ଦିର୍ଘ ୭ ଘଣ୍ଟା ପରେ କଟକ-ପାରାଦ୍ଵୀପ ଓ ପାରାଦ୍ଵୀପ-ଚଣ୍ଡିଖୋଲ ରାସ୍ତାରୁ ହଟିଛି ଅନ୍ଦୋଳନ । ଏହି ୭ ଘଣ୍ଟା ପର୍ଯ୍ୟନ୍ତ ପାରାଦ୍ଵୀପ ବନ୍ଦରର ପରିବହନ ମଧ୍ଯ ପ୍ରଭାବିତ ହୋଇଛି । ଘଟଣା ସ୍ଥଳରେ ପାରାଦ୍ଵୀପ ବିଧାୟକ ତଥା ଶିଳ୍ପମନ୍ତ୍ରୀ ସମ୍ପଦ ସ୍ବାଇଁ ପହଞ୍ଚି ଆଲୋଚନା କରିବା ପରେ ଆନ୍ଦୋଳନରୁ ହଟିଥିଲେ ଗ୍ରାମବାସୀ ଓ ମୃତ ହୋମଗାର୍ଡ ରାଜେନ୍ଦ୍ର ପ୍ରଧାନଙ୍କ ପରିବାର । ପ୍ରଶାସନ ପକ୍ଷରୁ ମୃତକ ରାଜେନ୍ଦ୍ରଙ୍କ ପରିବାରକୁ ୩୦ ହଜାର ଟଙ୍କା ଦିଆଯିବ, ରେଡକ୍ରସରୁ ୧୦ ହଜାର ଟଙ୍କା ସହିତ, ଡିୟୁଟିରେ ତାଙ୍କର ମୃତ୍ୟୁ ହୋଇଥିବାରୁ ସରକାରଙ୍କ ସମସ୍ତ ସହାୟତା ତାଙ୍କୁ ପ୍ରଦାନ କରାଯିବ । ଦୁର୍ଘଟଣା ଘଟାଇଥିବା ଗାଡିର ଇନସ୍ୟୁରାନ୍ସ ବାବଦ ଟଙ୍କା ସହିତ ହୋମଗାର୍ଡ ଡିଜିଙ୍କୁ ରାଜେନ୍ଦ୍ରଙ୍କ ପରିବାରକୁ ସ୍ବତନ୍ତ୍ର ସହାୟତା ପାଇଁ ଆବେଦନ କରିବ ପୋଲିସ । ଏଥିସହିତ ସମସ୍ତ ଘଟଣାର ନିରପେକ୍ଷ ତଦନ୍ତ ହେବ ବୋଲି ଶିଳ୍ପ ମନ୍ତ୍ରୀ ମଧ୍ଯ ପ୍ରତିଶୃତି ଦେଇଛନ୍ତି ଏବଂ ତାଙ୍କ ପରିବାରରୁ ଜଣଙ୍କୁ ନିଯୁକ୍ତି ପାଇଁ ପ୍ରୟାସ କରିବେ ବୋଲି ପ୍ରକାଶ କରିଛନ୍ତି ।
ଗତକାଲି ବିଳମ୍ବିତ ରାତ୍ରିରେ ଦୋଛକି ନିକଟରେ ଡ୍ୟୁଟିରେ ଥିବା ରାଜେନ୍ଦ୍ର ପ୍ରଧାନ ଓ ତାଙ୍କ ସହିତ ଆଉ ୩ ଜଣ ହୋମଗାର୍ଡ ରହିଥିଲେ । ତେବେ ବିଳମ୍ବିତ ରାତ୍ରିରେ ଗୋଟିଏ ଆଇରନ ଟ୍ରକକୁ ରାଜେନ୍ଦ୍ର ଓ ତାଙ୍କ ସହଯୋଗୀ ଅଟକାଉଥିବା ବେଳେ, ଆଇରନ ଟ୍ରକଟି ରାଜେନ୍ଦ୍ରଙ୍କ ଉପରେ ଚଢି ଯାଇଥିଲା। ଘଟଣାସ୍ଥଳରେ ରାଜେନ୍ଦ୍ର ଙ୍କ ମୃତ୍ୟୁ ଘଟିଥିଲା । ଯାହାକୁ ନେଇ ରାଜେନ୍ଦ୍ରଙ୍କ ପରିବାର ଓ ବାଲିଡିଆ ଗ୍ରାମବାସୀ ଦୋଛକି ନିକଟରେ ଟାୟାର ଜାଳି ରାସ୍ତା ଅବରୋଧ କରିଥିଲେ । ରାଜେନ୍ଦ୍ରଙ୍କ ସହିତ ଥିବା ଅନ୍ୟ ୩ ଜଣ ହୋମଗାର୍ଡ, ଟ୍ରକ ଡ୍ରାଇଭର ଓ ଟ୍ରକ ମାଲିକକୁ ଡାକିବା ଦାବିରେ ଅଡି ବସିଥିଲେ ଗ୍ରାମବାସୀ । ତେବେ ପୋଲିସ ଦୂର୍ଘଟଣା ଘଟାଇଥିବା ଟ୍ରକ ଓ ଡ୍ରାଇଭରକୁ ଅଟକ ରଖିବା ସହିତ ଏକ କେସ କରି ତଦନ୍ତ ଆରମ୍ଭ କରିଛି ।
