କେନ୍ଦୁଝର ଘଟଗାଁ ବନ ବିଭାଗ ଢେଙ୍କିକୋଟ ବିଟ୍ ଅଞ୍ଚଳରେ ହାତୀ ଆତଙ୍କ । ମେଣ୍ଢାମୁଣ୍ଢା ସାହିରେ ହାତୀଙ୍କ ଉପଦ୍ରବ ବଢ଼ିବାରେ ଲାଗିଛି । ଏହାକୁ ନେଇ ସ୍ଥାନୀୟ ଲୋକେ ଭୟଭୀତ ମଧ୍ୟ ହୋଇଛନ୍ତି ।
ରାତି ହେଉ ଅବା ଦିନ । ଫସଲ ନଷ୍ଟ କରିବା, ଧନସମ୍ପତ୍ତି ନଷ୍ଟ କରିବା, ଲୋକଙ୍କ ଜୀବନ ନେବା ହାତୀଙ୍କ ଏକପ୍ରକାର ପେଷାଗତ କାର୍ଯ୍ୟ । ହାତୀର ମନ ଯାହା ଚାହେଁ ସେ କରେ । କାହାକୁ ମାନେ ନାହିଁ । ହାତୀ ଓ ମଣିଷ ଲଢ଼େଇରେ ବେଳେ ବେଳେ ହାତୀଙ୍କ ଜୀବନ ବି ଗଲାଣି । ଅଧିକାଂଶ ସମୟରେ ହାତୀ ଆକ୍ରମଣରେ ସବୁ କିଛି ହରାଇବାକୁ ପଡ଼ିଛି ।
ଏମିତି ଏକ ଦୁଃଖଦ ଘଟଣା ଆସିଛି ଘଟଗାଁ ମେଣ୍ଢାମୁଣ୍ଢା ସାହିରୁ । ରାତିରେ ଡାକ୍ତର ମୁଣ୍ଡାଙ୍କ ଘରକାନ୍ଥ ଭାଙ୍ଗି ଦେଇଥିଲା ହାତୀ । ଶୋଇଥିବା ବେଳେ କାନ୍ଥ ଭୁଶୁଡ଼ି ଡାକ୍ତର ମୁଣ୍ଡା, ତାଙ୍କ ପତ୍ନୀ ରଶ୍ମିତା, ବଡ଼ଝିଅ ସୋନାଲି ଏବଂ ସାନଝିଅ ମୋନାଲିସା ଗୁରୁତର ଆହତ ହୋଇଥିଲେ । ସେମାନଙ୍କୁ ପ୍ରଥମେ ଘଟଗାଁ ମେଡିକାଲରେ ଭର୍ତ୍ତି କରାଯାଇଥିଲା । ପରେ ଜିଲ୍ଲା ହସ୍ପିଟାଲ ନିଆଯାଇଥିଲା । ସେଠାରେ କିନ୍ତୁ ଦେଢ଼ବର୍ଷୀୟ ଶିଶୁକନ୍ୟା ମୋନାଲିସା ପ୍ରାଣ ହରାଇଥିଲା । ଡାକ୍ତର ମୁଣ୍ଡାଙ୍କ ପତ୍ନୀ ରଶ୍ମିତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ଏସସିବି ପଠାଯାଇଛି । ସେପଟେ, ବନ ବିଭାଗ ପକ୍ଷରୁ ପରିବାରକୁ ପ୍ରାଥମିକ କ୍ଷତିପୂରଣ ପ୍ରଦାନ କରାଯାଇଛି ।