Tag: suchanatv24x7

ହାତୀପଲର ଉତ୍ପାତ: ଘର ଭାଙ୍ଗିଲା, କାନ୍ଥ ତଳେ ଚାପି ମହିଳାଙ୍କ ମୃତ୍ୟୁ

ରାଜ୍ୟର ଦୁଇଟି ଜିଲ୍ଲାରେ ହାତୀ ଆତଙ୍କ ଏବେ ଜନଜୀବନକୁ ଭୟଭୀତ କରିଛି। ଅନୁଗୁଳ ଜିଲ୍ଲା ସହିତ ବଲାଙ୍ଗୀର ଜିଲ୍ଲାରେ ହାତୀ ଆକ୍ରମଣରେ ଦୁଇ ଜଣ ମହିଳାଙ୍କ ମୃତ୍ୟୁ ଘଟିଥିବାବେଳେ ଆଉ ଦୁଇ ଜଣ ଗୁରୁତର ଆହତ ହୋଇଛନ୍ତି।

ଅନୁଗୁଳ ରେଞ୍ଜ ଅଧୀନ ସାହାରାଗୁଡ଼ା ଗାଁର ସୁନାଭୂଇଁ ସାହିରେ ଆଜି ସକାଳେ ଏକ ହୃଦୟବିଦାରକ ଘଟଣା ଘଟିଛି। ସକାଳୁ ଘର ନିକଟସ୍ଥ ନଳକୂଅକୁ ପାଣି ଆଣିବାକୁ ଯାଇଥିବା ବେଳେ ଝିଲ୍ଲୀ ବେହେରା (୩୫)ଙ୍କୁ ଏକ ଦନ୍ତା ହାତୀ ଆକ୍ରମଣ କରି ଦଳି ଦେଇଥିଲା। ଫଳରେ ଘଟଣାସ୍ଥଳରେ ଝିଲ୍ଲୀଙ୍କ ମୃତ୍ୟୁ ହୋଇଥିଲା। ଘଟଣା ପରେ ସାହାରାଗୁଡ଼ା ଗାଁରେ ଭୟ ଓ ଆକ୍ରୋଶର ପରିବେଶ ସୃଷ୍ଟି ହୋଇଛି। ରୋଷାବେଶରେ ଗାଁ ଲୋକେ ରେଞ୍ଜର ଉଦ୍ଧବ ବେହେରାଙ୍କୁ ଅଟକ ରଖିଥିବା ଖବର ମିଳିଛି।

ଏହା ସହିତ ବଲାଙ୍ଗୀର ଜିଲ୍ଲା ଲାଠୋର ରେଞ୍ଜ ଅଧୀନ ଖପ୍ରାଖୋଲ ଥାନାର ଚହକୋପଡ଼ା ଗ୍ରାମରେ ମଧ୍ୟ ହାତୀ ଆକ୍ରମଣରେ ଜଣେ ମହିଳାଙ୍କ ମୃତ୍ୟୁ ଘଟିଛି। ବିଗତ ଦୁଇ ଦିନ ଧରି ଲାଠୋର ରେଞ୍ଜ ଅଞ୍ଚଳରେ ପ୍ରାୟ ୩୦ଟିକିଆ ହାତୀପଲ ଉତ୍ପାତ କରୁଥିବାବେଳେ ଗୁରୁବାର ମଧ୍ୟରାତ୍ରିରେ ଏହି ହାତୀପଲ ଚହକୋପଡ଼ା ଗାଁର ଏକ ଘର ଉପରେ ଆକ୍ରମଣ କରିଥିଲେ। ଘର ଭାଙ୍ଗିଯିବାରୁ କାନ୍ଥ ତଳେ ଚାପି ହୋଇ ୪୫ ବର୍ଷୀୟ ଫୁଲମତି ନାଗଙ୍କ ମୃତ୍ୟୁ ହୋଇଛି।

ଏହି ଆକ୍ରମଣରେ ଫୁଲମତିଙ୍କ ସ୍ୱାମୀ ଗୌତମ ନାଗ ଓ ଶାଶୂ ଖୁଦ ନାଗ ଗୁରୁତର ଆହତ ହୋଇଛନ୍ତି। ସ୍ଥାନୀୟ ଲୋକ ଓ ବନ ବିଭାଗର ସହଯୋଗରେ ଦୁହିଁଙ୍କୁ ଉଦ୍ଧାର କରାଯାଇ ଆମ୍ବୁଲାନ୍ସ ଯୋଗେ ଖପ୍ରାଖୋଲ ଡାକ୍ତରଖାନାକୁ ପଠାଯାଇଛି। ଉଭୟଙ୍କ ଅବସ୍ଥା ଗୁରୁତର ରହିଥିବା ଜଣାପଡ଼ିଛି।

ଏକାଧିକ ଘଟଣା ପରେ ସମଗ୍ର ଅଞ୍ଚଳରେ ଭୟ ଓ ଆତଙ୍କର ପରିବେଶ ସୃଷ୍ଟି ହୋଇଛି। ବନ ବିଭାଗ ପକ୍ଷରୁ ହାତୀପଲକୁ ଜଙ୍ଗଲ ଅଞ୍ଚଳକୁ ଫେରାଇବା ପାଇଁ ପ୍ରୟାସ ଜାରି ରହିଥିବା ବେଳେ, ସ୍ଥାନୀୟ ପ୍ରଶାସନ ଲୋକମାନଙ୍କୁ ସତର୍କ ରହିବା ଏବଂ ବିଶେଷକରି ରାତି ସମୟରେ ଘରୁ ବାହାରକୁ ନ ବାହାରିବାକୁ ଅନୁରୋଧ କରିଛି।
ବର୍ଷ ଆରମ୍ଭରୁ ଶ୍ରୀମନ୍ଦିରରେ ମହାତ୍ରୁଟି !

ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରକାଶିତ ୨୦୨୬ କ୍ୟାଲେଣ୍ଡରକୁ ନେଇ ଏବେ ଭାରି ବିବାଦ ଦେଖାଦେଇଛି। କ୍ୟାଲେଣ୍ଡରରେ ମହାପ୍ରଭୁ ଶ୍ରୀଜଗନ୍ନାଥଙ୍କ ସମ୍ପର୍କିତ ଚିତ୍ରରେ ଗୁରୁତର ତ୍ରୁଟି ଥିବା ଦାବି କରାଯାଇଛି। ମହାପ୍ରଭୁ ଶ୍ରୀଜଗନ୍ନାଥଙ୍କ ସ୍ଥାନରେ ପ୍ରଭୁ ବଳଭଦ୍ର ଏବଂ ବଳଭଦ୍ରଙ୍କ ସ୍ଥାନରେ ଶ୍ରୀଜଗନ୍ନାଥଙ୍କ ଚିତ୍ର ସ୍ଥାପିତ ହୋଇଥିବା ଫଟୋକୁ କ୍ୟାଲେଣ୍ଡରରେ ସ୍ଥାନ ଦିଆଯାଇଥିବାରୁ ଜଗନ୍ନାଥ ପ୍ରେମୀ ଓ ସେବାୟତମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି।

ସେହିପରି କ୍ୟାଲେଣ୍ଡରରେ ଥିବା ରଥଯାତ୍ରା ସମ୍ପର୍କିତ ଏକ ଫଟୋକୁ ନେଇ ମଧ୍ୟ ଗୁରୁତର ଅଭିଯୋଗ ଆସିଛି। ଉକ୍ତ ଚିତ୍ରରେ ପ୍ରଥମେ ମା ସୁଭଦ୍ରାଙ୍କ ରଥ, ପରେ ମହାପ୍ରଭୁ ଜଗନ୍ନାଥଙ୍କ ରଥ ଏବଂ ଶେଷରେ ଶ୍ରୀବଳଭଦ୍ରଙ୍କ ରଥ ଟଣାଯାଉଥିବା ଦେଖାଯାଇଛି, ଯାହା ପରମ୍ପରା ଓ ଶାସ୍ତ୍ରସମ୍ମତ ନୁହେଁ ବୋଲି ସେବାୟତମାନେ କହିଛନ୍ତି।

ଏହି ତ୍ରୁଟିଗୁଡ଼ିକୁ ନେଇ ଶ୍ରୀମନ୍ଦିର ପ୍ରଶାସନର ଦାୟିତ୍ୱହୀନତା ସ୍ପଷ୍ଟ ହେଉଥିବା ଅଭିଯୋଗ ହେଉଛି। କ୍ୟାଲେଣ୍ଡର ଛପାହେବା ପୂର୍ବରୁ କେଉଁ ଅଧିକାରୀଙ୍କ ପରାମର୍ଶରେ ଏଭଳି ତ୍ରୁଟିପୂର୍ଣ୍ଣ ଫଟୋକୁ ଅନୁମୋଦନ ଦିଆଯାଇଥିଲା, ସେଥିପାଇଁ ତଦନ୍ତ ଦାବି କରାଯାଇଛି। ଜଗନ୍ନାଥ ସଂସ୍କୃତିକୁ ବିକୃତ କରୁଥିବା ଅନୁଷ୍ଠାନ ଓ ବ୍ୟକ୍ତି ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ ପୂର୍ବରୁ ଘୋଷଣା କରିଥିବା ପ୍ରଶାସନ ନିଜେ ଏହି ନିୟମକୁ ଉଲ୍ଲଘଂନ କରିଥିବା ନେଇ ସାଧାରଣରେ ଚର୍ଚ୍ଚା ଜୋର ଧରିଛି।

ଜଗନ୍ନାଥ ପ୍ରେମୀ ଓ ସେବାୟତମାନେ ତୁରନ୍ତ ଏହି ତ୍ରୁଟିପୂର୍ଣ୍ଣ କ୍ୟାଲେଣ୍ଡରକୁ ପ୍ରତ୍ୟାହାର କରିବା ସହ ଦୋଷୀ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏନେଇ ଶ୍ରୀମନ୍ଦିର ପ୍ରଶାସନ ସହ ଯୋଗାଯୋଗ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ସରକାରୀ ପ୍ରତିକ୍ରିୟା ମିଳିପାରିନାହିଁ।
ବିବାହ ପୂର୍ବ ବନ୍ଧୁତା ନେଇ ଦାମ୍ପତ୍ୟ କଳହ,ନବବିବାହିତ ଦମ୍ପତିଙ୍କ ଆତ୍ମହତ୍ୟା

ବିବାହ ପରେ ମାତ୍ର ଦେଢ଼ମାସ ମଧ୍ୟରେ ନବବିବାହିତ ଦମ୍ପତିଙ୍କ ଆଗପଛ ଆତ୍ମହତ୍ୟା ଘଟଣା ସହରକୁ ସ୍ତବ୍ଧ କରିଦେଇଛି। ବିବାହ ପୂର୍ବ ସମ୍ପର୍କକୁ ନେଇ ହୋଇଥିବା ତୀବ୍ର ବିବାଦ ଏହି ଦୁଃଖଦ ଘଟଣାର ମୁଖ୍ୟ କାରଣ ବୋଲି ପୁଲିସ ତଦନ୍ତରୁ ଜଣାପଡ଼ିଛି।

ସୂଚନା ଅନୁଯାୟୀ, ବେଙ୍ଗାଲୁରୁର ବିଦ୍ୟାରନ୍ୟାପୁର ଅଞ୍ଚଳର ବାସିନ୍ଦା ସୁରଜ ଶିବନ ଓ ଗନଭୀ ଦେଢ଼ମାସ ତଳେ ବିବାହ କରିଥିଲେ। ବିବାହ ପରେ ଦୁହେଁ ୧୦ ଦିନ ପାଇଁ ଶ୍ରୀଲଙ୍କାକୁ ହନିମୁନରେ ଯାଇଥିଲେ। ହେଲେ ସେଠାରେ ଗନଭୀଙ୍କ ବିବାହ ପୂର୍ବ ବନ୍ଧୁତାକୁ ନେଇ ଦୁଇଜଣଙ୍କ ମଧ୍ୟରେ ଭୟଙ୍କର ଝଗଡ଼ା ହୋଇଥିଲା। ଏହା ପରେ ଦମ୍ପତି ହନିମୁନ ଅଧାରୁ ବନ୍ଦ କରି ବେଙ୍ଗାଲୁରୁ ଫେରିଆସିଥିଲେ।

ହନିମୁନରୁ ଫେରିବା ପରେ ଘରୋଇ କଳହ ଆଉ ଗଭୀର ହୋଇଥିଲା। ସୁରଜଙ୍କ ବଡ଼ଭାଇ ସଞ୍ଜୟ ଶିବନ ଦୁହିଁଙ୍କ ମଧ୍ୟରେ ସମାଧାନ ଆଣିବାକୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇନଥିଲେ। ଶେଷରେ ଗନଭୀ ରାଗିକରି ନିଜ ପୈତୃକ ଘରକୁ ଚାଲିଯାଇଥିଲେ। ସେଠାରେ ଗୁରୁବାର ସେ ଆତ୍ମହତ୍ୟା କରିଥିଲେ।

