ପୁଣି କୁମ୍ଭୀର ଆତଙ୍କ। ମାଛ ଧରିବାକୁ ଯାଇ ଜାଲରେ ପଡିଲା କୁମ୍ଭୀର । ଫଳରେ ଲୋକେ ଭୟଭିତ । ଏଭଳି ଘଟଣା ସାମ୍ନାକୁ ଆସିଛି ବାଲେଶ୍ବର ବାଲିଆପାଳ ବ୍ଲକ ଅର୍ନ୍ତଗତ କୁଣ୍ଡଳୀ ଗ୍ରାମ ପଞ୍ଚାୟତରେ । ସୁଚନା ଅନୁଯାୟୀ ଆଜି ସକାଳେ ମହାପଦା ନଦୀରେ ଏକ ୪ ଫୁଟର କୁମ୍ଭୀର ଜାଲରେ ପଡି ମୃତ୍ୟୁ ହୋଇଥିବା ଜଣା ପଡିଥିବା ବେଳେ ଘଟଣା ସ୍ଥଳରେ ଲୋକଙ୍କ ଉତ୍ତେଜନା ଦେଖିବାକୁ ମିଳିଛି । ଘଟଣା ସ୍ଥଳରେ ବନବିଭାଗ ପହଞ୍ଚିଥିବା ସୂଚନା ମିଳିଛି । ତେବେ ବନବିଭାଗ ର ଖାମଖିଆଲି ମନ ଭାବ ଯୋଗୁ ନଦୀରେ କୁମ୍ଭୀରଙ୍କ ଆତଙ୍କ ଫଳରେ ଜନସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି ।
ଉତ୍ତରାଖଣ୍ଡରେ ସୁଡଙ୍ଗ ଭୁଶୁଡିବା ଘଟଣାରେ ଫସିଥିବା ୪୦ ଶ୍ରମିକଙ୍କ ଭିତରେ ଫସି ରହିଛନ୍ତି ୫ ଓଡ଼ିଆ ଶ୍ରମିକ । ବର୍ତ୍ତମାନ ସମସ୍ତେ ସୁରକ୍ଷିତ ଥିବା ସୂଚନା । NDRF,SDRF ଏବଂ ପୁଲିସ ସୁରକ୍ଷା ଦାୟିତ୍ୱରେ ନିୟୋଜିତ ଅଛନ୍ତି। ଶ୍ରମିକଙ୍କ ପାଖକୁ ପାଇପ ଯୋଗେ ଖାଦ୍ୟ, ଅମ୍ଳଜାନ ପଠାଯାଉଛି। ସୁଚନାଅନୁଯାୟୀ ଗତକାଲି ଭୋର ପ୍ରାୟ ୫ଟା ସମୟରେ ଉତ୍ତରାଖଣ୍ଡ ଉତ୍ତରକାଶୀ ଜିଲ୍ଲାର ବ୍ରହ୍ମଖାଲ-ଯମୁନେତ୍ରୀ ରାଷ୍ଟ୍ରୀୟ ରାଜମାର୍ଗରେ ଏକ ନିର୍ମାଣାଧୀନ ସୁଡଙ୍ଗ ଭୁଶୁଡି ପଡିଛି । ଫଳରେ ୨୪ ଘଣ୍ଟାରୁ ଅଧିକ ସମୟ ଧରି ୪୦ ଜଣ ଶ୍ରମିକ ଭିତରେ ଫସି ରହିଛନ୍ତି । ଏହାରି ମଧ୍ୟରେ ୪୦ ମିଟର ରାସ୍ତା ସଫା ହୋଇ ପାରିଛି । ଆହୁରି ୩୦ରୁ ୩୫ ମିଟର ରାସ୍ତା ସଫା ହେଲା ପରେ ଶ୍ରମିକମାନେ ବାହାରକୁ ଆସିବା ସମ୍ଭବ ହେବ ।ତେବେ ଚାର୍ ଧାମ ରୋଡ୍ ପ୍ରକଳ୍ପ ଅଧୀନରେ ଏହି ନିର୍ମାଣ ଚାଲିଥିଲା।
