Tag: #raid

୨୦ ହଜାର ଲାଞ୍ଚ ନେଇ ଫଶିଲେ ଆରଆଇ

ଭିଜିଲାନ୍ସ ଜାଲରେ ବିଲେଇପଦା ଆରଆଇ ପିର୍ ଖାନ । ଜମିପଟ୍ଟା କରାଇଦେବା ବାବଦକୁ ଜଣେ ବ୍ୟକ୍ତିଙ୍କ ଠାରୁ ୨୦ ହଜାର ଲାଞ୍ଚ ନେଉଥିବା ବେଳେ ମାଡ଼ିବସିଲା ଭିଜିଲାନ୍ସ । ଯୋଡ଼ା ବ୍ଳକ, ମୁର୍ଗାବେଡା ଅଞ୍ଚଳର ଦୁବୁରାଜ ହେମ୍ରମ ଅନଲାଇନରେ ଜମିପଟ୍ଟା ଆବେଦନ କରିବା ପରେ ବି ଜମିପଟ୍ଟା ପାଇପାରୁନଥିଲେ । ଏନେଇ ବିଲେଇପଦା ଆରଆଇଙ୍କ ନିକଟରେ ବହୁବାର ନେହୁରା ହୋଇଥିଲେ । ତେବେ ଜମି ପଟ୍ଟା କରାଇ ଦେବା ପାଇଁ ସେ ଦୁବୁରାଜ ହେମ୍ରମଙ୍କ ଠାରୁ ୫୦ ହାଜର ଟଙ୍କା ଦାବି କରିଥିଲେ ।

ଏନେଇ ଦୁବୁରାଜ, କେନ୍ଦୁଝର ଭିଜିଲାନ୍ସର ଦ୍ବାରସ୍ଥ ହୋଇଥିଲେ । ଯୋଜନା ମୁତାବକ ଆଜି ଆରଆଇ ପିର୍ ଖାନ ନିଜ କାର୍ଯ୍ୟାଳୟରେ ଦୁବୁରାଜଙ୍କ ଠାରୁ ୨୦ ହଜାର ଟଙ୍କା ଅଗ୍ରୀମ ଲାଞ୍ଚ ନେଉଥିବା ବେଳେ ଭିଜିଲାନ୍ସ ଟିମ୍ ମାଡ଼ିବସିଥିଲା । ଭିଜିଲାନ୍ସ ଟିମ୍ ଆର ଆଇଙ୍କୁ ନିଜ ହେପାଜତରେ ନେଇ ତଦନ୍ତ ଜାରୀ ରଖିଛନ୍ତି । ବଡ଼ବିଲ ତହସିଲ କଲୋନୀ ସ୍ଥିତ ତାଙ୍କ ସରକାରୀ ବାସଭବନ ଏବଂ ତେଲକୋଇ ସ୍ଥିତ ପୈତୃକ ଘରେ ମଧ୍ୟ ଚଢ଼ାଉ କରାଯାଉଛି ବୋଲି ସୂଚନା ରହିଛି ।

ତେବେ ଯାଞ୍ଚ ପରେ ଆରଆଇଙ୍କ ଠାରୁ କେତେ କଣ ମିଳିଲା ସେନେଇ ସୂଚନା ମିଳିପାରିବ । ବାଲେଶ୍ଵର ଡିଏସପି, ଏସଏସ ପୂଜାରୀ, କେନ୍ଦୁଝର ଡିଏସପି ଡି. କେ. ନାଏକଙ୍କ ସମେତ ୬ ଜଣିଆ ଭିଜିଲାନ୍ସ ଟିମ୍ ଏହି ଚଢ଼ାଉରେ ସାମିଲ ହୋଇଥିଲେ । ତେବେ ଘଟଣା ସମ୍ପର୍କରେ ଭିଲିଲାନ୍ସ ଡିଏସପି କୌଣସି ପ୍ରତିକ୍ରିୟା ଦେବାକୁ ମନା କରିଦେଇଥିଲେ ।
ଦେଶୀ ମହୁଲ ମଦ ଚୋରା ଚାଲାଣ ବେଳେ ଅବକାରୀ ବିଭାଗର ଚଢ଼ାଉ

କେନ୍ଦୁଝର ଜିଲ୍ଲାରେ ଥମୁନି ଚୋରା ମହୁଲି ମଦ କାରବାର। ପୁଣି ଚଢଉ କରି ଅବକାରୀ ପୋଲିସ ହଜାର ଲିଟର ମହୁଲ ପୋଚ ନଷ୍ଟ କରିବା ସହ ମଦ ତିଆରିରେ ବ୍ୟବହୃତ ବିଭିନ୍ନ ସାମଗ୍ରୀ ଜବତ କରିଛି। ସୂଚନା ମୁତାବକ, କେନ୍ଦୁଝର ଜିଲ୍ଲା ବନ୍ଧୁଆବେଡାରେ ଦେଶୀ ମଦ କୁଟୀର ଶିଳ୍ପରେ ପରିଣତ ହୋଇଥିବା ନେଇ ଅବକାରୀ ବିଭାଗକୁ ସୂଚନା ମିଳିଥିଲା। ସୂଚନା ଆଧାରରେ ଏସ୍ ପି ଓ ଅବକାରୀ ସୁପରିଟେଣ୍ଡେଣ୍ଟଙ୍କ ନିର୍ଦ୍ଦେଶରେ ବନ୍ଧୁଆବେଡ଼ା ଅଞ୍ଚଳରେ ଚୋରା ଦେଶୀ ମଦ ଭାଟି ଉପରେ ଚଢ଼ାଉ କରାଯାଇଥିଲା । ସେଠାରେ ଥିବା ୧୦୦୦ ଲିଟରରୁ ଅଧିକ ମହୁଲି ପୋଚ ନଷ୍ଟ କରିବା ସହିତ ୬୦ ଟି ୨ ଶହ ଲିଟରିଆ ଡ୍ରମ୍, ଗୁଡ଼ ପ୍ୟାକେଟ ଓ ଅନ୍ୟାନ୍ୟ ସରଞ୍ଜାମ ଜବତ କରିଥିଲା ଅବକାରୀ ବିଭାଗ । ଏହି ଚଢାଉରେ ଚମ୍ପୁଆ, ଯୋଡ଼ା ଏବଂ ବଡ଼ବିଲର ଅବକାରୀ ଅଧିକାରୀ ଓ କର୍ମଚାରୀ ସାମିଲ ହୋଇଥିଲେ । ଆଗାମୀ ଦିନରେ ଚୋରା ଦେଶୀ ମଦ ଭାଟିଗୁଡ଼ିକ ଉପରେ ଏହିଭଳି ଚଢ଼ଉ ଜାରି ରହିବ ବୋଲି ଅବକାରୀ ବିଭାଗ କହିଛି ।

