କେନ୍ଦୁଝର ଚମ୍ପୁଆ ରେଞ୍ଜ ଯୋଡ଼ା ସେକ୍ସନ ଅନ୍ତର୍ଗତ ଦଡୁଆଁ ବୈତରଣୀ ସଂରକ୍ଷିତ ଜଙ୍ଗଲରେ ଜନ୍ମ ପରେ ଏକ ହାତୀ ଶାବକର ସନ୍ଦେହ
ଜନ କ ମୃତ୍ୟୁ ଘଟିଛି । ତେବେ ମିଳିଥିବା ସୂଚନା ଅନୁଯାୟୀ ଗତକାଲି ରାତ୍ରି ପ୍ରାୟ ୨ଟା ସମୟରେ ଉକ୍ତ ଗ୍ରାମରେ ମାଈ ହାତୀଟି ଏକ ଶାବକକୁ ଜନ୍ମ ଦେଇଥିଲା। ମାତ୍ର ଶାବକ ହାତୀଟିର ଆଜି ସକାଳେ ମୃତ୍ୟୁ ଘଟିଥିବା ବନ ବିଭାଗ ପକ୍ଷରୁ ସୂଚନା ମିଳଇଛି ।
ବନ ବିଭାଗ ଶାବକ ର ମୃତ ଦେହକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି
ଗତକାଲି ଚମ୍ପୁଆ ରେଞ୍ଜ ଅନ୍ତର୍ଗତ ରଜିଆ ଜଙ୍ଗଲ ଭିତରେ ଠାବ ହୋଇଥିବା ମୃତ ମାଇ ହାତୀ ର ଗଳିତ ଶବକୁ ଆଜି ବନବିଭାଗ ବିବେଛ୍ଛେଦ କରିବା ସହ ପୋତି ହାତୀ ମୃତ୍ୟୁ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି। ସୂଚନା ଯୋଗ୍ୟ ଗତକାଲି ରଜିଆ ଜଙ୍ଗଲ ଭିତରେ ଏକ ମାଇ ହାତୀ ର ଗଳିତ ମୃତ ଦେହ ଗ୍ରାମବାସୀ ଦେଖି ବନ ବିଭାଗ କୁ ଖବର ଦେଇଥିଲେ। ଖବର ପାଇ କେନ୍ଦୁଝର ଡିଏଫ୍ଓ ଙ୍କ ସହିତ ରେଞ୍ଜର ଓ ବନ କର୍ମଚାରୀ,ବିଦ୍ୟୂତ ବିଭାଗ ଅଧିକାରୀ ଘଟଣାସ୍ଥଳରେ ପହଂଚି ଥିଲେ। ସନ୍ଧ୍ୟା ହେବାରୁ ହାତୀ ର ବିବେଛେଦ କରାଯାଇ ପାରିନଥିଲା। ଆଜି ସକାଳୁ ଭୂବନେଶ୍ବର ଓ୍ବାଇଡ୍ ଲାଇଫ ପିସିସିଏଫ୍ ଅରବିନ୍ଦ ମିଶ୍ର ଆରସିସିଏଫ ,ଟାଟା ପାୱାର ସୁପରିଟେଣ୍ଟ ଇନିସପେକ୍ଟର ଆରକେ ବେହେରା ପ୍ରାଣୀ ଧନ ଡାକ୍ତର ନରେନ୍ଦ୍ର ହେମ୍ବ୍ରମ, ପ୍ରମୁଖ ଙ୍କ ଉପସ୍ଥିତି ରେ ପ୍ରଥମେ ମୃତ ହାତୀ ର ଶବ ବ୍ୟବଚ୍ଛେଦ କରାଯାଇ ଘଟଣାସ୍ଥଳରେ ହାତୀ କୁ ପୋତିଦିଆଯାଇଥିଲା ପରେ ହାତୀ ମୃତ୍ୟୁ ସମ୍ପର୍କରେ ତଦନ୍ତ ଆରମ୍ଭ କରାଯାଇଛି । ବିଦ୍ୟୁତ ସଂସ୍ପର୍ଶରେ ଆସି ହାତୀର ମୃତ୍ୟୁ ହୋଇଥିବା ବନବିଭାଗ ସ୍ପଷ୍ଟ କରିଛି
