ଭୁବନେଶ୍ୱର ସ୍ଥିତ ପ୍ରତିଷ୍ଠିତ ସରକାରୀ ଶିକ୍ଷାନୁଷ୍ଠାନ ଓଡ଼ିଶା ବୈଷୟିକ ଓ ଗବେଷଣା ବିଶ୍ୱବିଦ୍ୟାଳୟ (OUTR) ପରିସରରୁ ଏକ ଅଭାବନୀୟ ତଥା ଲଜ୍ଜାଜନକ ଘଟଣା ସାମ୍ନାକୁ ଆସିଛି। ବିଶ୍ୱବିଦ୍ୟାଳୟର ହଷ୍ଟେଲରେ ଛାତ୍ରମାନଙ୍କୁ ଦିଆଯାଉଥିବା ଖାଦ୍ୟର ସ୍ୱଚ୍ଛତାକୁ ନେଇ ଏବେ ଗୁରୁତର ପ୍ରଶ୍ନବାଚୀ ସୃଷ୍ଟି ହୋଇଛି। ବିଶ୍ୱବିଦ୍ୟାଳୟର ଏପିଜେ ଅବ୍ଦୁଲ କଲାମ ହଲ୍ ଅଫ୍ ରେସିଡେନ୍ସରେ ମେସ୍ କର୍ମଚାରୀମାନେ ଛାତ୍ରଙ୍କ ଖାଦ୍ୟ ଟ୍ରେଗୁଡ଼ିକୁ ଏକ ଅଶୁଦ୍ଧ ନାଳ ପାଣିରେ ଧୋଉଥିବା ଦେଖିବାକୁ ମିଳିଛି।
ସୂଚନା ଅନୁସାରେ, ହଷ୍ଟେଲ ନିକଟରେ ଏକ ପାଇପ୍ ଫାଟି ଯିବା ଫଳରେ ସେଠାରେ ଜଳ ଜମି ଏକ ନାଳ ସଦୃଶ ହୋଇ ବହିଥିଲା। ସେହି ଅସ୍ୱାସ୍ଥ୍ୟକର ପାଣିକୁ ହିଁ ବାସନ ଧୋଇବାରେ ବ୍ୟବହାର କରାଯାଉଥିଲା। ଜଣେ ସତର୍କ ଛାତ୍ର ଏହି ସମ୍ପୂର୍ଣ୍ଣ ଘଟଣାକୁ ନିଜ ମୋବାଇଲ୍ରେ କଏଦ କରିଛନ୍ତି, ଯାହା ପରେ ବିଶ୍ୱବିଦ୍ୟାଳୟ ପରିସରରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଛାତ୍ରମାନେ ସେହି ମେସ୍ରୁ ଆଉ ଖାଦ୍ୟ ନଖାଇବା ପାଇଁ ନିଷ୍ପତ୍ତି ନେଇଛନ୍ତି। ବର୍ତ୍ତମାନର ମେସ୍ କର୍ତ୍ତୃପକ୍ଷଙ୍କ ଟେଣ୍ଡର ତୁରନ୍ତ ରଦ୍ଦ କରି ଜଣେ ନୂଆ ଏବଂ ଦାୟିତ୍ୱବାନ କର୍ତ୍ତୃପକ୍ଷଙ୍କୁ ଦାୟିତ୍ୱ ଦେବାକୁ ଦାବି ହୋଇଛି। ଖାଦ୍ୟର ମାନ ଏବଂ ରନ୍ଧନଶାଳାର ପରିବେଶକୁ ତୁରନ୍ତ ସୁଧାରିବାକୁ ଛାତ୍ରମାନେ ଚେତାବନୀ ଦେଇଛନ୍ତି।