Tag: #Suchana tv odia

ଫେବୃଆରି ୭–୮: ପ୍ରଧାନମନ୍ତ୍ରୀ ମୋଦୀଙ୍କ ମାଲେସିଆ ଯାତ୍ରା, ଭାରତ–ମାଲେସିଆ ସମ୍ପର୍କ ବୃଦ୍ଧି ପାଇଁ ଦ୍ୱିପକ୍ଷିକ ଆଲୋଚନା

ମାଲେସିଆର ପ୍ରଧାନମନ୍ତ୍ରୀ ଅନୱର ଇବ୍ରାହିମଙ୍କ ନିମନ୍ତ୍ରଣରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୭–୮ ଫେବୃଆରି ତାରିଖରେ ମାଲେସିଆ ଗସ୍ତ କରିବେ। ଏହା ମୋଦୀଙ୍କ ତୃତୀୟ ମାଲେସିଆ ଯାତ୍ରା ହେବ। ମୋଦୀଙ୍କ ପ୍ରଥମ ମାଲେସିଆ ଗସ୍ତ ଅଗଷ୍ଟ ୨୦୨୪ରେ ହୋଇଥିଲା, ଯେଉଁଥିରେ ଭାରତ–ମାଲେସିଆ ଦ୍ୱିପକ୍ଷିକ ସମ୍ପର୍କକୁ ଏକ ବ୍ୟାପକ ରଣନୈତିକ ସହଭାଗିତା ଦ୍ୱାରା ଉନ୍ନତି ମିଳିଥିଲା।

ଗସ୍ତ ସମୟରେ, ପ୍ରଧାନମନ୍ତ୍ରୀ ମୋଦୀ ଓ ପ୍ରଧାନମନ୍ତ୍ରୀ ଅନୱର ଇବ୍ରାହିମ ଭାରତ–ମାଲେସିଆ ସମ୍ପର୍କର ବିଭିନ୍ନ କ୍ଷେତ୍ରରେ ଦ୍ୱିପକ୍ଷିକ ଆଲୋଚନା କରିବେ।ମୋଦୀ ଏହି ଗସ୍ତବେଳେ ମାଲେସିଆରେ ରହୁଥିବା ଭାରତୀୟ ସମୁଦାୟ ଲୋକ, ଶିଳ୍ପ ଓ ବ୍ୟବସାୟ ଜଗତର ପ୍ରତିନିଧିଙ୍କୁ ଭେଟିବାର କାର୍ଯ୍ୟକ୍ରମ ରହିଛି । ଏହି ଗସ୍ତ ସହିତ ଦଶମ ଭାରତ-ମାଲେସିଆ ସିଇଓ ଫୋରମ୍ ବୈଠକ ଅନୁଷ୍ଠିତ ହେବାକୁ ଯାଉଛି । ଭାରତ ଓ ମାଲେସିଆ ମଧ୍ୟ‌ରେ ଐତିହାସିକ, ସାଂସ୍କୃତି ତଥା ସଭ୍ୟତାଗତ ସମ୍ପର୍କ ରହିଛି ।

ଏହାସହିତ ମାଲେସିଆରେ ୨.୯ ନିୟୁତ ଭାରତୀୟଙ୍କ ଉପସ୍ଥିତି ଏହି ସମ୍ପର୍କକୁ ଅଧିକ ମଜଭୁତ କରିଥାଏ। ବିଦେଶରେ ରହୁଥିବା ଭାରତୀୟ ସମୁଦାୟଙ୍କ ମଧ୍ୟରେ ଏହା ତୃତୀୟ ସର୍ବାଧିକ। ଅଧିକାରୀମାନେ କହିଛନ୍ତି ଯେ ଏହି ଗସ୍ତ ଉଭୟ ନେତାଙ୍କୁ ବାଣିଜ୍ୟ ଏବଂ ନିବେଶ, ପ୍ରତିରକ୍ଷା ଏବଂ ସୁରକ୍ଷା, ସାମୁଦ୍ରିକ ସହଯୋଗ, ଡିଜିଟାଲ୍ ଏବଂ ଆର୍ଥିକ ପ୍ରଯୁକ୍ତିବିଦ୍ୟା, ଶକ୍ତି, ସ୍ୱାସ୍ଥ୍ୟସେବା, ଶିକ୍ଷା, ସାଂସ୍କୃତିକ ତଥା ପର୍ଯ୍ୟଟନ କ୍ଷେତ୍ରଗୁଡ଼ିକରେ ସହଯୋଗ ସମୀକ୍ଷା କରିବାର ସୁଯୋଗ ପ୍ରଦାନ କରିବ । ଆଲୋଚନାରେ ବ୍ୟକ୍ତି ବ୍ୟକ୍ତି ସମ୍ପର୍କକୁ ମଜବୁତ କରିବା ଏବଂ ପାରସ୍ପରିକ ଲାଭ ପାଇଁ ଭବିଷ୍ୟତର ସମ୍ପର୍କ ପାଇଁ ଏକ ମାର୍ଗ ପ୍ରସ୍ତୁତ କରିବା ଉପରେ ମଧ୍ୟ ଧ୍ୟାନ ଦିଆଯିବ ବୋଲି ଆଶା କରାଯାଉଛି ।
ଟ୍ରମ୍ପଙ୍କ ଦାବି ପରେ ରୁଷ୍‌ର ସ୍ପଷ୍ଟ କଥା: ଭାରତ ଚାହିଲେ ଯେକୌଣସି ଦେଶରୁ ତୈଳ କିଣିପାରିବ