ଗନଭୀଙ୍କ ମୃତ୍ୟୁ ପରେ ତାଙ୍କ ପରିବାର ପକ୍ଷରୁ ମିଥ୍ୟା ଯୌତୁକ ନିର୍ଯାତନା ଅଭିଯୋଗ ଆଣାଯାଇଥିଲା। ଏହାକୁ ନେଇ ପୁଲିସ କାର୍ଯ୍ୟାନୁଷ୍ଠାନ ଭୟରେ ସୁରଜ, ତାଙ୍କ ଭାଇ ଓ ମା’ ପ୍ରଥମେ ହାଇଦ୍ରାବାଦ ଏବଂ ପରେ ନାଗପୁର ପଳାଇଯାଇଥିଲେ ବୋଲି ସଞ୍ଜୟ କହିଛନ୍ତି।

ଶୁକ୍ରବାର ରାତିରେ ସୁରଜଙ୍କୁ ନାଗପୁରର ଏକ ହୋଟେଲ ରୁମ୍‌ରେ ସିଲିଂ ଫ୍ୟାନରୁ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିଲା। ଏହାସହିତ ସୁରଜଙ୍କ ମା’ ମଧ୍ୟ ଆତ୍ମହତ୍ୟା ଉଦ୍ୟମ କରିଥିଲେ, ହେଲେ ସେ ଭାଗ୍ୟକ୍ରମେ ବର୍ତ୍ତିଯାଇଥିଲେ।

ଦୁଇ ଦିନ ମଧ୍ୟରେ ଘଟିଥିବା ଏହି ଦୁଇଟି ଆତ୍ମହତ୍ୟା ଘଟଣା ସମଗ୍ର ଅଞ୍ଚଳରେ ଚାଞ୍ଜଲ୍ୟ ସୃଷ୍ଟି କରିଥିବାବେଳେ, ପୁଲିସ ସମ୍ପୂର୍ଣ୍ଣ ଘଟଣାର ଗଭୀର ତଦନ୍ତ ଜାରି ରଖିଛି।
ବାଂଲାଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଖାଲିଦା ଜିଆଙ୍କ ଦେହାନ୍ତ

ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଏବଂ ବାଂଲାଦେଶ ନ୍ୟାସନାଲିଷ୍ଟ ପାର୍ଟି (ବିଏନପି) ଅଧ୍ୟକ୍ଷା ବେଗମ ଖାଲିଦା ଜିଆଙ୍କ ଆଜି ପରଲୋକ ଘଟିଛି। ଦୀର୍ଘଦିନ ଧରି ଅସୁସ୍ଥ ରହିଥିବା ଖାଲିଦା ଜିଆଙ୍କ ମୃତ୍ୟୁ ସମୟରେ ବୟସ ୮୦ ବର୍ଷ ଥିଲା।

ତାଙ୍କ ଦେହାନ୍ତ ପରେ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହସିନା ଗଭୀର ଶୋକ ପ୍ରକାଶ କରିଛନ୍ତି। ବିଏନପି ପକ୍ଷରୁ ‘ଏକ୍ସ’ (ପୂର୍ବତନ ଟ୍ୱିଟର)ରେ ପ୍ରକାଶିତ ଏକ ପୋଷ୍ଟରେ ଶେଖ୍ ହସିନା କହିଛନ୍ତି ଯେ, ବାଂଲାଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଓ ଗଣତନ୍ତ୍ର ପ୍ରତିଷ୍ଠାର ସଂଗ୍ରାମରେ ଖାଲିଦା ଜିଆଙ୍କ ଅବଦାନ ଦେଶ ସଦା ସ୍ମରଣ କରିବ।

ଶେଖ୍ ହସିନା ତାଙ୍କ ଶୋକବାର୍ତ୍ତାରେ କହିଛନ୍ତି ଯେ, ଖାଲିଦା ଜିଆଙ୍କ ବିୟୋଗ ବାଂଲାଦେଶର ରାଜନୈତିକ ଜୀବନ ଏବଂ ବିଏନପି ପାଇଁ ଏକ ଅପୂରଣୀୟ କ୍ଷତି। ସେ ଖାଲିଦା ଜିଆଙ୍କ ଆତ୍ମାର ଶାନ୍ତି କାମନା କରିବା ସହ ତାଙ୍କ ପୁଅ ତାରିକ ରହମାନ ଓ ପରିବାରବର୍ଗଙ୍କ ପ୍ରତି ସମବେଦନା ଜଣାଇଛନ୍ତି।

ଦୀର୍ଘ ସମୟ ଧରି ଲିଭର ସିରୋସିସ୍ ରୋଗରେ ପୀଡ଼ିତ ଥିବା ଖାଲିଦା ଜିଆ ଆର୍ଥ୍ରାଇଟିସ୍, ହୃଦ୍ରୋଗ ଓ ମଧୁମେହରେ ମଧ୍ୟ ପୀଡ଼ିତ ଥିଲେ।

ଖାଲିଦା ଜିଆ ଦୁଇଥର ବାଂଲାଦେଶର ପ୍ରଧାନମନ୍ତ୍ରୀ ଭାବେ ୧୯୯୧ରୁ ୧୯୯୬ ଏବଂ ୨୦୦୧ରୁ ୨୦୦୬ ପର୍ଯ୍ୟନ୍ତ ଦେଶକୁ ନେତୃତ୍ୱ ଦେଇଥିଲେ। ସେ ବିଏନପିର ପ୍ରତିଷ୍ଠାତା ଏବଂ ପୂର୍ବତନ ରାଷ୍ଟ୍ରପତି ଜିଆଉର ରହମାନଙ୍କ ପତ୍ନୀ ଥିଲେ।

ଖାଲିଦା ଜିଆଙ୍କ ଦେହାନ୍ତରେ ବାଂଲାଦେଶର ରାଜନୈତିକ, ସାମାଜିକ ଓ ସାଧାରଣ ଜନଜୀବନରେ ଗଭୀର ଶୋକର ଛାୟା ପଡ଼ିଛି। ତାଙ୍କ ରାଜନୈତିକ ଜୀବନ ଓ ଅବଦାନ ବାଂଲାଦେଶର ଇତିହାସରେ ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟ ଭାବେ ସ୍ମରଣ କରାଯିବ।
ସାମାଜିକ ସୁରକ୍ଷାରେ ନୂଆ ପଦକ୍ଷେପ, ଟ୍ରାନ୍ସଜେଣ୍ଡରଙ୍କୁ ମାସିକ ପେନ୍ସନ୍