କେନ୍ଦୁଝର ଓ ମୟୂରଭଞ୍ଜରେ ଆତଙ୍କ ଖେଳାଇଚାଲିଛନ୍ତି ହାତୀପଲ । ଆଜି ସକାଳୁ ସକାଳୁ ୨୨ ଟିକିଆ ହାତୀ ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡକୁ ପଶିବା ପରେ ଆତଙ୍କିତ ଅବସ୍ଥାରେ ସ୍ଥାନୀୟ ଲୋକେ। ଏହି ହାତୀପଲ ଗତ କିଛି ଦିନ ହେଲା କେନ୍ଦୁଝର ଜିଲ୍ଲା ପାଟଣା ବନାଞ୍ଚଳର ବିଭିନ୍ନ ଅଞ୍ଚଳରେ ବ୍ଯାପକ ଫସଲ ନଷ୍ଟ କରି ଅଞ୍ଚଳବାସୀଙ୍କୁ ଆତଙ୍କିତ କରି ରଖିବା ପରେ କରଞ୍ଜିଆ ମୁହାଁ ହୋଇଛନ୍ତି। ଆଜି ପାଟଣା ବନାଞ୍ଚଳରୁ ଦେଓ ନଦୀ ପାର ହୋଇ ୨୨ ଟିକିଆ ଦଳ ପଶିଛି ମୟୂରଭଞ୍ଜ ଜିଲ୍ଲା କରଞ୍ଜିଆ ବନଖଣ୍ଡକୁ । ବର୍ତ୍ତମାନ କରଞ୍ଜିଆର ବଡ ଦେଉଳି ଜଙ୍ଗଲରେ ରହିଥିବା ଜଣାପଡିଛି । ହେଲେ ହାତୀଙ୍କ ଗତିବିଧିରୁ ଦେଖିବାକୁ ମିଳିଛି କି, ହାତୀ ପଲ ଦିନ ବେଳେ ଜଙ୍ଗଲରେ ଲୁଚି ରହୁବା ସହ ସଞ୍ଜ ହେଲେ ଖାଦ୍ୟ ଅନ୍ବେଷଣରେ ଗାଁ ମୁହାଁ ହୋଇଥାନ୍ତି। ଗାଁ କଡରେ ଥିବା ଲୋକଙ୍କ ଚାଷଜମିରେ ଖାଦ୍ୟ ଶସ୍ୟ ଖାଇବା ସହ ବହୁ ନଷ୍ଟଭ୍ରଷ୍ଟ କରିଥାନ୍ତି। ତେବେ ହାତୀ ପଲ ଏହି ଅଞ୍ଚଳକୁ ଆସିବା କିଛି ନୂଆ କଥା ହୋଇ ନ ଥିବା ବେଳେ କିନ୍ତୁ ବର୍ତ୍ତମାନ ଚାଷବାସ ସମୟ ହୋଇଥିବାରୁ ହାତୀଙ୍କ ଦ୍ୱାରା ଏକର ଏକର ଚାଷର କ୍ଷତି ହେବା ସମ୍ଭାବନା ଦେଖାଦେଇଛି କରଞ୍ଜିଆ ବନଖଣ୍ଡ ଅଧୀନରେ। ତେଣୁ ଏହି ବନଖଣ୍ଡ ନିକଟରେ ରହୁଥିବା ବାସିନ୍ଦା ଭୟଭୀତ ଅବସ୍ଥାରେ ରହୁଛନ୍ତି। ତୁରନ୍ତ ବନବିଭାଗ ହାତୀପଲଙ୍କୁ ଘଉଡାଇବାକୁ ସାଧାରଣରେ ଦାବି ହେଉଛି। ସେପଟେ ହାତୀ ପଲଙ୍କ ଗତି ବିଧି ଉପରେ ନଜର ରଖିଛି ବନବିଭାଗ।
