ବାହାନଗା ଦୁର୍ଘଟଣା ପର ଠାରୁ ରେଳ ବିଭାଗରେ ଅଘଟଣ ଘଟିବାରେ ଲାଗିଛି । କେଉଁଠି ନା କେଉଁଠି ରେଳ ବିଭାଗରେ ସମସ୍ୟା ଦେଖାଦେଉଛି । ଆଜି ପୁଣି ରାୟଗଡ଼ା ଜିଲ୍ଲା ଅମ୍ବାଦଳା ଷ୍ଟେସନ ନିକଟରେ ବେଦାନ୍ତର ବକ୍ସାଇଟ୍ ବୋଝେଇ ମାଲବାହୀ ଟ୍ରେନ୍ ଲାଇନଚ୍ୟୁତ ହୋଇଛି । ଏହି ଟ୍ରେନ୍ ଲାଞ୍ଜିଗଡ଼ ବେଦାନ୍ତ ପ୍ଲାଣ୍ଟକୁ ଯାଉଥିବା ବେଳେ ତିନିଟି ବଗି ରେଳ ଧାରଣରୁ ଖସି ପଡ଼ିଛି ।
ଷ୍ଟେସନ ନିକଟରେ ବଗି ଲାଇନଚ୍ୟୁତ୍ ଯୋଗୁଁ ରେଳ ଯାତାୟାତ ବ୍ୟାହତ ହୋଇଥିଲା । ଦୁର୍ଘଟଣାରେ କୌଣସି ଧନଜୀବନ କ୍ଷୟକ୍ଷତି ହୋଇନଥିବା ଜଣାପଡ଼ିଛି । ତେବେ ପ୍ରତିଦିନ କିଛିନା କିଛି ଟ୍ରେନ୍ ଦୁର୍ଘଟଣା ଘଟୁଛି । କେଉଁଠି ବଗି ଲାଇନଚ୍ୟୁତ ତ ଆଉ କେଉଁଠି ଇଞ୍ଜିନ ଓ ବଗି ଅଲଗା ହେଉଛି । ଏଭଳି କ୍ରମାଗତ ଟ୍ରେନ୍ ଦୁର୍ଘଟଣା ଯାତ୍ରୀଙ୍କୁ ଅଡୁଆରେ ପକାଇଛି । ରେଳରେ ଯାତ୍ରା କରିବା ପାଇଁ ପଛଘୁଞ୍ଚା ଦେଉଛନ୍ତି ଯାତ୍ରୀ । ସେମାନଙ୍କ ଭୟ ଓ ଆତଙ୍କ ଦୂର କରିବା ପାଇଁ ରେଳ ବିଭାଗ ପକ୍ଷରୁ ଆବଶ୍ୟକ ପଦକ୍ଷେପ ନେବା ଜରୁରୀ ହୋଇଛି । ସେପଟେ, ଦୁର୍ଘଟଣାଗ୍ରସ୍ତ ମାଲବାହୀ ଟ୍ରେନକୁ ଖୁବଶୀଘ୍ର ଲାଇନ ଉପରକୁ ଆଣିବା ପାଇଁ ଉଦ୍ୟମ ଜାରି ରହିଛି ।
ଜୁନ୍ ୨ ତାରିଖରେ ବାହାନଗାରେ ଭୟଙ୍କର ରେଳ ଦୁର୍ଘଟଣା ଘଟିଥିଲା । ଏସସିବିରେ ଚିକିତ୍ସିତ ଜଣେ ବାହିରୀ ଯାତ୍ରୀଙ୍କ ଆଜି ମୃତ୍ୟୁ ଘଟିଛି । ଏହାକୁ ମିଶାଇ ଦୁର୍ଘଟଣାରେ ମୃତ୍ୟୁ ସଂଖ୍ୟା ୨୯୧ ଛୁଇଁଛି । ବିଭିନ୍ନ ମେଡିକାଲରେ ଗୁରୁତରଙ୍କ ଚିକିତ୍ସା ଜାରି ରହିଛି । ସେମାନଙ୍କ ମଧ୍ୟରୁ କେହି କେହି ଜୀବନ ହାରୁଛନ୍ତି । ତେଣୁ ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା ରହିଛି ।
