ରାଜ୍ୟ ସରକାରଙ୍କ ଲଘୁ ଖଣିଜ ସଂପଦ ପରିବହନକୁ ନେଇ ଅଣାଯାଇଥିବା ନୂତନ ନିୟମକୁ ବିରୋଧ କରିଛି ଟିପ୍ପର ମାଲିକ ସଙ୍ଘ। ଏହି ନୂଆ ନିୟମରେ ବାଲି ଓ ମାଟିକୁ ସାମିଲ କରିବା ସହିତ ସାମାନ୍ୟ ଭୁଲ ପାଇଁ ଲକ୍ଷାଧିକ ଟଙ୍କାର ଫାଇନ ଦେବାକୁ ପଡ଼ୁଛି ଗାଡ଼ି ମାଲିକ ମାନଙ୍କୁ। ପୂର୍ବରୁ ବାଲି ଓ ମାଟି ତହସିଲଦାରଙ୍କ ଅଧିନରେ ଥିବା ବେଳେ ଏବେ ଏହା ଲଘୁ ଖଣିଜ ସଂପଦ ବିଭାଗ ଅଧିନରେ ସାମିଲ କରାଯାଇଛି। ଏହି ନିୟମ ଖଣି ଅଞ୍ଚଳ ଗୁଡିକରେ ଲାଗୁ କରିବା ବଦଳରେ ସମଗ୍ର ଓଡିଶାରେ ଏହାକୁ ଲାଗୁ କରିଛନ୍ତି ରାଜ୍ୟ ସରକାର।
ଫଳରେ ଗ୍ରାମାଞ୍ଚଳରେ କାର୍ଯ୍ୟ କରୁଥିବା ଟିପ୍ପର ମାଲିକ ଆର୍ଥିକ ସଙ୍କଟ ଦେଇ ଗତି କରୁଛନ୍ତି। ଟିପ୍ପର ଚଲଉଥିବା ଡ୍ରାଇଭର ମାନେ ଅଧିକ ପାଠ ପଢ଼ି ନଥିବାରୁ ନିୟମ କାନୁନ ସମ୍ପର୍କରେ ଜାଣି ପାରୁ ନାହାନ୍ତି। ଫଳରେ ଗାଡ଼ି ଗୁଡ଼ିକୁ ଲକ୍ଷାଧିକ ଟଙ୍କାର ଫାଇନ ଦେବାକୁ ପଡ଼ୁଛି। ଯାହାକୁ ବିରୋଧ କରି ଇଷ୍ଟର୍ନ ଜୋନ ର ସମସ୍ତ ଟିପ୍ପର ସଂଘ ଆନ୍ଦୋଳନ କୁ ଓହ୍ଲାଇଛି।
ରାଜ୍ୟ ସରକାର ତୁରନ୍ତ ଏହି ଆଇନ୍ ପ୍ରତ୍ୟାହାର କରିବା ସହିତ ଟିପ୍ପର ସଂଘ ର ୧୧ ଦଫା ଦାବୀ ପୂରଣ କରିବାକୁ ପାରାଦ୍ଵୀପ ରିଜ୍ବନାଲ ଟିପ୍ପର ଓ୍ବଣ୍ଣର୍ସ ଆସୋସିଏସନ୍ ଏକ ସାମ୍ବାଦିକ ସମ୍ମିଳନୀ ରେ ଦାବୀ କରିଛି।
