ପୁଣି ହାତି ଆତଙ୍କ । ଗାଁ ମୁହାଁ ହେବାରେ ଲାଗିଛନ୍ତି ହାତୀ । ଫଳରେ ଗ୍ରାମବାସୀ ଭୟବିତ ଅବସ୍ଥାରେ ରହୁଛନ୍ତି । କାରଣ ହାତୀ ଗାଁ ମୁହାଁ ହେବା ଫଳରେ ଅନେକ ଧନ ଜୀବନ ନଷ୍ଟ ହେଉଛି । ସେମିତି କିଛି ଦେଖିବାକୁ ମିଳିଛି ବରଗଡ ଜିଲ୍ଲା ପଦ୍ମପୁର ଅଞ୍ଚଳରେ । ପଦ୍ମପୁର ରେଞ୍ଜ ସତିଭଟା , ସାଲେଗେଡି,ଦର୍ବେକେଲା ଅଞ୍ଚଳରେ ଆଜି ସକାଳୁ ଏକ ଦନ୍ତା ହାତୀ ବୁଲୁଥିବା ଦେଖିବାକୁ ମିଳିଛି । ଫଲରେ ଲୋକଙ୍କ ମନରେ ଭୟରବାତାବରଣ ଖେଳିଯାଇଛି । ଦନ୍ତା ହାତୀ ଟି ଜଗଦଳପୁର ପଟରୁ ପଦ୍ମପୁର ଆଡକୁ ଆସିଛି । ତେବେ ହାତୀକୁ ଘଉଡାଇବା ପାଇଁ ବନବିଭାଗ ଆପ୍ରାଣ ଉଦ୍ୟମ ଚଲାଇବା ସହ ଲୋକଙ୍କୁ ସତର୍କତା କରାଉଛନ୍ତି ।
ବରଗଡ ଜିଲ୍ଲାରେ ସ୍କ୍ରବ ଟାଇଫସ ସଂକ୍ରମଣ ଥମିବାର ନାଁ ନେଉନି। ପ୍ରତ୍ୟହ କିଛି ନା କିଛି ସଂକ୍ରମିତ ଚିହ୍ନଟ ହେବା ସହ ଏଯାବତ୍ ୭ ଜଣଙ୍କ ମୃତ୍ୟୁ ହେଲାଣି। ତେଣୁ ଆଜି ମଧ୍ୟ ବରଗଡରେ କେନ୍ଦ୍ରୀୟ ମେଡିକାଲ ଟିମ୍ ରୋଗର ସ୍ଥିତି ଯାଞ୍ଚ ପାଇଁ ପହଞ୍ଚିଛନ୍ତି। ଏହି ଟିମରେ ରାଜ୍ୟ ମେଡିକାଲ ଅଫିସର ୩ ଜଣଙ୍କ ସହ କେନ୍ଦ୍ରର ଦୁଇଜଣ ରହିଛନ୍ତି। ଟିମ୍ ପ୍ରଥମେ ଜିଲ୍ଲା ମୁଖ୍ଯ ଚିକିତ୍ସାଧିକାରୀଙ୍କ ସମ୍ମିଳନୀ କକ୍ଷରେ ଆୟୋଜିତ ସମୀକ୍ଷା ବୈଠକରେ ଯୋଗଦେଇ ଜନ ସ୍ୱାସ୍ଥ୍ୟ ଅଧିକାରୀ ସାଧୁ ଚରଣ ଦାସଙ୍କ ସହ ସ୍କ୍ରବ୍ ଟାଇଫସ ଉପରେ ସମୀକ୍ଷା କରିଥିଲେ। ଗଣମାଧ୍ୟମ ସେମାନଙ୍କ ସହ ବୈଠକରେ ସାମିଲ ହେବାକୁ ଚାହିଁବାରୁ କେନ୍ଦ୍ରୀୟ ଅଧିକାରୀ ରୋଗର ଭୟାବହତା ପାଇଁ ସେମାନଙ୍କୁ ଭିତରକୁ ଯିବାକୁ ଦେଇନଥିଲେ। ଜିଲ୍ଲାରେ ସ୍କ୍ରବ ଟାଇଫସର ବ୍ୟାପକତା ଓ ଚିକିତ୍ସାର ସଠିକତା ଉପରେ ଅନୁଧ୍ୟାନ କରିବେ ବୋଲି ବରଗଡ ଡିପିଏଚଓ କହିଛନ୍ତି। ଏଥିସହ ଡିପିଏଚଓ ଜିଲ୍ଲାରେ ସ୍କ୍ରବ ଟାଇଫସରେ ବର୍ଷ ଆରମ୍ଭରୁ ଏଯାବତ୍ ୧୭୭୫ ଟେଷ୍ଟିଂ ହୋଇଥିବା ବେଳେ ୮୯ ସଂକ୍ରମିତ ଚିହ୍ନଟ ହୋଇଛନ୍ତି ତଥା ୭ ଜଣଙ୍କ ଏଥିରେ ମୃତ୍ୟୁ ହୋଇଥିବା କହିଛନ୍ତି।
ତେବେ କେବଳ ବରଗଡ ନୁହେଁ ସୁନ୍ଦରଗଡ ଏବେ ସ୍କ୍ରବ ଟାଇଫସର କେନ୍ଦ୍ର ପାଲଟିଛି। ପଡୋଶୀ ଜିଲ୍ଲାକୁ ମଧ୍ୟ ବ୍ୟାପିବାରେ ଲାଗିଛି ଏହି ରୋଗ।ତେବେ ଜିଲ୍ଲା ସ୍ବାସ୍ଥ୍ୟ ବିଭାଗ ପକ୍ଷରୁ ଲୋକଙ୍କୁ ସଚେତନ କରିବାକୁ ଆଶା, ଏଏନଏମ, ଫାର୍ମାସିଷ୍ଟଙ୍କୁ ତାଲିମ ଦିଆଯାଇ ଲୋକଙ୍କୁ ସଚେତନ କରାଯାଉଛି। ଏଥିସହ ଚିକିତ୍ସା ପାଇଁ ପର୍ଯ୍ୟାପ୍ତ ଔଷଧ ମହଜୁଦ ଥିବା କହିଛନ୍ତି।
ଜିଲ୍ଲାରେ ଜାଲ ସାର୍ଟିଫିକେଟ ଦ୍ୱାରା ଚାକିରୀ କରୁଥିବା ଘଟଣାର ପର୍ଦାଫାଶ କରିଛନ୍ତି ବରଗଡ଼ SDPO। ଏନେଇ ଏକ ସାମ୍ବାଦିକ ସମ୍ମିଳନିରେ ସୂଚନା ଦେଇଛନ୍ତି । ଜାଲ ଜାତିଗତ ପ୍ରମାଣ ପତ୍ର ତିଆରି କରି ୫ ଜଣ ବ୍ୟକ୍ତି ଙ୍କୁ ଭଟଲି ପୋଲିସ ଗିରଫ କରିଥିବା ବେଳେ ଏନେଇ ଅଧିକ ତଦନ୍ତ ଚାଲିଛି । ଉତ୍ତର ପ୍ରଦେଶ ରାଜ୍ୟ ରୁ ଭଟଲିକୁ ଆସି ୩ ଯୁବକ ନକଲି ଜାତିଗତ ପ୍ରମାଣପତ୍ର ତିଆରି କରିଥିଲେ ।ପରେ ଜାତିଗତ ପ୍ରମାଣ ପତ୍ର ନେଇ ଚାକିରୀ ପାଇଁ ଆବେଦନ ବେଳେ ଧରାପଡିଲେ । ଭଟଲି ଥାନାରେ ଜଣେ ଆର .ଆଇ, ଓ ସରପଞ୍ଚ ଙ୍କ ସମେତ ମୋଟ ୫ ଜଣ ଙ୍କୁ ଅଟକ ରଖିଛି ପୋଲିସ ।ଏହି ଜାଲ ଜାତିଗତ ପ୍ରମାଣ ପତ୍ର କରବାରରେ ଲିପ୍ତଥିବା ଉତ୍ତର ପ୍ରଦେଶର ବିରପାଳ ସିଂ, ବବ୍ଲେସ କୁମାର, ରବିକାନ୍ତ,ଭଟଲି ତହସିଲ ଅନ୍ତର୍ଗତ ସୁକୁଡା ଆରଆଇ ସନ୍ଦୀପ କୁମାର ଶତପଥି ଓ ଡ଼ୁମେଲପାଳିର ସରପଞ୍ଚ ମନୋରଞ୍ଜନ ଦୋରାକୁ ପୋଲିସ ଗିରଫ କରିବା ସହ ଅଧିକ ତଦନ୍ତ ଜାରିରଖିଥିବା ନେଇ ସୂଚନା ଦେଇଛନ୍ତି ବରଗଡ SDPO |
