ଆଇସିସି ବିଶ୍ୱକପ ୨୦୨୩ ର ପ୍ରଥମ ସେମିଫାଇନାଲରେ ଭାରତ ନ୍ୟୁଜିଲାଣ୍ଡକୁ ଭେଟିବ | ଟୁର୍ଣ୍ଣାମେଣ୍ଟରେ ଅପରାଜିତ ରହିଥିବା ରୋହିତଙ୍କ ସେନା ହେଉଛି ଏକମାତ୍ର ଦଳ। ଭାରତୀୟ ଦଳ ଲିଗ୍ ପର୍ଯ୍ୟାୟରେ ସମସ୍ତ ୯ ଟି ମ୍ୟାଚ୍ ଜିତି ସେମିଫାଇନାଲରେ ପ୍ରବେଶ କରିଛି।
ଅନ୍ୟପକ୍ଷରେ କ୍ରମାଗତ ଚାରିଟି ମ୍ୟାଚ୍ ହାରିବା ପରେ ନ୍ୟୁଜିଲ୍ୟାଣ୍ଡ ଶ୍ରୀଲଙ୍କାକୁ ପରାସ୍ତ କରି ସେମିଫାଇନାଲରେ ପ୍ରବେଶ କରିଛି। ତେବେ ଆଇସିସି ଇଭେଣ୍ଟଗୁଡିକର ନକ୍ଆଉଟ୍ ମ୍ୟାଚ୍ ରେ ଭାରତର କିୱି ଦଳର ରେକର୍ଡ ଅତ୍ୟନ୍ତ ଭଲ ରହିଛି। ଗତ ବିଶ୍ୱକପ୍ର ସେମିଫାଇନାଲ ମ୍ୟାଚ୍ରେ ଟିମ୍ ଇଣ୍ଡିଆ ନ୍ୟୁଜିଲାଣ୍ଡକୁ ପରାସ୍ତ କରିଥିଲା।
ନଭେମ୍ବର ମାସ ପାଇଁ ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ଯୁଗ୍ମ ଜନ-ଅଭିଯୋଗ ଶୁଣାଣୀ କାର୍ଯକ୍ରମ ବଲାଙ୍ଗିର ଜିଲ୍ଲା ଗୁଡଭେଲା ବ୍ଲକ ମୁଖ୍ୟାଳୟ ଠାରେ ଅନୁଷ୍ଠିତ ହୋଇଯାଇଛି । ଏହି କାର୍ଯକ୍ରମରେ ଜିଲ୍ଲାପାଳ ଶ୍ରୀ ଚଞ୍ଚଲ ରାଣା, ଆରକ୍ଷୀ ଅଧିକ୍ଷକ ଖିଲାରୀ ରିଷିକେଶ ଦ୍ୟାନଦେଓଙ୍କ ସମେତ ବିଭିନ୍ନ ବିଭାଗର ଜିଲ୍ଲା ସ୍ତରୀୟ ଅଧିକାରୀ, ବଲାଙ୍ଗିର ଗୁଡଭେଲା ବିଡିଓ ଏବଂ ତହସିଲଦାର ଉପସ୍ଥିତ ଥିଲେ । ଏଥିରେ ବିଭିନ୍ନ ସମସ୍ୟାକୁ ନେଇ ସମୁଦାୟ ୨୮ଟି ଅଭିଯୋଗ ଦରଖାସ୍ତ ଦାଖଲ ହୋଇଥିବା ବେଳେ ୨୧ଟି ବ୍ୟକ୍ତିଗତ ଅଭିଯୋଗ ଦାଖଲ ହୋଇଥିଲା । ଅବଶିଷ୍ଟ ୭ଟି ସାମୁହିକ ଦରଖାସ୍ତ ଦାଖଲ ହୋଇଥିଲା । ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକ ଜନସାଧାରଣଙ୍କ ଏହି ସମସ୍ତ ଅଭିଯୋଗ ଓ ସମସ୍ୟା ଗୁଡିକର ଶୁଣାଣୀ କରିଥିଲେ । ୫ଟି ଅଭିଯୋଗର ତୁରନ୍ତ ସମାଧାନ ହେଇଥିଲା । ଯୁଗ୍ମ ଜନ-ଅଭିଯୋଗ ଶୁଣାଣୀ କାର୍ଯକ୍ରମରେ ସହାୟତା ବାବଦରେ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠି କିମ୍ବା ଜିଲ୍ଲା ରେଡକ୍ରସ ପାଣ୍ଠିରୁ କୌଣସି ଆର୍ଥିକ ସହାୟତା ମଞ୍ଜୁର ହୋଇନାହିଁ । ଏହି ଗସ୍ତ କାଳରେ ଜିଲ୍ଲାପାଳ, ତୁଷୁରା ଉଚ୍ଚ ବିଦ୍ୟାଳୟ ଏବଂ କଲେଜରେ ଚାଲିଥିବା ୫ଟି କାମକୁ ଅନୁଧ୍ୟାନ କରି ଜଲଦି କାମ ସାରିବାକୁ ବିଭାଗୀୟ ଅଧିକାରୀଙ୍କୁ ଆଦେଶ ଦେଇଥିଲେ ।