କନ୍ଧମାଳ ଜିଲ୍ଲାର ବିଭିନ୍ନ ସ୍ଥାନରେ ପାଳନ ହୋଇଛି ଦୀପାବଳୀ । ଏହି ଅବସରରେ ଜି. ଉଦୟଗିରି ସ୍ଥିତ ଚକରା ବିଷୋୟୀ ଛକରେ ବେଶ ଧୁମାଧାମରେ ଅନୁଷ୍ଠିତ ହୋଇଛି ମା କାଳୀଙ୍କ ପୂଜା । ସମସ୍ତ ରୀତିନୀତି ଅନୁୟାୟୀ, ମା କାଳୀଙ୍କ ପୂଜାର୍ଚନା ହୋଇଛି । କାଳି ମନ୍ଦିର ଓ ବରାଳ ଦେବୀ ମନ୍ଦିରରୁ ଆଜ୍ଞା ମାଳ ଆସିବା ପରେ ହୋମ ଅନୁଷ୍ଠିତ ହୋଇଥିଲା । ଏହି ଅବସରରେ ସହରର ବିଭିନ୍ନ ସ୍ଥାନରେ ମେଢ଼ କରାଯାଇଛି । ଏଥିସହ ପରିଚାଳନା କମିଟି ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ମଣ୍ଡପ ଗୁଡୁକ ନିକଟରେ ପ୍ରବଳ ଭକ୍ତଙ୍କ ସମାଗମ ଦେଖିବାକୁ ମିଳିଥିଲା । ସହରର ସମସ୍ତ ସ୍ଥାନରେ ବ୍ୟବସାୟୀ ପ୍ରତିଷ୍ଠାନ ଗୁଡ଼ିକ ଆଲୋକ ମାଳାରେ ସଜ୍ଜିତ ହୋଇଥିବା ଦେଖିବାକୁ ମିଳିଥିଲା । କଚେରି ସାହିରେ ସ୍ଥାନୀୟ ଜନସାଧାରଣ ରାସ୍ତା ସାରା ଦୀପ ପ୍ରଜ୍ଜ୍ୱଳନ କରି ଦୀପାବଳୀ ଉତ୍ସବ ପାଳନ କରିଥିଲେ ।
ବହୁ ଦିନର ବ୍ୟବଧାନ ପରେ ପୁଣି ସକ୍ରିୟ ହୋଇଛନ୍ତି ମାଓବାଦି । ଦେଖିବାକୁ ମିଳିଛି ଲାଲ୍ ପୋଷ୍ଟର । ଗଞ୍ଜାମ କନ୍ଧମାଳ ଜିଲ୍ଲା ସୀମାନ୍ତ ଦୁର୍ଗାପ୍ରସାଦ ଉଲିଙ୍ଗିଆ ଠାରେ ଦେଖିବାକୁ ମିଳିଛି ମାଓ ପୋଷ୍ଟର । ତେବେ ଉଲୁଙ୍ଗିଆ ରାସ୍ତା ନିର୍ମାଣକୁ ବିରୋଧ କରି ଲେଖାଯାଇଥିବା ଅନୁମାନ କରାଯାଉଛି । ଘଟଣା ସ୍ଥଳରେ ଭଞ୍ଜନଗର ପୋଲିସ ପହଞ୍ଚି ମାଓବାଦୀଙ୍କ ଲାଲ ପୋଷ୍ଟର କୁ ଉଧାର କରିଛି ।କିଛି ଦିନର ବ୍ୟବଧାନରେ ପୁଣି ମାଓ ପୋଷ୍ଟରକୁ ନେଇ ବର୍ତ୍ତମାନ ଅଞ୍ଚଳରେ ଏକ ପ୍ରକାର ଭୟର ବାତାବରଣ ସୃଷ୍ଟି ହୋଇଛି ।
