Blog

ଭୋଟର ନିର୍ଭୁଲ ମତଦାନ ସଚେତନତା ପାଇଁ ଉଦ୍ୟମ

ଆଗାମୀ ସାଧାରଣ ନିର୍ବାଚନରେ ଭୋଟର ନିର୍ଭୁଲ ମତଦାନ ସଚେତନତା ପାଇଁ ବଲାଙ୍ଗିର ଜିଲ୍ଲା ପ୍ରଶାସନ ତରଫରୁ ଜିଲ୍ଲା ମୁଖ୍ୟାଳୟ ଏବଂ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ପ୍ରଦର୍ଶନ କେନ୍ଦ୍ର ଉଦଘାଟନ ହୋଇଛି । ଏହି କେନ୍ଦ୍ରରେ ଇଭିଏମ ଏବଂ ଭିଭିପାଟ ପ୍ରଦର୍ଶନ ସହ ପୋଲିଂ ବୁଥରେ ଭୋଟ ଦେବାକୁ ନେଇ ଜନସାଧାରଣଙ୍କୁ ସଚେତନତା କରାଯିବ ।

ଅତିରିକ୍ତ ଜିଲ୍ଲାପାଳ ଶ୍ରୀ ଲମ୍ବୋଦର ଧରୁଆ ଏବଂ ଉପଜିଲ୍ଲାପାଳ ଶ୍ରୀ ପ୍ରଭାସ ଦଣ୍ଡସେନା ଏହି କେନ୍ଦ୍ର ଉଦଘାଟନ କରିବା ସହ ୪ ଟି ଇଭିଏମ ମୋବାଇଲ ଭ୍ୟାନକୁ ସବୁଜ ପତାକା ଦେଖାଇ ଶୁଭାରମ୍ଭ କରିଛନ୍ତି । ଏହି ମୋବାଇଲ ଭ୍ୟାନ ଗୁଡିକ ୧୪ ଟି ବ୍ଲକ ଏବଂ ସମସ୍ତ ପୌରାଞ୍ଚଳ ବୁଲିବ । ଏହି ଭ୍ୟାନ ଗୁଡିକ ଜିଲ୍ଲାର ସମସ୍ତ ଭୋଟ ଦାନ କେନ୍ଦ୍ର ଗୁଡିକ ବୁଲିବ ଏବଂ ସମ୍ପୃକ୍ତ ଅଧିକାରୀ ମାନେ ଭୋଟର ମାନଙ୍କୁ ସଚେତନ କରାଇବ । ମକ ପୋଲିଂ ପରେ ଭୋଟର ମାନେ କାହାକୁ ଭୋଟ ଦେଲେ ଦେଖିପାରିବେ ।

ଏହା ଦ୍ୱାରା ଜଣେ ନିର୍ଭୁଲ ଭାବେ ଭୋଟ ଦେଇପାରିବ । ତେବେ ଫେବୃଆରୀ ଶେଷ ପର୍ଯ୍ୟନ୍ତ ଏହି ମକ କାର୍ଯ୍ୟକ୍ରମ ଚାଲିବ | ଏହି କାର୍ଯ୍ୟକ୍ରମରେ ଡେପୁଟି କଲେକ୍ଟର (ନିର୍ବାଚନ) ରାଜେନ୍ଦ୍ର ନାୟକ , ଆସିଷ୍ଟାଣ୍ଟ କଲେକ୍ଟର ଫାଲ୍ଗୁନୀ ଶବର , ବଲାଙ୍ଗୀର ବିଡିଓ ଶରତ କୁମାର ସେଠୀ , ପୂଇନ୍ତଳା ବିଡିଓ ଅମରେନ୍ଦ୍ର ସ୍ଵାଇଁ ପ୍ରମୁଖ ଉପସ୍ଥିତ ଥିଲେ ।
୭୬ତମ ବିଶ୍ୱ ପ୍ରସିଦ୍ଧ ବରଗଡ଼ ଧନୁଯାତ୍ରା ଉଦଘାଟିତ

ସର୍ବ ବୃହତ୍‌ ମୁକ୍ତାକାଶ ରଙ୍ଗମଞ୍ଚରେ ଆରମ୍ଭ ହୋଇଯାଇଛି ବିଶ୍ୱ ପ୍ରସିଦ୍ଧ ବରଗଡ଼ ଧନୁଯାତ୍ରା। ବରଗଡ଼ ପାଲଟି ଯାଇଛି ମଥୁରାନଗରୀ। ଆରମ୍ଭ ହୋଇଛି ମହାପ୍ରତାପୀ, ଦିଗବିଜୟୀ ମହାରାଜ କଂସଙ୍କ ରାଜୁତି । ପବିତ୍ର ମକର ସଂକ୍ରାନ୍ତିରୁ ଆରମ୍ଭ ହୋଇଥିବା ଏହି ଯାତ୍ରା ଦୀର୍ଘ ୧୧ଦିନ ଧରି ଚାଲିବ। ଆସନ୍ତା ଜାନୁୟାରୀ ୨୫ ତାରିଖରେ ଏହା ଉଦଯାପିତ ହେବ। ୧୧ ଦିନିଆ ଧନୁଯାତ୍ରା ସମୟରେ ବରଗଡ଼ ଏବଂ ଅମ୍ବାପାଲି ମଧ୍ୟରେ ପ୍ରବାହିତ ଜୀରାନଦୀ ଯମୁନା ନଦୀରେ ରୂପାନ୍ତରିତ ହେବ । ମଥୁରାନଗରୀର ୧୫ ଏବଂ ଗୋପପୁରର ୯ଟି ଖୋଲାମଞ୍ଚରେ ଧନୁଯାତ୍ରା ଦୃଶ୍ୟାଭିନୟ ଅଭିନୀତ ହେବ।

