୪ ଦିନର ମହା ନାଟକ ପରେ ଏନସିପି ପ୍ରତିଷ୍ଠାତା ଶରଦ ପାୱାର ନିଜ ଇସ୍ତଫା ପ୍ରତ୍ୟାହାର କରିନେଇଛନ୍ତି। ନିଜ ସମର୍ଥକଙ୍କ ଅନୁରୋଧ ଓ ଜିଦି ଆଗରେ ମୁଣ୍ଡ ନୁଆଁଇବାକୁ ବାଧ୍ୟ ହୋଇଛନ୍ତି ପାୱାର। ପାୱାର ଗତ ୨ ତାରିଖରେ ହଠାତ୍ ଦଳର ଅଧ୍ୟକ୍ଷତା ପଦରୁ ଇସ୍ତଫା ଦେଉଥିବା ଘୋଷଣା କରିଥିଲେ, ଯାହାକୁ ନେଇ ସମର୍ଥକଙ୍କ ମଧ୍ୟରେ ଖେଳିଯାଇଥିଲା ଚାଞ୍ଚଲ୍ୟ। ତେଣୁ ନିଜ ନିଷ୍ପତ୍ତିରୁ ଓହରିବା ପାଇଁ ତାଙ୍କ ଉପରେ ଲଗାତର ଚାପ ପକାଯାଉଥିଲା।
ଇସ୍ତଫା ପତ୍ର ପ୍ରତ୍ୟାହାର ସମ୍ପର୍କରେ ପାୱାର ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ଘୋଷଣା କରିଛନ୍ତି। ସେ କହିଛନ୍ତି କି, ଆପଣମାନଙ୍କର ଭାବନାର ଅପମାନି କରିପାରିବି ନାହିଁ। ଆପଣଙ୍କ ଭାବନା ଓ ଭାବପ୍ରବଣତାରେ ମୁଁ ଭାବପ୍ରବଣ ହୋଇପଡିଛି ଏବଂ ମୋର ନିଷ୍ପତ୍ତି ପ୍ରତ୍ୟାହାର କରୁଛି। ଏନସିପି ମୁଖ୍ୟ ଆହୁରି କହିଛନ୍ତି କି, ମେ ୨ରେ ସେ ଏନସିପି ଅଧ୍ୟକ୍ଷ ପଦରୁ ଇସ୍ତଫା ଦେବାକୁ ନିଷ୍ପତ୍ତି ନେଇଥିଲି। ମୁଁ ଅନୁଭବ କରୁଥିଲି କି ବହୁ ବର୍ଷ ଲୋକଙ୍କ ସେବା କରିସାରିଲିଣି। ଏବେ ଅବସର ନେବାର ଆବଶ୍ୟକତା ରହିଛି।
କିନ୍ତୁ ମୋର ଘୋଷଣା ଅନେକଙ୍କ ମନରେ ଦୁଃଖ ଦେଇଛି। ଅନେକ ଏହି ନିଷ୍ପତ୍ତିରେ ମର୍ମାହତ ହୋଇ ନିଷ୍ପତିରୁ ଓହରି ଯିବାକୁ ବାଧ୍ୟ କରିଥିଲେ। ନିଷ୍ପତ୍ତି ଉପରେ ପୁନର୍ବିଚାର କରିବାକୁ ଅନୁରୋଧ କରିଥିଲେ । ତେଣୁ ସମସ୍ତଙ୍କ ଭାବନାକୁ ସମ୍ମାନ ଦେଇ ଇସ୍ତଫାକୁ ଫେରାଇ ନେବାକୁ ବାଧ୍ୟ ହୋଇଛି। ପାୱାର ଆଗକୁ କହିଛନ୍ତି କି, ମୁଁ ପୁନର୍ବାର ଅଧ୍ୟକ୍ଷ ପଦ ଗ୍ରହଣ କରୁଛି। ପାୱାରଙ୍କ ଏହି ଘୋଷଣା ପରେ ଏନସିପି କର୍ମୀମାନଙ୍କ ମଧ୍ୟରେ ଆନନ୍ଦର ଲହରୀ ଖେଳି ଯାଇଥିଲା। ପାର୍ଟିର କର୍ମକର୍ତ୍ତାମାନେ ବାଣ ଫୁଟାଇ ଏହାକୁ ସ୍ୱାଗତ କରିବା ସହ ଉତ୍ସବ ମନାଇଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ, ଯେ ମେ ୨ ରେ ଶରଦ ପାୱାର ନିଜ ପଦରୁ ଇସ୍ତଫା ଘୋଷଣା କରିଥିଲେ। ଏମିତି କି ଗତକାଲି ମଧ୍ୟ ଦଳୀୟ କର୍ମୀଙ୍କ ସବୁ ଅନୁରୋଧକୁ ପ୍ରତ୍ୟାକ୍ଷାନ କରିଥିଲେ ଓ ଦଳର ସଭାପତି ପଦରେ ରହିବେ ନାହିଁ ବୋଲି ସ୍ପଷ୍ଟ କରିଥିଲେ। ଏଥିସହ ଦଳର ନୂଆ ସଭାପତି ଚୟନ ପାଇଁ ଏକ କମିଟି ଗଠନ ସମ୍ପର୍କରେ ଘୋଷଣା କରିଥିଲେ। କମିଟି ଆଜି ଦଳର ପରବର୍ତ୍ତୀ ସଭାପତିଙ୍କ ନାମ ଘୋଷଣା କରିବାର ଥିଲା।