ମାହାଙ୍ଗା ବ୍ଲକ୍ ଅନ୍ତର୍ଗତ ଭଉଁରିଆ ପଞ୍ଚାୟତର ପନ୍ଦର ବାଟିଆ ସେତୁ ନିକଟରେ ଗୋବରୀ ଜଳ ନିକାଶ ପ୍ରଣାଳୀର ସଂଯୋଗ ନାଳୀ ଉନ୍ନତିକରଣ କାର୍ଯ୍ୟର ଶୁଭଭିତ୍ଷ ପ୍ରସ୍ତର ସ୍ଥାପନ ଆଜି ଅନୁଷ୍ଠିତ ହୋଇଛି। ଏହି ଗୁରୁତ୍ୱପୂର୍ଣ୍ଣ ପ୍ରକଳ୍ପର ଶୁଭାରମ୍ଭ ସାରଦା ପ୍ରସାଦ ପ୍ରଧାନଙ୍କ କରକମଳରେ ସମ୍ପନ୍ନ ହୋଇଥିବାରୁ ସ୍ଥାନୀୟ ବାସିନ୍ଦା ଓ ଚାଷୀମାନଙ୍କ ମଧ୍ୟରେ ନୂଆ ଆଶା ସୃଷ୍ଟି ହୋଇଛି।
କାର୍ଯ୍ୟକ୍ରମରେ ବିଧାୟକ ଶ୍ରୀ ପ୍ରଧାନ ଜନସାଧାରଣଙ୍କୁ ସମ୍ବୋଧିତ କରି ମାହାଙ୍ଗାରେ ଚାଲିଥିବା ବିଭିନ୍ନ ଉନ୍ନୟନମୂଳକ ପ୍ରକଳ୍ପ ବିଷୟରେ ଜଣାଇଥିଲେ। ସେ କହିଥିଲେ ଯେ ଏହି ୨୭ କିଲୋମିଟର ଲମ୍ବା ସଂଯୋଗ ପାଟ ନାଳୀ ମାଧ୍ୟମରେ ୧୯ଟି ପଞ୍ଚାୟତ ସରାସରି ଲାଭାନ୍ୱିତ ହେବ। ଏହା ଦ୍ୱାରା ଏଲାକାର ଶତାଧିକ ଚାଷୀ ଜଳ ନିଷ୍କାସନ ସମସ୍ୟାରୁ ମୁକ୍ତି ପାଇ ଭଲ ଫସଲ ଉପଜାଇ ପାରିବେ ବୋଲି ସେ ଆଶା ବ୍ୟକ୍ତ କରିଥିଲେ।
ବିଧାୟକ ନିଜ ବକ୍ତବ୍ୟରେ କହିଥିଲେ ଯେ ଏହି ନାଳୀ ପ୍ରକଳ୍ପର ଅନୁମାନିତ ଖର୍ଚ୍ଚ ପ୍ରାୟ ୯ କୋଟି ଟଙ୍କା, ଯାହା ଦୀର୍ଘଦିନ ଧରି ଚାଷୀମାନଙ୍କ ଦାବି ଥିଲା। ତଳିଆ ଅଞ୍ଚଳରେ ନିର୍ମଳ ଜଳ ନିଷ୍କାସନ ନଥିବାରୁ ବହୁ ଚାଷୀ ଧାନ ଉପଜାଇପାରୁ ନଥିଲେ। ନାଳୀ ଖୋଳା, ମରାମତି ଓ ବିକାଶ ହେବା ପରେ ବର୍ତ୍ତମାନ ଚାଷୀମାନେ ସମୟମତେ ସେଚନ କରି ଲାଭାନ୍ଵିତ ହେବେ ବୋଲି ସେ ଉଲ୍ଲେଖ କରିଥିଲେ।
ସେ ଅଧିକ କହିଛନ୍ତି ଯେ, ସମସ୍ତ ଉନ୍ନତି କାମର ସହିତ ନାଳୀ ଖନନ ଓ ମରାମତି କାର୍ଯ୍ୟର ସଠିକ୍ ନିର୍ବାହ ପାଇଁ ସମ୍ପର୍କିତ ଅଧିକାରୀ ଓ କର୍ମଚାରୀମାନେ ନିୟମିତ ତଦାରଖ କରିବା ଆବଶ୍ୟକ। ଏହି ପ୍ରକଳ୍ପ ସଫଳ ହେଲେ ମାହାଙ୍ଗାର ଚାଷୀମାନଙ୍କ ଜୀବନମାନରେ ମହତ୍ତ୍ୱପୂର୍ଣ୍ଣ ପରିବର୍ତ୍ତନ ଆସିବ ବୋଲି ସେ ଆଶ୍ୱାସନ ଦେଇଥିଲେ। ସ୍ଥାନୀୟ ଲୋକମାନେ ଓ ଚାଷୀମାନେ ବିଧାୟକଙ୍କ ଏହି ପଦକ୍ଷେପକୁ ସ୍ବାଗତ କରିଥାଇ, ଆଗାମୀ ଦିନରେ ମଧ୍ୟ ଏପରି ଉନ୍ନୟନ କାମ ଜାରି ରହିବ ବୋଲି ଆଶା ବ୍ୟକ୍ତ କରିଛନ୍ତି।