ଆମେରିକା ସହିତ ଭାରତର ବାଣିଜ୍ୟ ଚୁକ୍ତି ସମ୍ପନ୍ନ ହେବା ପରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଦାବି କରିଥିଲେ ଯେ ଭାରତ ଆଗାମୀ ଦିନରେ ରୁଷ୍‌ଠାରୁ ତୈଳ କ୍ରୟ କରିବ ନାହିଁ। ଏହି ବୟାନ ପରେ ରୁଷ୍‌ ପକ୍ଷରୁ ସ୍ପଷ୍ଟ କରାଯାଇଛି ଯେ, ଭାରତ ନିଜ ଆବଶ୍ୟକତା ଅନୁଯାୟୀ ଯେକୌଣସି ଦେଶରୁ ତୈଳ କିଣିବାକୁ ସମ୍ପୂର୍ଣ୍ଣ ସ୍ୱାଧୀନ।

କ୍ରେମଲିନ୍‌ର କହିବା ଅନୁସାରେ, ଭାରତ ଅନ୍ୟ ଦେଶମାନଙ୍କଠାରୁ ତୈଳ ଆଣିବାର ପ୍ରୟାସ କେବେବି ନୂଆ କଥା ନୁହେଁ ଓ ଏହାକୁ ମସ୍କୋ ବିରୋଧୀ ପଦକ୍ଷେପ ଭାବେ ମଧ୍ୟ ଦେଖାଯାଉନାହିଁ। ଟ୍ରମ୍ପଙ୍କ ମତାନୁସାରେ, ଭାରତ–ଆମେରିକା ବାଣିଜ୍ୟ ଚୁକ୍ତି ଅନୁଯାୟୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୁଷ୍‌ରୁ ତୈଳ କ୍ରୟ ବନ୍ଦ କରିବାକୁ ଓ ଆମେରିକା ସହିତ ସମ୍ଭବତଃ ଭେନେଜୁଏଲାରୁ ଅଶୋଧିତ ତୈଳ କିଣିବାକୁ ସମ୍ମତି ଦେଇଛନ୍ତି।

ଟ୍ରମ୍ପଙ୍କ ଏହି ଦାବି ପରେ କ୍ରେମଲିନ୍‌ ପ୍ରବକ୍ତା ଡିମିତ୍ରି ପେସ୍‌କୋଭ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ରୁଷ୍‌ କେବେବି ଭାରତ ପାଇଁ ତୈଳ ଓ ପେଟ୍ରୋଲିୟମ ଉତ୍ପାଦର ଏକମାତ୍ର ଯୋଗାଣକାରୀ ରହିନଥିଲା। ଆନ୍ତର୍ଜାତିକ ଶକ୍ତି ବିଶେଷଜ୍ଞମାନେ ମଧ୍ୟ ଏହି କଥା ଭଲଭାବେ ଜାଣନ୍ତି ଯେ ଭାରତ ପୂର୍ବରୁ ମଧ୍ୟ ଅନେକ ଉତ୍ସରୁ ତୈଳ ଓ ପେଟ୍ରୋଲିୟମ ସାମଗ୍ରୀ କ୍ରୟ କରୁଥିଲା।

ପେସ୍‌କୋଭ ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ରୁଷ୍‌ଠାରୁ ତୈଳ କ୍ରୟ ବନ୍ଦ କରିବା ସମ୍ପର୍କରେ ମସ୍କୋ ଭାରତ ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ସୂଚନା ପାଇନାହିଁ। ପୂର୍ବ ଦିନ ମଧ୍ୟ ସେ ଏହି ମତ ପୁନରାବୃତ୍ତି କରିଥିଲେ ଓ କହିଥିଲେ ଯେ ଏନେଇ ନୂଆଦିଲ୍ଲୀ ପକ୍ଷରୁ କୌଣସି ସ୍ପଷ୍ଟ ସଙ୍କେତ ମିଳିନାହିଁ।ଅନ୍ୟପକ୍ଷରେ ରୁଷ୍‌ର ବିଦେଶ ମନ୍ତ୍ରାଳୟର ପ୍ରବକ୍ତା ମାରିଆ ଜଖାରୋଭା ମଧ୍ୟ ଦୁଇ ଦେଶ ମଧ୍ୟରେ ଶକ୍ତି ସହଯୋଗର ସମର୍ଥନ କରିଥିଲେ। ଜଖାରୋଭା କହିଥିଲେ, ହାଇଡ୍ରୋକାର୍ବନ ବ୍ୟାପାର ଭାରତ ଓ ରୁଷ୍‌ ଉଭୟଙ୍କ ପାଇଁ ଲାଭଦାୟକ। ଏକ ସାମ୍ବାଦିକ ସମ୍ମିଳନୀରେ ଜଖାରୋଭା କହିଥିଲେ କି ଭାରତ ଦ୍ବାରା ରୁଷ୍‌ ହାଇଡ୍ରୋକାର୍ବନ କିଣିବା ଦୁଇ ପକ୍ଷ ପାଇଁ ଲାଭଦାୟକ ହେବ ।

