Tag: #Education

“ହିନ୍ଦି ପାଇଁ ସ୍ଥାନ ନାହିଁ” – ଷ୍ଟାଲିନଙ୍କ ବୟାନକୁ ନେଇ ତେଜିଲା ରାଜନୀତି

ତାମିଲନାଡ଼ୁ ମୁଖ୍ୟମନ୍ତ୍ରୀ ଏମ.କେ. ଷ୍ଟାଲିନଙ୍କ ହିନ୍ଦି ଭାଷା ବିରୋଧୀ ବୟାନକୁ ନେଇ ଦେଶରେ ପୁଣିଥରେ ରାଜନୀତି ତେଜିଛି ଉଠିଛି | ଷ୍ଟାଲିନ୍ ତାଙ୍କ ସୋସିଆଲ ମିଡ଼ିଆ ପ୍ଲାଟଫର୍ମ ‘X’ ରେ କହିଛନ୍ତି , ତାମିଲନାଡ଼ୁରେ ହିନ୍ଦି ଭାଷା ପାଇଁ କୌଣସି ସ୍ଥାନ ନାହିଁ, ପୂର୍ବରୁ ମଧ୍ୟ ନଥିଲା ଏବଂ ଆଗାମୀ ଦିନରେ ମଧ୍ୟ ରହିବ ନାହିଁ |

ରବିବାର ଚେନ୍ନାଇରେ ଡିଏମକେ ପକ୍ଷରୁ ‘ଭାଷା ସହିଦ ଦିବସ’ ପାଳନ କରାଯାଇଥିଲା | ମୁଖ୍ୟମନ୍ତ୍ରୀ ଅତୀତର ହିନ୍ଦୀ ବିରୋଧୀ ଆନ୍ଦୋଳନରେ ପ୍ରାଣ ହରାଇଥିବା ଭାଷା ସହିଦମାନଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ | ସେ କହିଥିଲେ ଯେ, ଜାତୀୟ ଶିକ୍ଷା ନୀତି ୨୦୨୦ ଭାରତୀୟ ଭାଷାଗୁଡ଼ିକୁ ଗୁରୁତ୍ୱ ଦିଅ କିନ୍ତୁ କୌଣସିଠାରେ କେବଳ ହିନ୍ଦି ପଢ଼ାଯିବାକୁ ବାଧ୍ୟତାମୂଳକ କରାଯାଇନାହିଁ |
ଏପଟେ କେନ୍ଦ୍ର ସରକାର ଓ ତାମିଲନାଡ଼ୁ ସରକାରଙ୍କ ମଧ୍ୟରେ ଏହି ପ୍ରସଙ୍ଗକୁ ନେଇ ଦୀର୍ଘଦିନ ଧରି ମତଭେଦ ଚାଲିଆସୁଛି | କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, ଏନଇପି ୨୦୨୦କୁ ନେଇ ତାମିଲନାଡ଼ୁ ସରକାର ରାଜନୀତି କରୁଛନ୍ତି | ତେବେ ଷ୍ଟାଲିନଙ୍କ ଏହି ଆଭିମୁଖ୍ୟ ଆଗାମୀ ଦିନରେ ବଡ଼ ରାଜନୈତିକ ଚର୍ଚ୍ଚା ସୃଷ୍ଟି କରିପାରେ ବୋଲି ମତ ପ୍ରକାଶ ପାଇଛି |
ପଞ୍ଚମ ଶ୍ରେଣୀ ଯାଏଁ ମାତୃଭାଷା ବାଧ୍ୟତାମୂଳକ

ପିଲାଙ୍କ ପାଇଁ ନୂଆ ନିୟମ : ପଞ୍ଚମ ଶ୍ରେଣୀ ଯାଏଁ ମାତୃଭାଷା , ୧୦ ଦିନ ବ୍ୟାଗ୍‌ମୁକ୍ତ ଶିକ୍ଷା

ନୂଆ ଶିକ୍ଷାନୀତି ନିୟମନୁଯାୟୀ ପଞ୍ଚମ ଶ୍ରେଣୀ ପର୍ଯ୍ୟନ୍ତ ମାତୃଭାଷାରେ ଶିକ୍ଷାଦାନକୁ ବାଧ୍ୟତାମୂଳକ କରାଯିବ | ଷଷ୍ଠରୁ ଦଶମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀମାଙ୍କ ପାଇଁ ୧୦ ଦିନିଆ ବ୍ୟାଗ୍‌ମୁକ୍ତ ଶିକ୍ଷାଦାନ ବ୍ୟବସ୍ଥା ମଧ୍ୟ ରହିବ। ବିଦ୍ୟାଳୟ ସ୍ତରୀୟ ଶିକ୍ଷା ପାଠ୍ୟକ୍ରମର ସଂସ୍କାର ଓ ପାଠ୍ୟପୁସ୍ତକ ବିକାଶ ନେଇ ଆୟୋଜିତ ସମୀକ୍ଷା ବୈଠକରେ ଏହି ସୂଚନା ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ |

