ଗରିବ, ଆଦିବାସୀ ବାପା ମୁଣ୍ଡଝାଳ ତୁଣ୍ଡରେ ମାରି ପୁଅକୁ ପାଠ ପଢାଇଥିଲେ। ଆଶା ଥିଲା ପୁଅ ବଡ ହେଇ ବଡ ଚାକିରି କରିବ। ବୁଢା ଦିନରେ ତାଙ୍କର ଆଶ୍ରା ହେବ ପୁଅ ଓ ତାଙ୍କ ଦୁଃଖ ଯିବ। ହେଲେ ସେହି ଆଶା ଆଜି ଆଶାରେ ରହିଯାଇଛି। ପୁଅକୁ ନେଇ ଦେଖିଥିବା ସ୍ବପ୍ନ କିଞ୍ଚିତ ସାକାର ହେବା ପରେ ବୁଢା ବାପାଙ୍କ ଜୀବନ ଆକାଶରେ କଳା ବାଦଲ ବର୍ଷି ଯାଇ ସ୍ବପ୍ନକୁ ସବୁ ଛାରଖାର କରି ଦେଇଛି। ଏବେ ବୁଢା ବାପା ପାଟିରୁ ସ୍ଫୁରୁନି ଶବ୍ଦଟିଏ। ମୁହଁ ମଉଳି ଯାଇଛି। କାରଣ ତାଙ୍କ ଭେଣ୍ଡିଆ ପୁଅ ତାଙ୍କ ବାର୍ଦ୍ଧକ୍ୟରେ ଭଣ୍ଡିଦେଇ ଚାଲିଯାଇଛି ଆରପାରିକୁ। ହଁ ଆଜ୍ଞା, ଗତକାଲି ସଚିବାଳୟର ଯେଉଁ ଯୁବ ଏଏସଓଙ୍କ ମୃତ୍ୟୁ ଖବର ଆଲୋଡନ ସୃଷ୍ଟି କରିଥିଲା, ଏ ହେଉଛନ୍ତି ତାଙ୍କ ବାପା। ମୟୂରଭଞ୍ଜ ଜିଲ୍ଲାର ମୋରା ମାରାଣ୍ଡି ଚଳିତ ବର୍ଷ ଏଏସଓ ଚାକିରିରେ ଯୋଗଦେଇଥିଲେ। ସଚିବାଳୟ ଇସ୍ପାତ ଓ ଖଣି ବିଭାଗରେ ଥିଲା ତାଙ୍କ କାମ। ଭୁବନେଶ୍ବରର ଆଚାର୍ଯ୍ୟବିହାର ଅଞ୍ଚଳରେ ତିନି ଜଣ ସାଙ୍ଗ ଏକାଠି ରହୁଥିଲେ। ଗତକାଲି ପରିବାର ଲୋକ ତାଙ୍କୁ ଫୋନ କରିଥିଲେ ମଧ୍ୟ ତାଙ୍କ ଫୋନ ଲାଗିନଥିଲା। ମୋରାଙ୍କ ସାଙ୍ଗଙ୍କୁ ଏନେଇ ପରିବାର ଲୋକ ଜଣାଇଥିଲେ। ସେ ମଧ୍ୟାହ୍ନରେ ଆସି କବାଟ ବାଡେଇ ଥିଲେ ମଧ୍ୟ ମୋରା କବାଟ ଖୋଲି ନ ଥିଲେ। ତେଣୁ ସେ ଝରକା ଖୋଲିଦିଅନ୍ତି ଆଖିରେ ପଡିଲା ମୋରାଙ୍କ ଜୀବନ ବିହୀନ ଶରୀର ବୋଲି କହିଛନ୍ତି ସାଙ୍ଗ। ତେବେ କାହିଁକି ଏମିତି କଲେ ମୋରା ତାର କାରଣ କାହାରିକୁ ଜଣା ନାହିଁ। ବୁଢା ବାପା ଆଦିବାସୀ ଭାଷାରେ ଅନେକ କିଛି କହୁଥିଲେ ମଧ୍ୟ ଆମ ପାଇଁ ସେସବୁ ବୁଝିବା ସହଜ ହୋଇନାହିଁ। ହେଲେ ସେ ଆଜି ସର୍ବହରା ହୋଇଯାଇଛନ୍ତି, ଏତିକି ଆମେ ବୁଝିଛୁ।
ଖବର ପାଇ ପୋଲିସ ମୋରାଙ୍କ ମୃତଦେହ ଗତକାଲି ଜବତ କରି କ୍ୟାପିଟାଲ ହସ୍ପିଟାଲରେ ରଖିଥିଲା। ଆଜି ପରିବାର ଲୋକ ଆସିବା ପରେ ବ୍ୟବଚ୍ଛେଦ ହୋଇଛି। ଆଜି ମରଶରୀରକୁ ପରିବାର ଲୋକେ ଗାଁକୁ ନେବେ। ହେଲେ ମୋରା କାହିଁକି ଏପରି ଚରମ ନିଷ୍ପତ୍ତି ନେଲେ ତାକୁ ନେଇ ଉଠୁଛି ଅନେକ ପ୍ରଶ୍ନ। ତେବେ ଘର ଲୋକଙ୍କ କହିବା କଥା କାମକୁ ନେଇ ଚାପରେ ଥିଲେ। ତେବେ ଏପରି ମୃତ୍ୟୁ ପଛର ବାସ୍ତବ କାରଣ ପୋଲିସର ତଦନ୍ତ ପରେ ବାହାରିପାରିବ ବୋଲି ଆଶା ରଖିଛନ୍ତି ପରିବାର ଲୋକ