ଇତିହାସ ରଚିଲା ଟିମ୍ ଇଣ୍ଡିଆ । ପୂର୍ବରୁ ଭାରତ ଟେଷ୍ଟ ଓ ଟି୨୦ରେ ଏକ ନମ୍ବର ଥିଲେ ମଧ୍ୟ ଦିନିକିଆରେ ପାକିସ୍ତାନ ଏକ ନମ୍ବର ଥିଲା। ଏସିଆ କପ୍ରେ ଦମଦାର ବିଜୟ ପରେ ଭାରତ ଆଜି ଖେଳାଯାଇଥିବା ଅଷ୍ଟ୍ରେଲିଆ ବିପକ୍ଷ ୩ ମ୍ୟାଚ୍ ବିଷିଷ୍ଟ ଦିନିକିଆ ସିରିଜ୍ର ପ୍ରଥମ ମୁକାବିଲାକୁ ୫ ୱିକେଟରେ ବିଜୟ ହାସଲ କରି ଆଇସିସି ଦିନିକିଆ ରାଙ୍କିଙ୍ଗରେ ଏକ ନମ୍ବର ସ୍ଥାନକୁ ଫେରିଛି। କ୍ରିକେଟର ତିନୋଟି ଯାକ ଫର୍ମାଟରେ ନମ୍ବର-୧ ସ୍ଥାନରେ ପହଞ୍ଚିଛି ଟିମ୍ ଇଣ୍ଡିଆ। ଆଜି ମୋହାଲିରେ ଖେଳାଯାଉଥିବା ଅଷ୍ଟ୍ରେଲିଆ ଦିନିକିଆରେ ବିଜୟ ପରେ ଭାରତ ପାକିସ୍ତାନକୁ ପଛରେ ପକାଇ ଦେଇଛି। ଏହା ସହ ଭାରତ ବର୍ତ୍ତମାନ କ୍ରିକେଟର ସବୁ ଫର୍ମାଟରେ ବିଶ୍ବର ଏକ ନମ୍ବର ଟିମ୍ ହୋଇଯାଇଛି।
ଆଜି ଭାରତ ଅଷ୍ଟ୍ରେଲିଆ ବିପକ୍ଷ ଦିନିକିଆ ମ୍ୟାଚ୍ ପୂର୍ବରୁ ୧୧୫ ପଏଣ୍ଟ ସହ ଆଇସିସି ଦିନିକିଆ ରାଙ୍କିଙ୍ଗରେ ଦୁଇ ନମ୍ବରରେ ଥିଲା। ଏଥି ସହିତ ପାକିସ୍ତାନ ସମାନ ପଏଣ୍ଟ ସହ ଏକ ନମ୍ବର ଥିଲା। ଆଉ ପ୍ରଥମ ଦିନିକିଆରେ ଭାରତ ଅଷ୍ଟ୍ରେଲିଆ ଦଳ ପକ୍ଷରୁ ଦିଆଯାଇଥିବା ୨୭୭ ରନ୍ର ବିଜୟ ଲକ୍ଷ୍ୟକୁ ୪୬.୨ ଓଭରରେ ୫ ୱିକେଟ ହରାଇ ହାସଲ କରିବା ସହ ଏକ ନମ୍ବର ସ୍ଥାନକୁ ଯାଇଛି। ପାକିସ୍ତାନ ୧୧୫ ପଏଣ୍ଟ ସହ ୨ନଂ ସ୍ଥାନକୁ ଖସି ଯାଇଛି। ଭାରତ ୧୧୬ ପଏଣ୍ଟ ସହ ୧ନମ୍ବର ସ୍ଥାନ ଦଖଲ କରିଛି। ଏଥି ସହିତ ଅଷ୍ଟ୍ରେଲିଆ ବର୍ତ୍ତମାନ ୧୧୧ ପଏଣ୍ଟ ସହ ତୃତୀୟ ସ୍ଥାନରେ ରହିଥିବା ବେଳେ ଚତୁର୍ଥରେ ସାଉଥ ଆଫ୍ରିକା, ପଞ୍ଚମରେ ଇଂଲଣ୍ଡ, ଷଷ୍ଠରେ ନ୍ୟୁଜିଲ୍ୟାଣ୍ଡ, ସପ୍ତମରେ ବାଂଲାଦେଶ, ଅଷ୍ଟମରେ ଶ୍ରୀଲଙ୍କା, ନବମରେ ଆଫଗାନିସ୍ତାନ ଓ ଦଶମମରେ ୱେଷ୍ଟଇଣ୍ଡିଜ ରହିଛି।