ନା ଫ୍ରିଜ୍, ନା ଆଇସ୍କ୍ରିମ୍ ମେସିନ୍। କେବଳ ଛାତ ପଙ୍ଖାରେ ଜମିଗଲା କୁଲଫି। ଶୁଣିବାକୁ ଅବିଶ୍ୱସନୀୟ ଲାଗୁଥିଲେ ମଧ୍ୟ ଏଭଳି ଏକ ଅଜବ ଦେଶୀ ଯୁଗାଡ଼ର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେଉଛି। ଜଣେ ମହିଳାଙ୍କ ଏହି ନିଆରା କୌଶଳ ଦେଖି ଆଶ୍ଚର୍ଯ୍ୟ ହୋଇଯାଇଛନ୍ତି ଇଣ୍ଟରନେଟ୍ ୟୁଜର୍ସ। କିଏ ମହିଳାଙ୍କ ବୁଦ୍ଧିକୁ ପ୍ରଶଂସା କରୁଛନ୍ତି ତ ଆଉ କିଏ ମଜାଳିଆ କମେଣ୍ଟ କରୁଛନ୍ତି।
ଭାରତରେ ଦେଶୀ ଯୁଗାଡ଼ର କୌଣସି ଅଭାବ ନାହିଁ। କେତେବେଳେ ପୁରୁଣା ଜିନିଷରେ ତିଆରି ହେଉଛି ଅଦ୍ଭୁତ ମେସିନ୍, ତ ଆଉ କେତେବେଳେ ସାଧାରଣ ଘରୋଇ ଉପକରଣରେ ହେଉଛି ଅସାଧାରଣ କାମ। ଏବେ ସେହିଭଳି ଏକ ଭିଡିଓ ସମସ୍ତଙ୍କ ଦୃଷ୍ଟି ଆକର୍ଷଣ କରିଛି।
ଭାଇରାଲ୍ ଭିଡିଓରେ ଦେଖିବାକୁ ମିଳୁଛି, ମହିଳା ଜଣକ ପ୍ରଥମେ ଏକ ବଡ଼ ହାଣ୍ଡିରେ କ୍ଷୀରକୁ ଭଲଭାବେ ଫୁଟାଇ ଘନ କରୁଛନ୍ତି। ଏହାପରେ ସେଥିରେ ଚିନି ସହ ଅନ୍ୟାନ୍ୟ ସାମଗ୍ରୀ ମିଶାଇ କୁଲଫି ପ୍ରସ୍ତୁତ କରୁଛନ୍ତି। ପ୍ରସ୍ତୁତ ମିଶ୍ରଣକୁ ଏକ ଛୋଟ ଷ୍ଟିଲ୍ ଡବାରେ ଭର୍ତ୍ତି କରି ଢାଙ୍କୁଣି ବନ୍ଦ କରିଦେଉଛନ୍ତି।
ଏହାପରେ ଆରମ୍ଭ ହେଉଛି ଅସଲ ଯୁଗାଡ଼। ମହିଳା ଜଣକ ଏକ ପ୍ଲାଷ୍ଟିକ୍ ଟବ୍ରେ ବରଫ ଓ ଲୁଣ ରଖି ତାହା ଭିତରେ କୁଲଫି ଭର୍ତ୍ତି ଷ୍ଟିଲ୍ ଡବାକୁ ରଖୁଛନ୍ତି। ପରେ ପୂରା ଟବ୍କୁ ଦଉଡ଼ିରେ ବାନ୍ଧି ଘରର ସିଲିଂ ଫ୍ୟାନ୍ରେ ଝୁଲାଇ ଦେଉଛନ୍ତି।
ପଙ୍ଖା ଚାଲିବା ମାତ୍ରେ ଟବ୍ଟି ଘୂରିବାକୁ ଲାଗୁଛି। ବରଫ ଓ ଲୁଣ ମିଶ୍ରଣର ଥଣ୍ଡା ପ୍ରଭାବ ସହ ନିରନ୍ତର ଘୂର୍ଣ୍ଣନ ଯୋଗୁଁ ଡବା ଭିତରେ କୁଲଫି ଜମିଯାଉଥିବା ଭିଡିଓରେ ଦାବି କରାଯାଇଛି। ତେବେ କୁଲଫିକୁ ଥଣ୍ଡା କରିବାର ମୁଖ୍ୟ କାମ ବରଫ ଓ ଲୁଣ କରୁଛି, ପଙ୍ଖା ନୁହେଁ।
ଏହି ଭିଡିଓ ଦେଖି ଜଣେ ୟୁଜର୍ ମଜାରେ ଲେଖିଛନ୍ତି, ଏତେ ବୁଦ୍ଧି ପାଠପଢ଼ାରେ ଲଗାଇଥିଲେ ଆଜି ନାସାରେ ଥାଆନ୍ତୁ। ଆଉ କିଏ ଏହାକୁ ଏକବିଂଶ ଶତାବ୍ଦୀର ଦେଶୀ ଯୁଗାଡ଼ ବୋଲି କହିଛନ୍ତି।
ତେବେ ଏହି କୌଶଳ ବିପଜ୍ଜନକ ମଧ୍ୟ ହୋଇପାରେ। ଚାଲୁଥିବା ପଙ୍ଖାରେ ଭାରୀ ଟବ୍ ଝୁଲାଇଲେ ଏହା ଖସିପଡ଼ି ଗୁରୁତର ଦୁର୍ଘଟଣା ଘଟାଇପାରେ। ତେଣୁ ଘରେ ଏଭଳି ପରୀକ୍ଷା ନକରିବାକୁ ପରାମର୍ଶ ଦିଆଯାଉଛି।