ପୁଣି କଳାକାରଙ୍କ କଳିରେ ବଳିପଡିଲା ଯାତ୍ରା। କୋଶଳ ମୁକ୍ତି ମୋର୍ଚ୍ଚା ପକ୍ଷରୁ ଯାତ୍ରାକୁ ବିରୋଧ । ବଲାଙ୍ଗୀର ସଇଁତଳା ଥାନା ତିଣ୍ଡାପାଲିରେ ଯାତ୍ରା ଚାଲିଥିବା ବେଳେ ଜୋରଦାର ବିରୋଧ କରାଯାଇଥିଲା ।ତିଣ୍ଡାପାଲିରେ ୪ ଦିନ ଧରି ଏହି ଯାତ୍ରା ଚାଲିବାକୁ ଥିବା ବେଳେ କୋଶଳ ମୁକ୍ତି ମୋର୍ଚ୍ଚା ପକ୍ଷରୁ ଏହାକୁ ବିରୋଧ କରାଯାଇଛି ଯାତ୍ରାର ପ୍ରଥମ ଦିନରୁ କୋଶଳ ସେନା ବିରୋଧ କରିଥିଲା ।ଯାତ୍ରା ଚାଲୁଥିବା ବେଳେ କୋଶଳ ସେନା ପହଂଚି ବିରୋଧ କରିବା ସହିତ ଯାତ୍ରାକୁ ସମ୍ପୁୁର୍ଣ୍ଣ ରୂପେ ବନ୍ଦ କରିଦେଇଥିଲେ ।
କୋଶଳ ସେନା ପକ୍ଷରୁ ପ୍ରଥମେ ପାଟଣାଗଡରେ ବିରୋଧ କରି ବନ୍ଦ କରାଯାଇଥିଲା । ଏବେ ଅନ୍ୟ ସ୍ଥାନ ଗୁଡିକରେ କୋଶଳ ପକ୍ଷରୁ ଯାତ୍ରା ବନ୍ଦ କରାଯାଉଛି । ଯାହାଦ୍ୱାରା ଯାତ୍ରାର କଳାକାର ମାନେ ବେଶ ପ୍ରଭାବିତ ହେବାରେ ଲାଗିଛନ୍ତି
ଗତ ୭ତାରିଖ ଦିନ କେନ୍ଦୁଝର ଟାଉନ ଥାନା ନିକଟ ଜଗନ୍ନାଥପୁର ଛକରୁ ଦିନ ଦିପ୍ରହରରେ ଏକ ବାଲେରୋ (OD-35-G-3055) ଗାଡି ଚୋରି ହୋଇଥିବା ଅଭିଯୋଗ ହୋଇଥିଲା । ଯାହାକୁ ନେଇ ଟାଉନ ପୋଲିସ ଆଖ ପାଖ ସିସିଟିଭି ଯାଞ୍ଚ କରିବାପରେ ଜାଣିବାକୁ ପାଇଥିଲା ଗାଡିଟି କଲିକତା ଅଭିମୁଖେ ଯାଇଛି । ତାପରେ ପୋଲିସ ଏକ ସ୍ୱତନ୍ତ୍ର ଟିମ ଗଠନ କରି ସିସିଟିଭି ଫୁଟେଜ ଆଧାରରେ ତଦନ୍ତ କରିବାକୁ କଲିକତା ଅଭିମୁଖେ ଯାଇଥିଲା । କଲିକତା ରାସ୍ତାରେ ଯିବାବେଳେ ବିଭିନ୍ନ ଟୋଲଗେଟ ର ସିସିଟିଭି ପୁଟେଜ କୁ ଆଧାରକରି ପୋଲିସ କଲିକତାର ଶେଖ ପଡା ରେ ପହଞ୍ଚି ଥିଲା । ଶେଖ ପଡ଼ାରେ ବିଭିନ୍ନ ସ୍ଥାନରେ ଚଢ଼ାଉ କରି କେନ୍ଦୁଝର ରୁ ଚୋରି ହୋଇଥିବା ବୋଲେର କୁ ପାଇଥିଲେ । ସେଠାରେ ପୋଲିସ ଜାଣିବାକୁ ପାଇଥିଲା ସେଯାଦ ଅଲ୍ଲୀ ନାମକ ଜଣେ ଯୁବକ ଏହି ଗାଡିଟିକୁ ଆଣି ବିକ୍ରୀ କରିବା ଉଦେଶ୍ୟ ରେ ଚୋରି କରିଥିଲା । ଏଣୁ ପୋଲିସ ଉକ୍ତ ବୋଲେରୋ କୁ ଜବତ କରିବା ସହିତ ସେଯାଦ ଅଲ୍ଲୀ କୁ ଗିରଫ କରିବା