜ୍ୟୋତିର୍ମୟୀ ଜାତୀୟ ଓ ଆନ୍ତର୍ଜାତୀୟ ସଙ୍ଗୀତ ଜଗତରେ ଆହୁରି ସଫଳତା ହାସଲ କରନ୍ତୁ ବୋଲି ସେ କାମନା କରିଛନ୍ତି।