ସୁପ୍ରିମକୋର୍ଟରେ ଆଜି ଦୁଇ ଜଣ ନୂତନ ବିଚାରପତି ନିଯୁକ୍ତି ପାଇବେ । ସୁପ୍ରିମକୋର୍ଟର ବିଚାରପତି ଭାବେ ପ୍ରଶାନ୍ତ ମିଶ୍ର ଏବଂ କେ.ବି ବିଶ୍ୱନାଥନଙ୍କୁ ମୁଖ୍ୟ ବିଚାରପତି ଡି.ଓ୍ବାଇ ଚନ୍ଦ୍ରଚୂଡ ଶପଥ ଗ୍ରହଣ କରାଇବେ । ଗୁରୁବାର ଦିନ କେନ୍ଦ୍ର ସରକାରଙ୍କ ତରଫରୁ ଅଧିବକ୍ତାଙ୍କ ନିଯୁକ୍ତିକୁ ଅନୁମୋଦନ ମିଳିବା ପରେ ଜଷ୍ଟିସ ପ୍ରଶାନ୍ତ କୁମାର ମିଶ୍ର ଏବଂ ବରିଷ୍ଠ ଅଧିବକ୍ତା କେ.ବି ବିଶ୍ୱନାଥନ ଆଜି ଶପଥ ଗ୍ରହଣ କରିବେ ବୋଲି ସ୍ପଷ୍ଟ ହୋଇଛି ।
କେନ୍ଦ୍ର ଆଇନ ମନ୍ତ୍ରୀ ଅର୍ଜୁନ ମେଘୱାଲ ଟ୍ୱିଟରରେ ମିଶ୍ର ଏବଂ ବିଶ୍ୱନାଥନଙ୍କ ନିଯୁକ୍ତିକୁ ନିଶ୍ଚିତ କରିଛନ୍ତି । ସୁପ୍ରିମକୋର୍ଟ କଲେଜିୟମ ଦ୍ୱାରା ଭାରତର ପ୍ରଧାନ ବିଚାରପତି (ସିଜେଇ) ଡିଓ୍ବାଇ ଚନ୍ଦ୍ରଚୁଡଙ୍କ ନେତୃତ୍ୱରେ ସେମାନଙ୍କ ନାମ କେନ୍ଦ୍ରକୁ ସୁପାରିଶ କରାଯାଇଥିଲା ।
ଜଷ୍ଟିସ ମିଶ୍ର ବର୍ତ୍ତମାନ ଆନ୍ଧ୍ରପ୍ରଦେଶ ହାଇକୋର୍ଟର ପ୍ରଧାନ ବିଚାରପତି ଅଛନ୍ତି । ପାଞ୍ଚ ସଦସ୍ୟ ବିଶିଷ୍ଟ କଲେଜିୟମ କହିଛନ୍ତି ଯେ, ୩୪ ଜଣ ବିଚାରପତିଙ୍କୁ ସୁପ୍ରିମକୋର୍ଟରେ ଅନୁମୋଦିତ କରିବାର କ୍ଷମତା ରହିଛି, ଯାହା ବର୍ତ୍ତମାନ ୩୨ ଜଣଙ୍କ ସହ କାର୍ଯ୍ୟ କରୁଛନ୍ତି । ନିକଟରେ ସୁପ୍ରିମକୋର୍ଟର ଦୁଇ ଜଣ ବିଚାରପତି ଦୀନେଶ ମହେଶ୍ୱରୀ ଏବଂ ଏମଆର ଶାହ ଅବସର ନେଇଛନ୍ତି ।
ମେ ମାସ ୧୬ ତାରିଖ ଦିନ ବିଶ୍ୱନାଥନ୍ ଏବଂ ମିଶ୍ରଙ୍କ ନାମ ସୁପାରିଶ କରିବା ବେଳେ କଲେଜିୟମ୍ କହିଛି ଯେ, ଜୁଲାଇ ଦ୍ୱିତୀୟ ସପ୍ତାହ ସୁଦ୍ଧା ଆହୁରି ଚାରିଟି ପଦବୀ ଖାଲି ହେବାକୁ ଯାଉଛି ଏବଂ ବିଚାରପତିଙ୍କ କାର୍ଯ୍ୟ କ୍ଷମତା ଆହୁରି ହ୍ରାସ ପାଇବ ।