ପେନସନ୍ ପାଇଁ ବୃଦ୍ଧାଙ୍କ ସଂଘର୍ଷ, ଚେୟାର ସାହାଯ୍ୟରେ ରାସ୍ତାରେ ଚାଲିଛନ୍ତି ‘ସୂର୍ଯ୍ୟ’

ପାଦରେ ଟିକେ ବି ଶକ୍ତି ନାହିଁ, ଛିଡ଼ା ହେବାକୁ ବି ବଳ ନାହିଁ । ରାସ୍ତାରେ ଚାଲିଛନ୍ତି ୭୦ ବର୍ଷୀୟା ବୃଦ୍ଧା । ତାଙ୍କ ପାଇଁ ଆଶାବାଡ଼ି ସାଜିଛି ଚେୟାର । ନବରଙ୍ଗପୁର ଜିଲ୍ଲାର ସୂର୍ଯ୍ୟ ହରିଜନ । ପେନସନ୍ ଟଙ୍କା ପାଇଁ ରାସ୍ତାରେ ବୃଦ୍ଧାଙ୍କୁ ଏଭଳି ଚାଲିବାକୁ ପଡ଼ିଛି ।

ଝରିଗାଁ ବ୍ଲକ୍‌ ବାଣୁଆଗୁଡ଼ା ଗାଁର ସୂର୍ଯ୍ୟ ହରିଜନଙ୍କ ଏହି ଭିଡିଓ ଏବେ ଭାଇରାଲ୍ ହୋଇଛି । ବୃଦ୍ଧାଙ୍କ ଅସହାୟତା କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ଖୁବ୍ ବ୍ୟଥିତ କରିଛି । ଏଠାରେ ମାନବିକତା ଗଲା କୁଆଡ଼େ, ବ୍ୟାଙ୍କ ବନ୍ଧୁମାନଙ୍କୁ ଏଦୃଶ୍ୟ ଦେଖାଯାଉନି କି ବୋଲି ଟ୍ୱିଟ୍ କରି ପ୍ରଶ୍ନ ପଚାରିଛନ୍ତି ଅର୍ଥମନ୍ତ୍ରୀ । ଏଥିରେ ବିଳମ୍ବ ନକରି ବୃଦ୍ଧାଙ୍କ ପେନସନ୍ ଟଙ୍କା ପୈଠ କରିଥିବା ଟ୍ୱିଟରରେ ଉତ୍ତର ରଖିଥିଲେ ବ୍ୟାଙ୍କ କର୍ତ୍ତୃପକ୍ଷ । ଏଥିସହ ଆସନ୍ତାମାସରୁ ଘରେ ଟଙ୍କା ଦିଆଯିବ ବୋଲି ଅର୍ଥମନ୍ତ୍ରୀଙ୍କୁ ସେ ଅବଗତ କରାଇଛନ୍ତି ।

ବୃଦ୍ଧାଙ୍କ ଜୀବନରେ ବାରମ୍ବାର ଏଭଳି ଘଟଣା ଆସୁଛି । ଭତ୍ତା ଟଙ୍କା ଉଠାଇବାକୁ ଯାଉଥିବା ବେଳେ ପାଦ ଖସି ଗୋଡ଼ ଭାଙ୍ଗିଗଲା । ବହୁ କଷ୍ଟରେ ମେଡିକାଲରେ ଚିକିତ୍ସିତ ହେଲେ । ୪ ମାସ ହେଲା ଶଯ୍ୟାଶାୟୀ ଥିବାରୁ ଏବେ ଭତ୍ତା ଟଙ୍କା ମିଳିନଥିଲା । ସାମାନ୍ୟ ସୁସ୍ଥ ଥିବାବେଳେ ବାଣୁଆଗୁଡ଼ା ଗ୍ରାହକ ସେବା କେନ୍ଦ୍ର ଯାଇଥିଲେ । ମାତ୍ର ସମସ୍ୟାର ସମାଧାନ ହୋଇନଥିଲା । ସେହିପରି ସାରିଆପଡ଼ା ଗ୍ରାହକ ସେବାକେନ୍ଦ୍ରରେ ବି ତାଙ୍କୁ ନିରାଶ ହେବାକୁ ପଡ଼ିଥିଲା । ଶେଷରେ ସେ ଝରିଗାଁ ଷ୍ଟେଟ ବ୍ୟାଙ୍କ ଯାଉଥିଲେ । ବୃଦ୍ଧାଙ୍କ ଏଭଳି ଅବସ୍ଥା ଦେଖି ବ୍ୟାଙ୍କ ମ୍ୟାନେଜର ତାଙ୍କୁ ୬ ମାସର ୩ ହଜାର ଟଙ୍କା ପ୍ରଦାନ କରିଥିଲେ ।

ଏଭଳି ଦୃଶ୍ୟ ନିହାତି ହୃଦୟ ବିଦାରକ । ବାର୍ଦ୍ଧକ୍ୟ ଅବସ୍ଥାରେ ଚେୟାର ସାହାରାରେ ରାସ୍ତାରେ ଚାଲିବା ଭାରି କଷ୍ଟକର । ମାନବିକତା ଦୃଷ୍ଟିରୁ ତାଙ୍କ ଘରେ ପେନସନ୍ ଟଙ୍କା ପହଞ୍ଚାଇବାରେ ଅସୁବିଧା କେଉଁଠି । ଭିଡିଓ ଭାଇରାଲ୍ ହେଲା, ସମାଲୋଚନା ପରେ କର୍ତ୍ତୃପକ୍ଷ ପଦକ୍ଷେପ ନେଲେ । ତେଣୁ ଏଭଳି ସ୍ଥିତିରେ ଆମକୁ କି ପ୍ରକାର ପଦକ୍ଷେପ ନେବା ଜରୁରୀ ସେ ସମ୍ପର୍କରେ ଜାଣିବା ଉଚିତ ।