୪୮ ଘଣ୍ଟା ଧରି ଉତ୍ତରପ୍ରଦେଶର ଏକ ଟନେଲ ଭିତରେ ଫସି ରହିଥିବା ୪୦ ଜଣ ଶ୍ରମିକଙ୍କୁ ଉଦ୍ଧାର କରିବା ପାଇଁ ମିଳିତ ଉଦ୍ୟମ କରାଯାଉଛି |ତିନି ଦିନରେ ପହଞ୍ଚିଛି ଚାର୍ ଧାମ ଟନେଲ୍ ଟ୍ରାଜେଡି। ଏବେ ବି ଟନେଲ ତଳେ ଫସି ରହିଛନ୍ତି ୪୦ ଜଣ ଶ୍ରମିକ। ଘଟଣାସ୍ଥଳରେ ଜାରି ରହିଛି ମେଗା ରେସ୍କ୍ୟୁ ଅପରେସନ । ଫସିଥିବା ଶ୍ରମିକଙ୍କ ନିକଟରେ ପହଞ୍ଚିବା ଲାଗି ଏକ ଏସ୍କେପ ପାସେଜ ତିଆରି ହୋଇଛି । ଏହାର ଦୂରତା ପ୍ରାୟ ୬୦ ମିଟର । ଏବଂ ସେମାନଙ୍କ ନିକଟକୁ ପାଇପ୍ ଯୋଗେ ଖାଦ୍ୟ, ପାନୀୟଠୁ ଅମ୍ଳଜାନ ପଠାଯାଉଛି। ଚାଲିବା ଏବଂ ନିଶ୍ୱାସ ନେବା ପାଇଁ ସେମାନଙ୍କ ପାଖରେ ପ୍ରାୟ ୪୦୦ ମିଟର ବଫର୍ ଅଛି ବୋଲି ବିପର୍ଯ୍ୟୟ ମୁକାବିଲା ଅଧିକାରୀ କହିଛନ୍ତି।ତେବେ ଉଦ୍ଧାରକାରୀ ଦଳ ୱାକି-ଟକିଜ୍ ସହିତ ଶ୍ରମିକମାନଙ୍କ ସହିତ ଯୋଗାଯୋଗ ସଫଳତାର ସହିତ ସ୍ଥାପନ କରିଛନ୍ତି | ପ୍ରାରମ୍ଭିକ ଯୋଗାଯୋଗ କାଗଜର ଏକ ସ୍କ୍ରାପରେ ଥିବା ଏକ ନୋଟ୍ ମାଧ୍ୟମରେ କରାଯାଇଥିଲା, କିନ୍ତୁ ପରେ ଉଦ୍ଧାରକାରୀମାନେ ରେଡିଓ ହ୍ୟାଣ୍ଡସେଟ୍ ବ୍ୟବହାର କରି ସଂଯୋଗ କରିବାରେ ସଫଳ ହୋଇଥିଲେ |
ଉଦ୍ଧାରକାରୀ ଟିମ୍ ପ୍ରଥମେ ୩୦ ମିଟର ପଥର କାଟିବାରେ ସକ୍ଷମ ହୋଇଥିଲେ, କିନ୍ତୁ କିଛି ମାଟି ପୁଣି ଭଶୁଡି ରାସ୍ତା ଅବରୋଧ କରିଥିଲା, ବର୍ତ୍ତମାନ ସେମାନେ ୨୧ ମିଟର ରାସ୍ତା ସଫା କରିବାରେ ସକ୍ଷମ ହୋଇଥିବା ସୁରକ୍ଷା ଅଧିକାରୀ ସୂଚନା ଦେଇଛନ୍ତି।ଅନ୍ୟପଟେ ଉଦ୍ଧାରକାରୀ ଟିମ୍ ହାଇଡ୍ରୋଲିକ୍ ଜ୍ୟାକ୍ ବ୍ୟବହାର କରି ଶ୍ରମିକମାନଙ୍କ ନିକଟକୁ ୯୦୦ ମିଲିମିଟର ବ୍ୟାସ ବିଶିଷ୍ଟ ଏକ ପାଇପ୍ ସଂଯୋଗ କରିବାକୁ ଯୋଜନା କରୁଛନ୍ତି। ସ୍ଲାବ୍ ଭୁଶୁଡି ପୋତି ହୋଇଥିବା ଆବର୍ଜନାକୁ ସଫା କରିବା ପାଇଁ ଆଗର୍ ମେସିନର ବ୍ୟବହାର ମଧ୍ୟ କରିବେ। ଏଥିପାଇଁ ଘଟଣାସ୍ଥଳରେ ଆବଶ୍ୟକୀୟ ସମସ୍ତ ସାମଗ୍ରୀ ଏବଂ ଯନ୍ତ୍ରପାତି ପହଞ୍ଚିଛି। ଅପରେସନରେ ଜଳସେଚନ ବିଭାଗର ବିଶେଷଜ୍ଞମାନେ ମଧ୍ୟ ସାମିଲ୍ ହୋଇଛନ୍ତି।
ଏଠାରେ କହି ରଖୁଛୁ କି ରବିବାର ଭୋର ପ୍ରାୟ ୫ଟା ସମୟରେ ଉତ୍ତରାଖଣ୍ଡ ଉତ୍ତରକାଶୀ ଜିଲ୍ଲାର ବ୍ରହ୍ମଖାଲ-ଯମୁନୋତ୍ରୀ ଜାତୀୟ ରାଜପଥରେ ଏକ ନିର୍ମାଣାଧୀନ ଟନେଲ ଆଂଶିକ ଭୁଶୁଡି ପଡିଥିଲା। ଏଥିରେ କାମ କରୁଥିବା ୪୦ ଜଣ କର୍ମଚାରୀ ଫସି ରହିଥିଲେ। ଚାର୍ ଧାମ ରୋଡ୍ ପ୍ରକଳ୍ପ ଅଧୀନରେ ଏହି ନିର୍ମାଣ ଚାଲିଥିଲା।