ବରଗଡ ଟାଉନ ପୋଲିସକୁ ମିଳିଲା ବଡ ଧରଣର ସଫଳତା। ଏକ ଠକ ଗ୍ୟାଙ୍ଗକୁ କାବୁ କରିଛି ପୋଲିସ। ମହେନ୍ଦ୍ରା କମ୍ପାନୀର କର୍ମଚାରୀ କହି ବରଗଡ ଅମ୍ବାପାଳିର ଅଜୟ ରେଖାନୀ ନାମକ ଜଣେ ବ୍ୟକ୍ତିଙ୍କ ଠାରୁ କୌଶଳ କ୍ରମେ ଲକ୍ଷାଧିକ ଟଙ୍କା ଠକିଥିବା ନେଇ ଅଭିଯୋଗ ପରେ ଏକ ରାକେଟକୁ କାବୁ କରିଛି ବରଗଡ ଟାଉନ ପୋଲିସ।
୧୩ ଜଣ ଅଭିଯୁକ୍ତଙ୍କୁ ବରଗଡ ଟାଉନ ପୋଲିସ ଗିରଫ କରିବା ସହିତ ସେମାନଙ୍କ ଠାରୁ ୨୩ ଗୋଟି ମୋବାଇଲ ଫୋନ , ନଗତ ୧ ଲକ୍ଷ ୯୫ ହଜାର ୬୪୦ ଟଙ୍କା , ୱେଷ୍ଟ ବେଙ୍ଗଲ ନମ୍ବର ରହିଥିବା ଏକ କାର , ୪ଟି ଲେପଟପ , ଦୁଇଟି ବ୍ଳାଙ୍କ ଚେକ ଓ ଅନେକ ନକଲି ପରିଚୟ ପତ୍ର ସହିତ ଠକାମିରେ ବ୍ୟବହୃତ ଅନେକ କାଗଜାତ ଜବତ କରିଛି ପୋଲିସ ।
୨ ଲକ୍ଷ ଟଙ୍କାର ଠକାମିର ଶିକାର ହୋଇଥିବା ବରଗଡ ଅମ୍ବାପାଳିର ଅଜୟ ରେଖାନୀ ନାମକ ଜଣେ ବ୍ୟକ୍ତିଙ୍କ ଅଭିଯୋଗ ପାଇବା ପରେ ଆକ୍ସନ୍ ମୋଡକୁ ଆସିଥିଲା ପୋଲିସ । ଏବଂ ଏହି ଠକ ଗ୍ୟାଙ୍ଗକୁ କାବୁ କରିବାରେ ସଫଳ ହୋଇଥିଲେ । ଏନେଇ ଆଜି ବରଗଡ ଟାଉନ ଥାନାରେ ହୋଇଥିବା ସାମ୍ବାଦିକ ସମ୍ବିଳନୀରେ ବରଗଡ ଉପଖଣ୍ଡ ଅଧିକାରୀ ଘଟଣାର ସୂଚନା ଦେଇଛନ୍ତି।
ବରଗଡ଼ ଟାଉନ ଥାନା ପକ୍ଷରୁ ବୀର ଛକରେ ଦୁଇଟି ଗାଡିରୁ ବିପୁଳ ପରିମାଣର ଗଞ୍ଜେଇ ଜବତ କରାଯାଇଛି । ପୋଲିସର ପେଟ୍ରୋଲିଂ ଚାଲିଥିବା ବେଳେ ସନ୍ଦେହରେ ଦୁଇଟି ଗାଡି କୁ ଯାଞ୍ଚ କରିଥିଲା । ସେଥିରୁ ଗଞ୍ଜେଇ ଜବତ ସହ ତିନି ଜଣଙ୍କୁ ଗିରଫ କରିଛି ଟାଉନ ପୋଲିସ । ଗିରଫ ଯୁବକମାନେ ଜବଲପୁର ମସନିଆ ଗ୍ରାମର ଜୟ ସାହୁ, ଅଭିଷେକ ସିଦାର, ବିଜୟ ଖୁସବା ବୋଲି ଜଣାପଡିଛି । ଜବତ ଗଞ୍ଜେଇ ବୌଦ୍ଧ ଅଞ୍ଚଳରୁ ଛତିଶଗଡ଼ ଚାଲାଣ ହେଉଥିବା ବେଳେ ଏନେଇ ପୋଲିସ ତଦନ୍ତ ଜାରିରଖିଛି । ତେବେ ଏହାର ଚେର କେତେ ଦୂର ଲମ୍ବିଛି ସେନେଇ ଅଧିକ ତଦନ୍ତ କରୁଛି ଟାଉନ ପୋଲିସ |