ଏହା ବିଶ୍ବ ଶକ୍ତି ବଜାରରେ ସ୍ଥିରତା ବଜାୟ ରଖିବାରେ ସାହାଯ୍ୟ କରିବ। ଆମେ ଆମର ଭାରତୀୟ ଅଂଶୀଦାରମାନଙ୍କ ସହିତ ଘନିଷ୍ଠ ସହଯୋଗ ଜାରି ରଖିବାକୁ ପ୍ରସ୍ତୁତ। ରୁଷ୍‌ର ଶକ୍ତି ବିଶ୍ଳେଷକମାନେ କହିଛନ୍ତି ଯେ, ଭାରତୀୟ ବିଶୋଧନାଗାରଗୁଡ଼ିକ ପାଇଁ ରୁଷ୍‌ର ଅଶୋଧିତ ତୈଳର ବ୍ୟବହାର ସମ୍ପୂର୍ଣ୍ଣ ବନ୍ଦ କରିବା ସହଜ ହେବନାହିଁ। ରୁଷ୍‌ର ଜାତୀୟ ଶକ୍ତି ସୁରକ୍ଷା ପାଣ୍ଠିର ଇଗୋର ୟୁଶକୋଭ କହିଛନ୍ତି ଯେ ଆମେରିକା ମୁଖ୍ୟତଃ ହାଲୁକା ଗ୍ରେଡ୍‌ର ତୈଳ ରପ୍ତାନୀ କରିଥାଏ । ଅନ୍ୟପକ୍ଷରେ ରୁଷ ଭାରତୀୟ ରିଫାଇନାରୀଗୁଡ଼ିକ ଦ୍ୱାରା ବ୍ୟବହୃତ ଭାରୀ, ସଲଫର-ସମ୍ପୃକ୍ତ ୟୁରାଲ୍ସ ଅଶୋଧିତ ତୈଳ ଯୋଗାଣ କରେ। ଭାରତକୁ ଅନ୍ୟ ଗ୍ରେଡ୍ ସହିତ ଆମେରିକୀୟ ତୈଳ ମିଶ୍ରଣ କରିବାକୁ ପଡିବ, ଯାହା ଖର୍ଚ୍ଚ ବୃଦ୍ଧି କରିବ । ଏକ ସହଜରେ ବଦଳା ଯିବା ସମ୍ଭବ ନୁହେଁ ବୋଲି ସେ କହିଛନ୍ତି । ୟୁଶକୋଭ ଆହୁରି କହିଛନ୍ତି ଯେ, ରୁଷ ପ୍ରତିଦିନ ଭାରତକୁ ୧.୫ ରୁ ୨ ନିୟୁତ ବ୍ୟାରେଲ ତୈଳ ପଠାଏ, ଆମେରିକା ସହଜରେ ଏତେ ପରିମାଣର ତୈଳ ପଠାଇ ପାରିବ ନାହିଁ । ଟ୍ରମ୍ପ ଏପରି କହି ଆମେରିକା ଏହାଦ୍ବାରା ଭାରତ ଓ ରୁଷ୍‌ଠାରୁ ସର୍ତ୍ତ ଜିତି ଯାଇଥିବା ଦର୍ଶାଇବାକୁ ଚାହୁଛନ୍ତି ବୋଲି ସେ କହିଛନ୍ତି ।
ଓଡ଼ିଆ ଯୁବ ନାବିକ ନିଖୋଜ, ପରିବାରରେ ଚିନ୍ତା: ସରକାରଙ୍କୁ ନିବେଦନ

ଭଦ୍ରକ ଜିଲ୍ଲା କେଶପୁର ଅଞ୍ଚଳର ଯୁବ ନାବିକ ସାର୍ଥକ ମହାପାତ୍ର ନିଖୋଜ ହୋଇଯାଇଥିବା ନେଇ ପରିବାର ଓ ଅଞ୍ଚଳବାସୀଙ୍କ ମଧ୍ୟରେ ଚିନ୍ତା ଦେଖାଦେଇଛି | ସାର୍ଥକ ମୁମ୍ବାଇରେ ଏକ ଜାହାଜ କମ୍ପାନୀରେ କାମ କରୁଥିଲେ |

ପରିବାରରୁ ମିଳିଥିବା ଖବର ଅନୁଯାୟୀ, ସାର୍ଥକ ପ୍ରଥମେ ଚୀନରୁ ମରିସସ୍ ଯାଇଥିଲେ | ତାହା ପରେ ମରିସସ୍ ରୁ ଚୀନ ଫେରୁଥିବା ବେଳେ ଗତ ୨ ତାରିଖରୁ ତାଙ୍କର କୋଣସି ଖବର ମିଳି ନାହିଁ | ଶେଷଥର ୨ ତାରିଖରେ ସାର୍ଥକ ତାଙ୍କ ମାଆଙ୍କ ସହ ଫୋନରେ କଥା ହୋଇଥିଲେ | ସେହି ଦିନ ପରଠାରୁ ତାଙ୍କ ମୋବାଇଲ ନମ୍ବର ସୁଇଚ୍ ଅଫ୍ ଆସୁଛି | ୩ ତାରିଖ ପରେ ଜାହାଜ କମ୍ପାନୀ ପକ୍ଷରୁ ସାର୍ଥକ ନିଖୋଜ ଥିବା ଖବର ପରିବାରକୁ ଦିଆଯାଇଥିଲା |

ପୁଅର ଏଭଳି ହଟାତ୍ ନିଖୋଜ ଘଟଣାରେ ସାର୍ଥକଙ୍କ ମାଆ ଦୁଃଖରେ ଭାଙ୍ଗି ପଡିଛନ୍ତି | ଲୁହଭରା ଆଖିରେ ସେ କେନ୍ଦ୍ର ଓ ରାଜ୍ୟ ସରକାରଙ୍କୁ ନିଜ ପୁଅକୁ ଶୀଘ୍ର ଖୋଜି ଆଣିବା ପାଇଁ ଅନୁରୋଧ କରିଛନ୍ତି | ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ମଧ୍ୟ ଚିନ୍ତା ଓ ଉତ୍କଣ୍ଠା ଦେଖାଦେଇଛି | ପରିବାର ପକ୍ଷରୁ ସମ୍ପୃକ୍ତ ଜାହାଜ କମ୍ପାନୀ ସହ ଯୋଗାଯୋଗ କରାଯାଉଥିବା ବେଳେ, ଭାରତୀୟ ଦୂତାବାସ ଓ ସମ୍ପୃକ୍ତ କର୍ତ୍ତୃପକ୍ଷ ଘଟଣାର ତଦନ୍ତ କରି ଯୁବ ନାବିକଙ୍କ ସନ୍ଧାନ ପାଇଁ ତୁରନ୍ତ ପଦକ୍ଷେପ ନେବାକୁ ଦାବି କରାଯାଉଛି |
୪ ମାସର ଭତ୍ତା ଅଟକିଲା; ବୃଦ୍ଧ ଦିବ୍ୟାଙ୍ଗଙ୍କ ଜୀବନଦାନରେ ଘାତ!