ଓଡ଼ିଶାରେ ଯେତିକି ଲୋକଙ୍କର ବିପର୍ଯ୍ୟୟ ଜନିତ ମୃତ୍ୟୁ ହେଉଛି ସେଥିରୁ ୪୦% ଲୋକଙ୍କର କେବଳ ସାପ କାମୁଡ଼ାରେ ମୃତ୍ୟୁ ହେଉଛି। ଦିନକୁ ଦିନ ସାପ କାମୁଡ଼ା ଏବଂ ସାପ କାମୁଡ଼ା ଜନିତ ମୃତ୍ୟୁ ବଢ଼ି ଚାଲିଥିବାବେଳେ ଗତ ୭ବର୍ଷରେ ୬୩୫୧ଜଣଙ୍କର ମୃତ୍ୟୁ ହୋଇଛି।
ଏପରିକି ସାପ କାମୁଡ଼ିଲେ ଲୋକଙ୍କର ମୃତ୍ୟୁ ହେଉଥିବାରୁ ଲୋକମାନେ ଭୟଭୀତ ହୋଇ ସାପକୁ ମାରି ଦେଉଛନ୍ତି। ତେଣୁ ସାପକୁ ଯେପରି ତୁରନ୍ତ ଉଦ୍ଧାର କରାଯିବ ସେନେଇ ଜଙ୍ଗଲ ଓ ପରିବେଶ ବିଭାଗ ପକ୍ଷରୁ ଗାଇଡଲାଇନ୍ ଜାରି କରାଯାଇଛି।
କେବଳ ସ୍ବୀକୃତିପ୍ରାପ୍ତ ସାପ ଧରାଳୀ ହିଁ ସାପ ଧରିବେ। ଯିଏ ଏହାକୁ ନମାନିବେ ସେମାନଙ୍କ ବିରୋଧରେ ବନ୍ୟପ୍ରାଣୀ (ସଂରକ୍ଷଣ) ଆଇନ, ୧୯୭୨ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ।
ଯେଉଁଠି ଲୋକଙ୍କ ଜୀବନକୁ ସାପର ଭୟ ଥିବ ଯଥା ଘରେ ଭିତରେ ବା ଜନଗହଳି ସ୍ଥାନରେ ସାପ ଦେଖାଗଲେ ତାକୁ ଉଦ୍ଧାର କରାଯିବ। ସାପ ଧରାଳୀମାନେ ଲୋକଙ୍କ ମଧ୍ୟରେ ପରିବେଶରେ ସାପର ଗୁରୁତ୍ବ ନେଇ ସଚେତନତା ସୃଷ୍ଟି କରିବେ, କେହି ସାପ ଧରି ଷ୍ଟଣ୍ଟ ଦେଖାଇବେ ନାହିଁ।
ଯଦି କେହି ଉଲ୍ଲଂଘନ କରିବେ ତାଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ।
ବୌଦ୍ଧ ଜିଲ୍ଲା ହରଭଙ୍ଗା ବ୍ଲକରେ ଉନ୍ନୟନମୂଳକ କାର୍ଯ୍ୟ ହେବ । ପାହାଡ଼ିଆ ଅଞ୍ଚଳରେ ରହୁଥିବା ଆଡ଼େନିଗଡ଼ ପଞ୍ଚାୟତର କଣ୍ଡରା ଗାଁର ବିକାଶ ହେବ । ଜିଲ୍ଲାର ମହିଳାମାନେ ସ୍ୱାବଲମ୍ବୀ ହେବେ । ସେଥିପାଇଁ ଏହି ଗାଁର ମା ପିତାବଲୀ ମହିଳା ସ୍ୱୟଂ ସହାୟକଙ୍କୁ ସାହାଯ୍ୟର ହାତ ବଢ଼ାଇଛନ୍ତି ରାଜ୍ୟ ସରକାର ।