ବରଗଡ ଜିଲ୍ଲାରେ ୩ଟି ବୃହତ ସେତୁର ନିର୍ମାଣ ପାଇଁ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ୩୯ କୋଟି ଟଙ୍କା ମଞ୍ଜୁର କରିଛନ୍ତି। ଏହି ୩ଟି ନୂତନ ସେତୁ ଦ୍ବାରା ଜିଲ୍ଲାର ପ୍ରାୟ ୭.୨୫ ଲକ୍ଷ ଲୋକ ଉପକୃତ ହେବେ। ଏହାଦ୍ବାରା ଜିଲ୍ଲାରେ ଗମନାଗମନର ସୁବିଧା ସହିତ ସାମାଜିକ ସୁବିଧା ସୁଯୋଗ ଓ ଆର୍ଥିକ ଅଭିବୃଦ୍ଧିରେ ସହାୟକ ହେବ ବୋଲି ମୁଖ୍ୟମନ୍ତ୍ରୀ ଆଶାପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ 5T ସଚିବ ଶ୍ରୀ ଭି.କେ. ପାଣ୍ଡିଆନ ଗତ ଜୁନ୍ ମାସ ୨୬ ଓ ୨୭ ତାରିଖରେ ବରଗଡ ଗସ୍ତ କରି ବିଭିନ୍ନ ଉନ୍ନୟନମୂଳକ ଯୋଜନାର ସମୀକ୍ଷା କରିବା ସହିତ ସାଧାରଣ ଲୋକଙ୍କୁ ଭେଟି ସେମାନଙ୍କ ଅଭିଯୋଗ ଶୁଣିଥିଲେ। ବିଭିନ୍ନ ସ୍ଥାନରେ ଲୋକଙ୍କ ଅନୁରୋଧକୁ ଶ୍ରୀ ପାଣ୍ଡିଆନ ମୁଖ୍ୟମନ୍ତ୍ରୀଙ୍କୁ ଅବଗତ କରାଇଥିଲେ। ଏହାପରେ ମୁଖ୍ୟମନ୍ତ୍ରୀ ବରଗଡ ଜିଲ୍ଲାରେ ୩ଟି ନୂତନ ବୃହତ ସେତୁର ନିର୍ମାଣ ପାଇଁ ୩୯ କୋଟି ଟଙ୍କା ମଞ୍ଜୁର କରିଛନ୍ତି।
ମଞ୍ଜୁର ହୋଇଥିବା ୩ଟି ସେତୁ ମଧ୍ୟରେ ବରପାଲିରେ ଗୋଟିଏ ବୃହତ ସେତୁ ରହିଛି। ବରପାଲିର ଜିଲୋଟ ନାଳ ଉପରେ ଏକ ସେତୁ ନିର୍ମାଣ କରାଯିବ। ୧୨୦ ମିଟର ଦୀର୍ଘ ଏହି ସେତୁ ପାଇଁ ୧୫ କୋଟି ଟଙ୍କା ଖର୍ଚ୍ଚ ହେବ। ଏହା ବରଗଡ ଓ ବରପାଲି ବ୍ଲକ ମୁଖ୍ୟାଳୟକୁ ସଂଯୋଗ କରିବା ସହିତ ଜିଲ୍ଲା ମୁଖ୍ୟାଳୟକୁ ମଧ୍ୟ ଯୋଗାଯୋଗର ସୁବିଧା ସୃଷ୍ଟି ହେବ। ଏହାଦ୍ୱାରା ପ୍ରାୟ ୨ ଲକ୍ଷ ୨୫ ହଜାର ଲୋକ ଉପକୃତ ହେବେ।