ଏଠାରେ କହି ରଖୁଛୁ କି, ଗତ ୫ ତାରିଖରେ ବାମେବାରୀ ଥାନା ଅଧୀନ ବନ୍ଧୁଆବେଡ଼ାରୁ ସ୍କୋର୍ପିଓରେ ଦେଶୀ ମହୁଲ ମଦ ଚୋରା ଚାଲାଣ ବେଳେ ଚଢାଉ କରି ସ୍କୋର୍ପିଓ ସହ ୨ଶହ ୪୦ ଲିଟର ମହୁଲ ମଦ ଜବତ୍ କରିଥିଲା। ଏଥିସହ ୨ ଜଣ ଅଭିଯୁକ୍ତଙ୍କୁ ଗିରଫ କରିଥିଲା ।
ଲାଞ୍ଚ ନେଉଥିବା ବେଳେ ଆରଆଇ ବାବୁଙ୍କୁ ମାଡ଼ିବସିଲା ଭିଜିଲାନ୍ସ

ରାଇରଙ୍ଗପୁର ଦୁର୍ଗା ମଣ୍ଡପ ଠାରେ ପାଞ୍ଚ ହଜାର ଟଙ୍କା ଲାଞ୍ଚ ନେଉଥିବା ବେଳେ ଲାଞ୍ଚୁଆ ଆରଆଇ ବାବୁଙ୍କୁ ମାଡ଼ିବସିଲା ଭିଜିଲାନ୍ସ । ମୟୂରଭଞ୍ଜ ଜିଲ୍ଲା ବାବନଘାଟି ଉପଖଣ୍ଡ ବାଦାମ ପାହାଡ଼ କୁସୁମୀ ତହସିଲ ଅଧୀନ କୁଲଡ଼ିହା Ri ରାକେଶ କୁମାର ପାତ୍ର ଜୟପୁର ସର୍କଲର ଜମିମାପ କରି ଏହା ବାବଦକୁ, ୱାର୍ଡ ନମ୍ବର ୬ ନିବାସୀ ରାମଦାସ ସାହୁଙ୍କ ଠାରୁ 5 ହଜାର ଟଙ୍କା ଦାବି କରିଥିଲେ । ଏଥି ପାଇଁ ସେ ରାଇରଙ୍ଗପୁର ଦୁର୍ଗା ମଣ୍ଡପ ଠାରେ ଅପେକ୍ଷା କରିଥିଲେ । ଏହି ସମୟରେ ରାମଦାସ ସାହୁଙ୍କ ଠାରୁ ଆରଆଇ ରାକେଶ କୁମାର ପାତ୍ର ଲାଞ୍ଚ ନେଉଥିବା ବେଳେ ବାଲେଶ୍ବର ଭିଜିଲାନ୍ସ ବିଭାଗର ଏକ ଟିମ ପୂର୍ବରୁ ଯୋଜନା ମୁତାବକ ଚଢାଉ କରି ଟଙ୍କା ସହ ଆଇଆରଙ୍କୁ ମାଡ଼ିବସି ଥିଲେ। ଏଥିସହିତ ଭିଜିଲାନ୍ସ ଟିମ ଅଭିଯୁକ୍ତ ରାଜସ୍ଵ ନିରୀକ୍ଷକ ରାକେଶ କୁମାର ପାତ୍ରଙ୍କ ଜୟପୁର କାର୍ଯ୍ୟାଳୟ ସ୍ଥିତ ସରକାରୀ ବାସଭବନ, ରାଇରଙ୍ଗପୁର ଓ ବାରିପଦା ମୁର୍ଗାବାଡି ଭଡ଼ା ଘରେ ଚଢ଼ାଉ କରିଛି । ଅଭିଯୁକ୍ତ ରାଜସ୍ଵ ନିରୀକ୍ଷକ ରାକେଶ କୁମାର ପାତ୍ର ପୂର୍ବରୁ ବିବାଦୀୟ ରହିଥିବା ଏକାଧିକ ଲାଞ୍ଚ ଅଭିଯୋଗ ତାଙ୍କ ବିରୋଧେ ରହିଛି । ଭିଜିଲାନ୍ସ ଅତିରିକ୍ତ SP ହରେକୃଷ୍ଣ ମାଝୀ ଙ୍କ ନେତୃତ୍ବରେ ଇନ୍ସପେକ୍ଟର ଦୁଷ୍ମନ୍ତ ନାୟକ ଓ ଅନ୍ୟାନ୍ୟ ବାଲେଶ୍ଵର ଭିଜିଲାନ୍ସ କର୍ମଚାରୀ ମାନେ ଚଢ଼ାଉ କରିଥିଲେ।
ଭିଜିଲାନ୍ସ ଜାଲରେ ରାୟଗଡା ଡିଏଫଓ