ବରଗଡ଼ ହାଟପଦାରେ ରାଜ ଦରବାର ଏବଂ ସ୍ଥାନୀୟ ନିଶାମଣି ସ୍କୁଲ ସମ୍ମୁଖ ସୁଦୃଶ୍ୟ ଲୋକମଣ୍ଡପ ପଡ଼ିଆରେ ରଙ୍ଗମହଲ ମଞ୍ଚ ପ୍ରସ୍ତୁତ ହୋଇଛି । ବିଗତବର୍ଷ ଭଳି ଏଥର ମଧ୍ୟ ହାଟପଦା ମଞ୍ଚରେ ମହୋତ୍ସବର ପ୍ରଥମ ୭ ଦିନ ପାଇଁ ରାଜ ଦରବାର ଏବଂ ଶେଷ ୪ଦିନ ପାଇଁ ରଙ୍ଗ ମହଲ ଦୃଶ୍ୟାଭିନୟ ଅଭିନୀତ ହେବ। ସେହିପରି ଅନ୍ତିମ ୪ଦିନ ନିଶାମଣି ହାଇସ୍କୁଲ ସମ୍ମୁଖ ଲୋକ ମଣ୍ଡପ ପଡ଼ିଆରେ ରାଜ ଦରବାର ସାଜିବ। ତେବେ ସୋମବାରରୁ ମଥୁରାନଗରୀ ଏବଂ ବୁଧବାରରୁ ଗୋପପୁର ଦୃଶ୍ୟାଭିନୟ ଅଭିନୀତ ହେବ।

ଏହି ଉଦଘାଟନୀ ଉତ୍ସବରେ ବରଗଡ଼ ଏମ୍‌ପି ସୁରେଶ ପୂଜାରୀ ଏବଂ ବରଗଡ଼ ବିଧାୟକ ଦେବେଶ ଆଚାର୍ଯ୍ୟ ସନ୍ଧ୍ୟା ୭ଟାରେ ଧନୁଯାତ୍ରା ମହୋତ୍ସବ ଉଦ୍‌ଘାଟନ କରିଥିଲେ। ଏହା ପୂର୍ବରୁ ଅପରାହ୍ନ ୨ଟାରୁ ଧନୁଯାତ୍ରା ପ୍ରଚାର ପ୍ରସାର କମିଟି ଆନୁକୂଲ୍ୟରେ ସ୍ଥାନୀୟ ଗାନ୍ଧୀଛକ କଲ୍ୟାଣ ମଣ୍ଡପରୁ ସାଂସ୍କୃତିକ ଶୋଭାଯାତ୍ରା ବାହାରି ସହର ପରିକ୍ରମା କରିବା ସହିତ ତଳିପଡ଼ା ସମଲେଶ୍ୱରୀ ମନ୍ଦିର ଅଭିମୁଖେ ଯାଇଥିଲା । ସେଠାରୁ ଶୋଭାଯାତ୍ରା ପୁଣି ହାଟପଦାସ୍ଥିତ ରାଜ ଦରବାରକୁ ଯାଇଥିଲା। ଉଦଘାଟନ ପରେ ଧନୁଯାତ୍ରା ଦୃଶ୍ୟାଭିନୟ ଦେଖିବାକୁ ମିଳିଥିଲା । ତେବେ ଦୀର୍ଘବର୍ଷ ଧରି ମାରୱାଡ଼ି ଧର୍ମଶାଳା ରାଜ ମହଲ ହୋଇଆସୁଥିବା ବେଳେ ଏଥର ସ୍ଥାନୀୟ ଜି.ଡ଼ି ଗୋୟଲ ଧର୍ମଶାଳା ରାଜ ମହଲ ପାଲଟିବ ବୋଲି ଧନୁଯାତ୍ରା ମହୋତ୍ସବ ସମିତିର ଆବାହକ ସୁରେଶ୍ୱର ଶତପଥୀ ସୂଚନା ଦେଇଛନ୍ତି।

ଆଜି ଦ୍ବିତୀୟ ରଜନୀରେ ସମଲେଶ୍ଵରୀ ମଣ୍ଡପ ସ୍ଥିତ କାରାଗାରରେ ଶ୍ରୀକୃଷ୍ଣଙ୍କ ଜନ୍ମ ଓ ଶ୍ରୀକୃଷ୍ଣଙ୍କୁ ନେଇ ବାସୁଦେବଙ୍କ ଗୋପପୁର ଯାତ୍ରା, ଉଗ୍ରସେନଙ୍କ ସହ ଭେଟ, ବିଜୁଳି କନ୍ୟାଙ୍କ ସହ ମଥୁରାକୁ ପ୍ରତ୍ୟାବର୍ତ୍ତନ, ଦୂର୍ମିଲା ରାକ୍ଷସ ସହ କଂସର ଯୁଦ୍ଧ ଏବଂ ଦୁର୍ମିଲା ରାକ୍ଷସ ନିହତ ହେବା ସହ ଚାରୁଣ ମୁଷ୍ଠିକ କୁ ଆହ୍ଵାନ ପରି ବହୁ କାର୍ଯ୍ୟକ୍ରମ ହେବାକୁ ଯାଉଛି।
ପୋଲତଳୁ ନାବାଳକର କ୍ଷତବିକ୍ଷତ ମୃତଦେହ ଉଦ୍ଧାର