ସେହିପରି ବରଗଡ ପୌରାଞ୍ଚଳ ଆଗାଁ ନଳା ଉପରେ ୬୦ ମିଟର ଦୀର୍ଘ ସେତୁ ନିର୍ମାଣ ପାଇଁ ୧୨ କୋଟି ଟଙ୍କା ମଞ୍ଜୁର କରାଯାଇଛି। ଏହା ବରଗଡ ଜିଲ୍ଲା ମୁଖ୍ୟାଳୟ ସହିତ ପରପାଲି ଓ ଭେଡେନ ବ୍ଲକ ମୁଖ୍ୟାଳୟକୁ ଯୋଡିବ । ଏହାଦ୍ୱାର ୨ ଲକ୍ଷ ୫୦ ହଜାର ଲୋକ ଉପକୃତ ହେବେ।
ତୃତୀୟ ସେତୁଟି ସରଳା ନାଳ ଉପରେ ନିର୍ମାଣ କରାଯିବ। ୧୫୦ ମିଟର ଦୈର୍ଘ୍ୟ ବିଶିଷ୍ଟ ଏହି ସେତୁ ପାଇଁ ୧୨ କୋଟି ଟଙ୍କା ମଞ୍ଜୁର କରାଯାଇଛି। ଏହା ଭଟଲି ବ୍ଲକ ମୁଖ୍ୟାଳୟକୁ ବରଗଡ ଓ ଅତାବିରା ବ୍ଲକ ମୁଖ୍ୟାଳୟକୁ ଯୋଡିବ। ଏହାଦ୍ୱାରା ୨ ଲକ୍ଷ ୫୦ ହଜାର ଲୋକ ଉପକୃତ ହେବେ।
ଆଉ ଏକ ଓଡ଼ିଆ ଯବାନ ହେଲେ ସହିଦ । ସେ ୪୮- ଆସାମ୍ ରାଇଫଲ୍ରେ ମଣିପୁରରେ କାର୍ଯ୍ୟରତ ଥିଲେ। ସେ ବରଗଡ଼ ଜିଲ୍ଲା ଭେଡ଼େନ ବ୍ଲକ ବାଘପାଲି (ସୁନାଲରମ୍ଭା) ଗ୍ରାମର ଯବାନ ନୀଳାଞ୍ଚଳ ପଟେଲ।
ସୂଚନା ଅନୁଯାୟୀ ଶୁକ୍ରବାର ବିଳମ୍ବିତ ରାତିରେ ଅନ୍ୟ ଯବାନଙ୍କ ସହ ପାଟ୍ରୋଲିଂ କରୁଥିବା ସମୟରେ ଗାଡ଼ିଟି ଦୁର୍ଘଟଣାଗ୍ରସ୍ତ ହୋଇଥିଲା ଯାହାଫଳରେ ତାଙ୍କ ବିୟୋଗ ଘଟିଥିବା ଜଣାପଡ଼ିଛି। ସୁନାଲରମ୍ଭା ଗ୍ରାମର ଆଦି ପଟେଲ ଓ ଗୁରୁବାରୀ ପଟେଲଙ୍କ ଦୁଇ ପୁଅଙ୍କ ମଧ୍ୟରୁ ନୀଳାଞ୍ଚଳ ସାନ। ସେ ୨୦୦୪ ମସିହାରେ ଆସାମ ରାଇଫଲ୍ରେ ଯୋଗଦାନ କରିଥିଲେ। ଚାରି ବର୍ଷ ହେଲା ସେ ସ୍ତ୍ରୀ ରାଜେଶ୍ବରୀ ଏବଂ ଦୁଇ ଝିଅ ରାନି, ରାନୁଙ୍କ ସହ ମଣିପୁରରେ ରହୁଥିଲେ। ତାଙ୍କ ବାପାଙ୍କ କିଛି ବର୍ଷ ଆଗରୁ ଦେହାନ୍ତ ହୋଇଥିଲା। ବିଧବା ମା’ ଗୁରୁବାରୀ, ବଡ଼ଭାଇ ନୀଳାମ୍ବର ଏବଂ ଭାଉଜ ମଞ୍ଜୁଲତା ଗାଁରେ ରହୁଛନ୍ତି।