ଜିଲ୍ଲାପାଳଙ୍କ ନିର୍ଦ୍ଦେଶରେ ହରଭଙ୍ଗା ବ୍ଲକ ଚାରିଛକ ଫରେଷ୍ଟ ବଙ୍ଗଳାରେ ଏକ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଏଥିରେ ମା ପିତାବଲୀ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କୁ ଖଲି ଦନା ତିଆରି ମେସିନ ଯୋଗାଇ ଦିଆଯାଇଛି । ବୌଦ୍ଧ ଜିଲାପାଳ ସତ୍ୟରଞ୍ଜନ ସାହୁ ଯୋଗଦେଇ ସେମାନଙ୍କୁ ମେସିନ ପ୍ରଦାନ କରିଥିଲେ । ବୌଦ୍ଧ ବନ ବିଭାଗ ପକ୍ଷରୁ ମହିଳା ଗୋଷ୍ଠୀଙ୍କ ପାଇଁ ଏଭଳି ଏକ ପଦକ୍ଷେପ ନିଆଯାଇଛି ।
ମହିଳାମାନେ କିପରି ସ୍ୱାବଲମ୍ବୀ ଏବଂ ସଶକ୍ତ ହୋଇପାରିବେ ସେ ନେଇ ଜିଲ୍ଲାପାଳ ପରାମର୍ଶ ଦେଇଥିଲେ । ଏହି କାର୍ଯ୍ୟକ୍ରମରେ ବୌଦ୍ଧ ଡିଏଫଓ ଦେବପ୍ରିୟ କମ୍ପ,ଜିଲ୍ଲା ପରିଷଦ କାର୍ଯ୍ୟନିର୍ବାହୀ ଅଧିକାରୀ ଅଶ୍ୱନୀ ମେହେର,ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ରୀତିକାନ୍ତି ବଳିୟାର ସିଂ, ବିଡିଓ ହରଭଙ୍ଗା ସ୍ୱପ୍ନିତା ନାୟକ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ଉପଜିଲ୍ଲାପାଳ ରବୀନ୍ଦ୍ର ନାଥ କଁହର,ଜିଲ୍ଲା ଶିଶୁ ସୁରକ୍ଷା ଅଧିକାରୀ ରାହୁଲ ପ୍ରଧାନ, ପୁରୁଣା କଟକ ରେଞ୍ଜର ନିହାର ମଳିକଙ୍କ ସମେତ ବନ ବିଭାଗର ଅନ୍ୟାନ୍ୟ ଅଧିକାରୀମାନେ ଉପସ୍ଥିତ ଥିଲେ । ମା ପିତାବଲୀ ମହିଳା ସ୍ୱୟଂ ସହାୟକ ଗୋଷ୍ଠୀଙ୍କୁ ପାହାଡ଼ ନାମକ ଏକ ଏନଜିଓ ସଂସ୍ଥା ସାହାଯ୍ୟ କରିବ ବୋଲି ପ୍ରତିଶ୍ରୁତି ଦେଇଛି । ଖଲି ଦନା ପ୍ରସ୍ତୁତି ନେଇ ମହିଳାମାନଙ୍କୁ ତାଲିମ ପ୍ରଦାନ କରିବାକୁ କହିଛି ଏହି ଏନଜିଓ ସଂସ୍ଥା ।
ପୁଣି ଶାକାରୀଙ୍କ ଗୁଳିରେ ଗଲା ଜଣେ ବନ କର୍ମଚାରୀଙ୍କ ଜୀବନ I ମୟୂରଭଞ୍ଜ ଜିଲ୍ଲା କରଞ୍ଜିଆରୁ ଆସିଛି ଏଭଳି ଏକ ଅଭାବନୀୟ ଘଟଣା । ମୃତ ବନକର୍ମଚାରୀ ଜଣକ ହେଲେ ବାରାହକାମୁଡ଼ାର ଫରେଷ୍ଟର ମାଟି ହାଁସଦା ।