ଭୂମିକମ୍ପରେ ଥରିଉଠିଲା ଆଫଗାନିସ୍ତାନ । ତାଲିବାନ ପ୍ରବକ୍ତା ସୂଚନା ଦେଇଛନ୍ତି ଯେ, ଆଫଗାନିସ୍ତାନର ପଶ୍ଚିମରେ ହୋଇଥିବା ଶକ୍ତିଶାଳୀ ଭୂମିକମ୍ପରେ ପାଖାପାଖି ୨୦୦୦ ଲୋକଙ୍କ ମୃତ୍ୟୁ ହଇଛି । ଇରାନ ସୀମା ନିକଟରେ ହୋଇଥିବା ବଡ ଝଟକାରେ ଅନେକ ସଂଖ୍ୟାରେ ଲୋକ ଆହତ ହୋଇଛନ୍ତି । ରିକ୍ଟର ସ୍କେଲରେ ଏହାର ତିବ୍ରତା ୬.୩ ଥିବା କୁହାଯାଇଛି ।
ଭୂମିକମ୍ପରେ ହେରାତ ସହରର ପାଖାପାଖି ୪୦ କି.ମି ଦୂର ପର୍ଯ୍ଯନ୍ତ ଅନେକ ଗାଁ ଧ୍ବସ୍ତ ବିଧ୍ବସ୍ତ ହୋଇଯାଇଛି । ଲୋକମାନେ ତିନୋଟି ଶକ୍ତିଶାଳୀ ଝଟକା ଅନୁଭବ କରିଛନ୍ତି । ଏଥିରେ ବର୍ତ୍ତିଯାଇଥିବା ଲୋକମାନେ ଏହାର ଭୟାବହତାକୁ ବ୍ୟାଖ୍ୟା କରିଥିଲେ । ଲୋକଙ୍କ କହିବା ଅନୁଯାୟୀ, ପ୍ରଥମେ ପାଖରେ ଥିବା କୋଠା ବାଡି ସବୁ ଦୋହଲିବା ଆରମ୍ଭ କରିଥିଲା ଆଉ ତାପରେ ସବୁ ଭାଙ୍ଗିରୁଜି ଚୁରମାର ହୋଇଯାଇଥିଲା ।
ତାଲିବାନ ସରକାରଙ୍କ ପକ୍ଷରୁ କୁହାଯାଇଛି, ଏଥିରେ ମୃତ୍ୟୁ ସଂଖ୍ୟା ବଢିବ । ତେଣୁ ତୁରନ୍ତ ତାଲିବାନ ସରକାର ଉଦ୍ଧାର କାର୍ଯ୍ୟ ଆରମ୍ଭ କରିବାକୁ ନିର୍ଦ୍ଦେଶ ଦେଇଛନ୍ତି । ପାଖାପାଖି ୬ଟି ଗାଁ ସମ୍ପୂର୍ଣ୍ଣ ନଷ୍ଟ ହୋଇଯାଇଛି ବୋଲି ସୂଚନା ମିଳିଛି । ରାସ୍ତା ଉପରେ ପଡିଥିବା ଭଗ୍ନାବଶେଷ ଭିତରେ ଅନେକ ଲୋକ ପୋତି ହୋଇ ରହିଥିବା ସୂଚନା ମିଳିଛି । ବିଶେଷ ତଥ୍ୟରୁ ଜଣାପଡିଛି ଯେ, ୪୬୫ଟି ଘର ନଷ୍ଟ ହୋଇଥିବା ବେଳେ ୧୩୫ଟି ଘର କ୍ଷତିଗ୍ରସ୍ତ ହୋଇଛି ।