ମୁନିଗୁଡା ବ୍ଲକରେ ଏକ ବଡ଼ ଧରଣର ସଡ଼କ ଦୁର୍ଘଟଣା ଘଟିଯାଇଛି। ମୁନିଖୋଲ ସ୍ଥିତ କନକ ପରମେଶ୍ଵରୀ ମନ୍ଦିର ନିକଟରେ ଏକ ବକ୍ସାଇଟ ବୋଝେଇ ଆଲୁମିନିଅମ ବଲକର ଭାରସାମ୍ୟ ହରାଇ ୩ଟି ପରିବାରର ବାସଗୃହ ଉପରେ ଓଲଟି ପଡ଼ିଛି। ତେବେ ସୌଭାଗ୍ୟବଶତଃ, ଏହି ଭୟାବହ ଦୁର୍ଘଟଣାରେ କୌଣସି ଜୀବନହାନି ଘଟିନାହିଁ। ଆଜି ଭୋର ସମୟ। ମୁନିଖୋଲ ଆର୍ଡି ମୁଖ୍ୟରାସ୍ତା, କନକା ପରମେଶ୍ଵରୀ ମନ୍ଦିର ନିକଟ। ବିଶାଖାପାଟଣାରୁ ଝାରସୁଗୁଡା ଯାଉଥିବା ଏକ ବକ୍ସାଇଟ ବୋଝେଇ ବଲକର। ଘରଗୁଡ଼ିକର କାନ୍ଥ ଏବଂ ଆଜବେଷ୍ଟ ସମ୍ପୂର୍ଣ୍ଣ ଭାଙ୍ଗି ଚୁରମାର ହୋଇଯାଇଛି।
ଘର ଭିତରେ ଥିବା ଆସବାବପତ୍ର ଓ ଦୈନନ୍ଦିନ ବ୍ୟବହାର୍ଯ୍ୟ ସାମଗ୍ରୀ ନଷ୍ଟ ହୋଇଛି। ଦୁର୍ଘଟଣା ସମୟରେ ପରିବାର ସଦସ୍ୟମାନେ ଶୋଇଥିଲେ ମଧ୍ୟ ସେମାନେ ଅଳ୍ପକେ ବର୍ତ୍ତି ଯାଇଛନ୍ତି। ଖବର ପାଇ ମୁନିଗୁଡା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଗାଡ଼ିଟିକୁ ଜବତ କରିବା ସହ ତଦନ୍ତ ଆରମ୍ଭ କରିଛି। ଡ୍ରାଇଭରଙ୍କୁ ନିଦ ଲାଗିଯିବା କାରଣରୁ କିମ୍ବା ଯାନ୍ତ୍ରିକ ତ୍ରୁଟି ଯୋଗୁଁ ଏହି ଦୁର୍ଘଟଣା ଘଟିଛି, ସେ ନେଇ ପୋଲିସ ଅଧିକ ପଚରାଉଚରା ଜାରି ରଖିଛି। ସ୍ଥାନୀୟ ଅଞ୍ଚଳରେ ଏହାକୁ ନେଇ କିଛି ସମୟ ପାଇଁ ଚାପା ଉତ୍ତେଜନା ଦେଖାଦେଇଥିଲେ ମଧ୍ୟ ପୋଲିସ ପରିସ୍ଥିତିକୁ ନିୟନ୍ତ୍ରଣ କରିଛି।