ଆୟ ବହିର୍ଭୂତ ସଂପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଜାଲରେ ରାୟଗଡ଼ା ଡିଏଫଓ ବିଜୟ କୁମାର ପରିଡ଼ା। ବୃକ୍ଷ ରୋପଣରେ ବ୍ୟାପକ ହେରଫେର କରିଥିବା ନେଇ ହୋଇଥିଲା ଅଭିଯୋଗ। ଅଭିଯୋଗ ଆଧାରରେ ପରିଡାଙ୍କ ଘର ସମେତ ୭ଟି ସ୍ଥାନରେ ଚାଲିଛି ଚଢ଼ାଉ।

ଡିଏଫଓ ରହୁଥିବା ଗାନ୍ଧୀନଗର ସ୍ଥିତ ସରକାରୀ ବାସଭବନ, ରାୟଗଡ଼ା ଓ ଭୁବନେଶ୍ୱର ସମେତ ୪ଟି ଜିଲ୍ଲାର ୭ଟି ସ୍ଥାନରେ ଭିଜିଲାନ୍ସ ପକ୍ଷରୁ ଏକକାଳୀନ ଚଢାଉ ଜାରି ରହିଛି। ଏହି ଚଢ଼ାଉରେ ଭିଜିଲାନ୍ସର ୫ ଟିମ୍ ସାମିଲ ହୋଇଛି। ଏଥିରେ ୮ ଜଣ ଡିଏସପି, ୬ ଜଣ ଇନସ୍ପେକ୍ଟର ଓ ଅନ୍ୟ କର୍ମଚାରୀ ନିୟୋଜିତ ଅଛନ୍ତି।

ରାୟଗଡ଼ା ଜିଲ୍ଲାର ଚନ୍ଦାପାହାଡରେ ୩ କୋଟି ଟଙ୍କାର ବୃକ୍ଷ ରୋପଣରେ ଦୁର୍ନୀତି ହୋଇଥିଲା। କିନ୍ତୁ ବୃକ୍ଷରୋପଣରେ ବ୍ୟାପକ ଦୁର୍ନୀତି ହୋଇଥିବା ନେଇ ସୂଚନା କର୍ମୀ ରବୀନ୍ଦ୍ର ପାଟ କଣ୍ଡାଳ ଭିଜିଲାନ୍ସ ବିଭାଗ ସମେତ ବିଭିନ୍ନ ଅଧିକାରୀଙ୍କ ନିକଟରେ ‌ଅଭିଯୋଗ କରିଥିଲେ। ଭିଜିଲାନ୍ସ ଘଟଣାର ତଦନ୍ତ କରି ଆଜି ପରିଡାଙ୍କ ଘରେ ଚଢ଼ାଉ କରିଛି।
ଆୟକରର ବହୁ ଖୁଲାସା ପରେ ଇଡା ନିରବତାକୁ ନେଇ ପ୍ରଶ୍ନବାଚୀ

ଡିଏନ ଗ୍ରୁପ ଉପରେ ଚଢାଉକୁ ନେଇ ଆୟକର ବିଭାଗର ସୂଚନା। ଡିଏନ୍ ଗ୍ରୁପ୍ ମୋଟ ୯୦କୋଟି ଟଙ୍କାର ଟିକସ ଫାଙ୍କିଛି। ଆୟକର ଚଢାଉ ବେଳେ ନଗଦ ୯.୭୪ କୋଟି ଟଙ୍କା ଜବତ ହୋଇଛି । ଆୟକର ଚଢାଉ ପରେ ଏତେ ପରିମାଣର ଟିକସ ଫାଙ୍କିର ପର୍ଦ୍ଦାଫାଶ ହୋଇଥିଲେ ମଧ୍ୟ ରିଏଲ ଇଷ୍ଟେଟ୍ ବ୍ୟବସାୟୀ ଜଗଦୀଶ ପ୍ରସାଦ ନାଏକଙ୍କ ଡିଏନ୍ ଗ୍ରୁପ୍ଙ୍କ ଉପରେ ପ୍ରବର୍ତ୍ତନ ନିର୍ଦ୍ଦେଶାଳୟ କୌଣସି ଆକ୍ସନ ନ ନେଇ ଚୁପବସିଛି।

