Blog

OMC ସୁକାକାଠି ରୁ ଗୁହାଳ ଡ଼ିହି କୁ ରେଳ ସଂଯୋଗୀକରଣ ପ୍ରସ୍ତାବକୁ କେନ୍ଦୁଝର ଜିଲ୍ଲା ଟ୍ରକ ମାଲିକ ସଙ୍ଘର ବିରୋଧ। ରେଳ ଯୋଗେ ଲୁହାପଥର ପରିବହନ ହେଲେ ଜିଲ୍ଲାର ଆର୍ଥିକ ମେରୁଦଣ୍ଡ ଭୁଶୁଡି ପଡିବ। ଟ୍ରକ ପରିବହନରେ ନିୟୋଜିତ ଲୋକମାନେ ରୋଜଗାର ହରାଇବେ ଅଭିଯୋଗ କରି ଜିଲ୍ଲା ଟ୍ରକ ମାଲିକ ସଂଘ ରେଳପଥ ସଂଯୋଗୀକରଣକୁ ବିରୋଧ କରୁଛନ୍ତି।

ନିଜର ଦାବି ଉପସ୍ଥାପନ କରିବାକୁ ଜିଲ୍ଲା ବନ୍ଦ ଡାକରା ଦିଆଯାଇଛି। ଏଥିପାଇଁ ଘଷିପୁରା ସ୍ଥିତ ଝାଡେଶ୍ୱର ମନ୍ଦିର ନିକଟରେ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ଜିଲ୍ଲାର ଟ୍ରକ ମାଲିକ ସଙ୍ଘର ସଭାପତି ରମାକାନ୍ତ ନାୟକ ,ସମ୍ପାଦକ ସୂର୍ଯ୍ୟ ନାରାୟଣ କରଙ୍କ ନେତୃତ୍ୱରେ ବୈଠକ ଅନୁଷ୍ଠିତ ହୋଇଥିଲା। ସରକାର ନେଇଥିବା ରେଳପଥ ସଂଯୋଗୀକରଣରୁ ଓହରିବାକୁ ଦାବି କରିଥିଲେ ଟ୍ରକ ମାଲିକ ସଂଘ ନେତୃତ୍ବ

ଏଥିରେ ଆନନ୍ଦପୁର ଉପଖଣ୍ଡର ଟ୍ରକ ମାଲିକ ସଙ୍ଘର ସଦସ୍ୟମାନେ ଯୋଗ ଦେଇଥିଲେ। ଶାନ୍ତି ଶୃଙ୍ଖଳା ରେ ବନ୍ଦ ପାଳନ କରି ସେମାନଙ୍କ ଦାବି ଉପସ୍ଥାପନର ମାଧ୍ୟମକୁ ସଫଳ କରିବା ଉପରେ ଆଲୋଚନା କରାଯାଇଥିଲା ।

ରାଜ୍ୟ ସରକାର ରାଜ୍ୟବ୍ୟାପୀ ସୌନ୍ଦର୍ଯ୍ୟକରଣ କାମ ହାତକୁ ନେଇଛନ୍ତି। ଏଥିପାଇଁ କୋଟିକୋଟି ଟଙ୍କା ଖର୍ଚ୍ଚ ହେଉଛି। କିନ୍ତୁ ଏହି ସୌନ୍ଦର୍ଯ୍ୟକରଣରେ ହେଉଛି ବ୍ୟାପକ ଚଞ୍ଚକତା। ଭାତ ହାଣ୍ଡିରୁ ଗୋଟିଏ ଭାତ ଚିପିଲା ପରି ଚାନ୍ଦବାଲିରେ ହୋଇଥିବା ହରିଲୁଟ ଗୋଟିଏ। ଚାନ୍ଦବାଲିରେ ହୋଇଥିବା ଏକ ସୌନ୍ଦର୍ଯ୍ୟକରଣରେ ୪ କୋଟିର ଘୋଟାଲା ହୋଇଥିବା ନେଇ ହୋଇଛି ଅଭିଯୋଗ। ଏନେଇ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଛି।

ଚାନ୍ଦବାଲି ଏନଏସିର ୭ ନଂ ୱାର୍ଡର କାଉନସିଲର ଚନ୍ଦନ ରାଉତ ଏକ ଲିଖିତ ଅଭିଯୋଗ କରିଛନ୍ତି। ଅଭିଯୋଗ ମୁତାବକ ଚାନ୍ଦବାଲି ବଡବଜାରରୁ ବିଏସଏନଏଲ କାର୍ଯ୍ୟାଳୟ ପର୍ଯ୍ୟନ୍ତ ବୈତରଣୀ ନଦୀ ପାର୍ଶ୍ଵରେ ସୌନ୍ଦର୍ଯ୍ୟକରଣ କାର୍ଯ୍ଯ ହୋଇଥିଲା। ଏହି କାର୍ଯ୍ୟରେ ନିୟମ ଅନୁଯାୟୀ କଂକ୍ରିଟ ପିଲର କରାଯାଉଛି। ହେଲେ ଏହି କାର୍ଯରେ ସଠିକ ଭାବେ ପାଇଲିଙ୍ଗ କରାଯାଉ ନାହିଁ। ଏଥିସହ ପିଲର ଯେଉଁ ଗଭୀରତାରେ କରାଯିବା କଥା ତାହା କରାଯାଇନାହିଁ।

ନିୟମକୁ ବାଏଁ ବାଏଁ ଉଡାଇ ଏଥିରେ ପ୍ରାୟ ୪ କୋଟିର ଘୋଟାଲା ହୋଇଥିବା ଅଭିଯୋଗ କରିଛନ୍ତି କାଉନସିଲର ।ସମ୍ପୃକ୍ତ ଠିକାଦାର ଏଭଳି ମନମାନୀ କାର୍ଯ୍ୟ କରୁଛନ୍ତି ବୋଲି ସ୍ଥାନୀୟ ଲୋକଙ୍କ ମଧ୍ୟରେ ମଧ୍ୟ ଅସନ୍ତୋଷ ବୃଦ୍ଧି ପାଉଛି। ଏହାକୁ ନେଇ ବିଭାଗୀୟ ଅଧିକାରୀ ତଦନ୍ତ ପାଇଁ ଆସିଥିଲେ ମଧ୍ୟ ଅଭିଯୋଗକାରୀଙ୍କୁ କୈାଣସି ଖବର ଜଣା ଯାଇନଥିଲା ବୋଲି ଶ୍ରୀ ରାଉତ କହିଛନ୍ତି ।

ଚାନ୍ଦବାଲି ଏନଏସିର ୭ ନଂ ୱାର୍ଡର କାଉନସିଲର ଚନ୍ଦନ ରାଉତ ଜିଲ୍ଲାପାଳଙ୍କୁ ଏନେଇ ଏକ ଲିଖିତ ଅଭିଯୋଗ କରିବା ପରେ ସେ ଉଚ୍ଚସ୍ତରୀୟ ତଦନ୍ତ କରାଇ ସତ୍ୟାସତ୍ୟ ପରଖିବାକୁ ଦେଇଛନ୍ତି ନିର୍ଭର ପ୍ରତିଶ୍ରୁତି। ଏବେ ଦେଖିବାକୁ ରହିଲା, କେବେ ଏହାର ତଦନ୍ତ ହେବ, ଜିଲ୍ଲାପାଳ ଏହା ଉପରେ କି ପଦକ୍ଷେପ ନେବେ