୪ ମାସର ଭତ୍ତା ପାଇନାହାନ୍ତି ହିତାଧିକାରୀ। ବୃଦ୍ଧ ଦିବ୍ୟାଙ୍ଗଙ୍କ ହୃଦୟ ବିଦାରକ ଦୃଶ୍ୟ। ବାଲୁଗାଁ ଗ୍ରାମପଞ୍ଚାୟତରୁ ଆସିଥିବା ଶତାଧିକ ବୃଦ୍ଧ, ବୃଦ୍ଧା ଏବଂ ଦିବ୍ୟାଙ୍ଗ ହିତାଧିକାରୀ ଏଭଳି ଅଭିଯୋଗ ଆଣିଛନ୍ତି। ଭତ୍ତା ଟଙ୍କା ପାଇବାର ଆଶାରେ ଚାରି ମାସ ଧରି ଅପେକ୍ଷା କରୁଥିଲେ। ସରକାରୀ ଭତ୍ତା ସେମାନଙ୍କ ପାଇଁ ସାଧାରଣ ଟଙ୍କା ନୁହେଁ, ଦିନକୁ ଦୁଇବେଳି ଭୋଜନ ଓ ଔଷଧ ପାଉଥିବା ଜୀବନଦାନ। ଭତ୍ତା ଟଙ୍କା ନପାଇଥିବାରୁ ଜିଲ୍ଲାପାଳ ଅଫିସ ଆଗରେ ଧାରଣା ଦେଇଥିଲେ ।

ସେମାନଙ୍କ ଅଭିଯୋଗ, ବ୍ୟାଙ୍କ ମାଧ୍ୟମରେ ସରକାରଙ୍କ ତରଫରୁ ପ୍ରଦାନ କରାଯାଉଥିବା ଭତ୍ତା ଟଙ୍କା ଏବେ ଚାରି ମାସ ହେଲା ଖାତାକୁ ଆସିନାହିଁ। ବାରମ୍ବାର ବ୍ଲକ କାର୍ଯ୍ୟାଳୟରେ ଅଭିଯୋଗ ଜଣାଇଲେ ମଧ୍ୟ ଆଗାମୀ ମାସରେ ଆସିବ କହି ଫେରାଇ ଦେଉଛନ୍ତି ଅଧିକାରୀ। ଭତ୍ତା ଟଙ୍କା ତୁରନ୍ତ ପ୍ରଦାନ କରିବାକୁ ଦାବି କରିବା ସହ ଧାରଣାର ବସିଛନ୍ତି। ନୟାଗଡ ଜିଲ୍ଲପାଳ ମଧୁମିତା ରଥ ବୁଝାସୁଝା କରିବା ସହ ୧୦ ଦିନ ମଧ୍ୟରେ ସମସ୍ତଙ୍କ ବ୍ୟାଙ୍କ ଖାତାକୁ ଟଙ୍କା ଯିବ ବୋଲି ପ୍ରତିଶୃତି ଦେବାପରେ ଧାରଣାରୁ ହଟିଥିଲେ ହିତାଧିକାରୀ।
ବଦଳିବ ବିକୃତ ଇଂରାଜୀ ସ୍ଥାନନାମ: ଓଡ଼ିଆ ଉଚ୍ଚାରଣକୁ ସରକାରୀ ସ୍ୱୀକୃତି

ରାଜ୍ୟର ଅନେକ ସ୍ଥାନରେ ଦୀର୍ଘଦିନ ଧରି ଚାଲିଆସୁଥିବା ବିକୃତ ଇଂରାଜୀ ନାମ ବଦଳିବ। ଓଡ଼ିଆ ଭାଷା ଓ ସାଂସ୍କୃତିକ ଐତିହ୍ୟକୁ ସରକାରୀ ରେକର୍ଡରେ ସଠିକ ଭାବେ ପ୍ରତିବିମ୍ବିତ କରିବା ଲକ୍ଷ୍ୟରେ ଓଡ଼ିଶା ସରକାର ଏହି ପଦକ୍ଷେପ ନେଇଛନ୍ତି। ବିଭିନ୍ନ ସ୍ଥାନର ଇଂରାଜୀ ନାମରେ ଥିବା ତ୍ରୁଟି ସୁଧାରିବା ପାଇଁ ରାଜସ୍ୱ ବିଭାଗ ପକ୍ଷରୁ ଏକ ସରକାରୀ ବିଜ୍ଞପ୍ତି ଜାରି କରାଯାଇଛି।