କେନ୍ଦୁଝର ଚମ୍ପୁଆ ଉପଖଣ୍ଡ ଯୋଡ଼ା ବ୍ଳକ ଅନ୍ତର୍ଗତ କୋହ୍ଲହୁଣ୍ଡୁଳା ଗ୍ରାମ ର ଏକ ପୋଲ ତଳୁ ଜଣେ ନାବାଳକ ର ମୃତ ଦେହ ଉଦ୍ଧାର ହୋଇଛି । ସୂଚନା ଅନୁଯାୟୀ, ଆଜି ସ୍ଥାନୀୟ କିଛି ମହିଳା ସକାଳୁ ଶୌଚ ହେବାକୁ ଯାଇଥିବା ବେଳେ କୋହ୍ଲହୁଣ୍ଡୁଳା ପୋଲତଳେ ଜଣେ ନାବାଳକର କ୍ଷତବିକ୍ଷତ ମୃତଦେହ ପଡ଼ିଥିବା ଦେଖିବାକୁ ମିଳିଥିଲା ।

ମୃତକ ଜାମୁକୁଣ୍ଡିଆ ଗାଁର ଶୁକଦେବ ଲାଗୁରୀ ବୋଲି ସୂଚନା ମିଳିଥିବା ବେଳେ, ତାଙ୍କୁ କେହି ପଥରରେ ଛେଚି ହତ୍ୟା କରାଯାଇଥିବା ସନ୍ଦେହ କରାଯାଉଛି । ଗତକାଲି ଶୁକଦେବ ସନ୍ଧ୍ୟାରେ ପାଖ ଗାଁକୁ ମକରମେଳା ଦେଖିବାକୁ ଯାଇ ଘରକୁ ଫେରି ନଥିଲେ । ଆଜି ସକାଳୁ ତାର ମୃତ ଦେହ ମିଳିବା ପରେ ଏହା ଏକ ହତ୍ୟା କାଣ୍ଡ ବୋଲି ଅନୁମାନ କରାଯାଉଛି।ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଆରମ୍ଭ କରିଛି। ଘଟଣା ସ୍ଥଳରେ ସାଇଣ୍ଟିଫିକ୍ ଟିମ୍‌ କୁ ଅପେକ୍ଷା କରାଯାଇଥିବା ଜଣାପଡ଼ିଛି।
ବଳରାମ ଧିର ବିଦ୍ୟାଳୟର ୧୯୯୯ ବ୍ୟାଚ୍ ଛାତ୍ରଛାତ୍ରୀଙ୍କ ଦ୍ବାରା ଶିକ୍ଷକ ସମ୍ବର୍ଦ୍ଧନା ଉତ୍ସବ

ଘଷିପୁରା ବ୍ଲକ ଅନ୍ତର୍ଗତ ପୁରୁଣାବାନ୍ଧଗୋଡା ସ୍ଥିତ ବଳରାମ ଧୀର ଉଚ୍ଚ ବିଦ୍ୟାଳୟର ୧୯୯୯ ବ୍ୟାଚର ଛାତ୍ରଛାତ୍ରୀମାନଙ୍କ ଦ୍ଵାରା ଶିକ୍ଷକ ସମ୍ବର୍ଦ୍ଧନା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଏହି ଉପଲକ୍ଷେ ଏକ ସାଧାରଣ ସଭାରେ ପୁରାତନ ଛାତ୍ର ତାରିଣୀ ପ୍ରସାଦ ପଟ୍ଟନାୟକଙ୍କ ସଭାପତିତ୍ବରେ ଅବସରପ୍ରାପ୍ତ ଶିକ୍ଷକ ବଳରାମ ଦାସ, ଇଶ୍ୱର ଚନ୍ଦ୍ର ବେହେରା, ବୈଷ୍ଣବ ଚରଣ ସେନାପତି, ବଳଭଦ୍ର ବେହେରାଙ୍କୁ ଉତ୍ତରୀୟ ଓ ପୁଷ୍ପଗୁଛ ଦେଇ ସ୍ବାଗତ ସମ୍ବର୍ଦ୍ଧନା କରାଯାଇଥିଲା। ଛାତ୍ରଙ୍କ ମଧ୍ୟରେ ସ୍ନେହ ଓ ସଦଭାବନା ଆଦାନ ପ୍ରଦାନର ମାଧ୍ୟମ ହେଉଛି ବନ୍ଧୁ ମିଳନ।