ସୂଚନା ଅନୁଯାୟୀ ଶିମିଳିପାଳ ଅଭୟାରଣ୍ୟର ଗାମୁଛାଝରଣ ନିକଟରେ ଗତକାଲି ରାତି ପ୍ରାୟ ୨ଟା ବେଳେ ବନ କର୍ମଚାରୀମାନେ ପାଟ୍ରୋଲିଂ କରୁଥିବା ବେଳେ ଶିକାରୀଙ୍କ ସହିତ ସେମାନଙ୍କର ମୁହାଁମୁହିଁ ହୋଇଥିଲା। ମୋଟ ୬ ଜଣ ଶିକାରୀ ଥିଲେ। ସେମାନଙ୍କ ହାତରେ ବନ୍ଧୁକ ଥିଲା। ଶିକାରୀମାନଙ୍କୁ କାବୁ କରିବା ସମୟରେ କୁ ବନକର୍ମଚାରୀ ଏବଂ ଶୀକାରୀଙ୍କ ମଧ୍ୟରେ ହାତାହାତୀ ହୋଇଥିଲା । ଏପରିକି ଗୁଳିବିନିମୟ ମଧ୍ୟ ହୋଇଥିଲା। ସେହି ସମୟରେ ଜଣେ ଶୀକାରୀର ଗୁଳିରେ ଫରେଷ୍ଟର ମାଟି ହାଁସଦାଙ୍କ ମୃତ୍ୟୁ ଘଟିଥିଲା।ଗୁଳି ତାଙ୍କ ଛାତିରେ ବାଜିଥିଲା। ତାଙ୍କୁ ଗୁରୁତର ଅବସ୍ଥାରେ କରଞ୍ଜିଆ ଡାକ୍ତରଖାନାକୁ ଅଣାଯାଇଥିଲା। ତେବେ ଡାକ୍ତର ତାଙ୍କୁ ସେଠାରେ ମୃତ ଘୋଷଣା କରିଥିଲେ।
ଆସନ୍ତାକାଲି ରାଜ୍ୟର ଏକ ବଡ଼ ପର୍ବ ମାନେ ରାତି ପାହିଲେ ପହିଲି ରଜ । ଧୁମଧାମରେ ପାଳନ କରିବା ପାଇଁ ସବୁଠି ଜୋରଦାର ପ୍ରସ୍ତୁତି । ସେପଟେ ରଜ ପୂର୍ବରୁ ହାତୀ ମୃତ୍ୟୁ ଖବର ସମସ୍ତଙ୍କୁ ଚିନ୍ତାରେ ପକାଇଛି ।
ଦିନକୁ ଦିନ ହାତୀଙ୍କ ମୃତ୍ୟୁ ସଂଖ୍ୟା ବଢ଼ିବାରେ ଲାଗିଛି । ସେମାନେ ଅସୁରକ୍ଷିତ ଯୋଗୁଁ ଘଞ୍ଚ ଜଙ୍ଗଲରୁ ବାହାରି ଆସୁଛନ୍ତି । ପରିବେଶର ପ୍ରଭାବ ହେଉ ଅବା ମନୁଷ୍ୟକୃତ ହାତୀଙ୍କ ମୃତ୍ୟୁ ସଂଖ୍ୟା କିନ୍ତୁ ବଢ଼ୁଛି । ସମ୍ବଲପୁର ଜିଲ୍ଲାରେ ପୁଣି ଏକ ଦନ୍ତାର ମୃତ୍ୟୁ ଘଟିଛି । ଏହାର କାରଣ ଅସ୍ପଷ୍ଟ ଥିବାବେଳେ ଶବ ବ୍ୟବଚ୍ଛେଦ ପରେ କାରଣ ଜଣାପଡ଼ିବ ବୋଲି ବନ ବିଭାଗ ପକ୍ଷରୁ କୁହାଯାଇଛି ।
ସମ୍ବଲପୁର ବନଖଣ୍ଡ ବସିଆପଡ଼ା ସେକ୍ସନ ବସିଆପଡ଼ା ବିଟ୍ ଅଧୀନ ରପ୍ଟା ନିକଟରେ ଦନ୍ତାର ମୃତ୍ୟୁ ଘଟିଛି । ସୂଚନା ପାଇବା ପରେ ଘଟଣାସ୍ଥଳରେ ପହଞ୍ଚିଥିଲା ବନ ବିଭାଗ । ଏସିଏଫ୍ ଅନ୍ୟ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ସମ୍ବଲପୁର ଜିଲ୍ଲାରେ ଏଭଳି ହାତୀ ମୃତ୍ୟୁ ଘଟଣା ନୂଆଁ ନୁହେଁ । ପୂର୍ବରୁ ବିଭିନ୍ନ ସମୟରେ ଏକାଧିକ ହାତୀର ମୃତ୍ୟୁ ଘଟିଲାଣି । ବାରମ୍ବାର ହାତୀ ମୃତ୍ୟୁ ହେଉଥିବାରୁ ପରିବେଶବିତ୍ ଏବଂ ବନ୍ୟଜନ୍ତୁପ୍ରେମୀମାନେ ଉଦ୍ବେଗ ପ୍ରକାଶ କରିଛନ୍ତି । ଏ ଦିଗରେ ବନ ବିଭାଗ ତୁରନ୍ତ ପଦକ୍ଷେପ ନେବା ଜରୁରୀ ।
ଏ ଦୃଶ୍ୟ ଆଉ କିଛି ବୟାନ କରୁଛି । ଚିତ୍ର ଦେଖିଲେ ଆପଣ ଜାଣିପାରୁଥିବେ ଏମାନେ ଶିଶୁ ଶ୍ରମିକ । ଦିନ ମଜୁରିଆ ଭାବେ ଲୋକଙ୍କ ସହ କାମରେ ନିୟୋଜିତ ହୋଇଛନ୍ତି । ଏଠାରେ ଶିଶୁ ଶ୍ରମିକ ଉଚ୍ଛେଦ ଏବଂ ନିୟନ୍ତ୍ରଣ ଆଇନ୍ ଫେଲ୍ ମାରିଥିବା ଅଭିଯୋଗ ହୋଇଛି ।
ବନ ବିଭାଗ କାର୍ଯ୍ୟରେ ନିୟୋଜିତ ହେଲେ ଶିଶୁ ଶ୍ରମିକ । ଏହା କୌଣସି ବେସରକାରୀ ସଂସ୍ଥା କିମ୍ବା ଠିକାଦାରୀ ସଂସ୍ଥା ନୁହେଁ, ଖୋଦ୍ ବନ ବିଭାଗ ଶିଶୁଙ୍କୁ ନିଜ କାମରେ ନିୟୋଜିତ କରିଥିବା ଅଭିଯୋଗ ଆସିଛି ।
ବୃକ୍ଷରୋପଣ ପ୍ରକଳ୍ପ ପାଇଁ ସରକାର ଲକ୍ଷାଧିକ ଟଙ୍କା ଯୋଗାଇ ଦେଇଥିବା ବେଳେ ପ୍ରକଳ୍ପ ଗାତ ଖୋଳା କାମରେ ଶିଶୁ ଶ୍ରମିକ ନିୟୋଜିତ ହୋଇଥିବା ଦେଖିବାକୁ ମିଳିଛି । ତେବେ କାହା ପରାମର୍ଶରେ ବନ ବିଭାଗ ଏଭଳି ପଦକ୍ଷେପ ନେଇଛି ତାହା ଜଣାପଡ଼ିନି । ଖର୍ଚ୍ଚ କାଟ୍ କରିବା ପାଇଁ ବନ ବିଭାଗ କ’ଣ ସତରେ ଶିଶୁଙ୍କୁ କାର୍ଯ୍ୟରେ ନିୟୋଜିତ କରିଛି ।
ସୂଚନା ଅନୁସାରେ ଗୋଟାଏ ଗାତ ଖୋଳିବାକୁ ଶିଶୁଙ୍କୁ ଦିଆଯାଉଛି ମାତ୍ର ଦଶ ଟଙ୍କା । ଏହି କାର୍ଯ୍ୟରେ ନିୟୋଜିତ ହୋଇଛନ୍ତି ଏକାଧିକ ଶିଶୁ ଶ୍ରମିକ । ଆଉ ସେମାନଙ୍କୁ ଜଗିଛନ୍ତି ଫରେଷ୍ଟ ଗାର୍ଡ । ବାଙ୍ଗିରିପୋଷି ରେଞ୍ଜ ଶୀର୍ଷା ବିଟ୍ ଉଚ୍ଚଗାଁ କୋଟିସଲ ଠାରେ ଚାଲିଥିବା ବୃକ୍ଷରୋପଣ କାର୍ଯ୍ୟର ଏଭଳି ଭିଡିଓ ଏବେ କ୍ୟାମେରାରେ କଏଦ ହୋଇଛି । ସେପଟେ ଘଟଣା ସମ୍ପର୍କରେ ବନ ବିଭାଗ ଅଧିକାରୀ କୌଣସି ପ୍ରତିକ୍ରିୟା ରଖିନାହାଁନ୍ତି ।