ବର୍ତ୍ତମାନ ରାଜ୍ୟର ଅନେକ ଜିଲ୍ଲା, ଉପଖଣ୍ଡ, ତହସିଲ ଓ ବ୍ଲକର ନାମ ଇଂରାଜୀରେ ଭୁଲ ଭାବେ ଲେଖାଯାଇ ଭ୍ରାନ୍ତ ଉଚ୍ଚାରଣରେ ବ୍ୟବହୃତ ହେଉଛି। ଏହାକୁ ସଠିକ ଓଡ଼ିଆ ଉଚ୍ଚାରଣ ଅନୁଯାୟୀ ସଂଶୋଧନ କରାଯିବ। ଏହି ପ୍ରକ୍ରିୟାରେ ମାଲକାନଗିରି, ଦେବଗଡ଼, କନ୍ଧମାଳ, ଖୋର୍ଦ୍ଧା, ଅନୁଗୁଳ, କଟକ, କେନ୍ଦ୍ରାପଡ଼ା, କେନ୍ଦୁଝର, ସମ୍ବଲପୁର ଓ ନୟାଗଡ଼ ସହିତ ଅନ୍ୟାନ୍ୟ ଜିଲ୍ଲାର ନାମ ସଠିକ କରାଯିବ।ପ୍ରସ୍ତାବିତ ସଂଶୋଧନ ସମ୍ପର୍କରେ ସାଧାରଣ ଲୋକଙ୍କର କୌଣସି ଆପତ୍ତି କିମ୍ବା ପରାମର୍ଶ ଥିଲେ ୧୫ ଦିନ ମଧ୍ୟରେ ଲେଖିତ ଭାବେ ଦାଖଲ କରିବାକୁ ବିଭାଗ ପକ୍ଷରୁ ଆହ୍ୱାନ କରାଯାଇଛି । ନିର୍ଦ୍ଧାରିତ ସମୟ ପରେ ପ୍ରାପ୍ତ ମତାମତ ଗ୍ରହଣ କରାଯିବ ନାହିଁ । ଯଦି ନିର୍ଦ୍ଧାରିତ ସମୟସୀମାରେ କୌଣସି ଆପତ୍ତି ମିଳିନାହିଁ, ତେବେ ସରକାର ଆଇନାନୁସାରେ ପରବର୍ତ୍ତୀ ପ୍ରକ୍ରିୟା ଆରମ୍ଭ କରିବେ । ଏହି ପଦକ୍ଷେପ ଫଳରେ ସରକାରୀ ରେକର୍ଡରେ ସ୍ଥାନନାମଗୁଡ଼ିକର ସଠିକ ଓଡ଼ିଆ ରୂପ ସୁନିଶ୍ଚିତ ହେବା ସହ ରାଜ୍ୟର ଐତିହ୍ୟ ଓ ଭାଷାଗତ ପରିଚୟ ଅଧିକ ସୁଦୃଢ଼ ହେବ ବୋଲି ବିଭାଗ ପକ୍ଷରୁ କୁହାଯାଇଛି ।
ରଣବୀର କପୁର ହେବେ ଖଳନାୟକ , ୨୦୨୭ରେ ଆରମ୍ଭ ହେବ ‘ଆନିମଲ୍ ପାର୍କ’ ସୁଟିଂ

ମୁମ୍ବାଇ: ରଣବୀର କପୁରଙ୍କ ସୁପରହିଟ୍ ଫିଲ୍ମ ‘ଆନିମଲ୍’ ପରେ ଏବେ ତାହାର ସିକ୍ୱେଲ୍ ‘ଆନିମଲ୍ ପାର୍କ’କୁ ନେଇ ଦର୍ଶକମାନଙ୍କ ମଧ୍ୟରେ ବେଶ୍ ଉତ୍ସାହ ଦେଖାଦେଇଛି। ଫିଲ୍ମ ନିର୍ମାତା ସନ୍ଦୀପ ରେଡ୍ଡୀ ଭାଙ୍ଗା ଏକ ଜୁମ୍ କଲ୍ ମାଧ୍ୟମରେ ସ୍ପଷ୍ଟ କରିଛନ୍ତି ଯେ ‘ଆନିମଲ୍ ପାର୍କ’ ଫିଲ୍ମର ସୁଟିଂ ୨୦୨୭ ମସିହାରେ ଆରମ୍ଭ ହେବକୁ ଯାଉଛି |

ସନ୍ଦୀପ ରେଡ୍ଡୀ ଭାଙ୍ଗା କହିଛନ୍ତି ଯେ ‘ସ୍ପିରିଟ୍’ ଫିଲ୍ମର ସୁଟିଂ ସମାପ୍ତ ହେବା ପରେ ସିଧାସଳଖ ‘ଆନିମଲ୍ ପାର୍କ’ର କାମ ଆରମ୍ଭ କରାଯିବ | ଏହି ଫିଲ୍ମରେ ରଣବୀର କପୁର ରଣବିଜୟ ସିଂହ ଚରିତ୍ରରେ ନଜର ଆସିବେ ଏବଂ ଏଥିପାଇଁ ସେ ଖଳନାୟକ ଭୂମିକାରେ ଦେଖାଯିବେ ବୋଲି ସନ୍ଦୀପ ସ୍ପଷ୍ଟ କରିଛନ୍ତି |

ଏହା ମଧ୍ୟରେ ‘ଆନିମଲ୍’ ଫିଲ୍ମ ଆନ୍ତର୍ଜାତୀୟ ସ୍ତରରେ ମୁକ୍ତି ପାଇବାକୁ ପ୍ରସ୍ତୁତ କରାଯାଉଛି | ତାହା ସହ ଜାପାନରେ ମଧ୍ୟ ମୁକ୍ତି ଲାଭ ପାଇବ ବୋଲି ଜଣାପଡିଛି | ଏହାକୁ ନେଇ ବିଶ୍ୱବ୍ୟାପୀ ସିନେମାପ୍ରେମୀମାନଙ୍କ ମଧ୍ୟରେ ଭାରି ଉତ୍ସାହ ଦେଖିବାକୁ ମିଳୁଛି |

ରଣବୀର କପୁର ନିଜେ ମଧ୍ୟ ‘ଆନିମଲ୍ ପାର୍କ’କୁ ନେଇ ସେ ବହୁତ ଖୁସି ବୋଲି କହିଛନ୍ତି | ଖଳନାୟକ ଭୂମିକାରେ ଅଭିନୟ କରିବା ତାଙ୍କ ପାଇଁ ବେଶ୍ ପ୍ରେରଣାଦାୟକ | ସେ କହିଛନ୍ତି, ଏହି ଚରିତ୍ରରେ ପୁଣି ସେଟକୁ ଫେରିବା ପାଇଁ ମୁଁ ଅପେକ୍ଷା କରିପାରୁ ନାହିଁ | ଏହି ଫିଲ୍ମରେ ରଶ୍ମିକା ମାଣ୍ଡାନ୍ନା, ଅନିଲ କପୁର, ବବି ଦେଓଲ ଓ ତୃପ୍ତି ଡିମରି ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ | ସନ୍ଦୀପ ରେଡ୍ଡୀ ଭାଙ୍ଗା ଏହା ମଧ୍ୟ ସୂଚନା ଦେଇଛନ୍ତି ଯେ ‘ଆନିମଲ୍ ପାର୍କ’ରେ ଆହୁରି ଅନେକ ନୂଆ ଏବଂ ଆକର୍ଷଣୀୟ ଚରିତ୍ର ଦେଖିବାକୁ ମିଳିପାରେ |