ଏହି ଘଟଣା ସାରା ଗାଁକୁ ସ୍ତବ୍ଧ କରି ଦେଇଛି। ଆଜି ତାଙ୍କ ମରଶରୀର ଗାଁରେ ପହଞ୍ଚିବା ପରେ ଅନ୍ତ୍ୟେଷ୍ଟିକ୍ରିୟା ସଂପନ୍ନ ହେବ। ସହିଦ ନୀଳାଞ୍ଚଳଙ୍କ ବିୟୋଗରେ ଅତାବିରା ବିଧାୟିକା ସ୍ନେହାଙ୍ଗିନୀ ଛୁରିଆ, ପୂର୍ବତନ ବିଧାୟକ ନିହାର ରଂଜନ ମହାନନ୍ଦଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଶୋକବ୍ୟକ୍ତ କରିଛନ୍ତି।
ପୁଣି ସାମ୍ନାକୁ ଆସିଲା ମାଓ ପୋଷ୍ଟର । ବରଗଡ ଜିଲ୍ଲା ପାଇକମାଳ ବ୍ଲକ ବରତୁଣ୍ଡା ଏବଂ ଜାମସେଠ ଠାରେ ମାଓବାଦୀ ପୋଷ୍ଟର ଲଗାଇଥିବା ଦେଖଇବାକୁ ମିଳିଛି । ଏହି ଅଞ୍ଚଳରେ ଜୁଲାଇ 28 ତାରିଖ ଠାରୁ ଅଗଷ୍ଟ 3 ତାରିଖ ଯାଏଁ ସହିଦ ଦିବସ ପାଳନ କରିବାକୁ ନିର୍ଦେଶ ଦିଆଯାଇଛି । ଠିକ ଏହି ସମୟରେ ଦେଖିବାକୁ ମିଳିଛି ମାଓବାଦୀଙ୍କ ପ୍ରାଦୁର୍ଭାବ ।
ପଷ୍ଟରରେ ଜନପ୍ରତିନିଧି, ଠିକାଦାର ସାଜି ଜେସିବିରେ କାମ କରୁଥିବା ତଥା ଦୁର୍ନୀତି ବିଷୟରେ ଅନେକ କିଛି ଉଲ୍ଲେଖ କରାଯାଇଛି । ପୋଷ୍ଟର ତଳେ ବରଗଡ ମହାସମୁନ୍ଦ ଡିଭିଜନ କମିଟି କଥା ଲେଖା ହୋଇଛି । ବରତୁଣ୍ଡା ଠାରେ ଏକ crpf କ୍ୟାମ୍ପ ଅଛି ଏବଂ ଅଳ୍ପ କିଛି ମିଟର ଦୂରରେ ଏହି ପୋଷ୍ଟର ଲାଗିଥିବା ଯୋଗୁଁ ଅଂଚଳରେ ଏକ ଭୟର ବାତାବରଣ ସୃଷ୍ଟି ହୋଇଛି ।
ବାହାନଗା ଦୁଃଖ ନଯାଉଣୁ ପୁଣି ଆଉ ଏକ ରେଳ ଦୁର୍ଘଟଣା ଘଟିଛି । ବରଗଡ଼ ଜିଲ୍ଲା ମେଣ୍ଢାପାଲି ନିକଟରେ ମାଲବାହୀ ଟ୍ରେନ୍ ଦୁର୍ଘଟଣାଗ୍ରସ୍ତ ହୋଇଛି । ଏହି ଟ୍ରେନ୍ ଲାଇନଚ୍ୟୁତ ହେବାରୁ ୫ଟି ଡବା ଓଲଟି ପଡ଼ିଛି । ତେବେ ଏଥିରେ କେହି ମୃତାହତ ହୋଇନାହାଁନ୍ତି ।
ମାଲବାହୀ ଟ୍ରେନଟି ବରଗଡ଼ ଜିଲ୍ଲା ଡୁଙ୍ଗୁରୀରୁ ଚୂନପଥର ନେଇ ଏସିସି ସିମେଣ୍ଟ କାରଖାନା ଯାଉଥିଲା । ଆଜି ସକାଳେ ଯାଉଥିବା ବେଳେ ଟ୍ରେନର ୫ଟି ବଗି ଲାଇନଚ୍ୟୁତ ହୋଇଥିଲା । ସେପଟେ ଦୁର୍ଘଟଣା ସହ ଭାରତୀୟ ରେଳ ବିଭାଗର କୌଣସି ସମ୍ପର୍କ ନାହିଁ ।