ରେ ସଫଳ ହୋଇଛି । ପ୍ରାଥମିକ ତଦନ୍ତରୁ ଜାଣିବାକୁ ପାଇଛି ଅଭିଯୁକ୍ତ ସେଯାଦ ଅଲ୍ଲୀ ଓଳା ଉବେର ଟେକ୍ସି ଗାଡି ଚଲାଉଥିଲା । ଏଣୁ ଗାଡି ଚୋରୀ ଉଦେଶ୍ୟ ରେ ସେ ୫ତାରିଖ ଦିନ ଏକ ଭଡା ଗାଡି ଯୋଗେ କେନ୍ଦୁଝର ଆସିଥିଲା । ପ୍ରଥମେ ଯୋଡ଼ା ରେ ରହିବାପରେ ତାପର ଦିନ କେନ୍ଦୁଝର ଆସି ଜଗନ୍ନାଥପୁର ଛକ ନିକଟରୁ ଉକ୍ତ ବୋଲେରୋ ଟିକୁ ଚୋରି କରିଥିଲା । ଆଉ ଏହି ବୋଲେରୋ ଟିର ନମ୍ବର ବଦଳାଇ (WB-29B-5055) କରି ଚଲାଉଥିଲା । ଗାଡିଟିକୁ ଜବତ କରିବା ପରେ ଗାଡ଼ିରୁ ନକଲି ନମ୍ବର ପ୍ଲେଟ,ପୋଲିସ ଲେଖା ଥିବା ଷ୍ଟିକର , ସ୍କୃଡାଇଭର, ଏକ ମୋବାଇଲ ସହିତ କିଛି ନଗଦ ଟଙ୍କା ଓ ଚୋରି ପାଇଁ ଆସିଥିବା ଓଳା ଉବେର ଟେକ୍ସି ଗାଡିକୁ ଜବତ କରିଛି ପୋଲିସ । ଏଥିସହ ଆଜି ଅଭିଯୁକ୍ତ କୁ ପୋଲିସ କୋଟ ଚାଲାଣ କରିଛି ।
ତିର୍ତ୍ତୋଲ ବ୍ଲକ ଗୋପିଆକୁଦ ସ୍ଥିତ ଚେଳିତୋଳ ବାଲିଯାତ୍ରା ଓ ବୋଇତ ବନ୍ଦଣ ପାଇଁ ଆଜି ତିର୍ତ୍ତୋଲ ବିଧାୟକ ବିଜୟ ଶଙ୍କର ଦାସଙ୍କ ନେତୃତ୍ୱରେ ଭୂମିପୂଜା କାର୍ଯ୍ୟକ୍ରମ ହୋଇଛି । ନଭେମ୍ବର ୨୭ ତାରିଖରୁ ଆରମ୍ଭ ହୋଇ ଡିସେମ୍ବର ୩ ତାରିଖ ପର୍ଯ୍ୟନ୍ତ ସାତ ଦିନ ଧରି ଏହି ଚେଳିତୋଳ ବାଲିଯାତ୍ରା ଅନୁଷ୍ଠିତ ହେବାପାଇଁ ବିଧାୟକ ବିଜୟ ଶଙ୍କର ଦାସ ସୂଚନା ଦେଇଥିଲେ । ଝଙ୍କଡ଼ର ଅଧିଷ୍ଠାତ୍ରୀ ଦେବୀ ମା ଶାରଳାଙ୍କ ନିକଟରେ ପୂଜାର୍ଚ୍ଚନା ପରେ ବାଲିଯାତ୍ରା ପଡିଆରେ ହୋମ ଯଜ୍ଞ କରାଯାଇଥିଲା । ଏବଂ ଉକ୍ତ କାର୍ଯ୍ୟକ୍ରମରେ ଅନେକ ମାନଗଣ୍ୟ ବ୍ୟକ୍ତି ଯୋଗଦେଇ କାର୍ଯ୍ୟକ୍ରମ ପରିଚାଳନା କରିଥିଲେ।