ମୟୂରଭଞ୍ଜ ଉଦଳାର ଫୁଲବାଡ଼ିଆ ଅଞ୍ଚଳରେ ବନ ବିଭାଗ ଓ ପୋଲିସ ଟିମ୍ ମିଳିତ ଭାବେ ଚଢ଼ାଉ କରିଛନ୍ତି । ସେଠାରୁ ୨ ଜଣ ଶିକାରୀକୁ ଗିରଫ କରିବା ସହ ବିଭିନ୍ନ ମାରଣାସ୍ତ୍ର ଜବତ କରାଯାଇଛି । ଘଟଣାର ତଦନ୍ତ ଜାରି ରଖିଛି ପୋଲିସ ।
ଶିମିଳିପାଳରେ ଶିକାରୀଙ୍କ ଗୁଳିରେ ଫରେଷ୍ଟ ଗାର୍ଡ ମୃତ୍ୟୁ ଘଟଣା ପରେ ବନ ବିଭାଗକୁ ଚେତା ପିଶିଛି । ବିଭିନ୍ନ ସ୍ଥାନରେ ବାରମ୍ବାର ରେଡ୍ କରୁଛି ଟିମ୍ । ଏବେ ପୋଲିସ ଓ ବନ ବିଭାଗ ଅଭିଯୁକ୍ତଙ୍କୁ ଧରିବା ପାଇଁ ଅଭିଯାନ ଜାରି ରଖିଛନ୍ତି । ଏହି ଚଢ଼ାଉରେ ୨ ଶିକାରୀଙ୍କୁ ଗିରଫ କରାଯାଇଛି । ସେମାନେ ହେଲେ ଶିବ ସିଂ ଏବଂ ବାସୁଦେବ ସିଂ । ସେମାନଙ୍କ ଠାରୁ ୩ଟି ବନ୍ଧୁକ ଜବତ କରିଛି ଟିମ୍ । ଶିକାରୀମାନେ ଦେଶୀ ବନ୍ଧୁକ ଏବଂ ଶିକାର ସାମଗ୍ରୀ ନିଜ ଘରେ ଲୁଚାଇ ରଖିଥିବା ବେଳେ ଜବତ କରାଯାଇଛି । ଏଥିସହ ସେମାନଙ୍କ ନିକଟରୁ ୩ଟି ଗୁଳି ଭର୍ତ୍ତି ଦେଶୀ ବନ୍ଧୁକ ଜବତ ହୋଇଛି ।
ଫାଶ,ଧନୁ,ଧନୁତୀର ଭଳି ଶିକାର ସାମଗ୍ରୀ ଘରୁ ମିଳିଛି । ଜବତ ହୋଇଥିବା ସାମଗ୍ରୀ ମଧ୍ୟରେ ରହିଛି ଗୋଟିଏ ଭଙ୍ଗା ଦେଶୀ ବନ୍ଧୁକ । ପୂର୍ବରୁ ବନ ବିଭାଗ ଓ ପୋଲିସ ମିଳିତ ଭାବେ କପ୍ତିପଦା ରେଞ୍ଜ ଅଞ୍ଚଳରେ ଚଢ଼ାଉ କରିଥିଲେ । ୨ ଜଣ ଶିକାରୀଙ୍କୁ ଗିରଫ କରିଥିବା ବେଳେ ସେମାନଙ୍କ ନିକଟରୁ ୪ଟି ବନ୍ଧୁକ ଜବତ ହୋଇଥିଲା । ବଜ୍ରକାପ୍ତା କାତି ସହିତ ଜଙ୍ଗଲୀ ମାଂସ ମଧ୍ୟ ମିଳିଥିଲା । ଫରେଷ୍ଟ ଗାର୍ଡଙ୍କ ମୃତ୍ୟୁ ଘଟଣା ପରେ ବନ ବିଭାଗ ଓ ପୋଲିସ ଟିମ୍ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଛି ।