କଣ ଇଣ୍ଡିଆ ମେଣ୍ଟ ଆଉ ଆଗକୁ ବଢିପାରିବନି । ଏକଥା ଏଥିପାଇଁ ଏବେ ମୁଣ୍ଡ ଟେକିଛି କାରଣ ସମାଜବାଦୀ ପାର୍ଟୀ ମୁଖ୍ୟ ଅଖିଳେଶ ଯାଦବ କଂଗ୍ରେସକୁ କଟାକ୍ଷ କରିବା ଆରମ୍ଭ କରିଛନ୍ତି । ମଧ୍ୟପ୍ରଦେଶ ବିଧାନସଭା ନିର୍ବାଚନରେ ସିଟ୍ ବଣ୍ଟନକୁ ନେଇ ଅଖିଳେଶ ନିରାଶ ହେବା ପରେ ଗୋଟିଏ ପରେ ଗୋଟିଏ ମେଣ୍ଟ ବିରୋଧି ବୟାନ ଦେଇଚାଲିଛନ୍ତି । କମଲ ନାଥ ମଧ୍ୟପ୍ରଦେଶରେ ସମାଜବାଦୀ ପାର୍ଟିକୁ ଅଣଦେଖା କରିଥିବା ଅଭିଯୋଗ କରିଛନ୍ତି ଅଖିଳେଶ । ଅନ୍ୟପଟେ କମଲନାଥଙ୍କୁ ଏ ବିଷୟରେ ପଚାରିବାରୁ ସେ ଦେଇଥିବା ପ୍ରତିକ୍ରିୟା ଅଖିଳେଶଙ୍କୁ ଅଣଦେଖା ଭଳି ସ୍ପଷ୍ଟ ବାରି ହେଉଛି । ଏବେ ପୁଣି ରାହୁଲ ଗାନ୍ଧୀଙ୍କ ଉଦ୍ଦେଶ୍ୟରେ କଟାକ୍ଷ କରିଛନ୍ତି ଅଖିଳେଶ ।
ବିଜେପିକୁ ଗାଦିଚ୍ୟତ କରିବା ଉଦ୍ଦେଶ୍ୟରେ ହୋଇଥିବା ଇଣ୍ଡିଆ ମେଣ୍ଟରେ ମତାନ୍ତର ଓ ମନାନ୍ତର ଥମୁନି । କଂଗ୍ରେସ ସାଂସଦ ରାହୁଲ ଗାନ୍ଧୀ ଜାତିଗତ ଜନଗଣନାକୁ ପ୍ରାଧାନ୍ୟ ଦେଉଥିବା ବେଳେ ଏହାକୁ ନେଇ ରାହୁଲଙ୍କୁ କଟାକ୍ଷ କରିଛନ୍ତି ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ । ଏକ ନିର୍ବାଚନୀ ପ୍ରଚାରରେ ଅଖିଳେଶ କଂଗ୍ରେସକୁ ଟାର୍ଗେଟ କରିଛନ୍ତି, ଯେଉଁ ସମୟରେ ଦଳକୁ ଦାୟିତ୍ୱ ନେବାର ଥିଲା ସେତେବେଳେ ସେମାନେ ପଛଘୁଞ୍ଚା ଦେଇଥିଲେ । ସ୍ୱାଧିନତା ପରଠାରୁ ଜାତିଗତ ଜନଗଣନା ପାଇଁ ଦାବି ହୋଇ ଆସୁଥିଲା । ହେଲେ କଂଗ୍ରେସ ସେତେବେଳେ ଏହାକୁ ଗୁରୁତ୍ୱ ଦେଇନଥିଲା । ହେଲେ ଏବେ କଂଗ୍ରେସ ପାରମ୍ପରିକ ଭୋଟ ହାତେଇବା ପାଇଁ ଦଳିତ ଓ ପଛୁଆ ବର୍ଗଙ୍କୁ ଆକର୍ଷିତ କରିବାକୁ ଚାହୁଁଛି ବୋଲି ଅଖିଳେଶ କହିଛନ୍ତି । ଦେଶର ରାଜନୀତି ପାରଦ ଏବେ ହାଇ ଥିବା ବେଳେ ଇଣ୍ଡିଆ ମେଣ୍ଟରେ ଫାଟ ତାପମାତ୍ରା ଆହୁରି ବଢାଇ ଦେଉଛି । କଂଗ୍ରେସକୁ ଅଖିଳେଶଙ୍କ ଏଭଳି ସିଧାସଳଖ ଆକ୍ଷେପ ଇଣ୍ଡିଆ ମେଣ୍ଟ ଉପରେ ଅନେକ ପ୍ରଶ୍ନ ସୃଷ୍ଟି କରୁଛି । ହେଲେ ଆଉ ଏକ ରୋଚକ କଥା ହେଉଛି, ସାମ୍ବାଦିକଙ୍କ ଇଣ୍ଡିଆ ମେଣ୍ଟ ସମ୍ପର୍କିତ ପ୍ରଶ୍ନକୁ ଅଖିଳେଶ ଏଡାଇ ଯାଇଛନ୍ତି ।
