ଆରବିଆଇ(RBI)ର ଶକ୍ତ ନିର୍ଦ୍ଦେଶ ପରେ ପେଟିଏମ୍ ୟୁଜର୍ସଙ୍କ ମୁଣ୍ଡରେ ଚିନ୍ତା

ଆଉ ମାତ୍ର ଗୋଟିଏ ଦିନ ପରେ ବନ୍ଦ ହେବ ପେଟିଏମ୍ । ତେଣୁ, ଏବେ ପେଟିଏମ୍ ୟୁଜର୍ସଙ୍କ ମୁଣ୍ଡକୁ ଘାରିଛି ପେଟିଏମ ଚିନ୍ତା । ଆରବିଆଇର ନିର୍ଦ୍ଦେଶ ଅନୁଯାୟୀ, ପେଟିଏମ୍ ପେମେଣ୍ଟ ବ୍ୟାଙ୍କ ଡିପୋଜିଟ୍ ଏବଂ କ୍ରେଡିଟ୍ ଟ୍ରାଞ୍ଜାକ୍ସନ କାରବାର ମାର୍ଚ୍ଚ ୧୫ ତାରିଖ ପରଠାରୁ ବନ୍ଦ ହେବ । ପେଟିଏମକୁ ନେଇ ଦେଖା ଦେଇଥିବା ବିବାଦ ପରେ ଆକ୍ସନ ମୋଡକୁ ଆସିଥିଲା ଆରବିଆଇ । ନିୟମ ଉଲ୍ଲଂଘନ ଦର୍ଶାଇ ଆରବିଆଇ ଜାନୁଆରୀ ୩୧ରେ ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ ପ୍ରତିବନ୍ଧକ ଲଗାଇଥିଲା।

ଆରବିଆର ଏକ ରିପୋର୍ଟ ମୁତାବକ, ସଠିକ୍ ପରିଚୟ ବିନା ପେଟିଏମ୍ ପେମେଣ୍ଟ ବ୍ୟାଙ୍କରେ ହଜାର ହଜାର ଆକାଉଣ୍ଟ ଖୋଲା ଯାଇଥିଲା । ଯାହାଦ୍ୱାରା ଅର୍ଥ ହେରଫେର ଭଳି ବେଆଇନ କାରବାରର ଆଶଙ୍କା ଦେଖାଦେଇଥିଲା ।

ରାଜସ୍ୱ ସଚିବ ସଞ୍ଜୟ ମଲହୋତ୍ରା ଏହାକୁ ନେଇ କହିଥିଲେ ଯେ, ପେଟିଏମ ଉପରେ ଯାଞ୍ଚ କରାଯିବ । ତେଣୁ, ଅସ୍ଥାୟୀ ଭାବେ ସେବାକୁ ବନ୍ଦ କରାଯାଉଛି ।

ତେବେ ପେଟିଏମ୍ ପେମେଣ୍ଟସ୍ ବ୍ୟାଙ୍କ ବନ୍ଦ ହେବା ପରେ ଏଥିରେ କଣ କଣ ପରିବର୍ତ୍ତନ ହେବ?

ପ୍ରଥମତଃ ଗ୍ରାହକ ନିଜ ପେଟିଏମ୍ ପେମେଣ୍ଟ ବ୍ୟାଙ୍କ ଆକାଉଣ୍ଟରେ ଟଙ୍କା ଜମା କରିପାରିବେ ନାହିଁ, କିନ୍ତୁ ମାର୍ଚ୍ଚ ୧୫ ପରେ ବି ଟଙ୍କା ଉଠାଣ କିମ୍ବା ଟ୍ରାନ୍ସଫର କରିପାରିବେ।

ପେଟିଏମ୍ ପେମେଣ୍ଟ ବ୍ୟାଙ୍କ ଆକାଉଣ୍ଟରେ ସାଲାରି କ୍ରେଡିଟ୍, ଡାଇରେକ୍ଟ ବେନିଫିଟ୍ ଟ୍ରାନ୍ସଫର କିମ୍ବା ସବସିଡି ଉପଲବ୍ଧ ହେବ ନାହିଁ, କିନ୍ତୁ ରିଫଣ୍ଡ, କ୍ୟାସବ୍ୟାକ୍ ଏବଂ ସ୍ୱିପ୍ ଇନ୍ ପାଇଁ ଅନୁମତି ମିଳିବ।

ମାର୍ଚ୍ଚ ୧୫ ପରେ ଗ୍ରାହକ ମାନେ ଟପ୍-ଅପ୍ କିମ୍ବା ୱାଲେଟରେ ଟଙ୍କା ଟ୍ରାନ୍ସଫର ଭଳି ସୁବିଧା ପାଇପାରିବେ ନାହିଁ। ଯଦି ସେମାନଙ୍କ ଆକାଉଣ୍ଟରେ ବାଲାନ୍ସ ଥାଏ, ତେବେ ପେମେଣ୍ଟ କରିପାରିବେ।

ଗ୍ରାହକ ମାନେ ପେଟିଏମ୍ ପେମେଣ୍ଟ ବ୍ୟାଙ୍କ ଦ୍ୱାରା ଜାରି କରାଯାଇଥିବା ସେମାନଙ୍କର FASTag ରିଚାର୍ଜ କରିପାରିବେ ନାହିଁ।

ପେଟିଏମ୍ ବ୍ୟାଙ୍କ ଦ୍ୱାରା ଜାରି କରାଯାଇଥିବା ଏନସିଏମସି କାର୍ଡରେ ରିଚାର୍ଜ କିମ୍ବା ଟପଅପ୍ ହେବ ନାହିଁ ।