କେନ୍ଦୁଝର ବନଖଣ୍ଡରେ ବାଘ ଗଣନା ସମୟରେ ଏକ ମହାବଳ ଓ ଏକ କଲରାପତରିଆ ବାଘ ଠାବ ହୋଇଛି । ଟ୍ରାପ କ୍ୟାମେରା ସହ ପାଦ ଚିହ୍ନ ଦ୍ୱାରା ଠାବ ହୋଇଥିବା ଜଣାପଡିଛି । ତେବେ ପ୍ରଥମ ପର୍ଯ୍ୟାୟରେ ସାଇନ ସର୍ଭେ ଓ ବର୍ତମାନ ନଭେମ୍ବର ୧ ତାରିଖରୁ ସାଇନ ସର୍ଭେ ସହ ଆରମ୍ଭ ହୋଇଛି କ୍ୟାମେରା ଟ୍ରାପ ସର୍ଭେ , ଯାହା ଜାନୁଆରି ୧୫ ତାରିଖ ପର୍ଯ୍ୟନ୍ତ ଚାଲିବ । କେନ୍ଦୁଝର ବନଖଣ୍ଡର ୭ ଟି ରେଞ୍ଜ ର ୧୦୨ ଟି ବିଟ୍ ଅଞ୍ଚଳରେ ୧୦୨ ଟି ଟିମ୍ ଦ୍ବାରା ବ୍ୟାଘ୍ର ଗଣନା କାର୍ଯ୍ୟ ଚାଲିଛି । ମୁଖ୍ୟତଃ ଅଟେଇ , କଳାପାଟ , ଚମକପୁର ଓ ଜଙ୍ଘିରା ଅଞ୍ଚଳରେ ୯୮ ଟି ଟ୍ରାପ କ୍ୟାମେରା ଲଗାଯାଇଛି ।
ଏଥିରେ ଜିଲ୍ଲାର ସମସ୍ତ ସ୍କ୍ବାର୍ଡ, ଗାର୍ଡ ଓ ଫରେଷ୍ଟର୍ ସାମିଲ୍ ହୋଇଛନ୍ତି । ଏମାନେ କିପରି ସୁରୁଖୁରୁରେ ବାଘର ପାଦ କୁ ଚିହ୍ନି ପାରିବେ ତାକୁ ନେଇ ପି ଆଇ ପି ରେ ଡେମୋ ଦେଇଥିଲେ ନିଜେ ଡିଏଫଓ । ବାଘ ଯାତାୟତ କରୁଥିବା ସ୍ଥାନରେ ବାଘର ପାଦଚିହ୍ନ ଜାଣିବା ପାଇଁ ୧୮୯୬ ଟି ପି ଆଇ ପି ସ୍ଥାପନ କରାଯାଇଛି । ତେବେ ବର୍ତ୍ତମାନ ଦୁଇଟି ବାଘ ଥିବା ଜଣା ପଡିଛି ଓ ଟ୍ରାପ୍ କ୍ୟାମେରାରେ ଦ୍ବିତୀୟ ପର୍ଯ୍ୟାୟ ଗଣନା ଶେଷ ହେବାପରେ ଆସନ୍ତା ଜାନୁଆରୀ ୩୧ ତାରିଖରେ ଜିଲ୍ଲାରେ କେତେ ସଂଖ୍ୟାରେ ବାଘ ଅଛନ୍ତି, ସେବିଷୟରେ ସ୍ପଷ୍ଟ ସୂଚନା ମିଳିବ ବୋଲି ବନ ବିଭାଗର ଏସିଏଫ ପ୍ରକାଶ କରିଛନ୍ତି ।
ଇତିମଧ୍ୟରେ କେନ୍ଦୁଝର ବନଖଣ୍ଡ ଅଧିନରେ ଥିବା ସଂରକ୍ଷିତ ଜଙ୍ଗଲରେ ବାଘର ପାଦଚିହ୍ନ , ଫଟୋ ସହ ବିଭିନ୍ନ ପ୍ରଜାତିର ବନ୍ୟ ଜନ୍ତୁ ସାଇନ ସର୍ଭେ ଓ କ୍ୟାମେରା ଟ୍ରାପ ରୁ ଜଣାପଡ଼ିଛି ।
