କର୍ମଚାରୀ ମାନଙ୍କ ଟଙ୍କା ହଡ଼ପ କରିବା ଏବଂ ବେନିୟମ ଭାବେ ଜିପିଏଫ ଟଙ୍କା ଉଠାଇବା ଅଭିଯୋଗରେ ଆଜି ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ଅଦାଲତ ଦୁଇ ସରକାରୀ କର୍ମଚାରୀଙ୍କୁ ୪ ବର୍ଷ ଲେଖାଏଁ ଜେଲଦଣ୍ଡ ଆଦେଶ ଦେଇଛନ୍ତି। ଏଥିସହ ଦୋଷୀମାନଙ୍କୁ ୧୦ ହଜାର ଟଙ୍କା ଲେଖାଏଁ ଅର୍ଥ ଦଣ୍ଡରେ ଦଣ୍ଡିତ କରାଯାଇଛି। ଜରିମାନା ଅନାଦେୟ ସ୍ଥଳେ ସେମାନଙ୍କୁ ଅଧିକ ୬ ମାସ ଅଧିକ ଜେଲ ଦଣ୍ଡ ଭୋଗିବାକୁ ପଡିବ ବୋଲି ଅଦାଲତ ରାୟ ଦେଇଛନ୍ତି। ଦଣ୍ଡାଦେଶ ପାଇଥିବା ଅଭିଯୁକ୍ତମାନେ ହେଲେ ବୌଦ୍ଧ ଜିଲ୍ଲା ପାଲଝର ଫାର୍ମର ତତ୍କାଳୀନ ଅଧୀକ୍ଷକ ନରେନ୍ଦ୍ର କୁମାର ଦଳାଇ ଏବଂ ବରିଷ୍ଠ କିରାଣୀ ସୁଧୀର କୁମାର ରାଉତ। ଗତ ୨୦୦୧ରୁ ୨୦୦୩ ମସିହା ମଧ୍ୟରେ ୧୪ କର୍ମଚାରୀଙ୍କ ଜିପିଏଫର ମାସିକ କିସ୍ତି ୨ ଲକ୍ଷ ୧୧ ହଜାର ୭୨୪ ଟଙ୍କା ଦୁଇ ଅଭିଯୁକ୍ତ ହଡପ କରି ନେଇଥିଲେ। ଏଭଳି ଭାବେ ସେମାନେ ଆତ୍ମସାତ କରିଥିବା ଜଣା ପଡିଥିଲା । ୧୨ ଜଣ ସାକ୍ଷୀଙ୍କ ବୟାନ ଓ ଅନ୍ୟାନ୍ୟ ତଥ୍ୟ ଆଧାରରେ ଭିଜିଲାନ୍ସ କୋର୍ଟ ବିଚାରପତି ସମର ବିଳାସ ବେହେରା ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି।