ଭାରତରେ କୁସ୍ତିଯୋଦ୍ଧାଙ୍କ ପ୍ରତି ଘୋର ଅନ୍ୟାୟ ହୋଇଛି । ଦିଲ୍ଲୀ ପୋଲିସର ଗିରଫଦାରୀ ବେଆଇନ୍ । ୟୁନାଇଟେଡ ୱାର୍ଲ୍ଡ ରେସଲିଂ ପକ୍ଷରୁ ଏଭଳି ସମାଲୋଚନା କରାଯାଇଛି । କୁସ୍ତି ଯୋଦ୍ଧାଙ୍କ ଧାରଣା ପରଠାରୁ ପ୍ରଥମ ଥର ପାଇଁ ମୁହଁ ଖୋଲି ଏଭଳି କହିଛି ସଂଘ । କୁସ୍ତି ଯୋଦ୍ଧାଙ୍କ ଅଭିଯୋଗର ନିରପେକ୍ଷ ତଦନ୍ତ କରାଯାଉ । ଏଥିସହ ଦୋଷୀଙ୍କୁ ଉଚିତ ଦଣ୍ଡ ଦେବାକୁ ୟୁନାଇଟେଡ ୱାର୍ଲ୍ଡ ରେସଲିଂ ଆହ୍ୱାନ କରିଛି । ରେସଲିଂ ଫେଡେରେସନ ଅଫ ଇଣ୍ଡିଆ ସଭାପତି ବ୍ରିଜଭୂଷଣ ସିଂଙ୍କ ବିରୋଧରେ ଅଭିଯୋଗ ଆସିଥିବା ବେଳେ ତାଙ୍କୁ ଅସ୍ଥାୟୀ ଭାବେ ପଦବୀରୁ ହଟାଯାଇଛି । ତେଣୁ ଆସନ୍ତା ଦିନରେ କୁସ୍ତି ଯୋଦ୍ଧାଙ୍କ ସହ ଆଲୋଚନା କରିବ ୟୁନାଇଟେଡ ୱାର୍ଲ୍ଡ ରେସଲିଂ।
ଇଣ୍ଡିଆନ୍ ଅଲିମ୍ପିକ ଆସୋସିଏସନ ଏବଂ ରେସଲିଂ ଫେଡେରେସନ ଅଫ ଇଣ୍ଡିଆର ଆଡହକ୍ କମିଟିକୁ ପୂର୍ବରୁ ଦିଆଯାଇଥିବା ୪୫ ଦିନ ଡେଡଲାଇନ ବିଷୟରେ ମଧ୍ୟ ଆଉଥରେ ମନେ ପକାଇ ଦେଇଛି ସଂଘ । ଏହି ଡେଡଲାଇନ ଭିତରେ ଇଲେକଟିଭ ଜେନେରାଲ ଆସେମ୍ବ୍ଲିଗଠନ ପାଇଁ କୁହାଯାଇଛି । ନିର୍ଦ୍ଦେଶ ଅମାନ୍ୟ କଲେ ୟୁନାଇଟେଡ ୱାର୍ଲ୍ଡ ରେସଲିଂ ପକ୍ଷରୁ ଆକ୍ସନ ନିଆଯିବ । ରେସଲିଂ ଫେଡେରସନ ଅଫ୍ ଇଣ୍ଡିଆକୁ ସସପେଣ୍ଡ କରାଯିବ ବୋଲି ଚରମବାଣୀ ଶୁଣାଇଛି UWW ।
କୁସ୍ତି ଯୋଦ୍ଧାଙ୍କ ଆନ୍ଦୋଳନ ଜାରି ରହିଛି । ସେଥିପାଇଁ ପୂର୍ବରୁ ଦିଲ୍ଲୀରେ ହେବାକୁ ଥିବା ଏସିଆନ ଚାମ୍ପିଆନସିପକୁ କାଜାକସ୍ଥାନ ସ୍ଥାନାନ୍ତର କରାଯାଇଥିଲା। ସେପଟେ ଗଙ୍ଗାରେ କୁସ୍ତିଯୋଦ୍ଧାମାନେ ମେଡାଲ ଭସାଇ ନାହାଁନ୍ତି । ହରିଦ୍ୱାରରେ ପହଞ୍ଚି ଚାଷୀ ନେତା ନରେଶ ଟିକାୟତ ବୁଝାସୁଝା କରିବା ପରେ ଏଥିରୁ ଓହରିଥିଲେ ।