ଅନ୍ୟପଟେ, ରଣବୀର କପୁରଙ୍କ ଆଗାମୀ ଫିଲ୍ମଗୁଡ଼ିକ ମଧ୍ୟରେ ‘ରାମାୟଣ’ ଓ ‘ଲଭ୍ ଆଣ୍ଡ୍ ୱାର୍’ ରହିଛି | ଗଲତି ସେ ମିଷ୍ଟେକ୍ ଓ ଚନ୍ନା ମେରେୟା ପରି ଗୀତରେ ତାଙ୍କ ଅଭିନୟ ଓ ଡ୍ୟାନ୍ସ ଯେପରି ଦର୍ଶକଙ୍କୁ ଆକର୍ଷିତ କରିଥିଲା, ସେହିପରି ‘ଆନିମଲ୍ ପାର୍କ’ରେ ତାଙ୍କ ନୂଆ ଲୁକ୍ ଓ ବୋଲ୍ଡ ଅନ୍ଦାଜକୁ ନେଇ ପ୍ରଶଂସକମାନେ ଏବେଠୁ ଅନେଇ ବସିଛନ୍ତି |
ବଣ୍ଡାଘାଟି ଆବାସ ଦୁର୍ନୀତି ମାମଲାରେ କଠୋର ପଦକ୍ଷେପ ନେବାକୁ ଘୋଷଣା

ବଣ୍ଡାଘାଟିରେ ଆବାସ ଦୁର୍ନୀତି ପ୍ରସଙ୍ଗକୁ ନେଇ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ନିଜ ପକ୍ଷରେ ବିତଣ୍ଡା ଯୁକ୍ତି ରଖିଛନ୍ତି। ଆବାସ ଯୋଜନାରେ ଅନିୟମ ହୋଇଥିବା ଅଭିଯୋଗ ସମ୍ପୃକ୍ତ ଅଧିକାରୀଙ୍କ ଦ୍ୱାରା କରାଯାଇଛି। ଏହି ଘଟଣାରେ ସଂପୃକ୍ତ ଠିକାଦାରଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି ମନ୍ତ୍ରୀ ଘୋଷଣା କରିଛନ୍ତି।

ସେହିପରି ଆବାସ ଘର ପାଇଁ ମିଳୁଥିବା ଅର୍ଥ ହଡପ ଘଟଣାର ସମ୍ପୂର୍ଣ୍ଣ ତଦନ୍ତ କରାଯିବ ବୋଲି ମଧ୍ୟ ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି। ଆବାସ ଘର ନିର୍ମାଣ ପାଇଁ ରାଜ୍ୟ ସରକାର ହିତାଧିକାରୀଙ୍କୁ କିସ୍ତି ଅନୁସାରେ ଅର୍ଥ ଯୋଗାଇ ଦେଉଥିବାବେଳେ, ଯେଉଁ ମାମଲାରେ ହିତାଧିକାରୀ ନିଜେ ଘର କରିପାରୁନଥିଲେ, ସେଠାରେ କିଏ ଠିକାଦାରଙ୍କୁ କାମ ଦେଲା ଓ କିଏ ଅର୍ଥ ହଡପ କଲା—ସେଥିରେ ଗଭୀର ତଦନ୍ତ ହେବ ବୋଲି ସ୍ପଷ୍ଟ କରିଛନ୍ତି ମନ୍ତ୍ରୀ। ଏ ନେଇ ଅଭିଯୋଗ କରନ୍ତୁ ବୋଲି କହିଛନ୍ତି ରାଜ୍ୟ ସରକାରଙ୍କ ଅନୁସୂଚିତ ଜାତି ଓ ଜନଜାତି କଲ୍ୟାଣ ମନ୍ତ୍ରୀ ନିତ୍ୟାନନ୍ଦ ଗଣ୍ତ । ଖଇରପୁଟ ଅଞ୍ଚଳରେ ଆବାସ ନାରେ ହୋଇଛି ବ୍ୟାପକ ର୍ଦୁନୀତି । ମାଲକାନଗିରି ଜିଲା ମାଥିଲି ଗସ୍ତରେ ଆସି ବଣ୍ତାଙ୍କ ପ୍ରତି ହୋଇଥିବା ଦୁର୍ନୀତି ଉପରେ ବିତଣ୍ଡା ଯୁକ୍ତି ଦେଇଛନ୍ତି ମନ୍ତ୍ରୀ ଗଣ୍ତ ।

ମାଲକାନଗିରି ଜିଲ୍ଲାର ଖଇରପୁଟ ବ୍ଲକ ଅନ୍ତର୍ଗତ ବଣ୍ତାଘାଟିର ଅଧିକାଂଶ ଗାଁରେ ଘର କରିବାକୁ କହି ଠିକାଦାର ଅର୍ଥ ହଡପ କରିଥିବା ଅଭିଯୋଗ ହୋଇଥିଲା । ଏ ନେଇ ଜିଲ୍ଲା ଆଦିବାସୀ ସମାଜ ମହାସଂଘ ଦଳ ପହଞ୍ଚି ନିମ୍ନମାନର କାମକୁ ଦେଖି ତାଜୁବ ହୋଇଥିଲେ । ନିରୀହ ବଣ୍ତାଙ୍କ ଆବାସ ଅର୍ଥ ହେରଫେରକୁ ନେଇ ଅଧିକାରୀଙ୍କ ଭୂମିକାକୁ ନେଇ ମଧ୍ୟ ପ୍ରଶ୍ନ ଉଠିଥିଲା । ଏ ନେଇ କନକ ନ୍ୟୁଜରେ ପ୍ରଥମ ଖବର ପ୍ରସାରଣ ହେବା ପରେ ବିଡିଓଙ୍କ ବଦଳି ବି ହୋଇଛି ।
୧୯ ବର୍ଷରୁ କମ୍ ବିଶ୍ବକପ, ସେମିଫାଇନାଲରେ ଆଫଗାନିସ୍ତାନକୁ ହରାଇ ଫାଇନାଲକୁ ଭାରତ