ସକ୍ରିୟ ଘୂର୍ଣ୍ଣିବଳୟ ପ୍ରଭାବରେ ଦକ୍ଷିଣପୂର୍ବ ବଙ୍ଗୋପସାଗରରେ ଆଜି ସୃଷ୍ଟି ହୋଇଛି ଲଘୁଚାପ କ୍ଷେତ୍ର। ପ୍ରଭାବରେ କାଲିଠୁ ରାଜ୍ୟରେ ପାଗରେ ପରିବର୍ତ୍ତନ ସହ ୧୬ ତାରିଖରୁ ପ୍ରବଳ ବର୍ଷା ସମ୍ଭାବନା ରହିଛି । ୧୬ ଓ ୧୭ ତାରିଖରେ ଦକ୍ଷିଣ ଆଭ୍ୟନ୍ତରୀଣ ଓ ଉପକୂଳ ଓଡ଼ିଶାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ଏନେଇ ଭୁବନେଶ୍ୱର ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ଏହି ସୂଚନା ଦିଆଯାଇଛି।
ପାଣିପାଗ କେନ୍ଦ୍ରର ସୂଚନା ଅନୁସାରେ, ଲଘୁଚାପ କ୍ଷେତ୍ରଟି କ୍ରମେ ଘନୀଭୂତ ହୋଇ ପଶ୍ଚିମ-ଉତ୍ତର ପଶ୍ଚିମ ଦିଗକୁ ଗତି କରିବ। ୧୬ ତାରିଖ ବେଳକୁ ଏହା ଅବପାତର ରୂପ ନେବ। ଏହାର ପ୍ରଭାବରେ ଗଞ୍ଜାମ, ପୁରୀ, କଟକ, କେନ୍ଦ୍ରାପଡା, ଜଗତସିଂହପୁର ଏବଂ ଭଦ୍ରକକୁ ୟେଲୋ ଆଲର୍ଟ ଜାରି କରାଯାଇଛି । ୧୭ରେ ପ୍ରବଳ ବର୍ଷା ସହ ଘଣ୍ଟାପ୍ରତି ୫୫ରୁ ୬୫ କିଲୋମିଟର ବେଗରେ ବହିବ ପବନ । ଏଥିପାଇଁ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, କେନ୍ଦୁଝର, ମୟୁରଭଞ୍ଜ, ଖୋର୍ଦ୍ଧା, ପୁରୀ ଏବଂ ଢେଙ୍କାନାଳକୁ ୟେଲୋ ଆଲର୍ଟ ଜାରି କରାଯାଇଛି । ଏହିସବୁ ଜିଲ୍ଲା ଗୁଡ଼ିକରେ ୭୦ରୁ ୧୧୦ ମିଲିମିଟର ପର୍ଯ୍ୟନ୍ତ ବର୍ଷା ହୋଇପାରେ ।ଏହାଛଡ଼ା ୧୬ ତାରିଖରୁ ସମୁଦ୍ର ଅଶାନ୍ତ ରହିବ । ଏଥିପାଇଁ ମତ୍ସ୍ୟଜୀବୀମାନଙ୍କୁ ସମୁଦ୍ର ମଧ୍ୟକୁ ନ ଯିବାକୁ ପରାମର୍ଶ ଦିଆଯାଇଛି ।
ପ୍ରବଳ ବର୍ଷାରେ ପ୍ରଭାବିତ ହୋଇପାରେ ଅମଳ ଉପଯୋଗୀ ଧାନ । ଏଣୁ ଧାନକୁ ସୁରକ୍ଷିତ ସ୍ଥାନକୁ ନେଇଯିବାକୁ ଚାଷୀଙ୍କୁ ପରାମର୍ଶ ଦିଆଯାଇଛି । ଅକ୍ଟୋବର ଏବଂ ନଭେମ୍ବର ଓଡ଼ିଶା ପାଇଁ ବାତ୍ୟା ପ୍ରବଣ ମାସ ହୋଇଥିବାରୁ ସାମ୍ଭାବ୍ୟ ଲଘୁଚାପ ଉପରେ ସ୍ବତନ୍ତ୍ର ନଜର ରଖିଛି ଆଇଏମଡି ।
ଆଜି ଦେଶର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହାରଲାଲ ନେହରୁଙ୍କ ଜନ୍ମଦିନ ମାନେ ଶିଶୁ ଦିବସ । ।ଏହି ଅବସରରେ ଦେଶର ବିଭିନ୍ନ ଶିକ୍ଷାନୁଷ୍ଠାନରେ ପାଳନ ହେଉଛି ଶିଶୁ ଦିବସ । ଶିଶୁଙ୍କ ଅଧିକାର, ଶିକ୍ଷା ଓ ମଙ୍ଗଳ ପାଇଁ ଶିଶୁ ଦିବସ ପାଳନ କରାଯାଏ । ଶିଶୁମାନଙ୍କୁ ପଣ୍ଡିତ ଜବାହରଲାଲ ନେହରୁ ବହୁତ ଶ୍ରଦ୍ଧା କରୁଥିଲେ । ଏବଂ ଶିଶୁମାନଙ୍କ ସହ ନେହେରୁ ସମୟ ଅତିବାହିତ କରିବାକୁ ଭଲ ପାଉଥିଲେ । ସେ ପିଲାମାନଙ୍କୁ ଈଶ୍ବରଙ୍କ ରୂପ ମନେକରୁଥିଲେ ।
