ଉତ୍ତରାଖଣ୍ଡ ରାଜନୀତିର ଜଣେ ସ୍ୱଚ୍ଛ, ଦକ୍ଷ ଓ ପ୍ରଭାବଶାଳୀ ବ୍ୟକ୍ତିତ୍ୱଙ୍କ ଅବସାନ ଘଟିଛି। ରାଜ୍ୟର ପୂର୍ବତନ ମୁଖ୍ୟମନ୍ତ୍ରୀ ତଥା ଭାରତୀୟ ଜନତା ପାର୍ଟିର ବରିଷ୍ଠ ନେତା, ଅବସରପ୍ରାପ୍ତ ମେଜର ଜେନେରାଲ ଭୁବନ ଚନ୍ଦ୍ର ଖଣ୍ଡୁରୀଙ୍କର ମଙ୍ଗଳବାର ଦିନ ଦେହାନ୍ତ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ଦୀର୍ଘ ଦିନ ଧରି ସେ ଅସୁସ୍ଥ ଥିଲେ ଏବଂ ଡେରାଡୁନର ମ୍ୟାକ୍ସ ହସ୍ପିଟାଲରେ ତାଙ୍କର ଚିକିତ୍ସା ଚାଲିଥିଲା।
ତାଙ୍କର ବିୟୋଗରେ ଦେଶର ସାମରିକ ଏବଂ ରାଜନୈତିକ ଜଗତରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି ହୋଇଛି।
ଭୁବନ ଚନ୍ଦ୍ର ଖଣ୍ଡୁରୀ ସେନାରୁ ଅବସର ନେବା ପରେ ସକ୍ରିୟ ରାଜନୀତିରେ ପ୍ରବେଶ କରିଥିଲେ।
ନିଜ ମୁଖ୍ୟମନ୍ତ୍ରୀତ୍ୱ କାଳରେ ସେ ଦୁର୍ନୀତି ବିରୋଧରେ ଶୂନ୍ୟ ସହନଶୀଳତା ନୀତି ଆପଣାଇଥିଲେ। ରାଜ୍ୟରେ ଏକ ସ୍ୱଚ୍ଛ, ଦାୟିତ୍ୱବାନ ଏବଂ ଶୃଙ୍ଖଳିତ ପ୍ରଶାସନର ମୂଳଦୁଆ ସ୍ଥାପନ କରିବାରେ ତାଙ୍କର ପ୍ରମୁଖ ଭୂମିକା ଥିଲା।
ଏହା ସହିତ ସେ କେନ୍ଦ୍ରରେ ଅଟଳ ବିହାରୀ ବାଜପେୟୀଙ୍କ ସରକାରରେ ମଧ୍ୟ ଗୁରୁତ୍ୱପୂର୍ଣ୍ଣ ମନ୍ତ୍ରୀ ପଦ ସମ୍ଭାଳିଥିଲେ ଏବଂ ଗଡ଼ୱାଲ ସଂସଦୀୟ କ୍ଷେତ୍ରରୁ ୧୬ତମ ଲୋକସଭାର ସଦସ୍ୟ ଭାବେ ନିର୍ବାଚିତ ହୋଇଥିଲେ।
ରାଜନୀତି ସହିତ ତାଙ୍କ ପରିବାର ମଧ୍ୟ ଉତ୍ତରାଖଣ୍ଡ ସେବାରେ ନିୟୋଜିତ ଅଛନ୍ତି। ତାଙ୍କ ଝିଅ ଋତୁ ଭୂଷଣ ଖଣ୍ଡୁରୀ ବର୍ତ୍ତମାନ ଉତ୍ତରାଖଣ୍ଡ ବିଧାନସଭାର ବାଚସ୍ପତି ଭାବେ ଦାୟିତ୍ୱ ତୁଲାଉଛନ୍ତି। ସେ ପିତାଙ୍କ ରାଜନୈତିକ ଓ ସାମାଜିକ ଆଦର୍ଶକୁ ଆଗକୁ ନେଉଛନ୍ତି।
ବିସି ଖଣ୍ଡୁରୀଙ୍କ ବିୟୋଗରେ ଗଭୀର ଶୋକ ପ୍ରକାଶ କରି ଉତ୍ତରାଖଣ୍ଡର ବର୍ତ୍ତମାନର ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଶ୍ରଦ୍ଧାଞ୍ଜଳି ଜଣାଇଛନ୍ତି।
- ଭାରତୀୟ ସେନାରେ ମେଜର ଜେନେରାଲ ପଦବୀରେ ରହି ଦେଶର ସୁରକ୍ଷାରେ ଅତୁଳନୀୟ ଅବଦାନ।
- ଉତ୍ତରାଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ, କେନ୍ଦ୍ର ମନ୍ତ୍ରୀ ଓ ସାଂସଦ।
- ସ୍ପଷ୍ଟବାଦୀ, ଦୁର୍ନୀତିମୁକ୍ତ ଏବଂ ଜଣେ ପ୍ରକୃତ ଦେଶଭକ୍ତ।
ତାଙ୍କର ଅନ୍ତିମ ସଂସ୍କାର ସମ୍ପୂର୍ଣ୍ଣ ରାଜ୍ୟ ମର୍ଯ୍ୟାଦା ସହିତ କରାଯିବ ବୋଲି ସୂଚନା ମିଳିଛି। ତାଙ୍କ ବିୟୋଗରେ ବିଭିନ୍ନ ମହଲରୁ ଶୋକର ସୁଅ ଛୁଟିବାରେ ଲାଗିଛି।