ଆଇଟି ଚଢାଉ ବେଳେ ଦସ୍ତାବିଜ ଯାଞ୍ଚରୁ ଜଣାପଡିଥିଲା କି, ଡିଏନ୍ ଗ୍ରୁପ୍ ନିଜର ବିଭିନ୍ନ କମ୍ପାନୀ ମାଧ୍ୟମରେ ଲୁଚା ଛପାରେ ମୋଟ ୨୧୦ କୋଟି ଟଙ୍କା ନଗଦ ଟଙ୍କା ସଂଗ୍ରହ କରି ଥିବା ବେଳେ ୯୦କୋଟି ଟଙ୍କା ଟିକସ ଫାଙ୍କି କରିଛି। ଏହି ଦସ୍ତାବିଜ ପ୍ରମାଣ ସହ ଚଢ଼ାଉ ବେଳେ ଡିଏନ୍ ଗ୍ରୁପ୍ ଠାରୁ ମୋଟ ୯.୭୪କୋଟି ଟଙ୍କା ନଗଦ ଅର୍ଥ ଜବତ କରିଛି ଆଇଟି , ଯାହା ନଗଦ ଆକାରରେ ଓଡ଼ିଶାରେ ଏପର୍ଯ୍ୟନ୍ତ ସର୍ବାଧିକ ଜବତ ଟଙ୍କା । ଏଥିସହ ଆୟକର ବିଭାଗର ଚଢ଼ାଉରେ ବହୁ ଡିଜିଟାଲ ଡାଟା, ହାତଲେଖା ଡାଏରୀ, ରିସିଦ୍ ଆଦି ଜବତ ହୋଇଛି। ଏସବୁର ଯାଂଚ ପରେ ୨୧୦କୋଟି ଟଙ୍କାର ନଗଦ ଟଙ୍କା ସଂଗ୍ରହ ହୋଇଥିବା କଥା ସାମ୍ନାକୁ ଆସିଥିଲା । ଜମି, ଘରଯୋଗ୍ୟ ପ୍ଲଟ ଓ ଫ୍ଲାଟ ବିକ୍ରି ଉଦ୍ଦେଶ୍ୟରେ ଏତେ ପରିମାଣର ଅର୍ଥ ଠୁଳ କରାଯାଇଥିବା ଜଣାପଡିଛି।

ସୂଚନାଯୋଗ୍ୟ, ଜୁଲାଇ ୫ ତାରିଖରେ ଆୟକର ଫାଙ୍କିବା ଅଭିଯୋଗରେ ଡିଏନ୍ ଗ୍ରୁପ୍ ଉପରେ ଆୟକର ବିଭାଗ ଚଢ଼ାଉ କରିଥିଲା । ଗ୍ରୁପର କାର୍ଯ୍ୟାଳୟ ଓ କର୍ମଚାରୀଙ୍କ ବାସଭବନ ପରି ୨୦ଟି ସ୍ଥାନରେ ଏକକାଳୀନ ୪ ଦିନ ବ୍ୟାପୀ ଚଢ଼ାଉ କାରଯାଇଥିଲା। ରାଜ୍ୟ ସରକାରଙ୍କ ପୃଷ୍ଠପୋଷକତାରେ ଡିଏନ୍ ଗ୍ରୁପ୍ ଏଭଳି କୋଟିକୋଟି ଟଙ୍କାର ବେନାମୀ ସମ୍ପତ୍ତି ସଂଗ୍ରହ କରିଛି ବୋଲି ବିରୋଧୀ ଦଳ ଅଭିଯୋଗ କରିଥିବାବେଳେ ଡିଏନ୍ ଗ୍ରୁପ୍ ମୁଖ୍ୟ ଜଗଦୀଶ ନାଏକ ସମସ୍ତ ଅଭିଯୋଗକୁ ଖଣ୍ଡନ କରାଯାଇଛି। ଗ୍ରୁପର କାର୍ଯ୍ୟ ସମ୍ପୂର୍ଣ୍ଣ ସ୍ବଚ୍ଛ, କୌଣସି ବେଆଇନ ହୋଇନି ବୋଲି ଗଣମାଧ୍ୟମକୁ ସୂଚନା ଦେଇଥିଲେ ନାୟକ । ଅବଶ୍ୟ ଏହି ଏତେ ପରିମାଣର ନଗଦ ଅର୍ଥ ଜବତ ହେବା ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନି । ଯାହାକୁ ନେଇ ବିରୋଧୀ ଉଠାଇଛନ୍ତି ପ୍ରଶ୍ନ।

ସେପଟେ ଏହି ଚଢାଉର ପ୍ରାରମ୍ଭିକ ଅବସ୍ଥାରେ ୟୁନିଟ୍-୪ରେ ଭଡ଼ାରେ ରହୁଥିବା ସଂସ୍ଥାର ଜଣେ କର୍ମଚାରୀଙ୍କ ଘରୁ ନଗଦ ୩୦ କୋଟି ଟଙ୍କା ଜବତ ହୋଇଥିଲା। ଡିଏନ ଗ୍ରୁପ୍ ଦ୍ୱାରା ଟିକସ ଫାଙ୍କି ଅଭିଯୋଗରେ ଏହି ରେଡ୍ ହେଉଥିବା ଅଫିସିଆଲ୍ ସୂତ୍ର କୁହାଯାଉଥିଲା।
୨୫ ହଜାର ଲାଞ୍ଚ ନେଇ ଭିଜିଲାନ୍ସ ଜାଲରେ ସିନ୍ଧିମାଳ ରାଜସ୍ୱ ନିରୀକ୍ଷକ

ଆଉ ଜଣେ ସରକାରୀ ଅଧିକାରୀ ଭିଜିଲାନ୍ସ ଜାଲରେ। ମାଲକାନଗିରି ଜିଲା ସିନ୍ଧିମାଳ ରାଜସ୍ୱ ନିରୀକ୍ଷକ ସିମାଞ୍ଚଳ ସାହୁଙ୍କୁ କାବୁ କରିଛି ଭିଜିଲାନ୍ସ। ୨୫ ହଜାର ଟଙ୍କା ଲାଞ୍ଚ ନେଉଥିବା ବେଳେ ତାଙ୍କୁ କାବୁ କରିଛି ରାଜ୍ୟ ଦୁର୍ନୀତି ନିବାରଣ ସଂସ୍ଥା। ଏହା ପରେ ତାଙ୍କର ଦୁଇଟି ସ୍ଥାନ ଉପରେ ଚାଲିଛି ରେଡ।