ସବୁବେଳେ ପିଲାମାନଙ୍କର ସଂସ୍କାର ଓ ଉତ୍ତମ ଶିକ୍ଷା ଉପରେ ଧ୍ୟାନ ରଖୁଥିଲେ ନେହେରୁ । ଦେଶର ଆଗାମୀ ପିଢ଼ି ଶିଶୁମାନେ ହୋଇଥିବାରୁ ସେମାନଙ୍କ ଶାରିରୀକ ଓ ମାନସିକ ବିକାଶ ନେଇ ସବୁବେଳେ ଧ୍ୟାନ ଦେଇଆସୁଥିଲେ । ୧୯୬୪ ମସିହା ମଇ ୨୭ରେ ନେହରୁଙ୍କ ପରଲୋକ ହୋଇଥିଲା । ସେହି ବର୍ଷଠାରୁ ତାଙ୍କର ଜନ୍ମଦିନକୁ ଶିଶୁଙ୍କ ପାଇଁ ଉତ୍ସର୍ଗ କରାଯାଇଥିଲା । ଯାହାକି ପ୍ରତ୍ୟେକ ବର୍ଷ ନଭେମ୍ବର ୧୪ ତାରିଖକୁ ଶିଶୁଦିବସ ରୂପେ ପାଳନ କରାଯାଏ। ଏବଂ ଜବାହାର ଲାଲ ନେହେରୁ ସମସ୍ତଙ୍କ ପ୍ରିୟ ଚାଚା ନେହେରୁ ନାମରେ ବେଶ୍ ପରିଚିତ ଥିଲେ ।
ସୁପ୍ରିମ କୋର୍ଟଙ୍କ ନିର୍ଦ୍ଦେଶକୁ ଫୁ
ଧୂଆଁ ଧୂଆଁ ଜାତୀୟ ରାଜଧାନୀ
ଦିଲ୍ଲୀ ଆକାଶ କୃତ୍ରିମ କୁହୁଡିରେ ପୂର୍ଣ୍ଣ
ଶ୍ବାସ କ୍ରିୟାରେ ଦେଖାଦେଲାଣି ସମସ୍ୟା
ଧୂଆଁରେ ଉଡିଲା ସର୍ବୋଚ୍ଚ କୋର୍ଟଙ୍କ ନିର୍ଦ୍ଦେଶ। କୋର୍ଟଙ୍କ ସବୁ କଟକଣାକୁ ଅବମାନନା କଲେ ରାଜଧାନୀ ଦିଲ୍ଲୀବାସୀ। ଦୀପାବଳି ମଧ୍ୟାହ୍ନରୁ ସାରା ଦିଲ୍ଲୀରେ ଫୁଟିଲା ବାଣ ଓ ବିଳମ୍ବିତ ରାତି ପର୍ଯ୍ୟନ୍ତ ଚାଲିଥିଲା ଏହି ଆତସବାଜି। ସ୍ଥିତି ଏମିତି ହୋଇଛି କି, ବର୍ଷା ଓ ଦିଲ୍ଲୀ ସରକାରଙ୍କ ଅଡ-ଇଭିନ ଅଭିଯାନ ପାଇଁ ଦିଲ୍ଲୀର ବାୟୁ ଗୁଣବତ୍ତାରେ ଆସିଥିବା ସୁଧାର ବିଗାଡିଯାଇଛି। ସୋମବାର ସକାଳ ଦିଲ୍ଲୀ ଆକାଶ ଥିଲା କୁହୁଡି ମୟ। ୧୦ ମିଟର ଆଗରେ କଣ ଅଛି ତାହା ମଧ୍ୟ ଦେଖିବା ଲୋକଙ୍କ ପାଇଁ ହୋଇଥିଲା ଅସମ୍ଭବ। ରାସ୍ତା ଉପରେ ବାଣର ଅଳିଆ ଭର୍ତ୍ତି ହୋଇଥିବା ବେଳେ ଆକାଶ କୁହୁଡିରେ ଭରିଯାଇଥିବା ଦେଖିବାକୁ ମିଳିଥିଲା। ଖାଲି ଭିଜିବିଲିଟି କମିନି, ନିଶ୍ବାସ ପ୍ରଶ୍ବାସରେ ସମସ୍ୟା ଦେଖାଦେଲାଣି ବାୟୁ ପ୍ରଦୂଷଣ ପାଇଁ। ୧୪- ୧୬ ଘଣ୍ଟାରେ ଏମିତି ବାଣ ଫୁଟିଲା କି, ଏୟାର କ୍ବାଲିଟି ଇଣ୍ଡେକ୍ସ ୯୯୯ରେ ପହଞ୍ଚି ଯାଇଛି ଦିଲ୍ଲୀର। ଯାହା ଗତକାଲି ଅପରାହ୍ନରେ ଅଢେଇଶହ ଥିଲା। ସୋମବାର ମଧ୍ୟାହ୍ନ ୧ଟାରେ ଦିଲ୍ଲୀର ସ୍ଥିତି ଆମେ ଦେଖେଇବାକୁ ଚାହୁଁଛୁ। ସୂର୍ଯ୍ୟ ମୁଣ୍ଡ ଉପରେ ସମ୍ପୂର୍ଣ୍ଣ ତେଜରେ। ହେଲେ ବାୟୁମଣ୍ଡଳରେ ଭରି ରହିଛି ଧୂଆଁ। ଆଜିର ଦିଲ୍ଲୀକୁ ଦେଖିବା ପରେ ସୁପ୍ରିମ କୋର୍ଟଙ୍କ ନିର୍ଦ୍ଦେଶକୁ ବାଣରେ ଫୁଟାଇ ଦିଲ୍ଲୀ ବାସୀ ଧୂଆଁରେ ଉଡେଇ ଦେଇଛନ୍ତି ଏହା ସ୍ପଷ୍ଟ ହୋଇଛି। ଗଳିକନ୍ଦି, ରାସ୍ତା ଘାଟରେ ପଡିଥିବା ବାଣର ଅବଶିଷ୍ଟାଂଶ ଦେଖିଲେ ମନକୁ ଆପଣା