୧୯ ବର୍ଷରୁ କମ୍ ବିଶ୍ବକପରେ ଟିମ୍ ଇଣ୍ଡିଆର ବିଜୟ ଯାତ୍ରା ଅବିରତ ଭାବରେ ଜାରି ରହିଛି। ହରାରେ ଗ୍ରାଉଣ୍ଡରେ ଆୟୋଜିତ ରୋମାଞ୍ଚକ ସେମିଫାଇନାଲ ମ୍ୟାଚ୍‌ରେ ଆଫଗାନିସ୍ତାନକୁ ୭ ୱିକେଟରେ ପରାଜିତ କରି, ଲଗାତାର ଷଷ୍ଠଥର ଏବଂ ମୋଟ ଦଶମଥର ପାଇଁ ଭାରତ ଫାଇନାଲରେ ପ୍ରବେଶ କରିଛି।ପ୍ରଥମେ ବ୍ୟାଟିଂ କରି ଆଫଗାନିସ୍ତାନ ୫୦ ଓଭରରେ ୪ ୱିକେଟ୍ ହରାଇ ୩୧୦ ରନ୍‌ର ଦୃଢ଼ ସ୍କୋର ଖଡ଼ିଆଇଥିଲା। କିନ୍ତୁ ଭାରତୀୟ ଯୁବ ବ୍ୟାଟ୍ସମ୍ୟାନମାନେ ଏହି ବଡ଼ ଲକ୍ଷ୍ୟକୁ ଅଶ୍ଚର୍ଯ୍ୟଜନକ ଭାବରେ ଖେଳି ମାତ୍ର ୪୧.୧ ଓଭରରେ ୩୧୧ ରନ୍ କରି ମ୍ୟାଚ୍ ଜିତିନେଲେ।

ଭାରତଙ୍କ ବିଜୟର ନାୟକ ହେଲେ ଆରୋନ୍ ଜର୍ଜ, ଯିଏ ଅଦ୍ଭୁତ ଶତକ ପ୍ରଦାନ କଲେ। ସେଙ୍କ ସାଙ୍ଗକୁ ବୈଭବ ସୂର୍ଯ୍ୟବଂଶୀ ଦମଦାର ବିସ୍ଫୋରକ ଇନିଂସ୍ ଖେଳି ଟିମକୁ ଝଟପଟ ନିଜ ଲକ୍ଷ୍ୟତିରେ ପହଞ୍ଚାଇଦେଲେ। ଏବେ ସମାଗ୍ର ବିଶ୍ୱର ଦୃଷ୍ଟି ରହିଛି ଆଜି ହେବାକୁ ଯାଉଥିବା ଫାଇନାଲ‌ ଉପରେ, ଯେଉଁଠାରେ ଭାରତ ଇଂଲଣ୍ଡ ସହ ଶୀର୍ଷ ସ୍ଥାନ ପାଇଁ ଟକ୍କର ଦେବ। ଯୁବ ଟିମ୍ ଇଣ୍ଡିଆର ବର୍ତ୍ତମାନର ଫର୍ମ୍ ଦେଖି ଭାରତୀୟ ଦର୍ଶକମାନେ ଆପଣାପେ ବିଜୟ ଆଶା କରୁଛନ୍ତି।
ଭୟଙ୍କର ଦୁର୍ଘଟଣା: ଯଖପୁରା ନିକଟରେ ଏକ୍ସପ୍ରେସ୍ ଟ୍ରେନ୍ ଲାଇନ୍‌ଚ୍ୟୁତ

ଯାଜପୁର ଜିଲ୍ଲାର ଦାନଗଦି ବ୍ଲକ ଅନ୍ତର୍ଗତ ଯଖପୁରା ରେଳଷ୍ଟେସନ୍‌ ନିକଟରେ ଏକ୍ସପ୍ରେସ୍ ଟ୍ରେନ୍ ଲାଇନ୍‌ଚ୍ୟୁତ ହୋଇଛି। କୌଣସି ଅଜଣା କାରଣରୁ ଏମଜିଆର–ଚେନ୍ନାଇ ସେଣ୍ଟ୍ରାଲ–ନ୍ୟୁ ଜଲପାଇଗୁଡ଼ି ଏକ୍ସପ୍ରେସ୍ ଟ୍ରେନ୍ ଦୁର୍ଘଟଣାର ସମ୍ମୁଖୀନ ହୋଇଥିଲା। ଏହି ଘଟଣାରେ କୌଣସି ପ୍ରକାର କ୍ଷୟକ୍ଷତି ହୋଇନଥିବା ସୂଚନା ମିଳିଛି।

ଆଜି ଭୁବନେଶ୍ୱରରୁ ଏମଜିଆର-ଚେନାଇ ସେଣ୍ଟ୍ରାଲ ନ୍ୟୁ ଜଳପାଇଗୁଡ଼ି ଏକ୍ସପ୍ରେସ କଲିକତା ଅଭିମୁଖେ ଆସୁଥିଲା । ହଠାତ କୌଣସି କାରଣରୁ ଯଖପୁର ରେଳ ଷ୍ଟେସନର ୪ ନମ୍ବର ପ୍ଲାଟଫର୍ମରେ ଟ୍ରାକରୁ ତିନୋଟି ବଗି ଖସି ଯାଇଥିଲା । ସୌଭାଗ୍ୟ ବସତଃ କୌଣସି ଯାତ୍ରୀଙ୍କର କ୍ଷୟକ୍ଷତି ହେଇନଥିବା ସୂଚନା ମିଳିଛି । ସେପଟେ ଖବର ପାଇ ବରିଷ୍ଠ ଅଧିକାରୀ ପହଂଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
ନୂଆପଡାରେ ଆରମ୍ଭ ହେଲା ଦୁଇ ଦିନିଆ ପିଏମ୍‌ଶ୍ରୀ ମେଳା