ସୂଚନା ଅନୁଯାୟୀ, ମାଲକାନଗିରି ଏୟାର ଷ୍ଟ୍ରିପ ପାଇଁ ଅଧିଗ୍ରହଣ କାର୍ଯ୍ୟ ଚାଲିଛି। ଜଣେ ଜମି ମାଲିକଙ୍କ ୧.୫ ଡିସମିଲ ଜମିକୁ ଏୟାର ଷ୍ଟ୍ରିପ ପାଇଁ ସରକାର ଅଧିଗ୍ରହଣ କରିବା ସହ ଏଥି ବାବଦକୁ ମହିଳାଙ୍କୁ କମ୍ପେନସେସନ ଦିଆଯାଇଛି। କିନ୍ତୁ ମହିଳା ସେହି ଜମିର ବିଭାଜନ କରିବାକୁ ଆରଆଇ ସାହୁଙ୍କ ସହ ଯୋଗାଯୋଗ କରିଥିଲେ। ଏହି କାମ ଲାଗି ସେ ମହିଳାଙ୍କଠାରୁ ୨୫ହଜାର ଟଙ୍କା ଲାଞ୍ଚ ମାଗିଥିଲେ। ଏନେଇ ମହିଳା ଭିଜିଲାନ୍ସର ଦ୍ୱାରସ୍ଥ ହୋଇଥିଲେ।

ଅଭିଯୋଗ ଆଧାରରେ ମହିଳା ଲାଞ୍ଚ ଟଙ୍କା ସାହୁଙ୍କୁ ଦେଉଥିବା ବେଳେ ପୂର୍ବରୁ ସେଠାରେ ଜଗି ରହିଥିବା ଭିଜିଲାନ୍ସ ଅଧିକାରୀ ତାଙ୍କୁ ମାଡି ବସିଥିଲେ। ଏଥିସହ ତାଙ୍କ ନିକଟରୁ ଟଙ୍କା ଜବତ କରିଥିଲେ। ଏହା ପରେ ତାଙ୍କର ଦୁଇଟି ସ୍ଥାନରେ ଚଢାଉ କରିଛି ଭିଜିଲାନ୍ସ। ଏହି ମାମଲାରେ କୋରାପୁଟ ଭିଜିଲାନ୍ସ ଥାନାରେ ସାହୁଙ୍କ ବିରୋଧରେ ଏକ ମାମଲା ରୁଜୁ କରାଯାଇଛି। ଭିଭିଲାନ୍ସ ସାହୁଙ୍କ ସମ୍ପତ୍ତିକୁ ନେଇ ଖୋଳତାଳ ଚଳାଇଛି। ଚଢାଉ ପରେ ଅଧିକ ତଥ୍ୟ ହସ୍ତଗତ ହେବ।

ଏହା ପୂର୍ବରୁ ନବରଙ୍ଗପୁରର ପୂର୍ବତନ ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ ରାଉତଙ୍କୁ ଜୁନ ଶେଷ ଭାଗରେ ଗିରଫ କରିଥିଲା ଭିଜିଲାନ୍ସ। ତାଙ୍କ ନିକଟରୁ ତାଙ୍କ ଆୟର ୫୦୬ ପ୍ରତିଶତ ଅଧିକ ସମ୍ପତ୍ତି ଠାବ ହୋଇଥିଲା। ସେହିପରି ୨୬ ଜୁନରେ ଡିଗପହଣ୍ଡି ଫରେଷ୍ଟ ରେଞ୍ଜର କାହ୍ନୁ ଚରଣ ପଟ୍ଟନାୟକଙ୍କ ଗାଡିରୁ ୧.୫ ଲକ୍ଷ ଟଙ୍କା ଜବତ କରିଥିଲା ଭିଜିଲାନ୍ସ। ଏହି ମାମଲାରେ ତାଙ୍କର ୩ଟି ସ୍ଥାନ ଉପରେ ହୋଇଥିଲା ଚଢାଉ। ଏଥିରେ ତାଙ୍କ ନିକଟରୁ ୫ ଲକ୍ଷ ଠାବ କରିଥିଲା ତଦନ୍ତକାରୀ ସଂସ୍ଥା। ତା ପରଦିନ, ଅର୍ଥାତ୍ ୨୭ ଜାନୁଆରୀରେ ଦେଓଗଡ ରିମୋଲ ବ୍ଲକ ଆକାଉଣ୍ଟାଣ୍ଟ ୬୦୦୦ ଟଙ୍କା ଲାଞ୍ଚ ନେଉଥିବା ବେଳେ ତାଙ୍କୁ ଧରିଥିଲା ଭିଜିଲାନ୍ସ।
ଡିଏନଗ୍ରୁପ ଉପରେ ଆୟକର ରେଡ