ଟ୍ରାନ୍ସଜେଣ୍ଡର ସମୁଦାୟଙ୍କ ସାମାଜିକ ସୁରକ୍ଷା ଓ ଆର୍ଥିକ ସ୍ଥିରତା ପାଇଁ ସରକାର ଏକ ବଡ଼ ପଦକ୍ଷେପ ନେଇଛନ୍ତି। ସରକାରଙ୍କ ପକ୍ଷରୁ ଟ୍ରାନ୍ସଜେଣ୍ଡରଙ୍କ ପାଇଁ ସ୍ୱତନ୍ତ୍ର ପେନ୍ସନ୍ ଯୋଜନା ଘୋଷଣା କରାଯାଇଛି। ଏହି ଯୋଜନା ମାଧ୍ୟମରେ ଆର୍ଥିକ ଭାବେ ଦୁର୍ବଳ ଟ୍ରାନ୍ସଜେଣ୍ଡର ବ୍ୟକ୍ତିମାନେ ପ୍ରତିମାସ ନିଶ୍ଚିତ ପେନ୍ସନ୍ ରାଶି ପାଇବେ।

ସରକାରୀ ସୂଚନା ଅନୁଯାୟୀ, ଏହି ପେନ୍ସନ୍ ସ୍କିମ୍‌ର ଲକ୍ଷ୍ୟ ହେଉଛି ଟ୍ରାନ୍ସଜେଣ୍ଡର ସମୁଦାୟକୁ ମୁଖ୍ୟଧାରା ସମାଜ ସହ ଯୋଡ଼ିବା ସହ ସେମାନଙ୍କ ଜୀବନଯାପନକୁ ସୁରକ୍ଷିତ କରିବା। ବିଶେଷକରି ବୟସ୍କ, ନିରାଶ୍ରୟ ଓ ନିୟମିତ ଆୟ ନଥିବା ଟ୍ରାନ୍ସଜେଣ୍ଡରମାନେ ଏହି ଯୋଜନାରୁ ଲାଭ ଉଠାଇପାରିବେ।

ଏହି ଯୋଜନା ଅଧୀନରେ ଯୋଗ୍ୟ ଟ୍ରାନ୍ସଜେଣ୍ଡର ବ୍ୟକ୍ତିମାନେ ପ୍ରତିମାସ ନିର୍ଦ୍ଧାରିତ ଅର୍ଥରାଶି ସିଧାସଳଖ ବ୍ୟାଙ୍କ ଖାତାକୁ ପାଇବେ। ଯୋଜନାକୁ ସରଳ ଓ ପାରଦର୍ଶୀ କରିବା ପାଇଁ ଡାଇରେକ୍ଟ ବେନିଫିଟ୍ ଟ୍ରାନ୍ସଫର୍ (DBT) ପ୍ରଣାଳୀ ଅନୁସରଣ କରାଯିବ।

ସରକାର କହିଛନ୍ତି, ଏହା କେବଳ ଏକ ଆର୍ଥିକ ସହାୟତା ନୁହେଁ, ବରଂ ଟ୍ରାନ୍ସଜେଣ୍ଡର ସମୁଦାୟ ପ୍ରତି ସାମାଜିକ ସ୍ୱୀକୃତି ଓ ସମ୍ମାନର ପ୍ରତୀକ। ଆଗାମୀ ଦିନରେ ଏହି ସମୁଦାୟ ପାଇଁ ସ୍ୱାସ୍ଥ୍ୟ, ଶିକ୍ଷା ଓ କୌଶଳ ବିକାଶ ସହିତ ସଂପୃକ୍ତ ଆହୁରି ଯୋଜନା ଆଣିବାକୁ ସରକାର ଯୋଜନା କରୁଛନ୍ତି।

ସମ୍ପର୍କିତ ବିଭାଗ ପକ୍ଷରୁ ସ୍ପଷ୍ଟ କରାଯାଇଛି ଯେ, ଶୀଘ୍ର ଯୋଗ୍ୟତା ମାନଦଣ୍ଡ, ପେନ୍ସନ୍ ରାଶି ଓ ଆବେଦନ ପ୍ରକ୍ରିୟା ସମ୍ପର୍କରେ ବିସ୍ତୃତ ଗାଇଡ୍‌ଲାଇନ୍ ଜାରି କରାଯିବ। ଏହି ଯୋଜନା ଟ୍ରାନ୍ସଜେଣ୍ଡର ସମୁଦାୟ ମଧ୍ୟରେ ଆଶା ଓ ଭରସା ସୃଷ୍ଟି କରିଛି।
ପୁଟିନଙ୍କ ବାସଭବନ ଡ୍ରୋନ୍‌ ମାଡ଼ ନେଇ ଚର୍ଚ୍ଚା

ରୁଷ୍‌ ୟୁକ୍ରେନ୍‌ ଯୁଦ୍ଧ ଶେଷ କରିବାକୁ ଆନ୍ତର୍ଜାତିକ ସ୍ତରରେ ଶାନ୍ତି ପ୍ରୟାସ ତୀବ୍ର ହେଉଥିବାବେଳେ, ଏକ ଡ୍ରୋନ୍‌ ଆକ୍ରମଣ ଦାବି ଦୁଇ ଦେଶ ମଧ୍ୟରେ ପୁଣି ଥରେ ଭୟଙ୍କର ଉତ୍ତେଜନା ସୃଷ୍ଟି କରିଛି। ରୁଷ୍‌ ଦାବି କରିଛି ଯେ, ସୋମବାର ନୋଭଗୋରୋଡ ଅଞ୍ଚଳରେ ଥିବା ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ଭାଲଡାଇ ବାସଭବନକୁ ଲକ୍ଷ୍ୟ କରି ୟୁକ୍ରେନ୍‌ ପକ୍ଷରୁ ଡ୍ରୋନ୍‌ ଆକ୍ରମଣ ହୋଇଛି। ଏହି ଘଟଣା ରୁଷ୍‌ ସୁରକ୍ଷା ବ୍ୟବସ୍ଥାକୁ ନେଇ ମଧ୍ୟ ଅନେକ ପ୍ରଶ୍ନ ଉଠାଇଛି।