ଛାଏଁ ପ୍ରଶ୍ନ ଆସୁଛି, ଦିଲ୍ଲୀରେ ବାଣ ନ ଫୁଟାଇବାକୁ କୋର୍ଟ ଗତ ସାତ ତାରିଖରେ ଦେଇଥିବା ନିର୍ଦ୍ଦେଶ ପରେ ଏତେ ବାଣ ଆସିଲା କେଉଁଠୁ? ପୋଲିସ ପ୍ରଶାସନ ବାଣ ବିକ୍ରି ବେଳେ କରୁଥିଲା କଣ? ଏବେ ପୋଲିସ ଓ ପ୍ରଶାସନ ଉପରେ କୋର୍ଟ ନେବେ କି କୌଣସି ପଦକ୍ଷେପ? ତାକୁ ଦେଖିବାକୁ ବାକି ରହିଥିବା ବେଳେ ଆମ ରାଜ୍ୟରେ ମଧ୍ୟ ସ୍ଥିତି କମ ଥିଲା। ଗୋଟିଏ ଦିନ ପୂର୍ବରୁ ଗ୍ରୀନ କ୍ରାକର ବିକ୍ରିକୁ ପୋଲିସ ପ୍ରଶାସନ ଅନୁମତି ଦେଇଥିଲା। ହେଲେ ଶନିବାରଠାରୁ ବାଣ ଫୁଟାର ମାହୋଲ ସୃଷ୍ଟି ହୋଇଥିଲା ଭୁବନେଶ୍ବରରେ। ଆଉ ଗତରାତି ତମାମ ବାୟୁ ପ୍ରଦୂଷଣ ସାଙ୍ଗକୁ କାନ ଅତଡା ଫାଟୁଥିଲା ଉଚ୍ଚ ଶବ୍ଦ ସୃଷ୍ଟିକାରୀ ବାଣର ଆବାଜରେ, ଆଖିରୁ ହଜିଯାଇଥିଲା ନିଦ। କମିଶନରେଟ ପୋଲିସ କଣ କରୁଛି ବୋଲି ବୁଦ୍ଧିଜୀବୀ ସୋସିଆଲ ମିଡିଆରେ କରିଥିଲେ ପ୍ରଶ୍ନ।
ରବିବାର ଦିନ ଦିଲ୍ଲୀର ଅନେକ ଅଞ୍ଚଳରେ ଦୀପାବଳିରେ ବାଣ ଉପରେ ନିଷେଧାଦେଶକୁ ଉଲ୍ଲଂଘନ କରାଯାଇଛି। ଶାହପୁର ଜଟ ଏବଂ ହୌଜର ନିର୍ଦ୍ଧିଷ୍ଠ ଅଞ୍ଚଳରେ ଲୋକମାନେ ଖୁବ ମଜାରେ ବାଣ ଫୁଟାଇଥିଲେ । ଅନେକ ଲୋକ ସେହି ଅଞ୍ଚଳର ପାର୍କରେ ଏକାଠି ହୋଇ ବାଣ ଫୁଟାଇବା ଦେଖିବାକୁ ମିଳିଥିଲା | ଅପରାହ୍ନ ୪ ଟା ପରେ ଆତସବାଜି ଆହୁରି ବୃଦ୍ଧି ପାଇବାରେ ଲାଗିଥିଲା | ଯଦିଓ ଏହା ଗତ ବର୍ଷ ତୁଳନାରେ କମ୍ ଥିଲା | କିଛି ଲୋକଙ୍କୁ ଛାଡି ଦେଲାପରେ , ଅନେକ ଲୋକ ନିଜ ଘରୁ ଏବଂ ଆଖପାଖରେ ବାହାରକୁ ଆସୁଥିବା ଦେଖାଯାଇନଥିଲା | କହି ରଖୁ ଯେ ଦିଲ୍ଲୀର ଖରାପ ବାୟୁ ଅବସ୍ଥାକୁ ଦୃଷ୍ଟିରେ ରଖି ବାଣ ଫୁଟାଇବାକୁ ବାରଣ କରାଯାଇଥିଲା ।
ପରିବେଶବିତ୍ ଭବରିନ୍ କାନ୍ଧାରୀ କହିଛନ୍ତି ଯେ ତାଙ୍କ ଆବାସିକ ଡିଫେନ୍ସ କଲୋନୀରେ ବାଣ ଫୁଟାଇବା ବିଷୟରେ ସୂଚନା ମଧ୍ୟ ମିଳିଥିଲା। ସେ କହିଛନ୍ତି ଯେ ଡିଫେନ୍ସ କଲୋନୀ ପୋଲିସ ଷ୍ଟେସନରେ ମଧ୍ୟ ଅଭିଯୋଗ କରାଯାଇଥିଲା, କିନ୍ତୁ କୌଣସି ସୁଫଳ ମିଳିନଥିଲା। ସେ ଆହୁରି ମଧ୍ୟ କହିଛନ୍ତି ଯେ ସୁପ୍ରିମକୋର୍ଟଙ୍କ କଠୋର ଆଭିମୁଖ୍ୟ ଆତସବାଜି ଧୂଆଁରେ ଉଡି ଯାଇଛି । ଚେତାବନୀ ଏବଂ ସମ୍ପୂର୍ଣ୍ଣ ନିଷେଧାଦେଶ ସତ୍ୱେ କର୍ତ୍ତୃପକ୍ଷ ପୁଣି ଥରେ ବିଫଳ ହୋଇଛନ୍ତି। ପ୍ରଶ୍ନ ଉଠୁଛି ଯେ ସୁପ୍ରିମକୋର୍ଟ ବର୍ତ୍ତମାନ କେଉଁ ଆଭିମୁଖ୍ୟ ଗ୍ରହଣ କରିବେ?