ରିୟଲ୍ ଇଷ୍ଟେଟ୍ ବ୍ୟବସାୟ ପ୍ରତିଷ୍ଠାନ ଡିଏନ ଗ୍ରୁପ୍ ଉପରେ ଆୟକର ବିଭାଗ ପକ୍ଷରୁ ବଡ଼ ଧରଣର ରେଡ୍ ହୋଇଛି । ଭୁବନେଶ୍ୱର ଆଇଆରସି ଭିଲେଜସ୍ଥିତ ସଂସ୍ଥାର ମୁଖ୍ୟ କାର୍ଯ୍ୟାଳୟ ସମେତ ୨୫ ରୁ ଅଧିକ ଜାଗାରେ ଆଜି ବଡ଼ି ସକାଳୁ ଏକକାଳୀନ ଚଢ଼ାଉ ଚାଲିଛି । ୟୁନିଟ୍-୪ରେ ଭଡ଼ାରେ ରହୁଥିବା ସଂସ୍ଥାର ଜଣେ କର୍ମଚାରୀଙ୍କ ଘରୁ ନଗଦ ୩୦ କୋଟି ଟଙ୍କା ଜବତ ହୋଇଥିବା କୁହାଯାଉଛି । ଡିଏନ ଗ୍ରୁପ୍ ଦ୍ୱାରା ଟିକସ ଫାଙ୍କି ଅଭିଯୋଗରେ ଏହି ରେଡ୍ ହେଉଥିବା ଅଫିସିଆଲ୍ ସୂତ୍ର କହୁଥିବା ବେଳେ ଏହା ପଛରେ ରାଜନୀତି ଥିବା ଚର୍ଚ୍ଚା ହେଉଛି ।

ସୂଚନା ଅନୁଯାୟୀ, ଆୟକର ଟିମ୍ ଭୁବନେଶ୍ୱର ସମେତ ରାଜ୍ୟ ଓ ରାଜ୍ୟ ବାହାରର ୨୫ ରୁ ଅଧିକ ଜାଗାରେ ଏକକାଳୀନ ଚଢ଼ାଉ କରିଛନ୍ତି । ସେମାନେ ସଂସ୍ଥାର ଆୟ ବ୍ୟୟ କାଗଜପତ୍ର ଯାଞ୍ଚ କରିବା ସହ ଠିକ୍ ଭାବରେ ଆୟକର ଦିଆଯାଉଛି ନା ନାହିଁ ଯାଞ୍ଚ କରୁଛନ୍ତି । ଭୁବନେଶ୍ୱରରେ ଆଇଆରସି ଭିଲେଜ୍ ସ୍ଥିତ ଡିଏନ ଗ୍ରୁପ୍ ର ମୁଖ୍ୟ କାର୍ଯ୍ୟାଳୟ, ଘାଟିକିଆସ୍ଥିତ ବିପୁଳ ଗାର୍ଡେନ୍ ରେ ରହୁଥିବା ସଂସ୍ଥାର ମାଲିକ ଜଗଦୀଶ ପ୍ରସାଦ ନାୟକ, ନିର୍ଦ୍ଦେଶକ ରତ୍ନମାଳା ସ୍ୱାଇଁ ଓ କିଛି ଅଧିକାରୀଙ୍କର ଘର ଏବଂ ୟୁନିଟ୍-୪ ସ୍ଥିତ ବିଏସଏନଏଲ କଲୋନୀରେ ଭଡ଼ାରେ ରହୁଥିବା ଜଣେ କର୍ମଚାରୀ ଚନ୍ଦ୍ରଶେଖର ପଣ୍ଡାଙ୍କ ଘରେ ଚଢ଼ାଉ ଚାଲିଛି ।

ବିଭିନ୍ନ ଗଣମାଧ୍ୟମର ରିପୋର୍ଟ ଅନୁଯାୟୀ, ଚନ୍ଦ୍ରଶେଖରଙ୍କ ଘରୁ ତିନି ଟ୍ରଙ୍କ୍ ଏବଂ ଗୋଟିଏ ଆଟାଚ୍ ଭର୍ତ୍ତି ଟଙ୍କା ଆୟକର ଅଧିକାରୀମାନେ ଜବତ କରିଛନ୍ତି । ଏଥିରେ ୩୦ କୋଟି ଟଙ୍କା ଅଛି । ତେବେ ଆୟକର ବିଭାଗର ଅଧିକାରୀମାନେ ଏ ସମ୍ପର୍କରେ କିଛି କହିନାହାନ୍ତି । ଖୋଳତାଡ଼ ଜାରି ରହିଥିବାରୁ ସୂଚନା ଦେବାକୁ ସେମାନେ ମନା କରିଛନ୍ତି ।
ଭିଜିଲାନ୍ସ ଜାଲରେ କରଞ୍ଜିଆ ତହସିଲଦାର, ବିଭିନ୍ନ ସ୍ଥାନରେ ରେଡ୍

ଭିଜିଲାନ୍ସ ଜାଲରେ କରଞ୍ଜିଆ ତହସିଲଦାର ଚାର୍ଲସ ନାୟକ । ଚେକରେ ୧୨ ଲକ୍ଷ ଟଙ୍କା ଲାଞ୍ଚ ନେଉଥିବା ବେଳେ ଧରିଲା ଭିଜିଲାନ୍ସ ଟିମ୍ । ଜମି କ୍ଷତିପୂରଣ ବାବଦରେ ୫୧୭୫୮୧୦ ଟଙ୍କା ଦେବାକୁ ଲାଞ୍ଚ ନେଉଥିଲେ ଚାଲ୍ସ ନାୟକ । ଏକକାଳୀନ ୪ଟି ସ୍ଥାନରେ କରଞ୍ଜିଆ ତହସିଲ ଅଫିସ,କରଞ୍ଜିଆସ୍ଥିତ କ୍ବାର୍ଟର୍ସ,ଭଦ୍ରକ ହସ୍ପିଟାଲ ନିକଟରେ ଥିବା ପୈତୃକ ଘର ଏବଂ କରଞ୍ଜିଆର ଛଡ଼େଇ ଭୋଲରେ ଭିଜିଲାନ୍ସ ରେଡ୍ କରିଛି ।