କେନ୍ଦୁଝର ଜିଲ୍ଲା, ଯୋଡ଼ା ବ୍ଳକ ଅଧୀନ ଗୁଆଲୀଠାରେ ଥିବା ଜେ ଏସ୍ ଡବ୍ଲ୍ଯୁର ନୂଆଗାଁ ଖଣି ଗେଟ୍ ସମ୍ମୁଖରେ ଅଞ୍ଚଳବାସୀଙ୍କ ବିକ୍ଷୋଭ ଓ ଧାରଣା । ବିଭିନ୍ନ କ୍ଷେତ୍ରରେ ସ୍ଥାନୀୟ ବାସିନ୍ଦାଙ୍କୁ ଅବହେଳା ଓ ଅଣଦେଖା କରାଯାଉଥିବା ଅଭିଯୋଗ । ଏଥିସହ ଖଣିଜ ପରିବହନ, ନିଯୁକ୍ତି ଓ ଅନ୍ୟାନ୍ୟ କ୍ଷେତ୍ରରେ ପ୍ରଭାବିତ ଅଞ୍ଚଳବାସୀଙ୍କୁ ଅଗ୍ରାଧିକାର ଦେବା ଦାବିରେ ଶୁକ୍ରବାର ଦିନ ଲୋକେ ଧାରଣାରେ ବସିଥିଲେ। କେନ୍ଦୁଝର ଜିଲ୍ଲାରେ ଜେ ଏସ ଡବ୍ଲୁ ଖଣି ରହିଥିଲାବେଳେ, ଖଣିରୁ ସୁନ୍ଦରଗଡ଼ ଜିଲ୍ଲାରେ ଥିବା ବିଭିନ୍ନ ରେଲୱେ ସାଇଡ଼ିଂକୁ ଯେଉଁ ଖଣିଜ ଦ୍ରବ୍ୟ ପରିବହନ କରାଯାଉଛି ତା’ର ପରିବହନ କାର୍ଯ୍ୟ ସ୍ଥାନୀୟ ଅଂଚଳର ପରିବହନକାରୀ ସଂସ୍ଥାକୁ ନଦେଇ ବାହାର ଟ୍ରାନ୍ସପୋର୍ଟରଙ୍କୁ ଦିଆଯାଉଛି, ବାହାର ଜିଲ୍ଲା ତଥା ଅନ୍ୟ ରାଜ୍ୟରୁ ଆସୁଥିବା ଟ୍ରେଲର ମାନଙ୍କରେ ଖଣିଜ ପରିବହନ କରାଯାଉଛି। ଫଳରେ ସ୍ଥାନୀୟ ଅଂଚଳର ଟ୍ରକ୍ ମାଲିକ କ୍ଷତି ସହୁଥିବା ଅଭିଯୋଗ ହେଉଛି। କମ୍ପାନୀର ଏପରି କାର୍ଯ୍ୟ ପାଇଁ ଅଞ୍ଚଳରେ ବେକାରୀ ସମସ୍ୟା ଉତ୍କଟ ହେଉଛି। ଖଣି ପ୍ରଭାବିତ ଅଞ୍ଚଳରେ ଧୂଳି ପ୍ରଦୂଷଣ ନିୟନ୍ତ୍ରଣ, ପାନୀୟ ଜଳ, ବିଦ୍ୟୁତ୍ ଓ ରାସ୍ତା ଘାଟର ଉନ୍ନତି ପାଇଁ କମ୍ପାନୀ ଦୃଷ୍ଟି ଦେଉନଥିବା ଅଭିଯୋଗ ହେଉଛି।
ତେବେ ଜେ ଏସ ଡବ୍ଲୁର ୱେଲଫେୟାର୍ ଅଫିସର ଜିତେନ୍ଦ୍ର ନନ୍ଦ ଧାରଣାରତ ଗ୍ରାମବାସୀ ଓ ଲୋକ ପ୍ରତିନିଧିଙ୍କ ସହ ଆଲୋଚନା କରି ସେମାନଙ୍କର ଦାବି ଗୁଡ଼ିକୁ ଶୁଣିଥିଲେ । ଏନେଇ ସେ କମ୍ପାନୀର ମ୍ୟାନେଜମେଣ୍ଟଙ୍କୁ ଅବଗତ କରାଇବେ ଏବଂ ଯାହା ନିଷ୍ପତ୍ତି ହେବ ତାହା ଜଣାଇଦିଆଯିବ ବୋଲି ସେ କହିଛନ୍ତି ।
ତେବେ ଆଲୋଚନା ପରେ ଆଜି ଧାରଣାକୁ ସାମୟିକ ଭାବରେ ସ୍ଥଗିତ ରଖାଯାଇଛି । ଯଥା ଶୀଘ୍ର ଦାବିଗୁଡ଼ିକୁ ପୂରଣ କରା ନଗଲେ ଆଗାମୀ ଦିନରେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଆନ୍ଦୋଳନ କରାଯିବ ବୋଲି ଗୁଆଲୀ ପଂଚାୟତବାସୀ ଚେତାବନୀ ଦେଇଛନ୍ତି ।
