ୱାଶିଂଟନ ଡିସିର ରିଗାନ ନ୍ୟାସନାଲ ଏୟାରପୋର୍ଟ ନିକଟରେ ଏକ ଯାତ୍ରୀବାହୀ ବିମାନ ଏକ ଆମେରିକୀୟ ସାମରିକ ହେଲିକପ୍ଟର ସହିତ ଧକ୍କା ହୋଇ ପୋଟୋମାକ ନଦୀରେ ଖସିପଡ଼ିଛି। ଏହି ବିମାନରେ ପ୍ରାୟ ୬୪ ଜଣ ଥିଲେ, ଯେଉଁଥିରୁ ୪ ଜଣ କ୍ରୁ ସଦସ୍ୟ ଥିଲେ। BNO ରିପୋର୍ଟ ଅନୁଯାୟୀ, ଦୁର୍ଘଟଣା ପରେ ୪ ଜଣଙ୍କୁ ଉଦ୍ଧାର କରାଯାଇଛି। ସେପଟେ ଉଦ୍ଧାର କାର୍ଯ୍ୟ ସମୟରେ ନଦୀରୁ ୧୯ ଜଣଙ୍କ ମୃତଦେହ ଉଦ୍ଧାର କରାଯାଇଛି। ତଥାପି, ମୃତ୍ୟୁ ସଂଖ୍ୟା ଆହୁରି ବୃଦ୍ଧି ପାଇପାରେ ବୋଲି ଆଶଙ୍କା କରାଯାଉଛି।
ଏହି ଆମେରିକୀୟ ଏୟାରଲାଇନ୍ସ ବିମାନଟି କାନସାସର ୱିଚିଟାରୁ ଉଡ଼ାଣ ଭରି ୱାଶିଂଟନ ଡିସି ଅଭିମୁଖେ ଆସୁଥିଲା । ରନୱେରେ ଅବତରଣ କରିବା ସମୟରେ, ଏହି ବିମାନଟି ଏକ ସାମରିକ ହେଲିକପ୍ଟର ସହିତ ମୁହାଁ-ମୁହିଁ ହୋଇଥିଲା। ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ବିମାନଟି ହଠାତ୍ ଡାହାଣକୁ ଢଳିବା ପରେ ଏଥିରେ ନିଆଁ ଲାଗିଯାଇଥିଲା ଏବଂ ଏହା ଦ୍ରୁତ ଗତିରେ ନଦୀରେ ଖସି ପଡ଼ିଲା।
ଆମେରିକାର ଫେଡେରାଲ୍ ଏଭିଏସନ୍ ପ୍ରଶାସନ କହିଛି ଯେ ପିଏସଏ ଏୟାରଲାଇନ୍ସର ଏକ ଆଞ୍ଚଳିକ ଜେଟ୍ ବିମାନ ରେଗାନ୍ ଆଡକୁ ଯାଉଥିବା ସମୟରେ ଏକ ବ୍ଲାକ୍ ହକ୍ ହେଲିକପ୍ଟର ସହିତ ଧକ୍କା ହୋଇଥିଲା। ଆମେରିକୀୟ ସାମରିକର ଜଣେ ଅଧିକାରୀ ନିଶ୍ଚିତ କରିଛନ୍ତି ଯେ ଏହାର ଗୋଟିଏ ହେଲିକପ୍ଟର ମଧ୍ୟ ଦୁର୍ଘଟଣାରେ ସାମିଲ ଥିଲା।