ଉତ୍ତର ଭାରତରେ ଥଣ୍ଡା ଆରମ୍ଭ ହେବା ସହିତ ଲୋକମାନେ ସେମାନଙ୍କର ଉଷ୍ମ ପୋଷାକ ବାହାର କରିଛନ୍ତି। ଦେଶର ଅନେକ ରାଜ୍ୟରେ ସକାଳେ କୁହୁଡି ମଧ୍ୟ ଦେଖାଯିବା ଆରମ୍ଭ କରିଛି। ସେପଟେ ଦେଶର କେତେକ ରାଜ୍ୟରେ ପ୍ରବଳ ବର୍ଷା ହେବାର ସତର୍କ ସୂଚନା ଜାରି କରିଛି ପାଣିପାଗ ବିଭାଗ। ତେବେ ଭାରତୀୟ ପାଣିପାଗ ବିଭାଗ ଅନୁଯାୟୀ, ଆପଣଙ୍କ ରାଜ୍ୟରେ ପାଣିପାଗ ଅବସ୍ଥା କିପରି ରହିବ? ଆସନ୍ତୁ ଜାଣିବା |
ଦିଲ୍ଲୀ-ଏନସିଆରରେ ମଧ୍ୟ ଥଣ୍ଡା ଅନୁଭୂତ ହେଲାଣି ଏବଂ ଲୋକମାନେ ଗରମ ପୋଷାକ ପିନ୍ଧିବା ଆରମ୍ଭ କରିଲେଣି । ସୋମବାର ଏହି ଅଞ୍ଚଳରେ କୁହୁଡି ମଧ୍ୟ ଦେଖାଦେଇଛି। ଭାରତୀୟ ପାଣିପାଗ ବିଭାଗ ଅନୁଯାୟୀ ସୋମବାର ଏହି ଅଞ୍ଚଳର ସର୍ବନିମ୍ନ ତାପମାତ୍ରା ୧୩ ଡିଗ୍ରୀ ସେଲସିୟସ ଏବଂ ସର୍ବାଧିକ ତାପମାତ୍ରା ୨୮ ଡିଗ୍ରୀ ସେଲସିୟସ ହେବାର ସମ୍ଭାବନା ରହିଛି।
ପାଣିପାଗ ବିଭାଗ ଦ୍ୱାରା ପ୍ରକାଶିତ ସୂଚନା ଅନୁଯାୟୀ, ୧୩ ରୁ ୧୬ ନଭେମ୍ବର ମଧ୍ୟରେ ବିଭିନ୍ନ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ପ୍ରବଳ ବର୍ଷା ହେବାର ସତର୍କ ସୂଚନା ରହିଛି। ସୋମବାର ଏବଂ ମଙ୍ଗଳବାର ଦିନ ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜରେ ଆନ୍ଧ୍ରପ୍ରଦେଶ, ତାମିଲନାଡୁ ଏବଂ ପୁଡୁଚେରୀ ଏବଂ ବୁଧବାର ଓ ଗୁରୁବାର ଦିନ କେରଳରେ ପ୍ରବଳ ବର୍ଷା ହେବାର ସତର୍କ ସୂଚନା ଜାରି କରାଯାଇଛି।
ଦୀପାବଳିରେ ଲକ୍ଷ ଲକ୍ଷ ଜି-ମେଲ ୟୁଜର୍ସଙ୍କୁ ଗୁଗୁଲ ଦେଇଛି ବଡ଼ ଝଟକା । ବାସ୍ତବରେ, କମ୍ପାନୀ ଲକ୍ଷ ଲକ୍ଷ ନିଷ୍କ୍ରିୟ ଜି-ମେଲ୍ ଖାତା ବନ୍ଦ କରିବାକୁ ଯାଉଛି । ଏହି ପ୍ରକ୍ରିୟା ଡିସେମ୍ବର ୧ରୁ କାର୍ଯ୍ୟକାରୀ ହେବ, ଯେଉଁଥିରେ ଦୀର୍ଘ ଦିନ ଧରି ନିଷ୍କ୍ରିୟ ଥିବା ଜି-ମେଲ୍ ଖାତା ସବୁଦିନ ପାଇଁ ବନ୍ଦ ରହିବ । ଯଦି ଆପଣ ମଧ୍ୟ ଜଣେ ଜି ମେଲ ବ୍ୟବହାରକାରୀ ଏବଂ ଦୀର୍ଘ ସମୟ ଧରି ଆପଣଙ୍କର Gmail ଖାତା ଖୋଲି ନାହାନ୍ତି, ତେବେ ଏହି ଖବର ଆପଣଙ୍କ ପାଇଁ ଅତ୍ୟନ୍ତ ଉପଯୋଗୀ । କାରଣ ଯଦି ଆପଣଙ୍କର ଜିମେଲ ଖାତା ବନ୍ଦ ହୋଇଯାଏ, ତେବେ ଆପଣ ଲଗଇନ୍ କରି ଆପଣଙ୍କର ଆଣ୍ଡ୍ରଏଡ୍ ସ୍ମାର୍ଟଫୋନ୍ ବ୍ୟବହାର କରିବାରେ ସମର୍ଥ ହେବେ ନାହିଁ।