ରୁଷ୍‌ ବିଦେଶ ମନ୍ତ୍ରୀ ସର୍ଗେଇ ଲାଭରୋଭ କହିଛନ୍ତି ଯେ, ଡିସେମ୍ବର ୨୮ ଓ ୨୯ ତାରିଖରେ ୟୁକ୍ରେନ୍‌ ୯୧ଟି ଦୀର୍ଘପଥ ଡ୍ରୋନ୍‌ ମାଧ୍ୟମରେ ଆକ୍ରମଣ ପ୍ରୟାସ କରିଥିଲା। ତାଙ୍କ କଥାନୁସାରେ, ରୁଷ୍‌ର ଏୟାର ଡିଫେନ୍ସ ସିଷ୍ଟମ୍‌ ବହୁ ଡ୍ରୋନ୍‌କୁ ଧ୍ୱଂସ କରିଦେଇଥିଲା, ଫଳରେ ବଡ଼ ମାନବୀୟ କ୍ଷତି ରୋକାଯାଇପାରିଛି। ତେବେ କିଛି ଡ୍ରୋନ୍‌ ରାଷ୍ଟ୍ରପତିଙ୍କ ବାସଭବନ ସମୀପକୁ ପହଞ୍ଚିଥିବା ଦାବି କରାଯାଇଛି।

ଲାଭରୋଭ ଏହି ଆକ୍ରମଣକୁ ‘ଆତଙ୍କବାଦୀ କାର୍ଯ୍ୟ’ ବୋଲି ଆଖ୍ୟା ଦେଇ କହିଛନ୍ତି ଯେ, ଏହା ଶାନ୍ତି ଆଲୋଚନାକୁ ବିଫଳ କରିବା ପାଇଁ ଉଦ୍ଦିଷ୍ଟ। ସେ ସପଷ୍ଟ କରିଛନ୍ତି ଯେ, ରୁଷ୍‌ ସେନାବାହିନୀ ପ୍ରତିଆକ୍ରମଣ ପାଇଁ ଟାର୍ଗେଟ୍‌ ଚିହ୍ନଟ କରିସାରିଛି ଏବଂ ଏହାର ଉଚିତ୍ ଉତ୍ତର ଦିଆଯିବ। ତଥାପି, ଆକ୍ରମଣ ସମୟରେ ପୁଟିନ ବାସଭବନରେ ଉପସ୍ଥିତ ଥିଲେ କି ନାହିଁ, ସେନେଇ ରୁଷ୍‌ କୌଣସି ସରକାରୀ ସୂଚନା ଦେଇନି।

ଅନ୍ୟପକ୍ଷରେ, ୟୁକ୍ରେନ୍‌ ରାଷ୍ଟ୍ରପତି ଭୋଲୋଦିମିର ଜେଲେନ୍‌ସ୍କି ରୁଷ୍‌ର ଏହି ଦାବିକୁ ପୂର୍ଣ୍ଣରୂପେ ଖଣ୍ଡନ କରିଛନ୍ତି। ସେ କହିଛନ୍ତି, “ପୁଟିନଙ୍କ ବାସଭବନ ଉପରେ କୌଣସି ଆକ୍ରମଣ କରାଯାଇନି। ରୁଷ୍‌ ନିଜର ଆଗାମୀ ସାମରିକ କାର୍ଯ୍ୟକଳାପକୁ ଯୁକ୍ତିଯୁକ୍ତ କରିବା ଏବଂ କିବ ଉପରେ ଅଧିକ ଆକ୍ରମଣ କରିବା ପାଇଁ ଏପରି ମିଛ ଦାବି କରୁଛି।” ସେ ଆହୁରି କହିଛନ୍ତି ଯେ, ୟୁକ୍ରେନ୍‌ ସିବିଲିଆନ୍‌ ଟାର୍ଗେଟ୍‌ କିମ୍ବା ରାଷ୍ଟ୍ରପତିଙ୍କ ବ୍ୟକ୍ତିଗତ ବାସଭବନକୁ ଲକ୍ଷ୍ୟ କରେନାହିଁ।

ଏହି ଘଟଣା ଏମିତି ଏକ ସମୟରେ ଘଟିଛି, ଯେତେବେଳେ ଆମେରିକା ନେତୃତ୍ୱରେ ଯୁଦ୍ଧ ବନ୍ଦ ପାଇଁ ଉଚ୍ଚସ୍ତରୀୟ ଆଲୋଚନା ଚାଲିଛି। ରବିବାର ଫ୍ଲୋରିଡାରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଜେଲେନ୍‌ସ୍କିଙ୍କ ମଧ୍ୟରେ ପ୍ରାୟ ୩ ଘଣ୍ଟା ଧରି ବୈଠକ ହୋଇଥିଲା। ଏହି ଆଲୋଚନାରେ ୟୁକ୍ରେନ୍‌କୁ ୧୫ ବର୍ଷ ପାଇଁ ସୁରକ୍ଷା ଗ୍ୟାରେଣ୍ଟି ଦେବା ପ୍ରସ୍ତାବ ଦିଆଯାଇଥିଲେ ମଧ୍ୟ, ୟୁକ୍ରେନ୍‌ ଏହାକୁ ପର୍ଯ୍ୟାପ୍ତ ନୁହେଁ ବୋଲି କହି ସହମତି ପ୍ରକାଶ କରିନାହିଁ।

ରାଜନୈତିକ ବିଶ୍ଳେଷକମାନଙ୍କ ମତରେ, ପୁଟିନଙ୍କ ବାସଭବନ ଉପରେ ଡ୍ରୋନ୍‌ ଆକ୍ରମଣ ଦାବି ସତ୍ୟ ହେଉ କି ମିଛ, ଯୁଦ୍ଧକୁ ଆହୁରି ଭୟାବହ କରିପାରେ। ଏହା ଶାନ୍ତି ଆଲୋଚନାକୁ ଦୁର୍ବଳ କରିବା ସହ ଦୁଇ ଦେଶ ମଧ୍ୟରେ ସାମରିକ ମୁହାଁମୁହିଁକୁ ଆହୁରି ତୀବ୍ର କରିପାରେ।
୧୧ ଦିନ ପରେ ମାଟିତଳୁ ମିଳିଛି ଶବ

