ପଡ଼ୋଶୀଙ୍କ ଛାତରୁ ମିଳିଲା କୋଟି କୋଟି ଟଙ୍କା । ଭିଜିଲାନ୍ସ ଚଢ଼ାଉ ଦେଖି ଟଙ୍କା ବିଡ଼ା ପ୍ୟାକେଟ୍ ପଡ଼ୋଶୀଙ୍କ ଛାତକୁ ଫୋପାଡ଼ି ଦେଲେ ଅତିରିକ୍ତ ଜିଲ୍ଲାପାଳ ବାବୁ । ଆଉ ଟଙ୍କା ସବୁ ଗୋଟାଇ ଭିଜିଲାନ୍ସ ଗଣିବା ବେଳକୁ ଏହା ତିନି କୋଟି ପାର୍ ହୋଇସାରିଥିଲା । ସରକାରୀ ଅଧିକାରୀ କେତେ ମାତ୍ରାରେ ଦୁର୍ନୀତି କରିପାରନ୍ତି,ତାହାର ଜ୍ୱଳନ୍ତ ଉଦାହରଣ ହେଉଛନ୍ତି ନବରଙ୍ଗପୁରର ଅତିରିକ୍ତ ଉପଜିଲ୍ଲାପାଳ ପ୍ରଶାନ୍ତ କୁମାର ରାଉତ ।
ଆୟ ବହିର୍ଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ଭିଜିଲାନ୍ସ ଚଢ଼ାଉ କରିଛି । ଏକକାଳୀନ ୯ଟି ସ୍ଥାନରେ ଚଢ଼ାଉ ଜାରି ରହିଛି । ଭୁବନେଶ୍ବର କାନନବିହାରସ୍ଥିତ ଦୁଇତାଲା ବଙ୍ଗଳା, ନବରଙ୍ଗପୁରସ୍ଥିତ ବାସଭବନ, ନବରଙ୍ଗପୁରସ୍ଥିତ ସରକାରୀ କାର୍ଯ୍ୟାଳୟ, ଭଦ୍ରକସ୍ଥିତ ପୈତୃକ ଗାଁ ଠାରେ ଏହି ଚଢ଼ାଉ କରାଯାଇଛି । ଏହାକୁ ଛାଡ଼ି ଅନ୍ୟ ୫ଟି ସ୍ଥାନରେ ବି ଚଢ଼ାଉ ହୋଇଛି । ତେବେ ଶ୍ରୀ ରାଉତ ଭୁବନେଶ୍ଵର କାନନବିହାରସ୍ଥିତ ନିଜ ଘରେ କାଗଜ ପେଟି ଭିତରେ ପାଞ୍ଚ ଶହ ଟଙ୍କିଆ ନୋଟ୍ ବିଡ଼ା ସବୁ ଲୁଚାଇ ରଖିଥିଲେ । ୬ଟି ପେଟିରେ ୨ କୋଟି ୨୫ ଲକ୍ଷ ଟଙ୍କା ରଖା ହୋଇଥିଲା ।
ଭିଜିଲାନ୍ସ ଚଢ଼ାଉ ହେବା ଜାଣିବା ପରେ ଶ୍ରୀ ରାଉତ ଏହି ଟଙ୍କା ପେଟି ନିଜ ପଡ଼ୋଶୀଙ୍କ ଛାତକୁ ଫୋପାଡ଼ି ଦେଇଥିଲେ । ହେଲେ ତଳେ ଥିବା ଭିଜିଲାନ୍ସ ଅଧିକାରୀ ଓ ଟିମ୍ ଏହାକୁ ଦେଖି ନେଇଥିଲେ । ତୁରନ୍ତ ପଡ଼ୋଶୀଙ୍କ ଛାତକୁ ଯାଇ ଏହି ଟଙ୍କା ଜବତ କରିଥିଲା ଭିଜିଲାନ୍ସ । ଆବଶ୍ୟକସ୍ଥଳେ ପଡ଼ୋଶୀଙ୍କ ଘରେ ଆହୁରି ଯାଞ୍ଚ ହେବ ବୋଲି ଜଣାପଡ଼ିଛି । ସେହିପରି ଶ୍ରୀ ରାଉତଙ୍କ ନବରଙ୍ଗପୁରସ୍ଥିତ ଘରୁ ବି ନଗଦ ୭୭ ଲକ୍ଷ ଟଙ୍କା ଜବତ କରିଛି ଭିଜିଲାନ୍ସ । ସେଠାରେ ବି ରାଉତ ବାବୁ ନଗଦ ଟଙ୍କା ଲୁଚାଇ ରଖୁଥିଲେ । ଟଙ୍କାକୁ ଛାଡ଼ିଦେଲେ ଘରୁ ସୁନା ବିସ୍କୁଟ,ବିପୁଳ ପରିମାଣର ସୁନା ଅଳଙ୍କାର ଜବତ ହୋଇଛି ।
WATCH VIDEO: