ଆଜି ମୁଖ୍ୟଯନ୍ତ୍ରୀ ତଥା ବୈତରଣୀ ବେସିନର ମ୍ୟାନେଜରଙ୍କ କେନ୍ଦୁଝର ସରକାରୀ ବାସଭବନ ଓ କାର୍ଯ୍ୟାଳୟରେ ଯାଞ୍ଚ ଆରମ୍ଭ କରିଛି ଭିଜିଲାନସ୍ ବିଭାଗ । ଆଜି ମୁଖ୍ୟଯନ୍ତ୍ରୀଙ୍କ ଉପସ୍ଥିତି ଏବଂ କେନ୍ଦୁଝର ଭିଜିଲାନ୍ସ DSPଙ୍କ ନେତୃତ୍ୱରେ ଏହି ଯାଞ୍ଚ କରାଯାଉଛି । ଗତକାଲି କେନ୍ଦୁଝରରେ ମୁଖ୍ୟ ଯନ୍ତ୍ରୀଙ୍କର ଅନୁପସ୍ଥିତି ଯୋଗୁଁ ଏହି ୨ଟି ସ୍ଥାନକୁ ଭିଜିଲାନ୍ସ ବିଭାଗ ତରଫରୁ ଜଉମୁଦ ଦେଇ ସିଲ୍ କରାଯାଇଥିଲା । ସୂଚନାଯୋଗ୍ୟ, ଗତକାଲି ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ମୁଖ୍ୟଯନ୍ତ୍ରୀ ତଥା ବୈତରଣୀ ବେସିନର ମ୍ୟାନେଜର କୈଳାଶ ଚନ୍ଦ୍ର ସାହୁଙ୍କ ୧୦ଟି ଠିକଣାରେ ଭିଜିଲାନସ୍ ଚଢ଼ାଉ କରିଥିଲା । ଏହି ଚଢ଼ାଉରେ ୩ଟି Flat, ଗୋଟିଏ ୮୮୨୧ Sqftର ୩ ମହଲା ନିର୍ମାଣାଧୀନ ଘର, ଏକ ଦୋକାନ ଘର, ୨୮ଟି ମୂଲ୍ୟବାନ Plot ଓ ୮୨ ଲକ୍ଷ ୮୦ ହଜାର ଟଙ୍କାର ବ୍ୟାଙ୍କ ଜମା, ଗୋଟିଏ ୪ ଚକିଆ ଗାଡ଼ି ସହ, ୩ଟି ୨ ଚକିଆ ଗାଡ଼ି ଠାବ ହୋଇଛି । ଆଜି ମୁଖ୍ୟଯନ୍ତ୍ରୀ କୈଳାଶ ଚନ୍ଦ୍ର ସାହୁଙ୍କୁ ନେଇ କେନ୍ଦୁଝରରେ ତାଙ୍କର ୨ଟି ଠିକଣାରେ ଭିଜିଲାନ୍ସ ଯାଞ୍ଚ ଜାରି ରଖିଛି ।
ତେବେ ଗତକାଲି ଏହି ମାମଲାରେ କୈଳାଶ ସାହୁଙ୍କ ଯାଜପୁର ଜିଲ୍ଲା ଡ଼ାକବଙ୍ଗଳା ସ୍ଥିତ ଏକ ଆପାଟମେଣ୍ଟ ଭିତରେ ଥିବା ଭଡା ଘରେ ଭିଜିଲାନ୍ସ ଚଢ଼ାଉ କରିଥିଲା । କାରଣ ସେ ଏହା ପୂର୍ବରୁ ସେ ଯାଜପୁରର କୋରେଇ ବ୍ଲକରେ କାର୍ଯ୍ୟରତ ଥିଲେ । ବାଲେଶ୍ୱର ଭିଜିଲାନ୍ସ ଏସପିଙ୍କ ନିର୍ଦ୍ଦେଶ କ୍ରମେ ଏକ ୫ ଜଣିଆ ଟିମ ହଠାତ ବ୍ୟାସନଗର ପୌର ପରିଷଦ ସ୍ଥିତ ଡ଼ାକବଙ୍ଗଳା ଛକରେ ପହଞ୍ଚିଥିଲେ । ଭିଜିଲାନ୍ସ ପକ୍ଷରୁ ଏକାକାଳୀନ କେନ୍ଦୁଝର ଜିଲ୍ଲା ବାସଭବନ ସହିତ କୈଳାଶଙ୍କ ୧୦ଟି ସ୍ଥାନରେ ଚଢ଼ାଉ କରି ସମ୍ପତ୍ତି ଆକଳନ କରାଯାଇଛି ।