ପଶ୍ଚିମ ବଙ୍ଗରେ ଜଣେ ଦଳିତ ନାବାଳିକାକୁ ଗଣଦୁଷ୍କର୍ମ ଓ ହତ୍ୟା ଘଟଣାରେ, ନାବାଳିକାର ଶବ ବ୍ୟବଚ୍ଛଦ ରିପୋର୍ଟ ପୋଲିସକୁ ହସ୍ତଗତ ହୋଇଛି। ନାବାଳିକାର ମୃତ୍ୟୁ ବିଷକ୍ରିୟା କାରଣରୁ ହୋଇଥିବା ରିପୋର୍ଟରୁ ଜଣାପଡିଛି। ଏନେଇ ଉତ୍ତର ଦିନାଜପୁରର ଏସପି ସାନା ଅକ୍ତର ସୂଚନା ଦେଇଛନ୍ତି। ଗୁରୁବାର ଦିନ ପଶ୍ଚିମ ବଙ୍ଗର ଉତ୍ତର ଦିନାଜପୁର ଜିଲ୍ଲାରେ ଜଣେ ନାବାଳିକାକୁ ଗଣ ଦୁଷ୍କର୍ମ ହୋଇଥିବା ନେଇ ଅଭିଯୋଗ ହୋଇଥିଲା। ନାବାଳିକାଟି ନିଖୋଜ ହୋଇଯାଇଥିବା ବେଳେ ଗୁରୁବାର ନାବାଳିକାର ମୃତଦେହ ସ୍ଥାନୀୟ ଲୋକଙ୍କୁ ମିଳିଥିଲା। ନାବାଳିକାକୁ ନ୍ୟାୟ ଦେବାକୁ ଲୋକେ ଶୁକ୍ରବାର ଆନ୍ଦୋଳନକୁ ଓହ୍ଲାଇଥିଲେ।
ଦିନାଜପୁର ଏସପି ଘଟଣା ସମ୍ପର୍କରେ ସୂଚନା ଦେବାକୁ ଯାଇ କହିଛନ୍ତି କି, ସ୍ଥାନୀୟ ଲୋକେ ଏକ ବାଳିକାର ମୃତଦେହ ପାଇବା ପରେ ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଥିଲା। ବାଳିକାର ବାପାଙ୍କୁ ମଧ୍ୟ ପୋଲିସ ଅଟକ ରଖିଥିଲା। ପରିବାରର ଅଭିଯୋଗ ଆଧାରରେ ଏକ ମାମଲା ରେଜିଷ୍ଟର ହୋଇଥିଲା। ମାମଲାରେ ସମ୍ପୃକ୍ତି ଥିବା ଦୁଇ ଅଭିଯୁକ୍ତଙ୍କୁ ପୋଲିସ 14 ଦିନିଆ କଷ୍ଟଡିକୁ ପଠାଇଦେଇଥିଲା।
ଏସପି କହିଛନ୍ତି, ପୋଷ୍ଟମର୍ଟମ ରିପୋର୍ଟରୁ ପୀଡିତାର ମୃତ୍ୟୁ ବିଷ କ୍ରିୟାରୁ ହୋଇଥିବା ଜଣାପଡିଛି। ତେବେ ଶରୀରରେ କୌଣସି ଦୁଷ୍କର୍ମଜନିତ ଖଣ୍ଡିଆ ଅଛିକି ନାହିଁ ତାକୁ ସ୍ପଷ୍ଟ କରିବାକୁ କୁହାଯାଇଛି। ତେବେ ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା। ଲୋକେ ଆନ୍ଦୋଳନକୁ ଓହ୍ଲାଇଥିଲେ। ସ୍ଥିତିକୁ ଦେଖି ଶନିବାର ଜାତୀୟ ମହିଳା କମିଶନର ତରଫରୁ ପୋଲିସକୁ ରିପୋର୍ଟ ତଲବ କରାଯାଇଛି।