ନକ୍ସଲବାଦକୁ ସମୂଳେ ଉପଖାତ କରିବା ପାଇଁ କେନ୍ଦ୍ର ସରକାର ଦୃଢ଼ ମନୋଭାବ ନେଇଛି। ଏହି ପ୍ରସଙ୍ଗରେ ଆଜି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଗୁରୁତ୍ୱପୂର୍ଣ୍ଣ ବୈଠକଗୁଡ଼ିକ କରିବାକୁ ଯାଉଛନ୍ତି। ରାୟପୁର ଗସ୍ତ ସମୟରେ ସେ ଏକାଧିକ ମହତ୍ୱପୂର୍ଣ୍ଣ ବିଚାରବିମର୍ଶରେ ଯୋଗଦେବେ। ବିଶେଷତଃ, ନକ୍ସଲ ଚରମପନ୍ଥକୁ କିପରି ଶେଷ କରାଯାଇପାରେ, ତାହା ନେଇ ଖୁଟିନାଟି ଆଲୋଚନା ହେବ।
ଏଥିସହ ରାଜ୍ୟର ସୁରକ୍ଷା ଏବଂ ପ୍ରାଶାସନିକ ବ୍ୟବସ୍ଥାକୁ ସୁଦୃଢ଼ କରିବା ନେଇ ଉଚ୍ଚ ଅଧିକାରୀଙ୍କ ସହ ବୈଠକ କରିବେ ଶାହ। ବୈଠକରେ ଛତିଶଗଡ଼ ମୁଖ୍ୟମନ୍ତ୍ରୀ ବିଷ୍ଣୁଦେଓ ସାଏ, ରାଜ୍ୟ ଗୃହମନ୍ତ୍ରୀ ବିଜୟ ଶର୍ମା ପ୍ରମୁଖ ସାମିଲ ହେବେ। ଗତକାଲି ସଂଧ୍ୟାରେ ଶାହ ରାୟପୁରରେ ପହଞ୍ଚିବା ପରେ ସେଠାରେ ତାଙ୍କୁ ଭବ୍ୟ ସ୍ବାଗତ କରାଯାଇଛି। ଦୁଇ ମାସ ଭିତରେ ଶାହଙ୍କ ଏହା ଦ୍ବିତୀୟ ଛତିଶଗଡ଼ ଗସ୍ତ ଅଟେ ।