ଏଭଳି କହିଛି ପୂର୍ବତଟ ରେଳବାଇ । ମାଲବାହୀ ଟ୍ରେନଟି ଏକ ଘରୋଇ ସିମେଣ୍ଟ କମ୍ପାନୀର । ଟ୍ରେନ୍ ଚଲାଇବା ପାଇଁ ଯାହା କିଛି ଭିତ୍ତିଭୂମିର ଆବଶ୍ୟକତା ରହିଛି ତାହା ସିମେଣ୍ଟ କମ୍ପାନୀ କରିଛି । ସେହି କମ୍ପାନୀ ଭିତ୍ତିଭୂମିର ରକ୍ଷଣାବେକ୍ଷଣ କରୁଥିବା ନେଇ ପୂର୍ବତଟ ରେଳବାଇ ପକ୍ଷରୁ ସୂଚନା ଦିଆଯାଇଛି ।
ଗତ ୨ ତାରିଖରେ ବାହାନଗାରେ ବଡ଼ ଧରଣର ରେଳ ଦୁର୍ଘଟଣା ଘଟି ୨୭୫ ଜଣଙ୍କ ମୃତ୍ୟୁ ଘଟିଛି । ଅନେକ ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି । ମୃତ୍ୟୁ ସଂଖ୍ୟା ଆହୁରି ବଢ଼ିବା ନେଇ ଆଶଙ୍କା ମଧ୍ୟ ରହିଛି । ଯୁଦ୍ଧକାଳୀନ ଭିତ୍ତିରେ ମରାମତି କାମ ସରିଛି । ପରୀକ୍ଷାମୂଳକ ଭାବେ ଟ୍ରେନ୍ ଟ୍ରାକରେ ଗଡ଼ିଛି । ଏଭଳି ସ୍ଥିତିରେ ପୁଣି ରେଳ ଦୁର୍ଘଟଣାକୁ ନେଇ ଚିନ୍ତା ବଢୁଛି ।
ବରଗଡ ଜିଲ୍ଲା ଗାଇସିଲଟ ଥାନାରେ ଭିଜିଲାନ୍ସ ଟିମ। ଥାନାଧିକାରୀଙ୍କ ଦୁର୍ନୀତିରେ ଲିପ୍ତ ଅଭିଯୋଗ ଆଧାରରେ ଭିଜିଲାନ୍ସ ଗାଇସିଲଟ ଥାନାରେ ପହଞ୍ଚି ଛାନଭିନ କରିବା ସହ ଥାନାଧିକାରୀଙ୍କ ବାସ ଭବନ ପରି ୪ଟି ସ୍ଥାନରେ ମଧ୍ୟ ରେଡ କରୁଛି। ଗାଇସିଲଟ ଥାନାର ଇନଚାର୍ଜ ବୀରବର ଭଗତ ଏବେ ଅଡୁଆରେ। ସମ୍ବଲପୁର ଭିଜିଲାନ୍ସ କୋର୍ଟର ସ୍ପେସାଲ ଜଜଙ୍କ ଦ୍ୱାରା ଜାରି ୱାରେଣ୍ଟ ଆଧାରରେ ଏହି ସର୍ଚ୍ଚ ଚାଲିଥିବା ରାଜ୍ୟ ଭିଜିଲାନ୍ସ ପକ୍ଷରୁ ସୂଚନା ଦିଆଯାଇଛି।
