ଅନୁଗୋଳ ଜିଲ୍ଲା ବଅଁରପାଳ ବ୍ଲକ ଅନ୍ତର୍ଗତ ତୁଳସୀପାଳ ଗ୍ରାମ ଫଟାକାଞ୍ଜିଆଠାରେ ଅଧିଷ୍ଠାତ୍ରୀ ଦେବୀ ମା’ ମହାପାଟଙ୍କ ବାର୍ଷିକ ଉତ୍ସବ ସମାରୋହରେ ପାଳିତ ହୋଇଯାଇଛି। ପ୍ରତ୍ୟେକ ବର୍ଷ ଭାଦ୍ରବ ମାସ ଶୁକ୍ଳପକ୍ଷ ଦ୍ଵିତୀୟା ଦିନ ମା’ଙ୍କ ବଡ଼ପୂଜାକୁ ଆନନ୍ଦଉଲ୍ଲାସର ସହ ପାଳନ କରାଯାଇଛି। ପ୍ରତ୍ୟୁଷରୁ ମାଙ୍କୁ ଛତି, ତରାଶ, ଢୋଲ, ନିଶାଣ, ଆତସବାଜୀ ଓ ଡିଜେ ସାଉଣ୍ଡ ସହ ଏକ ଶୋଭାଯାତ୍ରାରେ ମୁଖ୍ୟରାସ୍ତା ପରିକ୍ରମା କରି ଫଟାକାଞ୍ଜିଆ ଠାରେ ଥିବା ପୀଠସ୍ଥଳୀଙ୍କୁ ନେଇଥିଲେ। ସେଠାରେ ମାଙ୍କ ପୂଜାର୍ଚ୍ଚନା କରାଯାଇଥିଲା। ଏହି ପୀଠ ଓ ପୀଠେଶ୍ବରୀଙ୍କ ଉପରେ ସ୍ଥାନୀୟ ଅଞ୍ଚଳର ଲୋକଙ୍କ ପ୍ରଗାଢ ବିଶ୍ବସ ରହିଛି। ମାଙ୍କ ନିକଟରେ ଯାହା ମାନସିକ କରାଯାଏ ତାହା ମା ପୂରଣ କରିଥାନ୍ତି ବୋଲି ଏଠାକୁ ଆସିଥିବା ଭକ୍ତ ଓ ଶ୍ରଦ୍ଧାଳୁ କହିଥିଲେ।
ବହୁ ସଂଖ୍ୟକ ମାନସିକଧାରୀ ମହିଳା ଓ ଶିଶୁ ଅଧିଆ ପଡିବା ସହ ମୁଣ୍ଡନ କରିଥିଲେ। ଏହି ସେଠାରେ ଏକ ମୀନା ବଜାର ମଧ୍ୟ ପଡିଥିଲା। ଆଖପାଖ ଲଙ୍ଗୁଳିଆବେଡା, ଗାଢ଼ରଖାଇ, କଙ୍କିନାଳୀ, ବନ୍ଦା ଓ ଝଜିରୀବାହାଳ ଗ୍ରାମରୁ ବହୁ ସଂଖ୍ୟକ ଶ୍ରଦ୍ଧାଳୁ ଭକ୍ତଙ୍କ ସମାଗମ ହୋଇଥିଲା। ବନ୍ଦା ସମିତିସଭ୍ୟ ଦୁଷ୍ମନ୍ତ କୁମାର ଗଡ଼ନାୟକ ଓ ସହଯୋଗୀ ମଳୟ କୁମାର ଗଡ଼ନାୟକ ସମସ୍ତ ଶ୍ରଦ୍ଧାଳୁ ଭକ୍ତଙ୍କ ପାଇଁ ପ୍ରସାଦ ସେବନର ଆୟୋଜନ କରିଥିଲେ।