ଅନୁଗୁଳରେ ଅବକାରୀ ବିଭାଗକୁ ସଫଳତା ମିଳିଛି । ଜଣେ ବ୍ରାଉନସୁଗାର ବେପାରୀକୁ ଧରିବାରେ ସଫଳ ହୋଇଛି ଟିମ୍ । ତା ନିକଟରୁ ୧୨୫ ଗ୍ରାମ ବ୍ରାଉନସୁଗାର ଜବତ କରାଯାଇଛି ।
ଅନୁଗୁଳ ଜିଲ୍ଲା କନ୍ୟାବେଡା ଗାଁର ଅନିଲ ସାହୁ ଏବେ ଧରାପଡ଼ିଛି । ଦୀର୍ଘଦିନ ହେଲା ସେ ବ୍ରାଉନସୁଗାର ବେପାର କରି ଆସୁଥିବା ବେଳେ ଧରା ପଡୁନଥିଲା । ଏଥିପାଇଁ ଅବକାରୀ ବିଭାଗ ପକ୍ଷରୁ ତା ଉପରେ ସ୍ୱତନ୍ତ୍ର ନଜର ରଖାଯାଇଥିଲା । ବ୍ରାଉନସୁଗାର ଧରି ବିକ୍ରି କରିବାକୁ ଯାଉଥିଲା ଅନିଲ ସାହୁ । ଖବର ପାଇ ଅବକାରୀ ଟିମ୍ ଜାଲ ବିଛାଇଥିଲା । ଅନିଲ ଏକ ଅଟୋରେ ଯାଉଥିବା ବେଳେ କୁକୁଡ଼ାଙ୍ଗ ନିକଟରେ ତାକୁ ଧରିଥିଲା ଟିମ୍ । ତା ନିକଟରୁ ୧୨୫ ଗ୍ରାମ୍ ବ୍ରାଉନସୁଗାର ଜବତ କରାଯାଇଛି । ଜବତ ବ୍ରାଉନସୁଗାର ଆନୁମାନିକ ମୂଲ୍ୟ ୧୨ ଲକ୍ଷ ୫୦ ହଜାର ଟଙ୍କା ହେବ ।
ରାଜ୍ୟରେ ଏବେ ଧଳା ଜହର କାରବାର ବୃଦ୍ଧି ପାଇବାରେ ଲାଗିଛି । ବିଭିନ୍ନ ସ୍ଥାନରେ ବ୍ରାଉନସୁଗାର ବେପାର ଜୋରସୋରରେ ଚାଲିଛି । ଏହାକୁ ରୋକିବା ପାଇଁ ଅବକାରୀ ଟିମ୍ ଏବଂ ପୋଲିସ ପକ୍ଷରୁ ବିଭିନ୍ନ ସ୍ଥାନରେ ରେଡ୍ କରାଯାଉଛି । ଏ ଦିଗରେ ସଫଳତା ମିଳୁଥିଲେ ସୁଦ୍ଧା ବେପାରୀମାନେ ବିଭିନ୍ନ ଉପାୟରେ ବ୍ରାଉନସୁଗାର ବିକ୍ରି କରି ବେଶ୍ ଲାଭବାନ ହେଉଛନ୍ତି । ତେଣୁ ଅଭିଯୁକ୍ତମାନଙ୍କୁ ଧରିବା ପାଇଁ ଅଭିଯାନକୁ ଜୋରଦାର କରିଛି ଅବକାରୀ ଟିମ୍ ।