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ ପରେ ଭିଜିଲାନ୍ସ ରେଡ୍ କରିଛି । ବେଆଇନ୍ ଖଣି ଲିଜ୍ ଦେଇ ବିପୁଳ ଅର୍ଥ ରୋଜଗାର କରୁଥିବା ମଧ୍ୟ ଅଭିଯୋଗ ହୋଇଥିଲା। ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ଦେଖାଦେବା ପରେ ଏବେ ବିଭିନ୍ନ ସ୍ଥାନରେ ରେଡ୍ କରିଛି ଟିମ୍ ।

ଚାର୍ଲସ ନାୟକ ପୂର୍ବରୁ ବାଲେଶ୍ବର ଜିଲ୍ଲା ସୋରରେ ତହସିଲଦାର ଥିଲେ । ସେଠାରେ ତାଙ୍କ ନାଁରେ ଦୁର୍ନୀତି ଅଭିଯୋଗ ଆସିଥିଲା । ତେଣୁ ତାଙ୍କୁ ଦୂର ଜିଲ୍ଲାକୁ ବଦଳି କରାଯାଇଥିଲା । ଏବେ ପୁଣି କରଞ୍ଜିଆ ତହସିଲଦାର ଭାବେ ଦାୟିତ୍ୱ ନେବା ପରେ ଦୁର୍ନୀତି, ଆୟ ବହିର୍ଭୂତ ସମ୍ପତ୍ତି ଠୁଳ ଭଳି ଅଭିଯୋଗ ଆସିଛି । ତେଣୁ ତାଙ୍କ ନାଁରେ ଥିବା ସମ୍ପତ୍ତି ଅନ୍ୟାନ୍ୟ ଲିଙ୍କ୍ ଖୋଜୁଛି ଟିମ୍ । ଆଜି ସକାଳୁ ସକାଳୁ କଟକ ଭିଜିଲାନ୍ସ ଟିମ୍ କରଞ୍ଜିଆ ତହସିଲଦାର ଚାର୍ଲସ ନାୟକଙ୍କ ଘରେ ପହଞ୍ଚି ରେଡ୍ କରିଥିଲା।
ଉଦଳା: ସାମଗ୍ରୀ ସହ ଶିକାରୀଙ୍କୁ ଧରିଲା ମିଳିତ ଟିମ୍

ମୟୂରଭଞ୍ଜ ଉଦଳାର ଫୁଲବାଡ଼ିଆ ଅଞ୍ଚଳରେ ବନ ବିଭାଗ ଓ ପୋଲିସ ଟିମ୍ ମିଳିତ ଭାବେ ଚଢ଼ାଉ କରିଛନ୍ତି । ସେଠାରୁ ୨ ଜଣ ଶିକାରୀକୁ ଗିରଫ କରିବା ସହ ବିଭିନ୍ନ ମାରଣାସ୍ତ୍ର ଜବତ କରାଯାଇଛି । ଘଟଣାର ତଦନ୍ତ ଜାରି ରଖିଛି ପୋଲିସ ।

ଶିମିଳିପାଳରେ ଶିକାରୀଙ୍କ ଗୁଳିରେ ଫରେଷ୍ଟ ଗାର୍ଡ ମୃତ୍ୟୁ ଘଟଣା ପରେ ବନ ବିଭାଗକୁ ଚେତା ପିଶିଛି । ବିଭିନ୍ନ ସ୍ଥାନରେ ବାରମ୍ବାର ରେଡ୍ କରୁଛି ଟିମ୍ । ଏବେ ପୋଲିସ ଓ ବନ ବିଭାଗ ଅଭିଯୁକ୍ତଙ୍କୁ ଧରିବା ପାଇଁ ଅଭିଯାନ ଜାରି ରଖିଛନ୍ତି । ଏହି ଚଢ଼ାଉରେ ୨ ଶିକାରୀଙ୍କୁ ଗିରଫ କରାଯାଇଛି । ସେମାନେ ହେଲେ ଶିବ ସିଂ ଏବଂ ବାସୁଦେବ ସିଂ । ସେମାନଙ୍କ ଠାରୁ ୩ଟି ବନ୍ଧୁକ ଜବତ କରିଛି ଟିମ୍ । ଶିକାରୀମାନେ ଦେଶୀ ବନ୍ଧୁକ ଏବଂ ଶିକାର ସାମଗ୍ରୀ ନିଜ ଘରେ ଲୁଚାଇ ରଖିଥିବା ବେଳେ ଜବତ କରାଯାଇଛି । ଏଥିସହ ସେମାନଙ୍କ ନିକଟରୁ ୩ଟି ଗୁଳି ଭର୍ତ୍ତି ଦେଶୀ ବନ୍ଧୁକ ଜବତ ହୋଇଛି ।