ରାଜ୍ୟ ସରକାରଙ୍କ ପକ୍ଷରୁ ରାଜ୍ୟର ବରିଷ୍ଠ ନାଗରିକମାନଙ୍କୁ ଦେଶର ବିଭିନ୍ନ ତୀର୍ଥ କ୍ଷେତ୍ର ପରିଭ୍ରମଣ ବ୍ୟବସ୍ଥା ହୋଇଛି। ଏହି ଯୋଜନାରେ ଚଳିତ ବର୍ଷ ବଲାଙ୍ଗିର ଜିଲ୍ଲାରୁ ୩୫୪ ବରିଷ୍ଠ ନାଗରିକ ତୀର୍ଥ ଯାତ୍ରା କରିବାକୁ ଯାଉଛନ୍ତି। ଏହା ପୂର୍ବରୁ ଜିଲ୍ଲାପାଳଙ୍କ ଅଧ୍ୟକ୍ଷତାରେ ବରିଷ୍ଠ ନାଗରିକ ତୀର୍ଥ ଯାତ୍ରା ଯୋଜନାରେ ସମନ୍ଵୟ କମିଟି ବୈଠକ ଜିଲ୍ଲାପାଳଙ୍କ ଅଫିସରେ ଅନୁଷ୍ଠିତ ହୋଇଯାଇଛି । ଜିଲ୍ଲାର ୬୦ ରୁ ୭୫ ବର୍ଷ ପର୍ଯ୍ୟନ୍ତ ନାଗରିକମାନଙ୍କୁ ଦୁଇଟି ପର୍ଯ୍ୟାୟରେ ତୀର୍ଥ କରିବାର ସୁଯୋଗ ମିଳିବ । ପ୍ରଥମ ପର୍ଯ୍ୟାୟରେ ଡିସେମ୍ବର ୦୬ ତାରିଖ ରୁ ୧୧ତାରିଖ ଏବଂ ଦ୍ଵିତୀୟ ପର୍ଯ୍ୟାୟରେ ଆଗାମୀ ଫେବୃଆରୀ ୧୯ ତାରିଖ ରୁ ୨୪ ତାରିଖ ଏହି ତୀର୍ଥ ଯାତ୍ରା ଆରମ୍ଭ ହେବ । ଜିଲ୍ଲାରୁ ପ୍ରତି ପର୍ଯ୍ୟାୟରେ ୧୭୭ ଜଣ ଲେଖାଏଁ ମୋଟ ୩୫୪ ଜଣଙ୍କୁ ଏହି ସୁଯୋଗ ମିଳିବ । ପ୍ରତ୍ୟକ ଯାତ୍ରୀଙ୍କ ପଛରେ ସରକାର ୧୬୮୦୦ ଟଙ୍କା ଲେଖାଏଁ ଖର୍ଚ୍ଚ କରିବେ । ତୀର୍ଥ ପୂର୍ବରୁ ମୁଖ୍ୟ ଚିକିତ୍ସାଧିକାରୀ ତତ୍ଵାବଧାନରେ ସମସ୍ତଙ୍କ ସ୍ୱାସ୍ଥ୍ୟ ପରୀକ୍ଷା କରାଯିବା ସହ ସ୍ୱାସ୍ଥ୍ୟ କିଟ ବଣ୍ଟାଯିବ । ତୀର୍ଥ ଯାତ୍ରୀଙ୍କୁ ପୋଲିସ ପକ୍ଷରୁ ଉପଯୁକ୍ତ ପାଟ୍ରୋଲିଂ କରେଇ ନେବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଥିଲେ । ନଭେମ୍ବର ୧୦ରେ ଏହାର ପଞ୍ଜୀକରଣ ସରୁଥିବା ବେଳେ ଉଭୟ ଅନଲାଇନ ଓ ଅଫଲାଇନରେ ବରିଷ୍ଠ ନାଗରିକ ମାନେ ନିଜ କୁ ପଞ୍ଜୀକୃତ କରାଇଛନ୍ତି । ବୈଠକରେ ଜିଲ୍ଲା ପ୍ରଶାସନ ଓ ପୋଲିସ ପ୍ରଶାସନର ଅଧିକାରୀ ଉପସ୍ଥିତ ରହି ତୀର୍ଥଯାତ୍ରାକୁ ସଫଳ କରିବାରେ ସେମାନଙ୍କ ମତ ଦେଇଥିଲେ।