ଇରାନରେ ସରକାର ବିରୋଧୀ ସ୍ୱରକୁ ଦମନ କରିବା ପାଇଁ ପୁଣି ଏକ କଠୋର ପଦକ୍ଷେପ ନିଆଯାଇଛି। ଜଣେ ମାତ୍ର ୧୯ ବର୍ଷୀୟ ଯୁବ କୁସ୍ତିଯୋଦ୍ଧା ସାଲେ ମୋହମ୍ମଦୀଙ୍କ ସମେତ ତିନିଜଣଙ୍କୁ ସର୍ବସମ୍ମୁଖରେ ମୃତ୍ୟୁଦଣ୍ଡ ଦିଆଯାଇଛି। ଏହି ଘଟଣା ଏବେ ସାରା ବିଶ୍ୱର କ୍ରୀଡ଼ା ଜଗତ ଏବଂ ମାନବାଧିକାର କର୍ମୀଙ୍କ ମଧ୍ୟରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି। ଗତ ଜାନୁଆରି ମାସରେ ହୋଇଥିବା ସରକାର ବିରୋଧୀ ଆନ୍ଦୋଳନ ସମୟରେ ମୋହମ୍ମଦୀ ଓ ଅନ୍ୟ ଦୁଇଜଣ ବିକ୍ଷୋଭକାରୀ ଦୁଇଜଣ ପୋଲିସ କର୍ମୀଙ୍କୁ ହତ୍ୟା କରିଥିବା ଅଭିଯୋଗ ହୋଇଥିଲା।
ଜାନୁଆରି ୮ ତାରିଖରେ ହୋଇଥିବା ପ୍ରତିବାଦରେ ଅନେକ କ୍ରୀଡ଼ାବିତ୍ ସାମିଲ ହୋଇଥିଲେ। ପୋଲିସର ଗୁଳିଚାଳନା ଯୋଗୁଁ ସେଠାରେ ଅନେକ ଲୋକ ଆହତ ମଧ୍ୟ ହୋଇଥିଲେ। ଇରାନର ପୂର୍ବତନ ଖେଳାଳିମାନେ ଏହି କାର୍ଯ୍ୟାନୁଷ୍ଠାନକୁ ତୀବ୍ର ସମାଲୋଚନା କରିଛନ୍ତି। ପୂର୍ବତନ ୱାଟର ପୋଲୋ ଖେଳାଳି ରେଜା ସୁଲୋମାନୀ କହିଛନ୍ତି ଯେ, ଇରାନରେ କ୍ରୀଡ଼ାବିତ୍ମାନଙ୍କୁ ସମାଜର ଆଦର୍ଶ ଭାବେ ଗ୍ରହଣ କରାଯିବା ପରିବର୍ତ୍ତେ ସେମାନଙ୍କ ଉପରେ ଅକଥନୀୟ ଅତ୍ୟାହାର କରାଯାଉଛି। ଜଣେ ଯୁବ ପ୍ରତିଭାବାନ ଖେଳାଳିଙ୍କୁ ଏଭଳି ଭାବେ ମୃତ୍ୟୁଦଣ୍ଡ ଦିଆଯିବା ଘଟଣା କେବଳ ଇରାନ ନୁହେଁ, ବରଂ ସାରା ବିଶ୍ୱରେ ମାନବାଧିକାରର ସୁରକ୍ଷା ଉପରେ ଏକ ପ୍ରଶ୍ନବାଚୀ ସୃଷ୍ଟି କରିଛି।