ନାଇଜେରିଆର କାଡୁନା ରାଜ୍ୟରୁ ଆଉ ଏକ ନିର୍ମମ ହିଂସାକାଣ୍ଡର ସମ୍ବାଦ ଆସିଛି। ଅସ୍ତ୍ରଧାରୀ ଦଳ ଏକ ଗାଁକୁ ଆକ୍ରମଣ କରି ତିନି ଜଣ ଗ୍ରାମବାସୀଙ୍କୁ ହତ୍ୟା କରିଦେଇଛି। ଆକ୍ରମଣକାରୀମାନେ ଏଠାରେ ହଂସ ରଚି ଅନେକଙ୍କୁ ବନ୍ଧକ କରି ନେଇଥିବା ସୂଚନା ମିଳିଛି।
ରିପୋର୍ଟ୍ କୁହୁଁଛି ଯେ ଅପହୃତମାନଙ୍କ ମଧ୍ୟରେ ଜଣେ କ୍ୟାଥୋଲିକ ପାଦ୍ରୀ ମଧ୍ୟ ଅଛନ୍ତି, ଯାହାରୁ ଅଞ୍ଚଳରେ ଆତଙ୍କ ଓ ଅସୁରକ୍ଷାର ଭୟ ଆହୁରି ବଢ଼ିଛି। ସରକାର ଘଟଣାକୁ ଗୁରୁତ୍ୱ ଦେଇଥିଲେ ମଧ୍ୟ, ଉତ୍ତର ନାଇଜେରିଆର ସୁରକ୍ଷା ପରିସ୍ଥିତି ଗୁରୁତର ସଙ୍କଟର ସମ୍ମୁଖୀନ ହେଉଥିବା ଖୋଲାମେଲା ହେଉଛି।
ଭୋର୍ ସମୟରେ ଆକ୍ରମଣ
ଶନିବାର ଭୋର୍ ପ୍ରାୟ ୩ଟା ସମୟରେ ବନ୍ଧୁକଧାରୀମାନେ କାଡୁନା ରାଜ୍ୟର କୌରୁ ଅଞ୍ଚଳର ଏକ ଗ୍ରାମକୁ ଟାର୍ଗେଟ କରିଥିଲେ । ଆକ୍ରମଣକାରୀମାନେ ଜୋରଜବରଦସ୍ତ ଜଣେ ପାଦ୍ରୀଙ୍କ ଘରେ ପଶି ଆକ୍ରମଣ କରିବା ସହିତ ଲୋକଙ୍କ ଉପରକୁ ଗୁଳି ଚଳାଇବା ଆରମ୍ଭ କରିଥିଲେ। ହଠାତ୍ ଆକ୍ରମଣରେ ତିନି ଜଣ ଗ୍ରାମବାସୀଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ଯାହା ଫଳରେ ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଥିଲା ।
ପାଦ୍ରୀଙ୍କୁ ଅପହରଣ
ହତ୍ୟାକାଣ୍ଡ ପରେ, ବନ୍ଧୁକଧାରୀମାନେ ବନ୍ଧୁକ ମୁନରେ ମୋଟ ୧୧ ଜଣଙ୍କୁ ଅପହରଣ କରିଛନ୍ତି । ସେମାନଙ୍କ ମଧ୍ୟରେ ଜଣେ କ୍ୟାଥୋଲିକ ପାଦ୍ରୀ ମଧ୍ୟ ଅଛନ୍ତି । ଚର୍ଚ୍ଚ ଅଧିକାରୀମାନେ ଘଟଣାକୁ ନିଶ୍ଚିତ କରିଛନ୍ତି ଏବଂ ଏହାକୁ ଆତଙ୍କବାଦୀଙ୍କ ଦ୍ୱାରା ଏକ ଯୋଜନାବଦ୍ଧ ଆକ୍ରମଣ ବୋଲି କହିଛନ୍ତି । କାଡୁନା କ୍ୟାଥୋଲିକ ଚର୍ଚ୍ଚ ସମସ୍ତ ଅପହୃତ ଲୋକଙ୍କ ସୁରକ୍ଷିତ ମୁକ୍ତି ପାଇଁ ନିବେଦନ କରିଛି ।
ବଢୁଛି ସୁରକ୍ଷା ଚିନ୍ତା
ଉତ୍ତର ନାଇଜେରିଆରେ ସୁରକ୍ଷା ପରିସ୍ଥିତି ଖରାପ ହେବାରେ ଲାଗିଛି । ଅପହରଣ ଘଟଣା ଏବେ ସାଧାରଣ ହୋଇଯାଇଛି । ରାଷ୍ଟ୍ରପତି ବୋଲା ଟିନୁବୁ ଏହି ସଙ୍କଟ ସମାପ୍ତ କରିବାକୁ ପ୍ରତିଶ୍ରୁତି ଦେଇଥିଲେ । କିନ୍ତୁ ସେ ଏପର୍ଯ୍ୟନ୍ତ ଏଥିରେ ସଫଳତା ହାସଲ କରିପାରି ନାହାନ୍ତି । ସାମରିକ ଚାପ ଏବେ ସଶସ୍ତ୍ର ଗୋଷ୍ଠୀଗୁଡ଼ିକୁ ଉତ୍ତର ଓ ଦକ୍ଷିଣ ଆଡକୁ ଗତି କରିବାକୁ ବାଧ୍ୟ କରିଥିବା କୁହାଯାଉଛି। । ଯାହା ଏକ ପ୍ରମୁଖ ଚିନ୍ତାର ବିଷୟ ପାଲଟିଛି ।
ଆନ୍ତର୍ଜାତୀୟ ପ୍ରଭାବ
ନାଇଜେରିଆ ସରକାର ଦେଶରେ ଖ୍ରୀଷ୍ଟିଆନମାନଙ୍କୁ ସମ୍ପୂର୍ଣ୍ଣ ସୁରକ୍ଷା ଦେବାରେ ବିଫଳ ହୋଇଥିବା ଆମେରିକା ଅଭିଯୋଗ କରିଛି । ଏହାର ଜବାବରେ, ଆମେରିକା ଗତ କିଛି ମାସ ମଧ୍ୟରେ ଅନେକ ଅଞ୍ଚଳରେ ସଶସ୍ତ୍ର ଗୋଷ୍ଠୀଙ୍କ ଶିବିର ଉପରେ ଏୟାର୍ ଷ୍ଟ୍ରାଇକ୍କରିଛି । ସୁରକ୍ଷା ସହାୟତା ଯୋଗାଇବା ପାଇଁ ଏକ ଛୋଟ ଆମେରିକୀୟ ସାମରିକ ଦଳ ବର୍ତ୍ତମାନ ନାଇଜେରିଆରେ ନିୟୋଜିତ କରାଯାଇଛି ।
ପୂର୍ବର ହିଂସାତ୍ମକ ଘଟଣା
ଏହି ଆକ୍ରମଣ ସମ୍ପ୍ରତି ୧୫୦ ରୁ ଅଧିକ ଖ୍ରୀଷ୍ଟିଆନଙ୍କୁ ବନ୍ଧକରୁ ମୁକ୍ତ କରାଯିବା ପରେ ଘଟିଛି । ପୂର୍ବରୁ, ଇସଲାମିକ ଉଗ୍ରବାଦୀମାନେ କ୍ୱାରା ରାଜ୍ୟରେ ୧୬୦ ରୁ ଅଧିକ ଲୋକଙ୍କୁ ନିର୍ମମ ଭାବରେ ହତ୍ୟା କରିଥିଲେ ।