ଆପଣଙ୍କୁ ଜଣାଇ ଦେଉଛୁ ଯେ, ଗୁଗୁଲ୍ ଆକାଉଣ୍ଟ୍ ସାହାଯ୍ୟରେ Gmail ଏବଂ ଅନ୍ୟାନ୍ୟ ଅନେକ ଆକାଉଣ୍ଟର ରକ୍ଷଣାବେକ୍ଷଣ କରାଯାଏ । ଯଦି ଆପଣଙ୍କର ଜି-ମେଲ ଖାତା ଡିଲିଟ ହୋଇଯାଏ, ତେବେ ଆପଣଙ୍କୁ ଅନ୍ୟ ସେବା ଗୁଡିକ ମଧ୍ୟ ହରାଇବାକୁ ପଡିବ । କିନ୍ତୁ ଗୁଗୁଲ ଆପଣଙ୍କର ଖାତା ଡିଲିଟ କରିବା ପୂର୍ବରୁ ଇମେଲ ମାଧ୍ୟମରେ ଆବଶ୍ୟକ ସୂଚନା ଦେବ, ଯାହାଫଳରେ ଆପଣ ଚାହିଁଲେ ଆପଣଙ୍କ ଆକାଉଣ୍ଟକୁ ସେଭ୍ କରିପାରିବେ ।
ଯଦି ଆପଣ ଗତ ୨ ବର୍ଷ ଧରି ଆପଣଙ୍କ ଗୁଗୁଲ୍ ଆକାଉଣ୍ଟ୍ ବ୍ୟବହାର କରିନାହାନ୍ତି, ତେବେ ଆପଣ ଏହାକୁ ପୁନର୍ବାର ଆକ୍ଟିଭି କରିପାରିବେ । ଏଥିପାଇଁ ଆପଣଙ୍କୁ କମ୍ପାନୀର ବିଭିନ୍ନ ସେବା ବ୍ୟବହାର କରିବାକୁ ପଡିବ । ଯେପରି…
ଇମେଲ ପଢିବା କିମ୍ବା ପଠାଇବା…
ଗୁଗୁଲ୍ ଡ୍ରାଇଭ୍ ବ୍ୟବହାର କରିବା…
ୟୁଟ୍ୟୁବ୍ ଭିଡିଓ ଦେଖିବା କିମ୍ବା ଫଟୋ ସେୟାର କରିବା…
ପ୍ଲେ-ଷ୍ଟୋରରୁ ଆପ୍ ଡାଉନଲୋଡ୍ କରିବା କିମ୍ବା ଗୁଗୁଲ୍ ସର୍ଚ୍ଚ ବ୍ୟବହାର କରି କିଛି ଖୋଜାଖୋଜି କରିବା…
କୌଣସି ଥାର୍ଡପାର୍ଟି ଆପ୍ କିମ୍ବା ୱେବସାଇଟରେ ଲଗଇନ କରିବା ପାଇଁ ଗୁଗୁଲ୍ ଆକାଉଣ୍ଟ୍ ବ୍ୟବହାର କରିବା ଇତ୍ୟାଦି । ଏମିତି କଲେ ଆପଣଙ୍କର ଜିମେଲ ଆକାଉଣ୍ଟ ଡିଲିଟ ହେବ ନାହିଁ ।
ଯଦି ଆପଣ ନିଜ ଗୁଗୁଲ୍ ଆକାଉଣ୍ଟରୁ କମ୍ପାନୀର କୌଣସି ଜିନିଷ କିମ୍ବା ସେବା ନେଇଛନ୍ତି ତେବେ ଆପଣଙ୍କ ଖାତା ଡିଲିଟ୍ ହେବ ନାହିଁ । ସେହିଭଳି ଯେଉଁ ଆକାଉଣ୍ଟରୁ ୟୁଟ୍ୟୁବ୍ ଭିଡିଓ ପୋଷ୍ଟ କରାଯାଇଛି ତାହା ମଧ୍ୟ ସୁରକ୍ଷିତ ରହିବ । ଯେଉଁ ଆକାଉଣ୍ଟରେ ମନିଟାରୀ ଗିଫ୍ଟ କାର୍ଡ ରଖାଯାଇଛି ତାହା ମଧ୍ୟ ଡିଲିଟ୍ ହେବନାହିଁ । ଯଦି ଆପଣଙ୍କ ଆକାଉଣ୍ଟ ଆପଣଙ୍କ ପିଲାଙ୍କ ଆକାଉଣ୍ଟ ସହିତ ଲିଙ୍କ୍ ରହିଛି ତେବେ ମଧ୍ୟ ଏହା ସୁରକ୍ଷିତ ରହିବ । ଯେଉଁମାନେ ଆପ୍ ପବ୍ଲିସିଙ୍ଗ ପାଇଁ ଗୁଗୁଲ୍ ଆକାଉଣ୍ଟ୍ ବ୍ୟବହାର କରିଛନ୍ତି ସେହି ଆକାଉଣ୍ଟ ଗୁଡିକ ମଧ୍ୟ ସୁରକ୍ଷିତ ରହିବ ।