ସ୍କୁଲର ଶିକ୍ଷକ ମାନଙ୍କ ଦିଗଦର୍ଶନ ପାଇ ଆଜି ଛାତ୍ରଛାତ୍ରୀ ବିଭିନ୍ନ କ୍ଷେତ୍ରରେ ସଫଳ ହୋଇପାରିଛନ୍ତି। ସେମାନଙ୍କ ଏହି ଉନ୍ନତ କାର୍ଯ୍ୟକୁ ଉପସ୍ଥିତ ଛାତ୍ରଛାତ୍ରୀ ବର୍ଣ୍ଣନା କରିବା ସହ ପୁରୁଣା ଦିନର ସ୍ମୃତିଚାରଣ କରିଥିଲେ। ଏହି କାର୍ଯ୍ୟକ୍ରମକୁ ସଂଜିବ ସେଠୀ,ସତ୍ୟବ୍ରତ ପଟ୍ଟନାୟକ,ଚଗଲା ସା, ସଂଜିତ ଦାସ,ଲିପକ ବେହେରା, ମନୋରଞ୍ଜନ ବିଶୋଇ, ପଙ୍କଜ ବେହେରା, କୀର୍ତ୍ତିମାଳା ନାୟକ, କୁନି ରଣା, କବିତା ଚକ୍ର,ମିତା ନାୟକ ସହ ସମସ୍ତ ଛାତ୍ରଛାତ୍ରୀ ପରିଚାଳନା ରେ ସହଯୋଗ କରିଥିଲେ। ପରିଶେଷରେ ଛାତ୍ରୀ କବିତା ଚକ୍ର ସମସ୍ତ ଛାତ୍ରଛାତ୍ରୀଙ୍କୁ ଧନ୍ୟବାଦ ଅର୍ପଣ କରିଥିଲେ।
ଜଙ୍ଘ ବଡ଼ ଦେଓ ମନ୍ଦିର ବିଗ୍ରହ ପ୍ରତିଷ୍ଠା ଉତ୍ସବରେ ରାଜନେତାଙ୍କ ଧସ୍ତାଧସ୍ତି

ଆଠମଲ୍ଲିକ ବ୍ଲକ ଆମ୍ବସର୍ମୁଣ୍ଡା ଠାରେ ଦୀର୍ଘ ତିନି ଦିନ ଧରି ଚାଲିଥିବା ଅଖିଳ ଭାରତୀୟ ଗୋଣ୍ଡ଼ ୱନା ସମାଜର ଜଙ୍ଘ ବଡ଼ ଦେଓ ମନ୍ଦିର ପ୍ରତିଷ୍ଠା କାର୍ଯ୍ୟ ସମ୍ପାଦନ ହୋଇଛି। ରୀତି ନୀତି ଅନୁଯାୟୀ ପୂଜା ପାଠ ହୋମ ଯଜ୍ଞ ସହିତ ବିଗ୍ରହ ସ୍ଥାପନ କରାଯାଇଛି। ଏଥିରେ କର୍ତ୍ତା ଭାବେ ପେନ୍ଥାନାର ସଭାପତି ତଥା ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାୟ ଓ ତାଙ୍କ ସହଧର୍ମିଣୀ ଲିନା ସାୟ ଦାୟିତ୍ଵ ନିର୍ବାହ କରିଥିଲେ। ଅନ୍ୟ ମାନଙ୍କ ମଧ୍ୟରେ ଗୋଣ୍ତ ୱାଣା ସମାଜର ରାଜ୍ୟ ମହା ସଚିବ ପ୍ୟାରୀ ମୋହନ ନାୟକ, ସଭାପତି ସଦାଶିବ ନାୟକ, ମହିଳା ସଭାପତି ଦମୟନ୍ତୀ ମହାପାତ୍ର, ସମ୍ପାଦିକା ଶୈଳବାଳା ନାୟକ ପ୍ରମୁଖ ମଞ୍ଚାଶିନ ରହି ଗୋଣ୍ଡ ଜାତିର ସାମାଜିକ ସ୍ଥିତି ଓ ଚଳନି ଉପରେ ସାର ଗର୍ଭକ ବକ୍ତବ୍ୟ ପ୍ରଦାନ କରିଥିଲେ।

