ଅନ୍ଧାରରେ ବାଡ଼ି ବୁଲାଉଛି ମଞ୍ଚେଶ୍ୱର ଥାନା ପୋଲିସ । ଅସଲି ଚୋରକୁ ଧରିବା ବଦଳରେ ନକଲିଙ୍କୁ ଧରିଛି ଟିମ୍ । ବାହାବା ନେବାକୁ ପୋଲିସର ଜୋରଦାର ଉଦ୍ୟମ । ମଞ୍ଚେଶ୍ୱର ଶିଳ୍ପାଞ୍ଚଳ ଇଡକୋ କଲୋନୀ ଷ୍ଟାଡିୟମ ନିକଟରେ ଏମିତି କିଛି ଘଟଣା ଦେଖିବାକୁ ମିଳିଛି । ୫ ଜଣ ସାଧୁ ବାବା ଏକ ବୋଲେରୋ ରଖି ଜୟଶ୍ରୀରାମ କହିବା ସହ ଶଙ୍ଖ ଫୁଙ୍କୁଥିଲେ ।
ଏହି ଅଞ୍ଚଳରେ ବୁଲାବୁଲି କରୁଥିବା ବେଳେ ଧରିଥିଲା ମଞ୍ଚେଶ୍ୱର ଥାନା ପୋଲିସ । ନିକଟରେ ସୁନା ଚୋରି ଘଟଣାରେ ସନ୍ଦେହ କରି ଥାନାରେ ଅଟକ ରଖିଥିଲା ପୋଲିସ । କିନ୍ତୁ ପରେ ପୋଲିସକୁ ବଦନାମ ହେବାକୁ ପଡ଼ିଛି । ପ୍ରକୃତରେ ସାଧୁ ବାବାମାନେ ପୁରୀ ରଥଯାତ୍ରା ଦେଖିବାକୁ ଉତ୍ତରପ୍ରଦେଶରୁ ଆସିଥିଲେ । ଜଗନ୍ନାଥଙ୍କ ଦର୍ଶନ ପରେ ଭୁବନେଶ୍ୱରରେ କିଛି ସ୍ଥାନ ବି ବୁଲିଛନ୍ତି । ମଞ୍ଚେଶ୍ୱରରେ ବୁଲାବୁଲି କରୁଥିବା ବେଳେ ତାଙ୍କୁ ଧରିଥିଲା ପୋଲିସ । ସତ୍ୟାସତ୍ୟ ଜଣାପଡ଼ିବା ପରେ ଅଟକ ବାବାମାନଙ୍କୁ ଛାଡ଼ିଦେଲା ପୋଲିସ ।
ଦୁଇଦିନ ପୂର୍ବେ ନନ୍ଦନକାନନ ଥାନା ଅଞ୍ଚଳରେ ବାବା ବେଶରେ ୫ ଲକ୍ଷ ଟଙ୍କାର ସୁନା ଅଳଙ୍କାର ନେଇ ପଳାଇଥିବା ଅଭିଯୋଗ ହୋଇଥିଲା । ଧାର୍ମିକ ଆଲୋଚନା ପରେ ଜଳଖିଆ ଖାଇବା ବାହାନାରେ ଘରେ ପଶିଥିଲେ ନାଗା ବାବା । ହେଲେ ଜଳଖିଆ ନଖାଇ ସୁନା ଅଳଙ୍କାର ଲୁଟି ନେଇଥିବା ନନ୍ଦନକାନନ ଥାନାରେ ଅଭିଯୋଗ ହୋଇଥିଲା ।
ସେହି ଘଟଣାର ତଦନ୍ତ ଜାରି ଥିବା ବେଳେ ପ୍ରକୃତ ଚୋରଙ୍କୁ ଛାଡ଼ି ସାଧୁ ବାବାଙ୍କୁ ଧରିଥିଲା ମଞ୍ଚେଶ୍ୱର ଥାନା ପୋଲିସ ।