ଫାଶ,ଧନୁ,ଧନୁତୀର ଭଳି ଶିକାର ସାମଗ୍ରୀ ଘରୁ ମିଳିଛି । ଜବତ ହୋଇଥିବା ସାମଗ୍ରୀ ମଧ୍ୟରେ ରହିଛି ଗୋଟିଏ ଭଙ୍ଗା ଦେଶୀ ବନ୍ଧୁକ । ପୂର୍ବରୁ ବନ ବିଭାଗ ଓ ପୋଲିସ ମିଳିତ ଭାବେ କପ୍ତିପଦା ରେଞ୍ଜ ଅଞ୍ଚଳରେ ଚଢ଼ାଉ କରିଥିଲେ । ୨ ଜଣ ଶିକାରୀଙ୍କୁ ଗିରଫ କରିଥିବା ବେଳେ ସେମାନଙ୍କ ନିକଟରୁ ୪ଟି ବନ୍ଧୁକ ଜବତ ହୋଇଥିଲା । ବଜ୍ରକାପ୍ତା କାତି ସହିତ ଜଙ୍ଗଲୀ ମାଂସ ମଧ୍ୟ ମିଳିଥିଲା । ଫରେଷ୍ଟ ଗାର୍ଡଙ୍କ ମୃତ୍ୟୁ ଘଟଣା ପରେ ବନ ବିଭାଗ ଓ ପୋଲିସ ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ।
ଟେରର ଫଣ୍ଡିଂ ପ୍ରସଙ୍ଗ, କାଶ୍ମୀରର ବିଭିନ୍ନ ସ୍ଥାନରେ NIA ରେଡ୍

ଟେରର ଫଣ୍ଡିଂ ପ୍ରସଙ୍ଗରେ ଜାମ୍ମୁ ଓ କାଶ୍ମୀରର ବିଭିନ୍ନ ସ୍ଥାନରେ ଚଢ଼ାଉ କରିଛି ଜାତୀୟ ତଦନ୍ତକାରୀ ସଂସ୍ଥା ବା ଏନଆଇଏ । ଦକ୍ଷିଣ କାଶ୍ମୀରର ସୋପିଆନ ଏବଂ ପୁଲୱାମା ଭଳି ଅଞ୍ଚଳରେ ଜୋରଦାର ଚଢ଼ାଉ ହୋଇଛି । ରାଜ୍ୟର ମୋଟ ୧୩ଟି ସ୍ଥାନରେ ଚଢ଼ାଉ ଚାଲିଛି ।

ଟେରର ଫଣ୍ଡିଂ ପ୍ରସଙ୍ଗରେ ଶ୍ରୀନଗର,ଅନନ୍ତନାଗ,ବଡ଼ଗାଓଁ,ସୋପିଆନ,ପୁଲୱାମା ଭଳି ଅଞ୍ଚଳରେ ରେଡ୍ ଚାଲିଛି । ଏହି ଅଞ୍ଚଳରେ ଛଦ୍ମବେଶୀ ଆତଙ୍କୀ ସଂଗଠନ କାର୍ଯ୍ୟ କରୁଛି । ପାକିସ୍ତାନ ଲିଙ୍କରେ ଆତଙ୍କବାଦୀ କାର୍ଯ୍ୟକଳାପ ଚଳାଇଥିବା ବାରମ୍ବାର ଅଭିଯୋଗ ହୋଇଆସୁଛି । ମେ’୧୧ ତାରିଖରେ ଏନଆଇଏ ବାରାମୁଲାରେ ରେଡ୍ କରିଥିଲା । ସୟଦ କରିମର ଜାଭିଦ ଅହମଦ ଧୋବି, ସାଙ୍ଗ୍ରୀ କଲୋନୀର ସୋଏବ ଅହମ୍ମଦ ଚୁର, କାଂଶୀପୁରାର ଅବଦ୍ଦୁଲ ଖଲିକଙ୍କ ଘରେ ଚଢ଼ାଉ କରିଥିଲା ଏନଆଇଏ ।

ଆତଙ୍କବାଦୀ ସଂଗଠନ ସହ ଲିଙ୍କ୍ ଏବଂ ହମଲା ଯୋଜନା କରିବା ଅଭିଯୋଗରେ ଏନଆଇଏ ଏହି ଚଢ଼ାଉ କରିଥିଲା । ପୁଞ୍ଚରେ ନିକଟରେ ୫ ଯବାନଙ୍କ ସହିଦ ପରେ ଆକ୍ସନ ମୋଡ଼କୁ ଆସିଛି ଏନଆଇଏ । NIA ଟିମ୍ ସହ SIA ଟିମ୍ ମଧ୍ୟ ରେଡରେ ସାମିଲ ହୋଇଛି ।

ଜମ୍ମୁକାଶ୍ମୀରରେ ଆତଙ୍କବାଦୀଙ୍କ ହିଂସାକୁ ନଜରରେ ରଖି ବ୍ୟାପକ ସୁରକ୍ଷାକର୍ମୀ ମୁତୟନ ହୋଇଛନ୍ତି । ଯେମିତି କୌଣସି ଅପ୍ରୀତିକର ଘଟଣା ନଘଟେ ସେଥିପ୍ରତି ସଜାଗ ରହିଛି ସେନା । ଟେରର ଫଣ୍ଡିଂ ପ୍ରସଙ୍ଗ ନେଇ ଏବେ ଜୋରଦାର ରେଡ୍ ଆରମ୍ଭ କରିଛି NIA ଟିମ୍ । ଦେଶରେ ହିଂସା ସୃଷ୍ଟି ପାଇଁ ଆତଙ୍କବାଦୀମାନେ ଉଦ୍ୟମ ଜାରି ରଖିଥିବା ବେଳେ ଏଥିରେ ରୋକ୍ ଲଗାଇବାକୁ NIA ଏବଂ SIA ଟିମ୍ ପକ୍ଷରୁ ରେଡ୍ କରାଯାଉଛି ।