ସବୁଠାରୁ ରୋଚକ ଖବର ହେଲା ବିନା ନିମନ୍ତ୍ରଣରେ ନିଜର ରାଜନୈତିକ ପତିଆରା ଦେଖାଇବା ପାଇଁ ଗତ ଥର ବିଜେଡ଼ି ପକ୍ଷରୁ ସମ୍ବଲ୍ପୁର ଲୋକସଭା କ୍ଷେତ୍ରରୁ ପରାଜିତ ସାଂସଦ ପ୍ରାର୍ଥୀ ନଳିନୀ କାନ୍ତ ପ୍ରଧାନ ଏକ ବିରାଟ ବାଇକ୍ ରାଲିରେ ଠାକୁରଗଡ଼ ଖେଳପଡ଼ିଆରୁ ନିମନ୍ତ୍ରିତ ହୋଇଥିବା ରାଜ୍ୟ ଖଣି ଓ ଇସ୍ପାତ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ, ଆଦିବାସୀ କଲ୍ୟାଣ ମନ୍ତ୍ରୀ ଜଗନ୍ନାଥ ସାରକା, ଅନୁଗୁଳ ବିଧାୟକ ରଜନୀ କାନ୍ତ ସିଂହ, ଛେଣ୍ଡିପଦା ବିଧାୟକ ସୁଶାନ୍ତ ବେହେରା, ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଜିଲ୍ଲା ପରିଷଦ ଅଧ୍ୟକ୍ଷା ବବିତା ପ୍ରଧାନ ଙ୍କୁ ସାଙ୍ଗରେ ଧରି ସାଉଣ୍ଡ ଗାଡ଼ି ଧରି ନବୀନ ପଟ୍ଟନାୟକ ଜିନ୍ଦାବାଦ, ଆଠମଲ୍ଲିକ ର ବିକାଶ ପୁରୁଷ ନଳିନୀ ପ୍ରଧାନ, ହେ ନଳିନୀ ବାବୁ ଆମେ ତୁମ ଫ୍ୟାନ୍ ବଜାଇ ମନ୍ଦିର ସମ୍ମୁଖରେ ପହଁଚିଥିଲେ। ସ୍ଵାଗତ ଜଣାଇବା ପାଇଁ ଅଗୋଣ୍ଡୱାନଆ ସମାଜର ସେବା ଦଳ ଛିଡ଼ା ହୋଇ ଥିବା ବେଳେ ନଳିନୀଙ୍କ ସମର୍ଥକମାନେ ନିଜସ୍ୱ ଶୈଳୀରେ ଅଭିନନ୍ଦନ ଜଣାଇବା ପାଇଁ ଫୁଲ ତୋଡା ଦେଇ ଅତିଥି ମାନଙ୍କୁ ସ୍ଵାଗତ କରିଥିଲେ। ଯାହାକୁ ନେଇ ସେବା ଦଳ ଓ ନଳିନୀ ଗୋଷ୍ଠୀ ମଧ୍ୟରେ ଧସ୍ତାଧସ୍ତି ହୋଇଥିଲା। ପରେ ମନ୍ତ୍ରୀ ଦ୍ବୟ ମନ୍ଦିର ଭିତରେ ପହଞ୍ଚି ଆଶିଷ ଭିକ୍ଷା କରୁଥିଲେ। ନଳିନୀ ବାବୁ ମନ୍ତ୍ରୀ ଦ୍ୱାୟଙ୍କୁ ମନ୍ଦିରରୁ ଟାଣି ଆଣି ଗାଡ଼ିରେ ବସାଇ ନିଜ ସମର୍ଥକ ଙ୍କ ସହିତ ଚାଲି ଯାଇଥିଲେ।

ଧସ୍ତା ଧସ୍ତି ବେଳେ ସେବା କର୍ତ୍ତୃପକ୍ଷ ନଳିନୀ ପ୍ରଧାନ ଗୋ ବ୍ୟାକ୍ ନାରାବାଜି ଦେଇଥିଲେ। ଏହି ଖବର ଶୁଣିବା ପରେ ମହାସଚିବ ପ୍ୟାରୀ ମୋହନ ନାୟକ ଏକ ପ୍ରେସ ମିଟ ଡାକି କହି ଥିଲେ ଯେ, ଏହା ଏକ ସାମାଜିକ ଅନୁଷ୍ଠାନ । ମନ୍ଦିରରେ ବିଗ୍ରହ ପ୍ରତିଷ୍ଠା ଉତ୍ସବ ପାଳିତ ହୋଇ ଥିଲା। ଏହାକୁ ରାଜନୈତିକ ରଙ୍ଗ ଦେବା ପାଇଁ ନଳିନୀ ପ୍ରଧାନଙ୍କ ଏକ ହୀନ ପ୍ରୟାସ କରିଛନ୍ତି। ଆଗାମୀ ଦିନରେ ଏହାର ଜବାବ୍ ଆମେ ଗୋଣ୍ଡୱାନଆ ସମାଜ ନିଶ୍ଚିତ ଭାବରେ ଦେବୁ। ଏହି ଘଟଣାକୁ ନେଇ ରାଜନୀତି ଜୋର ଧରିଛି।
ଦେଓ ମନ୍ଦିରର ପ୍ରତିଷ୍ଠା ଉତ୍ସବରେ ମାନ୍ୟବର ରାଜ୍ୟପାଳ

ଗତକାଲି ଦିନିକିଆ ଅନୁଗୁଳ ଗସ୍ତରେ ଯାଇଥିଲେ ଓଡ଼ିଶାର ରାଜ୍ୟପାଳ ରଘୁବର ଦାସ । ଆଠମଲ୍ଲିକ ବ୍ଲକ ଆମ୍ବସରମୁଣ୍ଡା ଗୋଣ୍ଡ ସମାଜର ଆରାଧ୍ୟ ଦେବତା ବଡ଼ ଜଂଘା ଦେଓ ମନ୍ଦିରର ପ୍ରତିଷ୍ଠା ଉତ୍ସବରେ ଯୋଗ ଦେଇଥିଲେ। ପ୍ରଥମେ ଆମ୍ବେଦକରଙ୍କ ପ୍ରତି ମୂର୍ତ୍ତିରେ ପୁଷ୍ପ ଗୁଛ ଅର୍ପଣ କରିବା ପରେ ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତି ଉନ୍ମୋଚିତ କରିଥିଲେ। ପରେ ୩୫ ଏକର ପଥର ଚଟାଣ ଉପରେ ନିର୍ମିତ ଜଙ୍ଘା ବଡଦେଓ ମନ୍ଦିର ଯାଇ ସେଠାରେ ଠାକୁରଙ୍କୁ ଦର୍ଶନ କରି ପ୍ରଭୁଙ୍କ ଆଶିଷ ଲାଭ କରିଥିଲେ। ପରେ ଏକ ଜନସଭାକୁ ସମ୍ବୋଧିତ କରି ଜନଜାତି ଙ୍କ ବିକାଶ ହେଲେ ଭାରତ ବିକଶିତ ହେବ ବୋଲି କହିଥିଲେ।