ଗାଇସିଲଟ ଥାନା ଅଧିକାରୀ ବୀରବର ଭଗତଙ୍କ ନାମରେ ଆୟ ବହିର୍ଭୂତ ସମ୍ପତ୍ତି ଠୁଳ କରିବା ନେଇ ବହି ଅଭିଯୋଗ ହେଇଥିଲା ଭିଜିଲାନ୍ସ ନିକଟରେ। ଏହି ଅଭିଯୋଗ ଆଧାରରେ ରାଜ୍ୟ ଦୁର୍ନୀତି ନିବାରଣ ସଂସ୍ଥା ଆଜି ବଡି ଭୋରୁ ଭଗତଙ୍କ କାର୍ଯ୍ୟାଳୟ ସହ ଗାଇସିଲଟରେ ଥିବା ଘର ସହ ଅତାବିରାର ଟାଙ୍ଗରପାଲି ତଥା ସମ୍ବଲପୁରରେ ଥିବା ଘର ଉପରେ ଚଢାଉ କରିଛି। ଏହି ଚଢାଉରେ ସମ୍ୱଲପୁର, ବରଗଡ ଓ ସୋନପୁରର ଭିଜିସାନ୍ସ ଟିମ ନିୟୋଜିତ ଥିବା ବେଳେ ଟିମରେ ୨ ଡିଏସପି, ୭ ଇନସ୍ପେକ୍ଟର, ୨ ଏଏସଆଇ ଓ ଅନ୍ୟ କର୍ମଚାରୀ ରହିଛନ୍ତି।
ଏଠାରେ କହି ରଖୁ କି ଗତ କିଛି ଦିନ ଧରି ରାଜ୍ୟର ବିଭିନ୍ନ ଜିଲ୍ଲାରେ ଭିଜିଲାନ୍ସ ବିଭାଗ ଆକ୍ଚିଭ ରହିଛି। ଗତକାଲି ଏହି କ୍ରମରେ ବୀରମହାରାଜପୁର ଉପଖଣ୍ଡ ପ୍ରାଣୀ ଚିକିତ୍ସାଳୟର କନିଷ୍ଠ ସହକାରୀ ଗୋଲକ ବିହାରୀ ପୋଢଙ୍କୁ ୧୫,୦୦୦ ଟଙ୍କା ଲାଞ୍ଚ ନେଉଥିବା ବେଳେ ମାଡିବସିଥିଲା ଭିଜିଲାନ୍ସ। ସେହିପରି ଗତ ୧୮ ତାରିଖରେ ଭୁବନେଶ୍ୱର ଖାଦ୍ୟ ସୁରକ୍ଷା କମିଶନର ବିଭାଗୀୟ ଅଧିକାରୀ ଗିରିଜା ଶଙ୍କର ଦାସ ଏକ ଔଷଧ ଦୋକାନର ଫାର୍ମାସିଷ୍ଟଙ୍କ ନାମ ପରିବର୍ତ୍ତନ କରିବା ପାଇଁ ୧୦,୦୦୦ ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ଦ୍ୱାରା ଗିରଫ ହୋଇଥିଲେ। ସେହିଦିନ ଭଞ୍ଜନଗର ଆଡିସିନାଲ ସିଭିଲ ସପ୍ଲାଇ ଅଫିସର ସଞ୍ଜୟ ସାହୁଙ୍କୁ ଏକ ଡିଏ କେଶରେ ଗିରଫ କରି କୋର୍ଟ ଚାଲାଣ କରାଯାଇଥିଲା।
ମେ ୧୭ରେ ଅରୁଣ ନାୟକ, ବ୍ଲକ ସାମାଜିକ ସୁରକ୍ଷା ଅଧିକାରୀ , ବେଗୁନିଆପଡା ବ୍ଲକ , ଗଞ୍ଜାମ ଜଣେ ଅଭିଯୋଗକାରୀଙ୍କଠାରୁ ବାର୍ଦ୍ଧକ୍ୟ ଭତ୍ତା ମଞ୍ଜୁରୀ ପାଇଁ ତାଙ୍କର ତଥା ଅନ୍ୟାନ୍ୟ ଯୋଗ୍ୟ ଆବେଦନକାରୀଙ୍କ ସପକ୍ଷରେ ଅନୁସନ୍ଧାନ ରିପୋର୍ଟ ଦେବା ନିମନ୍ତେ ₹୬,୦୦୦ ଟଙ୍କା ଲାଞ୍ଚନେଇ ଓଡ଼ିଶା ଭିଜିଲାନ୍ସ ଦ୍ୱାରା ଗିରଫ କରିଥିଲା।