୧୧ ଦିନ ଧରି ନିଖୋଜ ଥିବା ଜଣେ ଯୁବକଙ୍କ ଶବ ମାଟିତଳେ ପୋତା ଅବସ୍ଥାରେ ଠାବ ହେବା ପରେ ସୁବର୍ଣ୍ଣପୁର ଜିଲ୍ଲାରେ ସନସନୀ ସୃଷ୍ଟି ହୋଇଛି। ମୃତ ଯୁବକ ହେଲେ ବିନିକା ଥାନା ଅନ୍ତର୍ଗତ ଗୁଲାପଡା ଗାଁର ପ୍ରକାଶ ମହାନ୍ତି।

ସୂଚନା ଅନୁସାରେ, ପ୍ରକାଶ ମହାନ୍ତି ୧୧ ଦିନ ପୂର୍ବରୁ କିଛି ଲୋକଙ୍କ ସହ ବାହାରକୁ ଯାଇଥିଲେ । କିନ୍ତୁ ସେ ଆଉ ଘରକୁ ଫେରିନଥିଲେ। ଏନେଇ ତାଙ୍କ ସ୍ତ୍ରୀ ବନିତା ମହାନ୍ତି ବିନିକା ଥାନାରେ ନିଖୋଜ ଥିବା ଖବର ପାଇଁ ଏତଲା ଦେଇଥିଲେ। ତାପରେ ପୋଲିସ ତଦନ୍ତ ଆରମ୍ଭ କରିଥିଲା।

ପୁଲିସ ତଦନ୍ତ ସମୟରେ ଗୁପ୍ତ ସୂଚନା ଆଧାରରେ, ଆଜି ସକାଳେ ଏକ ସ୍ଥାନରେ ଖୋଦନ କରାଯାଇଥିଲା। ସେଠାରୁ ପ୍ରକାଶଙ୍କ ଶବ ତାଙ୍କ ଘରଠୁ କିଛି ଦୂରରେ ଥିବା ଏକ ଜୋର ନିକଟରେ ମାଟିତଳେ ପୋତା ଅବସ୍ଥାରେ ମିଳିଥିଲା। ଶବ ଉଦ୍ଧାର ପରେ ଘଟଣାସ୍ଥଳରେ ଫରେନ୍ସିକ ଟିମ୍, ସନ୍ଧାନୀ କୁକର ସହ ପହଞ୍ଚି ତଦନ୍ତ ଆରମ୍ଭ କରିଛି।

ଏହି ଘଟଣାରେ ସମ୍ପୃକ୍ତ ଥିବା ସନ୍ଦେହରେ ପୁଲିସ ୫ ଜଣଙ୍କୁ ଅଟକ ରଖି ପଚରାଉଚରା କରୁଛି। ପ୍ରକାଶଙ୍କୁ କିଏ, କେଉଁ କାରଣରୁ ହତ୍ୟା କଲା ଓ ମାଟିତଳେ ପୋତିଲା,ସେନେଇ ପୁଲିସ ତଦନ୍ତ ଜାରି ରହିଛି।

ଶବକୁ ପୋଷ୍ଟମର୍ଟମ ପାଇଁ ପଠାଯାଇଥିବା ବେଳେ, ରିପୋର୍ଟ ପରେ ମୃତ୍ୟୁର ସଠିକ୍ କାରଣ ସ୍ପଷ୍ଟ ହେବ ବୋଲି ପୁଲିସ କହିଛି। ଘଟଣା ପରେ ଗୁଲାପଡା ଗାଁରେ ଶୋକ ଓ ଆତଙ୍କର ପରିବେଶ ସୃଷ୍ଟି ହୋଇଛି।
ନୂଆବର୍ଷ ପୂର୍ବରୁ ଓଡ଼ିଶାରେ ଜାଡ଼ ଆତଙ୍କ, ଜନଜୀବନ ଅସ୍ତବ୍ୟସ୍ତ

ଜାଡ଼ ମାଡ଼ରେ ଥରୁଛି ସାରା ଓଡ଼ିଶା। ରାଜ୍ୟରେ ଶୀତ ଲହରୀ ଆହୁରି ତୀବ୍ର ରୂପ ନେଇଥିବା ବେଳେ, ନୂଆବର୍ଷ ପର୍ଯ୍ୟନ୍ତ ତାପମାତ୍ରାରେ କୌଣସି ବଡ଼ ପରିବର୍ତ୍ତନ ହେବାର ସମ୍ଭାବନା ନାହିଁ ବୋଲି ପାଣିପାଗ ବିଭାଗ ଆକଳନ କରିଛି। ରାଜ୍ୟର ୧୦ରୁ ଅଧିକ ସହରରେ ପାରଦ ୧୦ ଡିଗ୍ରୀ ତଳେ ରହିଥିବାରୁ ଜନଜୀବନ ଅସ୍ତବ୍ୟସ୍ତ ହୋଇପଡ଼ିଛି।

କନ୍ଧମାଳ, କୋରାପୁଟ, ରାଉରକେଲା, ଝାରସୁଗୁଡ଼ା, ନବରଙ୍ଗପୁର ସହ ରାଜ୍ୟର ଅନେକ ଉଚ୍ଚଭୂମି ଓ ଆଭ୍ୟନ୍ତରୀଣ ଅଞ୍ଚଳରେ ଶୀତ ଅସହ୍ୟ ହୋଇପଡ଼ିଛି। ରାତି ଓ ସକାଳ ବେଳେ ଘରୁ ବାହାରିବା ମୁସ୍କିଲ୍ ହେଉଥିବା ବେଳେ, ସାଧାରଣ ଜୀବନ ଉପରେ ଜାଡ଼ର ପ୍ରଭାବ ସ୍ପଷ୍ଟ ଦେଖାଯାଉଛି।

ଶୀତ ସହିତ ସହ ଘନ କୁହୁଡ଼ି ମଧ୍ୟ ଲୋକଙ୍କୁ କଲବଲ କରୁଛି। ପାଣିପାଗ କେନ୍ଦ୍ର ଅନୁସାରେ ଆଗାମୀ ୫ ଦିନ ପର୍ଯ୍ୟନ୍ତ ରାଜ୍ୟର ବିଭିନ୍ନ ସ୍ଥାନରେ ଘନ କୁହୁଡ଼ି ଲାଗିରହିବ। ଆଜି ଓ କାଲି ସୁନ୍ଦରଗଡ଼, ଢେଙ୍କାନାଳ, ନୟାଗଡ଼, କନ୍ଧମାଳ ଓ କୋରାପୁଟ ଜିଲ୍ଲା ପାଇଁ କୁହୁଡ଼ି ସତର୍କତା ଜାରି କରାଯାଇଛି। ଉପକୂଳ ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାରେ ମଧ୍ୟ କୁହୁଡ଼ିର ପ୍ରଭାବ ପଡ଼ିପାରେ।