ଜନଜାତିଙ୍କ ଶିକ୍ଷାର ବିକାଶ ଦିଗରେ କନ୍ଦ୍ର ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି, ବେଟି ବଚାଓ, ବେଟି ପଢ଼ାଓ ନରା ଦେଇଥିଲେ। ଅନ୍ୟତମ ଅତିଥି ଭାବେ କେନ୍ଦ୍ର ସରକାରଙ୍କ ଶିକ୍ଷା ଓ ଦକ୍ଷତା ବିକାଶ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଯୋଗଦେଇ ଆଦିବାସୀଙ୍କ ପ୍ରତି କେନ୍ଦ୍ର ସରକାର ବିଭିନ୍ନ ଯୋଜନାର ପରିକଳ୍ପନା କରୁଥିବା କହିବା ସହ ଓଡ଼ିଶା ପର୍ଯ୍ୟଟନ ମାନଚିତ୍ରରେ ଆମ୍ବସରମୁଣ୍ଡା ପେନଣ୍ଠାନା ଯୋଡ଼ି ହେଲା ବୋଲି କହିଥିଲେ।

ପେନଠାନାର ସଭାପତି ତଥା ଆଠମଲ୍ଲିକ ବିଧାୟକ ରମେଶ ଚନ୍ଦ୍ର ସାଏ ସ୍ବାଗତ ଭାଷଣ ଦେଇଥିବା ବେଳେ ଗୋଣ୍ଡ୍ ୱାନା ସମାଜର ରାଜ୍ୟ ମହାସଚିବ ପ୍ୟାରୀ ମୋହନ ନାୟକ ବିବରଣୀ ପାଠ କରିଥିଲେ। ଛତିଶଗଡ଼ ରାଜ୍ୟର ପୂର୍ବତନ ବିଧାୟକ ରବି ନାୟଣ ନାୟକ ଧନ୍ୟବାଦ ଅର୍ପଣ କରିଥିଲେ।
କାଶିପୁର: ଚେରକଟା ପର୍ଯ୍ୟଟନ ପ୍ରତି ନାହିଁ ସରକାରଙ୍କ ନିଘା

ଶୀତ ଆସିଲେ ଜମେ ବଣଭୋଜିର ଆସର। ଲୋକେ ବଣଭୋଜି ପାଇଁ ବାଛିଥାନ୍ତି ବିଭିନ୍ନ ପର୍ଯ୍ୟଟନସ୍ଥଳୀକୁ । ସେଥିପାଇଁ ରାୟଗଡା ଜିଲ୍ଲା କାଶିପୁର ବ୍ଲକର ଚେରକଟାକୁ ଛୁଟୁଛି ପର୍ଯ୍ୟଟକଙ୍କ ଭିଡ। ଲୋକେ ବଣ ଭୋଜି ପାଇଁ ଶହ ଶହ ସଂଖ୍ଯାରେ ସେଠାକୁ ଧାଉଁଛନ୍ତି। ରନ୍ଧାବଢା କରି ଖାଇବା ସହ ଚେରକଟାରେ ଥିବା ଜଳପ୍ରପାତର ମଜା ନେଉଛନ୍ତି। ଚେରକଟାର ପ୍ରାକୃତିକ ସୌନ୍ଦର୍ଯ୍ୟକୁ ମନଭରି ଉପଭୋଗ କରୁଛନ୍ତି।

ପର୍ଯ୍ୟଟକଙ୍କ ଆଗମନରୁ ସ୍ଥାନୀୟ ଅଞ୍ଚଳର ଗରିବ ଅଧିବାସୀଙ୍କ ମଧ୍ୟରେ ମଧ୍ୟ ଖୁସି। କାରଣ ସେମାନେ ଜଙ୍ଗଲରୁ ସଂଗ୍ରହ କରୁଥିବା କାଠକୁ ଭୋଜିପାଇଁ ପର୍ଯ୍ୟଟକ କିଣୁଛନ୍ତି, ଯାହା ତାଙ୍କୁ ଦୁଇ ପଇସା ରୋଜଗାର କରିବାରେ ସହାୟକ ହେଉଛି। ହେଲେ ଏହି ଜଳପ୍ରପାତ ଆଜି ମଧ୍ୟ ପ୍ରସିଦ୍ଧି ଲାଭ କରିପାରି ନାହିଁ। ତେଣୁ କେବଳ ରାୟଗଡା ଓ ଆଖପାଖ ଜିଲ୍ଲାର ଲୋକେ ଏଠାକୁ ଆସିଥାନ୍ତି।

ଏହା ବ୍ୟତୀତ, ଏଠାକୁ ଯିବା ପାଇଁ ଭଲ ରାସ୍ତାଟିଏ ନାହିଁ। ଏହା ବ୍ୟତୀତ, ସରକାରଙ୍କ ପକ୍ଷରୁ ଏହି ପର୍ଯ୍ୟଟନସ୍ଥଳୀ ପାଇଁ କୌଣସି ବ୍ୟବସ୍ଥା ହୋଇନାହିଁ। ସରକାର ସ୍ବଚ୍ଛତାକୁ ପ୍ରାଧାନ୍ୟ ଦେଉଥିବା ବେଳେ ଜିଲ୍ଲା ପ୍ରଶାସନ ପକ୍ଷରୁ ଏଠାରେ ଡଷ୍ଟବିନଟିଏ ଯୋଗାଇ ଦିଆଯାଇ ନାହିଁ କି କୌଣସି ସଚେତନ କରାଯାଉ ନାହିଁ। ତେଣୁ ଲୋକେ ବଣଭୋଜି କରିବା ସହ ସେହି ସ୍ଥାନରେ ସେମାନଙ୍କ ବ୍ୟବହୃତ ସାମଗ୍ରୀ ସେଠାରେ ପକାଇ ଚାଲିଯାଉଛନ୍ତି। ଫଳରେ ସ୍ଥାନଟି ଅଳିଆ ଆବର୍ଜନାରେ ପୂରି ଯାଇଛି। ଏସବୁର ସୁ ପରିଚାଳନା ପାଇଁ ଏଠାକୁ ଆସୁଥିବା ଲୋକମାନେ ଦାବି କରୁଛନ୍ତି

