ରେଳଧାରଣାରୁ ମିଳିଲା ଖଣ୍ଡ ବିଖଣ୍ଡିତ ମୃତଦେହ, ହତ୍ୟା ସନ୍ଦେହ

ଚମ୍ପୁଆ ସୀମାନ୍ତ ଝାଡ଼ଖଣ୍ଡ, ପଶ୍ଚିମ ସିଂହଭୂମ ଜିଲ୍ଲାର ଚକ୍ରଧରପୁର ରେଳ ବିଭାଗର ତାଲାବୁରୁ ଏବଂ କେନ୍ଦୋପୋସି ରେଳ ଷ୍ଟେସନ ମଧ୍ୟରେ ଥିବା ରେଳ ଟ୍ରାକରୁ ଚାରି ଜଣଙ୍କ ଖଣ୍ଡ ବିଖଣ୍ଡିତ ମୃତଦେହ ମିଳିଛି । ଟ୍ରାକରେ ପଡ଼ିଥିବା ଶବଗୁଡ଼ିକରେ ଜଣେ ଯୁବକ, ଜଣେ ମହିଳା ଏବଂ ଦୁଇ ଶିଶୁ, ଗୋଟିଏ ଆଠ ମାସର ଶିଶୁ, ଏବଂ ଗୋଟିଏ ଅଢେଇ ବର୍ଷ ଝିଅର ଶବ ରହିଥିବା ସୂଚନା ରହିଛି ।

ଶବ ଗୁଡ଼ିକୁ ଅନେକ ଖଣ୍ଡରେ ବିଭକ୍ତ କରାଯାଇଛି । ଦୁଇ ଶିଶୁଙ୍କ ମୃତ ଦେହକୁ ପ୍ଲାଷ୍ଟିକ ଆଖାରେ ଭର୍ତ୍ତି କରାଯାଇ ଥିଲାବେଳେ, ୪ ଟି ଯାକ ମୃତ ଦେହ ତ୍ରାକର ଅଲଗା ଅଲଗା ସ୍ଥାନରେ ପଡିଥିବା ଦେଖିବାକୁ ମିଳିଛି । ମହିଳାଙ୍କ ଶରୀରର ହାତ ଓ ଗୋଡ଼ ବନ୍ଧା ଯାଇଥିଲା ବେଳେ, ତାଙ୍କ ଶରୀରକୁ ଦୁଇ ଭାଗରେ କଟିଥିବା ଦେଖିବାକୁ ମିଳିଛି । ସେହିପରି ଯୁବକଙ୍କ ମୁଣ୍ଡ ତାଙ୍କ ଶରୀରରୁ ଅଲଗା ହୋଇ ଥିବା ଦେଖାଯାଇଛି । ହତ୍ୟା ପରେ ସେମାନଙ୍କ ମୃତଦେହକୁ ରେଲୱେ ଟ୍ରାକରେ ଫୋପାଡି ଦିଆଯାଇଥିବା ସନ୍ଦେହ କରାଯାଉଛି ।

ତେବେ ଏହା ହତ୍ୟାକାଣ୍ଡ ନା ନାହିଁ ସେନେଇ କିଛି ସ୍ପଷ୍ଟ ହୋଇନାହିଁ। ଗତକାଲି ରାତିରେ ଏହି ଘଟଣା ଘଟିଥିବା କୁହାଯାଉଛି। ମୃତଦେହ ଦେଖିବା ପରେ ଟ୍ରାକରେ ଟ୍ରେନ୍ ଚଳାଚଳ ବନ୍ଦ ରଖାଯାଇଛି । ମୃତ ୪ ଜଣଙ୍କର ପରିଚୟ ମଧ୍ୟ ମିଳିପାରିନାହିଁ । ପୋଲିସ ମୃତଦେହ ଚିହ୍ନଟ କରିବା ପାଇଁ ଚେଷ୍ଟାଚଳାଇଛି । ଡିଏସପି ରାକେଶ ମିନଜଙ୍କ ସହ ଜଗନ୍ନାଥପୁର ରେଳବାଇ ପୋଲିସ ମଧ୍ୟ ଘଟଣାସ୍ଥଳରେ ଉପସ୍ଥିତ ରହି ତଦନ୍ତ ଚଳାଇଛନ୍ତି । ଘଟଣାର ଅନୁସନ୍ଧାନ ପାଇଁ ଫୋରେନସିକ୍ ଟିମ୍ ଓ ଡଗ୍ ସ୍କ୍ୱାର୍ଡ ଡକାଯାଇ ଅନୁସନ୍ଧାନ ଜାରୀ ରଖାଯାଇଛି ।