କେନ୍ଦୁଝର ଜିଲ୍ଲା ତେଲକୋଇ ବନାଞ୍ଚଳରେ ହାତୀ ଆତଙ୍କ । ବିମଳା ଫରେଷ୍ଟ ସେକ୍ସନ ବନବିହାରୀପୁର ଗାଁରେ ଜଣଙ୍କୁ ଦଳିଦେଇଛି ଦନ୍ତା । ଜଣେ ମହିଳାଙ୍କ ମୃତ୍ୟୁ ଘଟିଥିବା ବେଳେ ଲୋକେ ଭୟଭୀତ ହୋଇଛନ୍ତି ।
ହାତୀ ଆତଙ୍କ ଥମିବାର ନାଁ ନେଉନି । କେଉଁଠି ଘର ଭାଙ୍ଗୁଛି ତ ଆଉ କେଉଁଠି ନଷ୍ଟ କରୁଛି ଫସଲ । ଲୋକଙ୍କୁ ଦଳୁଛି ତ ଆଉ କେଉଁଠି ଗୁରୁତର କରୁଛି । ଏଭଳି ଦୈନନ୍ଦିନ କିଛି ନା ଘଟଣା ଘଟାଉଛି ଦନ୍ତା । କେନ୍ଦୁଝର ଜିଲ୍ଲା ତେଲକୋଇ ବନାଞ୍ଚଳରେ ଏମିତି ଏକ ଘଟଣାକୁ ନେଇ ଲୋକେ ଭୟଭୀତ ହୋଇଛନ୍ତି । ଲୋକଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି । ହାତୀ ଆକ୍ରମଣରେ ବିମଳା ଫରେଷ୍ଟ ସେକ୍ସନ ବନବିହାରୀପୁର ଗାଁର ଜଣେ ମହିଳାଙ୍କ ମୃତ୍ୟୁ ଘଟିଛି । ମୃତକଙ୍କ ନାଁ ଦ୍ରୌପଦୀ ନାୟକ । ସେ ଆକୁଳ ପଞ୍ଚାୟତ ୧୦ନଂ ୱାର୍ଡର ୱାର୍ଡମେମ୍ବର ।
ସୂଚନା ଅନୁସାରେ ଗତକାଲି ରାତିରେ ଝଡ଼ତୋଫାନ ହୋଇଥିଲା । ତେଣୁ ଆଜି ଭୋରୁ ଘର ନିକଟରେ ଥିବା ଆମ୍ବ ତୋଟାକୁ ଯାଇଥିଲେ । ଆମ୍ବ ଗୋଟାଉଥିବା ବେଳେ ହାତୀ ହାବୁଡ଼ରେ ପଡ଼ି ଯାଇଥିଲେ ମହିଳା ୱାର୍ଡମେମ୍ବର । ତାଙ୍କୁ ଶୁଣ୍ଢରେ ଆକ୍ରମଣ କରି ଫୋପାଡ଼ି ଦେଇଥିଲା ହାତୀ । ମହିଳାଙ୍କୁ ଉଦ୍ଧାର କରି ତେଲକୋଇ ମେଡିକାଲରେ ଭର୍ତ୍ତି କରିଥିଲେ ପରିବାର ଲୋକେ । କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ୱାର୍ଡମେମ୍ବରଙ୍କ ମୃତ୍ୟୁ ପରେ ବନ ବିଭାଗ ପକ୍ଷରୁ ମୃତକଙ୍କ ପରିବାରକୁ ଅନୁକମ୍ପା ରାଶି ପ୍ରଦାନ କରାଯାଇଛି । ପ୍ରଥମ ପର୍ଯ୍ୟାୟରେ ୬୦ ହଜାର ଟଙ୍କା ଦେଇଛି ବନ ବିଭାଗ । ସେପଟେ, ବନବିହାରୀପୁର ଅଞ୍ଚଳରେ ଏକ ହାତୀପଲ ବୁଲୁଛି । ସେଥିରେ ୧୫ଟି ହାତୀ ଥିବା ସୂଚନା ମିଳିଛି ।