ସରକାର ପର୍ଯ୍ୟଟନକୁ ଶିଳ୍ପର ଆଖ୍ୟା ଦେଇ ଏହାର ଉନ୍ନତି ପାଇଁ ବିଭିନ୍ନ ଯୋଜନା କରୁଛନ୍ତି। ଏଥିପାଇଁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ହେଲେ ରାୟଗଡା ଜିଲ୍ଲାର ଏହି ପର୍ଯ୍ୟଟନସ୍ଥଳିର ବିକାଶ ଉପରେ ନାହିଁ ସରକାରଙ୍କ ନଜର। ଏହି ପର୍ଯ୍ୟଟନ କ୍ଷେତ୍ରର ବିକାଶ ଦିଗରେ ସରକାର ଦୃଷ୍ଟି ଦେଲେ ଆଗାମୀ ଦିନରେ ଏହି ପର୍ଯ୍ୟଟନସ୍ଥଳୀ ପ୍ରତି ଆହୁରି ଅଧିକ ଲୋକ ଆକୃଷ୍ଟ ହେବେ ବୋଲି ମତପ୍ରକାଶ ପାଉଛି।
ରେଲୱେ ଟ୍ରାକରୁ ବଣିକ ସଂଘ ସଭାପତିଙ୍କ ମୃତଦେହ ଉଦ୍ଧାର

ବଲାଙ୍ଗିର ସଦର ଥାନା ଖୁଜେନପାଲି ରେଲୱେ ଟ୍ରାକରୁ ଜିଲ୍ଲା ବଣିକ ସଂଘ ସଭାପତି ତ୍ରିପୁରାରି ପାଣିଗ୍ରାହୀଙ୍କ ରକ୍ତ ଜୁଡୁବୁଡୁ ମୃତଦେହ ଉଦ୍ଧାର କରାଯାଇଛି। ରେଲୱେ ପୁଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ କରୁଥିବା ଜଣା ପଡିଛି । ତେବେ ତ୍ରିପୁରାରି ପାଣିଗ୍ରାହୀଙ୍କ କିପରି ମୃତ୍ୟୁ ଘଟିଲା ତାର କାରଣ ଅସ୍ପଷ୍ଟ ରହିଥିବା ବେଳେ ତାଙ୍କର ଏପରି ଅବସ୍ଥାର ମୃତଦେହ ମିଳିବା ସମସ୍ତଙ୍କୁ ସ୍ତବ୍ଧ କରିଛି।

ତେବେ ତ୍ରିପୁରାରି ପାଣିଗ୍ରାହୀ ଜିଲ୍ଲା ବଣିକ ସଂଘର ସଭାପତି ଥିବା ସହ ଜଣେ ଜଣାଶୁଣା ବ୍ୟବସାୟୀ ମଧ୍ୟ ଥିଲେ।ତେବେ ପରିବାର ଲୋକଙ୍କୁ ପଚରାଉଚରା କରିବା ସହ ଘଟଣାର ତଦନ୍ତ କରୁଛି ପୁଲିସ ।
ମେଳା ବୁଲିବାକୁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ

ଚମ୍ପୁଆ ବ୍ଲକ ସରେଇ ବୈତରଣୀ ନଦୀ ପଠାରେ ଥିବା କେଶରୀ କୁଣ୍ଡରେ ଲାଗିଛି ସକାଳୁ ଶ୍ରଦ୍ଧାଳୁଙ୍କ ଭିଡ଼ । ବୈତରଣୀ ନଦୀ ପଠାରେ ଥିବା ବିଶାଳ ପଥର ଚଟାଣ ମଧ୍ୟରେ ଥିବା କୁଣ୍ଡ ଭିତରେ ଶ୍ରଦ୍ଧାଳୁ ମାନେ ବୁଡ଼ ପକାଉ ଥିବା ଦେଖିବାକୁ ମିଳିଛି। ତେବେ କୁଣ୍ଡ ଭିତରେ ଥିବା ପାଣିରେ ବୁଡ଼ ପକାଇଲେ ପାପ କ୍ଷୟ ହେବା ସହ ପୁଣ୍ୟ ଅର୍ଜନ ହୋଇଥାଏ ବୋଲି ଲୋକ ମତ ରହିଛି। ବିଶେଷ କରି ମକର ସଂକ୍ରାନ୍ତି ରେ ଏଠାରେ ବୁଡ଼ ପକାଇଲେ ପୁଣ୍ୟ ଅର୍ଜନ କରିବାର ଲୋକ ମତ ରହିଥିବା ବେଳେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି।

