ଜାଡ଼ ମାଡ଼ରେ ଥରୁଛି ସାରା ଓଡ଼ିଶା। ରାଜ୍ୟରେ ଶୀତ ଲହରୀ ଆହୁରି ତୀବ୍ର ରୂପ ନେଇଥିବା ବେଳେ, ନୂଆବର୍ଷ ପର୍ଯ୍ୟନ୍ତ ତାପମାତ୍ରାରେ କୌଣସି ବଡ଼ ପରିବର୍ତ୍ତନ ହେବାର ସମ୍ଭାବନା ନାହିଁ ବୋଲି ପାଣିପାଗ ବିଭାଗ ଆକଳନ କରିଛି। ରାଜ୍ୟର ୧୦ରୁ ଅଧିକ ସହରରେ ପାରଦ ୧୦ ଡିଗ୍ରୀ ତଳେ ରହିଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।
କନ୍ଧମାଳ, କୋରାପୁଟ, ରାଉରକେଲା, ଝାରସୁଗୁଡ଼ା, ନବରଙ୍ଗପୁର ସହ ରାଜ୍ୟର ଅନେକ ଉଚ୍ଚଭୂମି ଓ ଆଭ୍ୟନ୍ତରୀଣ ଅଞ୍ଚଳରେ ଶୀତ ଅସହ୍ୟ ହୋଇପଡ଼ିଛି। ରାତି ଓ ସକାଳ ବେଳେ ଘରୁ ବାହାରିବା ମୁସ୍କିଲ୍ ହେଉଥିବା ବେଳେ, ସାଧାରଣ ଜୀବନ ଉପରେ ଜାଡ଼ର ପ୍ରଭାବ ସ୍ପଷ୍ଟ ଦେଖାଯାଉଛି।
ଶୀତ ସହିତ ସହ ଘନ କୁହୁଡ଼ି ମଧ୍ୟ ଲୋକଙ୍କୁ କଲବଲ କରୁଛି। ପାଣିପାଗ କେନ୍ଦ୍ର ଅନୁସାରେ ଆଗାମୀ ୫ ଦିନ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ଘନ କୁହୁଡ଼ି ଲାଗିରହିବ। ଆଜି ଓ କାଲି ସୁନ୍ଦରଗଡ଼, ଢେଙ୍କାନାଳ, ନୟାଗଡ଼, କନ୍ଧମାଳ ଓ କୋରାପୁଟ ଜିଲ୍ଲା ପାଇଁ କୁହୁଡ଼ି ସତର୍କତା ଜାରି କରାଯାଇଛି। ଉପକୂଳ ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାରେ ମଧ୍ୟ କୁହୁଡ଼ିର ପ୍ରଭାବ ପଡ଼ିପାରେ।
କନ୍ଧମାଳର ଉଦୟଗିରିରେ ରାଜ୍ୟର ସର୍ବନିମ୍ନ ତାପମାତ୍ରା ୪.୪ ଡିଗ୍ରୀ ସେଲସିଅସ୍ ରେକର୍ଡ ହୋଇଛି। ଗତକାଲି ଏଠାରେ ପାରଦ ୭.୮ ଡିଗ୍ରୀ ଥିବା ବେଳେ, ଗୋଟିଏ ଦିନରେ ୩.୪ ଡିଗ୍ରୀ ହ୍ରାସ ପାଇଛି। ଦୁର୍ଗମ ଓ ଜଙ୍ଗଲିଆ ଅଞ୍ଚଳରେ ପାରଦ ଆହୁରି ୧ରୁ ୨ ଡିଗ୍ରୀ କମ୍ ଥିବା ଆକଳନ କରାଯାଇଛି।
ସେହିଭଳି ଦାରିଙ୍ଗବାଡ଼ିରେ ତାପମାତ୍ରା ୬ ଡିଗ୍ରୀ, କୋରାପୁଟରେ ୬.୬, ସେମିଳିଗୁଡ଼ାରେ ୬.୭, ରାଉରକେଲାରେ ୭, ଝାରସୁଗୁଡ଼ାରେ ୭.୪, ନବରଙ୍ଗପୁରରେ ୯, କେନ୍ଦୁଝରରେ ୯.୧, ସୁନ୍ଦରଗଡ଼ରେ ୯.୪ ଓ ବଲାଙ୍ଗୀରରେ ୯.୫ ଡିଗ୍ରୀ ସେଲସିଅସ୍ ରେକର୍ଡ କରାଯାଇଛି।
ପାଣିପାଗ ବିଭାଗ କହିଛି, ଆସନ୍ତା ୩ରୁ ୪ ଦିନ ପରେ ଶୀତର ତୀବ୍ରତା ସାମାନ୍ୟ କମିପାରେ। ତଥାପି ସେପର୍ଯ୍ୟନ୍ତ ଲୋକମାନଙ୍କୁ ସତର୍କ ରହିବା ସହ ଆବଶ୍ୟକ ସାବଧାନତା ନେବାକୁ ପରାମର୍ଶ ଦିଆଯାଇଛି।