ସ୍ଥାନୀୟ ସରକାରୀ ନ୍ୟାସନାଲ ଉଚ୍ଚ ବିଦ୍ୟାଳୟର ମାରାଗୁଡା ମଣ୍ଡପରେ ଦୁଇ ଦିନିଆ ପିଏମ୍‌ଶ୍ରୀ ମେଳା ଉଦଘାଟିତ ହୋଇଯାଇଛି। ଏହି ଉଦଘାଟନୀ ଉତ୍ସବରେ ଖଡ଼ିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ ମୁଖ୍ୟ ଅତିଥି ଭାବେ ଯୋଗଦେଇ ଥିବାବେଳେ ସମ୍ମାନିତ ଅତିଥି ଭାବେ ନୂଆପଡା ବିଧାୟକ ଜୟ ଢୋଲକିଆ କଳାହାଣ୍ଡି ସାଂସଦ ପ୍ରତିନିଧି ପ୍ରେମ ଅଗ୍ରୱାଲ ଜିଲ୍ଲା ପରିଷଦ ଉପାଧକ୍ଷ ଦୀପିକା ଦୀପ ପଦ୍ମଶ୍ରୀ ଉପାଧିରେ ବିଭୂଷିତ ଶିକ୍ଷା ଓ ଭାଷା ଜାତୀୟ ପରାମର୍ଶ ଦାତା ନୂଆ ଦିଲ୍ଲୀ ମହେନ୍ଦ୍ର ମିଶ୍ର ଜିଲ୍ଲା ପ୍ରାନ୍ତୀୟ ବନଖଣ୍ଡ ଅଧିକାରୀ ମହମ୍ମଦଆଜିଜ ଖାନ ନୂଆପଡା ବ୍ଲକ ଅଧ୍ୟକ୍ଷା ତାରେଶ୍ୱରୀ ସାହୁ ପ୍ରମୁଖ ଉପସ୍ଥିତ ଥିଲେ।

ଏହି କାର୍ଯ୍ୟକ୍ରମ ରେ ନୂଆପଡା ଜିଲ୍ଲାପାଳ ମଧୁସୂଦନ ଦାସ ସଭାପତିତ୍ୱ କରିଥିବାବେଳେ ଜିଲ୍ଲା ଶିକ୍ଷା ଅଧିକାରୀ ପ୍ରଶାନ୍ତ କୁମାର ମହାନ୍ତି ଆବାହକ ରୂପେ କାର୍ଯ୍ୟକ୍ରମ କୁ ପରିଚାଳନା କରିଥିଲେ। ଜିଲ୍ଲାର କୋଣ ଅନୁକୋଣରୁ ଅନେକ ପ୍ରତିଭାବାନ ଛାତ୍ର ଛାତ୍ରୀ ଅନେକ ବିଜ୍ଞାନ ସମ୍ମତ ଏକକ ବ୍ୟବହୃତ ପ୍ଲାଷ୍ଟିକ ତଥା ଆବର୍ଜନା ରୁ ନବନିର୍ମିତ ହୋଇପାରୁଥିବା ଗୃହଉପଯୋଗୀ ସାମଗ୍ରୀ କିପରି ନିର୍ମାଣ କରାଯାଇପାରେ ସେନେଇ ଅନେକ ପ୍ରକଳ୍ପ ପ୍ରଦର୍ଶନୀ କରିଥିଲେ।

ଦିବ୍ୟାଙ୍ଗ ଛାତ୍ର ଛାତ୍ରୀ କିପରି ଅଧିକ ସ୍ୱାଭଲମ୍ବୀ ହୋଇପାରିବେ ସେଥିପାଇଁ ସମଗ୍ର ଶିକ୍ଷା ଅଭିଯାନ ର ଆଇଇଡି ସଂଯୋଜକ ହେମନ୍ତ ଭୋଇ ଏବଂ ତାଙ୍କର ସହଯୋଗୀଙ୍କ ପ୍ରଚେଷ୍ଠାରେ ଅନୁଷ୍ଠିତ ଏକ ଷ୍ଟଲ ବହୁତ ପ୍ରେରଣାଦାୟୀ ଥିଲା। ରାଜ୍ୟସରକାର ରାଜ୍ୟରେ ୧୨୫୦୦ ପିଏମଶ୍ରୀ ବିଦ୍ୟାଳୟ ପରିଚାଳନା ପାଇଁ ଖୋଲିଥିବା ବେଳେ ନୂଆପଡା ଜିଲ୍ଲାରେ ୧୨ ଟି ପାଇଁ ଅନୁମୋଦିତ କରିଥିବାରୁ ନିଜେ ଜିଲ୍ଲାପାଳ ନିଜର କୃତଜ୍ଞତା ଜ୍ଞାପନ କରିଥିଲେ। ସନ୍ଧ୍ୟା ସମୟରେ ବିଭିନ୍ନ ବିଦ୍ୟାଳୟ ମାନଙ୍କରୁ ଆସିଥିବା ଛାତ୍ରଛାତ୍ରୀ ମାନଙ୍କ ଦ୍ୱାରା ପରିବେଷ୍ଟିତ ସାଂସ୍କୃତିକ କାର୍ଯ୍ୟକ୍ରମ ରେ ମାରାଗୁଡା ମଣ୍ଡପ ଦୁଲୁକି ଉଠିଥିଲା।