ତେବେ ଚମ୍ପୁଆ ସଦର ମହକୁମା ଠାରୁ ମାତ୍ର ୧0 କି. ମି. ଦୂର ଏହି କେଶରୀକୁଣ୍ଡ । ମକର ମେଳାରେ ବୈତରଣୀ ନଦୀର ଉଭୟ ପାର୍ଶ୍ୱରେ ଲକ୍ଷ ଲକ୍ଷ ଲୋକଙ୍କ ସମାଗମ ହୋଇଥାଏ। ଲୋକେ ବୈତରଣୀ ନଦୀ ସହ ଏହି ପବିତ୍ର କୁଣ୍ଡରେ ବୁଡ଼ ପକାଇ ନିକଟସ୍ଥ ଶୈବ ପୀଠରେ ପୂଜା ଅର୍ଚନା କରିବା ପରେ ସାଙ୍ଗରେ ନେଇଥିବା ପିଠା ପଣା ଖାଇ ମକର ମେଳାର ମଜା ଉଠାଇଥାନ୍ତି
ବିଜେପିରେ ଯୋଗ ଦେବା ସହ ବିଜେଡ଼ିର କୁଶାସନ ଉପରେ ଭୟଙ୍କର ବର୍ଷିଲେ ନେତା ଓ କର୍ମୀ

ଆଗକୁ ସାଧାରଣ ନିର୍ବାଚନ ଏବେଠୁ ଅସମ୍ଭାଳ ହେଲେଣି ରାଜନୈତୀକ ଉଷ୍ମତା ନେତାମାନେ ଆରମ୍ଭ କଲେଣି ଏ ଦଳରୁ ସେ ଦଳକୁ ଡେଇଁବା । ଯାଜପୁର ଜିଲ୍ଲା ବରୀ ନିର୍ବାଚନ ମଣ୍ଡଳୀ ର ରସୁଲପୁରବ୍ଲକ ର ଦସ ଗୋଟି ପଞ୍ଚାୟତରେ ଶଙ୍ଖ ଛାଡି ପଦ୍ମ ଧରିଲେଣି ବିଜେଡି ନେତା, ସୁଚନା ଅନୁସାରେ ରସୁଲପୁର ବ୍ଲକ ଅନ୍ତର୍ଗତ ମୂଳାପାଳ ଛକ ନିକଟରେ ବରୀ ବିଜେପି ନେତା ଉମେଶ ଜେନା ଙ୍କ ନେତୃତ୍ୱରେ ଏକ ବିରାଟ ମିଶ୍ରଣ ପର୍ବ ର ଆୟୋଜନ କରାଯାଇଥିଲା ।ଏହି କ୍ରମରେ ବରୀ ରସୁଲପୁରବ୍ଲକ ଦଶ ପଂଚାୟତ ର ଶହ ଶହ କର୍ମୀ ଓ ମୁଖ୍ୟ ଆକର୍ଷଣ ରାଜେନ୍ଦ୍ରପୁର ପଂଚାୟତ ପୂର୍ବତନ ସରପଞ୍ଚ ଶୁଶାନ୍ତ କୁମାର ବେହେରା ଏବଂ ସାମନ୍ତରାପୁର ପଂଚାୟତ ର ପୂର୍ବତନ ସରପଞ୍ଚ ଅଭିମନ୍ୟୁ ମହାଲିକ ବିଜୁଜନତା ଦଳ ତଥା ଶଙ୍ଖ କୁ ପରିତ୍ୟାଗ କରି ବିଧିବଧ ଭାବେ ଭାରତୀୟ ଜନତା ପାର୍ଟି ତଥା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଙ୍କ ବିକାସ ଧାରାରେ ଅନୁପ୍ରାଣିତ ହୋଇ ବିଜେପି ରେ ଯୋଗ ଦେବା ସହ ବିଜେଡ଼ିର କୁଶାସନ ଉପରେ ଭୟଙ୍କର ବର୍ଶିବା ସହ ରସୁଲପୁର ର ଦଶ ପଂଚାୟତ କିଛି ଦଲାଲ୍ ଙ୍କ ପାଖରେ ବନ୍ଧା ପଡ଼ିଥିବା ମତ ରଖିଥିବା ସୂଚନା….

ଏହି କ୍ରମରେ ଜିଲ୍ଲା ସଭାପତି ଗୌତମ ରାୟ, ଡଃ ରବୀନ୍ଦ୍ର ନାରାୟଣ ବେହେରା ମଞ୍ଚ ପରିଚାଳନା ରେ ଆଶୁତୋଷ ପରିଡ଼ା ଜିଲ୍ଲା ସଂପାଦକ ମୁକୁନ୍ଦ ମହାନ୍ତି ମଣ୍ଡଳ ସଭାପତି ଲକ୍ଷ୍ମୀଧର ପତି ଏବଂ ଅନ୍ୟ ନେତୃବୃନ୍ଦ ମାନେ ଉପସ୍ଥିତ ରହି ବିଜେଡି ଉପରେ ଭୟଙ୍କର ବର୍ସିବା ସହ ବରୀ ରେ କେଉଁ ଭଳି ଭାବେ ଘରେ ଘରେ ପଦ୍ମ ଫୁଟିବ ଏ ନେଇ ନୂତନ ମିଶ୍ରିତ ନେତା ମାନଙ୍କୁ ଗୁରୁ ମନ୍ତ୍ର ଦେଇଥିଲେ !!