ଝିଆରୀ ଅନ୍ୟ ଜାତିରେ ବିବାହ କରିବାରୁ ମାରିଦେଲା ଦାଦା

ଉତ୍ତର ପ୍ରଦେଶର ସୀତାପୁରରେ ଅନର କିଲିଙ୍ଗର ପୁନରାବୃତ୍ତି।  ଝିଆରୀ ଅନ୍ୟ ଜାତିର ଯୁବକ ସହ ଘରୁ ପଳାଇ ଯାଇ ବିବାହ କରିଥିବାରୁ ଦାଦା ହତ୍ୟା କରିଛି ଝିଆରୀକୁ।  ଜଘଣ୍ୟ ହତ୍ୟାକାଣ୍ଡ ଘଟାଇବା ପରେ ଦାଦା ଥାନାକୁ ଯାଇ ଆତ୍ମସମର୍ପଣ କରିଛି। ପୋଲିସ ଅଭିଯୁକ୍ତଠାରୁ ହତ୍ୟାରେ ବ୍ୟବହୃତ ମାରଣାସ୍ତ୍ର ଜବତ କରିଛି। ସୀତାପୁରର ପିସାୱାନା ଥାନା ଅଧୀନ ବାଜନଗର ଗାଁରେ ଶନିବାର ଏହି ହତ୍ୟାକାଣ୍ଡ ହୋଇଛି।  ପୋଲିସ ମାମଲାକୁ ନେଇ କହିଛି କି, ଏହା ସମ୍ପୂର୍ଣ୍ଣରୂପେ ଅନର କିଲିଂ ମାମଲା। ଅଭିଯୁକ୍ତ ମଧ୍ୟ ନିଜ ଦୋଷ ମାନି ନେଇଛି।

ସୂଚନାକ ମୁତାବକ, ସେହି ଗାଁର ରୁପ ଚନ୍ଦ୍ର ମୌର୍ୟ୍ୟ ନାମକ ଜଣେ ବ୍ୟକ୍ତି ସହ ମୃତ ୨୦ ବର୍ଷୀୟା ଯୁବତୀଙ୍କର ପ୍ରେମ ସମ୍ପର୍କ ଗଢିଉଠିଥିଲା। କିନ୍ତୁ ଉକ୍ତ ଯୁବକ ପୂର୍ବରୁ ବିବାହିତ ଥିଲେ। ଉଭୟଙ୍କ ସମ୍ପର୍କ ବିଷୟରେ ଯୁବତୀଙ୍କ ପରିବାର ଜାଣିବା ପରେ ଯୁବତୀଙ୍କ ଦାଦା ରାଗରେ ହିତାହତ ଜ୍ଞାନ ହରାଇ ବସିଥିଲେ ଓ ଯୁବତୀଙ୍କୁ ଏକ ଧାରୁଆ ଛୁରୀରେ ଭୁଷି ଚାଲିଥିଲେ। ଫଳରେ ଯୁବତୀଙ୍କ ଘଟଣା ସ୍ଥଳରେ ହିଁ ମୃତ୍ୟୁ ହୋଇଥିଲା। ସ୍ଥାନୀୟ କୌଣସି ବ୍ୟକ୍ତି ପୋଲିସକୁ ଏହି ହତ୍ୟାକାଣ୍ଡ ସମ୍ପର୍କରେ ସୂଚନା ଦେଇଥିଲେ ଓ ଏସପିଙ୍କ ସହ ପୋଲିସ ଟିମ ସେଠାରେ ପହଞ୍ଚିଥିଲା। ପୋଲିସ ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇ ଦେଇଛି।

ପୋଲିସ ତଥ୍ୟ ମୁତାବକ ପୀଡିତାର ରୁପ ଚନ୍ଦ୍ର ସହ ସମ୍ପର୍କ ଗଢିଉଠିଥିଲା। ପରିବାର ଲୋକେ ସେମାନଙ୍କୁ ବିବାହ କରିବାକୁ ଦେବେ ନାହିଁ ଜାଣି ନଭେମ୍ବର ମାସରେ ଉଭୟ ଗାଜିଆୱାଦ ପଳାଇଯାଇ ସେଠାରେ କୋର୍ଟ ମ୍ୟାରେଜ କରିଥିଲେ ଓ ସେଠାରେ ଏକାଠି ରହିଥିଲେ। କିଛି ଦିନ ତଳେ ଉଭୟ ଗାଁକୁ ଆସିଥିଲେ। ତେବେ ଝିଆରୀ ଘରୁ ପଳାଇବା ପରଠାରୁ ଦାଦା ତାକୁ ମାରିବାକୁ ଅପେକ୍ଷା କରି ବସିଥିଲା। ଯେତେବେଳେ ସେମାନେ ଗାଁକୁ ଫେରିଲେ ଦାଦା ଝିଆରୀକୁ ଛୁରାମାଡ କରିଥିଲା ବୋଲି ପୋଲିସ ସୂଚନା ଦେଇଛି।

ଏନେଇ ରୁପଚନ୍ଦ୍ରର ପରିବାର ପକ୍ଷରୁ ଥାନାରେ ଏକ ଅଭିଯୋଗ ହୋଇଛି। ଘରେ ପସି ପୀଡିତାର ପରିବାର ଲୋକେ ତାକୁ ଘୋଷାଡି ନେବା ସହ ହତ୍ୟା କରିଥିବା ଆଭିଯୋଗରେ ଉଲ୍ଳେଖ କରାଯାଇଛି। ପୋଲିସ ଘଟଣାର ତଦନ୍ତ ଚଳାଇଛି। ତେବେ ଏହା ପୂର୍ବରୁ ଗତ ଡିସେମ୍ୱରରେ ଉତ୍ତର ପ୍ରଦେଶର ବିଜନୋର ଜିଲ୍ଲାରେ ଜଣେ ବ୍ୟକ୍ତିଙ୍କୁ ଅନର କିଲିଂ ମାମଲାରେ ହତ୍ୟା କରାଯାଇଥିବା ଅଭିଯୋଗ ହୋଇଥିଲା। ମାମଲାରେ ପୋଲିସ ୪ ଜଣଙ୍କୁ ଗିରଫ କରିଥିଲା। ଅଭିଯୁକ୍ତ ବାପା ଝିଅର ପ୍ରେମିକକୁ ମାରିଦେଇଥିବା ଅଭିଯୋଗ ହୋଇଥିଲା।