ମେ’ ୧୩ ତାରିଖରେ କର୍ଣ୍ଣାଟକ ବିଧାନସଭା ନିର୍ବାଚନରେ କଂଗ୍ରେସ ବହୁମତ ହାସଲ କରି ସେଲିବ୍ରେସନ କରିଥିଲା । ହେଲେ ଦଳକୁ ଟେନସନ ଦେଇଥିଲା କିଏ ମୁଖ୍ୟମନ୍ତ୍ରୀ ହେବେ । ଡିକେ ଶିବକୁମାର ନା ସିଦ୍ଧରମୈୟା, କାହାକୁ ସିଏମ୍ ପଦବୀ ଦିଆଯିବ ସେ ନେଇ ଅଙ୍କକଷା ଚାଲିଥିଲା । ଦୀର୍ଘ ୪ ଦିନର କସରତ ପରେ ଶେଷରେ ଚୂଡ଼ାନ୍ତ ନିଷ୍ପତ୍ତି ନେଇଛନ୍ତି କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ ।
କର୍ଣ୍ଣାଟକ ମୁଖ୍ୟମନ୍ତ୍ରୀ ହେବେ ବରିଷ୍ଠ ନେତା ସିଦ୍ଧରମୈୟା । ଉପମୁଖ୍ୟମନ୍ତ୍ରୀ ଭାବେ ଶିବକୁମାରଙ୍କ ନାଁ ଘୋଷଣା ହୋଇଛି । ଚାରି ଦିନର ରାଜନୈତିକ କସରତ ପରେ କର୍ଣ୍ଣାଟକ ଅଚଳାବସ୍ଥାରେ ପୂର୍ଣ୍ଣଚ୍ଛେଦ ପଡ଼ିଛି । ଗତ ମଧ୍ୟରାତ୍ରିରେ ଏଭଳି ଘୋଷଣା କରିଛନ୍ତି କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡଗେ । ଏହି ପଦବୀ ଲାଗି ପ୍ରମୁଖ ଦାବିଦାର ଥିବା ଡି.କେ ଶିବକୁମାରଙ୍କୁ ଶେଷରେ ମନାଇଛି ଦଳ । ମେ’ ୨୦ରେ ବେଙ୍ଗାଳୁରୁରେ ନୂତନ ମନ୍ତ୍ରିମଣ୍ଡଳର ଶପଥ ଗ୍ରହଣ ସମାରୋହ ଅନୁଷ୍ଠିତ ହେବା ନେଇ ସୂଚନା ମିଳିଛି ।
ଗତକାଲି ଅର୍ଥାତ ବୁଧବାର କଂଗ୍ରେସ ସଭାପତି ମଲ୍ଲିକାର୍ଜୁନ ଖାଡଗେ, ପୂର୍ତତନ ସାଂସଦ ରାହୁଲ ଗାନ୍ଧିଙ୍କ ଉପସ୍ଥିତିରେ ଏକାଧିକ ପର୍ଯ୍ୟାୟ ଆଲୋଚନା ହୋଇଥିଲା । ଶୀର୍ଷ ପଦବୀକୁ ନେଇ ନେତାଙ୍କ ସହ ଆଲୋଚନା ଜାରି ଥିଲା । କର୍ଣ୍ଣାଟକ ମୁଖ୍ୟମନ୍ତ୍ରୀ ଚୟନ ପାଇଁ ଜାରିଥିବା ଅଚଳାବସ୍ଥାରେ ଏବେ ପୂର୍ଣ୍ଣଚ୍ଛେଦ ପଡ଼ିଛି ।
ଗତ ୧୩ ତାରିଖରେ କର୍ଣ୍ଣାଟକ ରେଜଲ୍ଟ ଆସିବା ପରେ ମୁଖ୍ୟମନ୍ତ୍ରୀ ପଦବୀ ପାଇଁ ସସ୍ପେନ୍ସ ଲାଗି ରହିଥିଲା । ନୂଆ ସରକାର ଗଠନ ହେବା କରିବାକୁ ମଧ୍ୟରାତ୍ରି ପର୍ଯ୍ୟନ୍ତ ଆଲୋଚାନ ବି ହୋଇଥିଲା । ମୁଖ୍ୟମନ୍ତ୍ରୀ ରେସରେ ଥିବା ୨ ପ୍ରତିଦ୍ବନ୍ଦ୍ବୀ ତଥା କର୍ଣ୍ଣାଟକର ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟା ଏବଂ କର୍ଣ୍ଣାଟକ କଂଗ୍ରେସ ସଭାପତି ଡିକେ ଶିବକୁମାର କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟି ଆଲୋଚନା କରିଥିଲେ । ପରେ ସେମାନେ କଂଗ୍ରେସ ନେତା ରାହୁଲ ଗାନ୍ଧିଙ୍କୁ ଭେଟିଥିଲେ । ଶେଷରେ ରାହୁଲ ଗାନ୍ଧି ଓ ଖଡଗେଙ୍କ ସହ ଏକତ୍ର ବୈଠକ ପରେ ଶେଷରେ ସିଏମଙ୍କ ନାଁ ଘୋଷଣା ହୋଇଥିଲା ।