କନ୍ଧମାଳର ଉଦୟଗିରିରେ ରାଜ୍ୟର ସର୍ବନିମ୍ନ ତାପମାତ୍ରା ୪.୪ ଡିଗ୍ରୀ ସେଲସିଅସ୍ ରେକର୍ଡ ହୋଇଛି। ଗତକାଲି ଏଠାରେ ପାରଦ ୭.୮ ଡିଗ୍ରୀ ଥିବା ବେଳେ, ଗୋଟିଏ ଦିନରେ ୩.୪ ଡିଗ୍ରୀ ହ୍ରାସ ପାଇଛି। ଦୁର୍ଗମ ଓ ଜଙ୍ଗଲିଆ ଅଞ୍ଚଳରେ ପାରଦ ଆହୁରି ୧ରୁ ୨ ଡିଗ୍ରୀ କମ୍ ଥିବା ଆକଳନ କରାଯାଇଛି।

ସେହିଭଳି ଦାରିଙ୍ଗବାଡ଼ିରେ ତାପମାତ୍ରା ୬ ଡିଗ୍ରୀ, କୋରାପୁଟରେ ୬.୬, ସେମିଳିଗୁଡ଼ାରେ ୬.୭, ରାଉରକେଲାରେ ୭, ଝାରସୁଗୁଡ଼ାରେ ୭.୪, ନବରଙ୍ଗପୁରରେ ୯, କେନ୍ଦୁଝରରେ ୯.୧, ସୁନ୍ଦରଗଡ଼ରେ ୯.୪ ଓ ବଲାଙ୍ଗୀରରେ ୯.୫ ଡିଗ୍ରୀ ସେଲସିଅସ୍ ରେକର୍ଡ କରାଯାଇଛି।

ପାଣିପାଗ ବିଭାଗ କହିଛି, ଆସନ୍ତା ୩ରୁ ୪ ଦିନ ପରେ ଶୀତର ତୀବ୍ରତା ସାମାନ୍ୟ କମିପାରେ। ତଥାପି ସେପର୍ଯ୍ୟନ୍ତ ଲୋକମାନଙ୍କୁ ସତର୍କ ରହିବା ସହ ଆବଶ୍ୟକ ସାବଧାନତା ନେବାକୁ ପରାମର୍ଶ ଦିଆଯାଇଛି।
ମହାପ୍ରଭୁଙ୍କ ରାତି ଅନିଦ୍ରା ଉପରେ ପ୍ରଶ୍ନ, ଶ୍ରୀମନ୍ଦିର ଖୋଲାକୁ ନେଇ ଚିଠି

ଇଂରାଜୀ ନବବର୍ଷକୁ ନେଇ ଶ୍ରୀମନ୍ଦିର ଖୋଲା ରହିବା ପ୍ରଥା ଉପରେ ପୁଣିଥରେ ବିବାଦ ଆରମ୍ଭ ହୋଇଛି। ଜାନୁଆରି ୧ ରାତିରେ ମଧ୍ୟରାତ୍ରିରେ ଶ୍ରୀମନ୍ଦିର ଖୋଲି ଦର୍ଶନ ବ୍ୟବସ୍ଥା କରାଯିବାକୁ ନେଇ ଅସନ୍ତୋଷ ପ୍ରକାଶ ପାଇଛି। ଏହି ପ୍ରସଙ୍ଗରେ ଶ୍ରୀମନ୍ଦିର ପରିଚାଳନା ସମିତିର ସଦସ୍ୟ ପଣ୍ଡିତ ମହେଶ ସାହୁ, ଗଜପତି ମହାରାଜା, ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ରାଜ୍ୟ ଆଇନ ମନ୍ତ୍ରୀଙ୍କୁ ପତ୍ର ଲେଖି ଏହି ପ୍ରଥାକୁ ବନ୍ଦ କରିବାକୁ ଅନୁରୋଧ କରିଛନ୍ତି।

ଚିଠିରେ ପଣ୍ଡିତ ମହେଶ ସାହୁ ସ୍ପଷ୍ଟ କରିଛନ୍ତି ଯେ, ମହାପ୍ରଭୁ ଶ୍ରୀଜଗନ୍ନାଥ ସନାତନ ହିନ୍ଦୁମାନଙ୍କର ଆସ୍ଥା ଓ ଆରାଧ୍ୟ ଦେବତା। ଶ୍ରୀମନ୍ଦିରର ସମସ୍ତ ନୀତିକାନ୍ତି, ପୂଜାପାଠ ଓ ପରମ୍ପରା ସନାତନ ଧର୍ମଶାସ୍ତ୍ର ଅନୁଯାୟୀ ଚାଲିଆସୁଛି। ଜାନୁଆରି ୧ ଇଂରାଜୀ କ୍ୟାଲେଣ୍ଡର ଅନୁସାରେ ନବବର୍ଷ ହେଲେ ମଧ୍ୟ, ଏହା ସନାତନ ପରମ୍ପରାରେ ନବବର୍ଷ ନୁହେଁ ବୋଲି ସେ ଉଲ୍ଲେଖ କରିଛନ୍ତି।

ଗତ କିଛି ବର୍ଷ ଧରି ଜାନୁଆରି ୧ ରାତିରେ ମଧ୍ୟରାତ୍ରିରେ ଭକ୍ତଙ୍କ ଦର୍ଶନ ପାଇଁ ମନ୍ଦିର ଖୋଲା ରହିବା ଏକ ନିୟମିତ ପ୍ରଥାରେ ପରିଣତ ହୋଇଯାଇଛି। ଏହା ଫଳରେ ମହାପ୍ରଭୁଙ୍କୁ ରାତି ଅନିଦ୍ରାରେ ରଖାଯାଉଛି, ଯାହା ଧାର୍ମିକ ଓ ପରମ୍ପରାଗତ ଦୃଷ୍ଟିକୋଣରୁ ଅନୁଚିତ ବୋଲି ସେ ଦାବି କରିଛନ୍ତି।

ଏହି ଚିଠି ପରେ ଶ୍ରୀମନ୍ଦିରରେ ଇଂରାଜୀ ନବବର୍ଷ ରାତିର ଦର୍ଶନ ବ୍ୟବସ୍ଥା ନେଇ ପୁଣିଥରେ ଚର୍ଚ୍ଚା ଜୋର ଧରିଛି। ଏବେ ମନ୍ଦିର ପ୍ରଶାସନ ଓ ସରକାର ଏନେଇ କେଉଁ ନିଷ୍ପତ୍ତି ନେବେ, ସେଥିପାଇଁ ସମସ୍ତଙ୍କ ନଜର ରହିଛି।
ଦେବାଳିଆ ପାକିସ୍ତାନର ସାଙ୍ଘାତିକ ସ୍ଥିତି

