ହିନ୍ଦୁ ଧର୍ମରେ ତୁଳସୀ ଗଛର ରହିଛି ବଡ ମହତ୍ୱ। ପ୍ରତି ହିନ୍ଦୁଙ୍କ ଘର ଆଗରେ ଶୋଭାପାଏ ଚଉରାରେ ତୁଳସୀ। ତୁଳସୀକୁ ହିନ୍ଦୁଧର୍ମାବଲମ୍ବୀ ପବିତ୍ର ତୁଳସୀକୁ ବିଷ୍ଣୁ ପ୍ରିୟା ଭାବେ କରିଥାନ୍ତି ପୂଜାର୍ଚ୍ଚନା। ତେବେ ତୁଳସୀ ପୂଜିବାର ରହିଛି ଏକ ନିର୍ଦ୍ଧିଷ୍ଟ ଶୈଳୀ ଓ କେତେକ କାର୍ଯ୍ୟ ନ କରିବାକୁ ମଧ୍ୟ ରହିଛି ଶାସ୍ତ୍ରୀୟ ନିର୍ଦ୍ଦେଶାବଳୀ। ଏହି ଉପାୟରେ ତୁଳସୀ ପୂଜା କରିବା ଦ୍ୱାରା ଘରେ ସୁଖ ସମୃଦ୍ଧି ବୃଦ୍ଧି ହେବାର ରହିଛି ବିଶ୍ୱାସ।
ତୁଳସୀର ପୂଜା ମାନସିକ ଶାନ୍ତି ପ୍ରଦାନ କରିବା ସହ ଗୃହରେ ସକାରାତ୍ମକ ଶକ୍ତିର ସୃଷ୍ଟି କରିଥାଏ। ତେଣୁ ଚଉରା ଚାରିପାଖ ସଫା ସୁତରା ରଖିବାକୁ କୁହାଯାଇଛି। ଚଉରା ନିକଟରେ ଯୋତା ରଖିବାକୁ କରାଯାଇଛି ବାରଣ। ସେହିପରି କଦାପି ତୁଳସୀ ଗଛକୁ ଅପରିଷ୍କାର କି ଅଇଁଠା ହାତରେ ଛୁଅନ୍ତୁ ନାହିଁ। ଏପରି କାର୍ଯ୍ୟରେ ବିଷ୍ଣୁ ଅପମାନିତ ହେବା ସହ କ୍ରୋଧିତ ହୋଇଥାନ୍ତି ବୋଲି ବିଶ୍ୱାସ ରହିଛି। ତୁଳସୀ ମୂଳରେ ପାଣି ଦେବା ବେଳେ ବା ପୂଜା କରିବା ବେଳେ କଳା କପଡା ପିନ୍ଧନ୍ତୁ ନାହିଁ । ମୁଖ୍ୟତଃ ଏକାଦଶୀ ତିଥିରେ କଳା କପଡା ପିନ୍ଧି ପୂଜା କରିବା ଅତି ଭୟଙ୍କର ଫଳ ଦେଇଥାଏ ।
ଆଉ ଏକ ବିଶେଷ ବିଶ୍ବାସ ରହିଛି ତୁଳସୀଙ୍କୁ ନେଇ। ବିଶ୍ୱାସ ରହିଛି, ଦେବସୟନୀ ଏକାଦଶୀଠାରୁ ବିଷ୍ଣୁ ୪ ମାସ ପାଇଁ ଯିବେ କ୍ଷୀର ସାଗରକୁ ଯୋଗ ଶୟନରେ, ଯାହାକୁ ଚତୁର୍ମାସ ବା ଚତୁର୍ମାସିଆ କୁହାଯାଏ। ଏହି ଏକାଦଶୀ ଦିନକୁ ବହୁତ ଶୁଭ ଭାବେ ଗ୍ରହଣ କରାଯାଏ। ତେଣୁ ଏହି ଦିନ ବିଷ୍ଣୁ ପ୍ରିୟା ତୁଳସୀଙ୍କ ପୂଜା କରିବା ଅତି ଶୁଭ ବୋଲି ବିଶ୍ୱାସ ରହିଛି। ତେବେ ଏକାଦଶୀ ଦିନମାନଙ୍କରେ ମା ତୁଳସୀ ନିର୍ଜଳା ବ୍ରତ ରଖିଥିବାରୁ ଏହି ଦିନରେ ତୁଳସୀ ମୂଳରେ ଜଳ ଚଢାଇବା ଅନୁଚିତ। ଏକାଦଶୀ ଦିନ ତୁଳସୀ ପତ୍ର ଛିଣ୍ଡାଇବା ଉପରେ ମଧ୍ୟ ରହିଛି ବାରଣ। ତେଣୁ ଯଦି ତୁଳସୀର ବ୍ୟବହାର କରିବାକୁ ଚାହୁଁଥାନ୍ତି ତେବେ ତା ପୂର୍ବ ଦିନରୁ ପତ୍ର ଛିଣ୍ଡାଇ ରଖିଥାନ୍ତୁ। ଏହି ପରି ନିତି ନିୟମରେ ତୁଳସୀ ପୂଜା କଲେ ବହୁ ସୁଫଳ ମିଳିଥାଏ। ଏହା ବ୍ୟତୀତ ଆଗାମୀ ୨୯ ତାରିଖରେ ଦେବସୟନୀ ଏକାଦଶୀ ଥିବାରୁ ତୁଳସୀ ପୂଜା ବେଳେ ଏହି ନିୟମ ପାଳନ କରନ୍ତୁ।