‘ଜି୨୦’ ଶିଖର ସମ୍ମିଳନୀରେ ଯୋଗ ଦେବାକୁ ଆସିଥିବା ବିଶ୍ବର ବିଭିନ୍ନ ଦେଶର ନେତାମାନଙ୍କୁ ସ୍ବାଗତ କରିବା ଲାଗି ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଗତି ମୈଦାନରେ ନିର୍ମିତ ‘ଭାରତ ମଣ୍ଡପମ୍’ରେ ଉପସ୍ଥିତ ରହି ଅଷ୍ଟାଦଶ ‘ଜି୨୦’ ଶିଖର ସମ୍ମିଳନୀରେ ଯୋଗ ଦେବାକୁ ଆସିଥିବା ବିଶ୍ବ ନେତାମାନଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓଡ଼ିଶାର କୋଣାର୍କସ୍ଥିତ ସୂର୍ଯ୍ୟ ମନ୍ଦିରର ପ୍ରସିଦ୍ଧ ଚକ୍ରର ପ୍ରତିକୃତି ଥିବା ପୃଷ୍ଠଭୂମି ସମ୍ମୁଖରେ ସ୍ବାଗତ କରିବା ସହିତ କରମର୍ଦ୍ଦନ କରିଛନ୍ତି। ଏହି ଅବସରରେ, ‘ଏକ୍ସ୍’ କରି ରାଷ୍ଟ୍ରପତି ଦ୍ରୌପଦୀ ମୁର୍ମୁ କହିଛନ୍ତି: ନୂଆଦିଲ୍ଲୀରେ ଅନୁଷ୍ଠିତ ‘ଜି୨୦’ର ୧୮ଶ ଶିଖର ସମ୍ମିଳନୀକୁ ‘ଜି୨୦’ ରାଷ୍ଟ୍ରର ପ୍ରତିନିଧି ଦଳର ମୁଖ୍ୟ, ଅତିଥି ରାଷ୍ଟ୍ର ଓ ଅଂଶଗ୍ରହଣକାରୀ ଆନ୍ତର୍ଜାତିକ ସଙ୍ଗଠନମାନଙ୍କୁ ହାର୍ଦ୍ଦିକ ସ୍ବାଗତ। ଭାରତର ‘ଜି୨୦’ ଅଧ୍ୟକ୍ଷତାର ଭାବଧାରା ହେଉଛି ‘ବସୁଧୈବ କୁଟୁମ୍ବକମ୍’। ଦୀର୍ଘସ୍ଥାୟୀ, ସାମଗ୍ରିକ ଓ ମାନବକେନ୍ଦ୍ରିକ ବିକାଶର ବୈଶ୍ବିକ ମାର୍ଗ ହେଉଛି ଏକ ବିଶ୍ବ, ଏକ ପରିବାର ଓ ଏକ ଭବିଷ୍ୟତ। ଏହି ବିଚାରଧାରାକୁ ହୃଦୟଙ୍ଗମ କରିବା ଉଦ୍ୟମରେ ‘ଜି୨୦’ ଶିଖର ସମ୍ମିଳନୀର ଅଂଶଗ୍ରହଣକାରୀମାନେ ସଫଳ ହେବେ ବୋଲି ଆଶା। ଏ ସଂକ୍ରାନ୍ତରେ ‘ଏକ୍ସ୍’ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଲେଖିଛନ୍ତି: ‘ଜି୨୦’ ସ୍ବାଗତ-କରମର୍ଦ୍ଦନସ୍ଥଳରେ ଓଡ଼ିଶାର ଚିର ବିସ୍ମୟ କୋଣାର୍କ ଚକ୍ର। ସମଗ୍ର ଭାରତବାସୀ ଓ ବିଶେଷକରି ମୋ ଓଡ଼ିଶାର ଭାଇଭଉଣୀଙ୍କ ପାଇଁ ଅତି ଗୌରବର ମୁହୂର୍ତ୍ତ। ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଆଜି ସକାଳ ୯.୩୦ରୁ ୧୦.୩୦ ମଧ୍ୟରେ ନେତା ଓ ପ୍ରତିନିଧିମାନେ ‘ଭାରତ ମଣ୍ଡପମ୍’ରେ ପହଞ୍ଚି,ତା’ପରେ ‘ଟ୍ରି ଅଫ୍ଲାଇଫ୍ ଫର୍ ଫୟର୍’ରେ ପ୍ରଧାନମନ୍ତ୍ରୀଙ୍କ ସହିତ ସ୍ବାଗତକାଳୀନ ଫଟୋ ଉତ୍ତୋଳନ କରିବେ। ଏବଂ ତା’ପରେ ‘ସଭିଏଁ ଲାଉଞ୍ଜ୍ ଲେଭଲ୍୨’ ସମବେତ ହେବେ।