ପାକିସ୍ତାନ ପରିସ୍ଥିତି ୨ ବର୍ଷ ମଧ୍ୟରେ ଡାକ୍ତର, ଇଞ୍ଜିନିୟର ଓ ଆକାଉଣ୍ଟାଣ୍ଟଙ୍କର ବୃହତ୍ତ ପ୍ରବାସ ଦେଖାଯାଇଛି। ସରକାରୀ ରିପୋର୍ଟ ଅନୁଯାୟୀ, ୨୪ ମାସରେ ପାକିସ୍ତାନ ୫,୦୦୦ ଡାକ୍ତର, ୧୧,୦୦୦ ଇଞ୍ଜିନିୟର ଓ ୧୩,୦୦୦ ଆକାଉଣ୍ଟାଣ୍ଟକୁ ହରାଇଛି। ଏହି ପରିସ୍ଥିତି ପାକିସ୍ତାନୀମାନଙ୍କୁ ସରକାର ଓ ସେନା ମୁଖ୍ୟ ଅସୀମ ମୁନିରଙ୍କର ‘ବ୍ରେନ୍ ଗେନ୍’ ଦାବିରେ ଉପହାସର ପାତ୍ର କରିଦେଇଛି।

ପୂର୍ବତନ ସିନେଟର ମୁସ୍ତାଫା ନୱାଜ ଖୋଖର ରିପୋର୍ଟକୁ ଉଲ୍ଲେଖ କରି କହିଛନ୍ତି, “ରାଜନୀତିକୁ ସଜାଡ଼ନ୍ତୁ ତେବେ ଆର୍ଥିକତା ଠିକ୍ ହେବ। ପାକିସ୍ତାନ ଚତୁର୍ଥ ସବୁଠାରୁ ବଡ଼ ଫ୍ରିଲାନ୍ସିଂ ହବ୍ ହେବା ସତ୍ତ୍ୱେ, ଇଣ୍ଟରନେଟ୍ ବନ୍ଦରୁ ୧.୬୨ ଡଲାର ବିଲିୟନ ହାନି ହୋଇଛି ଓ ୨.୩୭ ଲକ୍ଷ ଫ୍ରିଲାନ୍ସିଂ ଚାକିରି ବିପଦରେ ପଡ଼ିଛି।”

ପ୍ରବାସ ତଥ୍ୟ ଅନୁଯାୟୀ, ୨୦୨୪ ମସିହାରେ ୭,୨୭,୩୮୧ ପାକିସ୍ତାନୀ ବିଦେଶରେ ନିଯୁକ୍ତି ପାଇଁ ପଞ୍ଜୀକୃତ ହୋଇଥିଲେ। ୨୦୨୫ ମଧ୍ୟରେ ନଭେମ୍ବର ପର୍ଯ୍ୟନ୍ତ ୬,୮୭,୨୪୬ ଜଣ ପଞ୍ଜୀକୃତ ହୋଇଛନ୍ତି। ବୃହତ୍ତ ପ୍ରବାସ କେବଳ କମାଇ ପାଇଁ ଗଲ୍ଫ ଦେଶକୁ ଯାଉଥିବା ଶ୍ରମିକମାନଙ୍କ ସୀମିତ ନୁହେଁ; ଡାକ୍ତର, ଇଞ୍ଜିନିୟର ଓ ଅନ୍ୟାନ୍ୟ ବୃତ୍ତିଗତମାନେ ମଧ୍ୟ ଦେଶ ଛାଡ଼ୁଛନ୍ତି।

ସ୍ୱାସ୍ଥ୍ୟ କ୍ଷେତ୍ର ସବୁଠାରୁ ଅଧିକ ପ୍ରଭାବିତ ହୋଇଛି। ୨୦୧୧ ରୁ ୨୦୨୪ ମଧ୍ୟରେ, ନର୍ସମାନଙ୍କର ପ୍ରବାସରେ ୨,୧୪୪% ବୃଦ୍ଧି ଘଟିଛି। ଏହା ପାକିସ୍ତାନର ସ୍ୱାସ୍ଥ୍ୟ ବ୍ୟବସ୍ଥାକୁ ଆଉ ଦୁର୍ବଳ କରିଛି।ସେଥିପାଇଁ ୨୦୨୫ ମସିହାରେ ୬୬,୧୫୪ ଯାତ୍ରୀଙ୍କୁ ପାକିସ୍ତାନୀ ବିମାନବନ୍ଦରରୁ ଓହ୍ଲାଇ ଦିଆଯାଇଛି। ଶେହବାଜ ସରିଫ ସରକାର ‘ପେଶାଦାର ଭିକାରୀ’ ଓ ଅସମ୍ପୂର୍ଣ୍ଣ କାଗଜପତ୍ରଥିବା ଯାତ୍ରୀଙ୍କୁ ବିଦେଶକୁ ଯିବାରୁ ନିବୃତ୍ତ କରିଛି।

ଅସୀମ ମୁନିରଙ୍କ ‘ବ୍ରେନ୍ ଗେନ୍’ ଦାବି ସାମ୍ପ୍ରତିକ ତଥ୍ୟ ପରେ ପାକିସ୍ତାନୀମାନଙ୍କ ମଧ୍ୟରେ ଉପହାସର ଶିକାର ହୋଇଛି। ବହୁତ ସୋସିଆଲ୍ ମିଡିଆ ବ୍ୟବହାରକାରୀଙ୍କ ମତରେ, ଏହି ରାଜନୈତିକ ବାଣୀ ସତ୍ୟତା ସହ ସମନ୍ୱୟ ନ ରହିବାର ଉଦାହରଣ। ଏହା ଦେଖାଯାଉଛି ଯେ, ପାକିସ୍ତାନ କେବଳ ଦକ୍ଷ ବୃତ୍ତିଗତଙ୍କ ମଧ୍ୟରେ ଏକ ବ୍ୟବଧାନ ନୁହେଁ, ବରଂ ନେତାଙ୍କର ଭାଷଣ ଓ ବାସ୍ତବ ପରିସ୍ଥିତି ମଧ୍ୟରେ ବହୁତ ଫରକ ରହୁଛି।