କେନ୍ଦ୍ରମନ୍ତ୍ରୀ କହିଛନ୍ତି, ୨୦୨୬-୨୭ ଶିକ୍ଷାବର୍ଷରୁ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ନୂତନ ପାଠ୍ୟପୁସ୍ତକ ଆରମ୍ଭ କରାଯିବ। ଏହି ପାଠ୍ୟପୁସ୍ତକଗୁଡ଼ିକରେ ‘ଓଡ଼ିଶା ରାଜ୍ୟ ପାଠ୍ୟକ୍ରମ ଢାଞ୍ଚା’ ଉପରେ ଶିକ୍ଷା ରହିବ । ଏଥିପାଇଁ ରାଜ୍ୟର ପ୍ରାୟ ୧.୬୭ ଲକ୍ଷ ଶିକ୍ଷକଙ୍କୁ ନୂତନ ପାଠ୍ୟକ୍ରମରେ ଦକ୍ଷ କରିବା ପାଇଁ ବିଶେଷ ପ୍ରଶିକ୍ଷଣ ମଧ୍ୟ ପ୍ରଦାନ କରାଯିବ |

ପଞ୍ଚମ ଶ୍ରେଣୀ ପର୍ଯ୍ୟନ୍ତ ମାତୃଭାଷାରେ ଶିକ୍ଷାଦାନକୁ ସୁଦୃଢ଼ କରାଯିବା କାରଣ ପିଲାମାନଙ୍କର ମୌଳିକ ଶିକ୍ଷାର ମୂଳଦୁଆ ଠିକ ରହିବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି |

ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡ କହିଛନ୍ତି ଯେ , ଜାତୀୟ ଶିକ୍ଷା ନୀତି–୨୦୨୦ ଅଧୀନରେ ୫୫ଟି ନୂତନ ଏନ୍‌ସିଇଆରଟି ପାଠ୍ୟପୁସ୍ତକକୁ ଓଡ଼ିଆରେ ଅନୁବାଦ କରାଯାଇଛି | ଏଥିସହ ଛାତ୍ରଛାତ୍ରୀଙ୍କ ସାମଗ୍ରିକ ବିକାଶ ପାଇଁ ଓଡ଼ିଶାରେ ୩ଟି ନୂତନ ବିଷୟ ଯୋଡ଼ା ଯାଇଛି | ଯାହାକି କଳା ଶିକ୍ଷା, ଶାରୀରିକ ଶିକ୍ଷା ଓ ସୁସ୍ଥତା, ତାହା ସହ ଧନ୍ଦାମୂଳକ ଶିକ୍ଷା | ସେହିପରି ଜନ୍ମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଶିଶୁମାନଙ୍କ ପୋଷଣ ଓ ସ୍ୱାସ୍ଥ୍ୟ ପ୍ରତି ଅଧିକ ଧ୍ୟାନ ଦେବାକୁ ଏହି ଶିକ୍ଷାନୀତିରେ ଗୁରୁତ୍ୱ ଦିଆଯାଇଛି।

ଏହି ସମୀକ୍ଷା ବୈଠକରେ ରାଜ୍ୟର ୩୦ଟି ଜିଲ୍ଲାର ଜିଲ୍ଲା ଶିକ୍ଷା ଅଧିକାରୀ, ସମସ୍ତ ଜିଲ୍ଲା ଡାଏଟ୍, କେନ୍ଦ୍ରୀୟ ବିଦ୍ୟାଳୟ, ଜବାହର ନବୋଦୟ ବିଦ୍ୟାଳୟ, ଓଡ଼ିଶା ଆଦର୍ଶ ବିଦ୍ୟାଳୟ ଏବଂ ଏକଲବ୍ୟ ଆଦର୍ଶ ଆବାସିକ ବିଦ୍ୟାଳୟର ଅଧ୍ୟକ୍ଷମାନେ ଆଭାସୀ ମାଧ୍ୟମରେ ସାମିଲ ହୋଇଥିଲେ |
ଗୋଷ୍ଠି ଶିକ୍ଷା ଅଧିକାରୀ ନେପାଲ ମୁଣ୍ଡାଙ୍କୁ ବିଦାୟକାଳୀନ ସମ୍ବର୍ଦ୍ଧନା

ମୟୂରଭଞ୍ଜ ଜିଲ୍ଲାର ରାଇରଙ୍ଗପୁର ଉପଖଣ୍ଡ ର ବିଜାତଳା ବ୍ଲକ୍ ଗୋଷ୍ଠି ଶିକ୍ଷା ଅଧିକାରି ନେପାଲ ମୁଣ୍ଡା ଓ ଅତିରିକ୍ତ ଗୋଷ୍ଠି ଶିକ୍ଷା ଅଧିକାରିଣୀ ନିରୁପମା ମହାନ୍ତି ଙ୍କୁ ଆଜି ବିଦାୟକାଳୀନ ସମ୍ବର୍ଦ୍ଧନା ଦିଆଯାଇଛି । ଏହି କାର୍ଯ୍ୟକ୍ରମ ମୟୂରଭଞ୍ଜ ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣ ଚନ୍ଦ୍ର ସେଠୀ, ଜାମଦା ଗୋଷ୍ଠି ଶିକ୍ଷା ଅଧିକାରୀ ସୁରେଶ ମୁଣ୍ଡା ଓ ବିଜାତଳା ବ୍ଲକ ର ୧୫୫ ଟି ବିଦ୍ୟାଳୟ ର ପ୍ରଧାନ ଶିକ୍ଷକ, ଶିକ୍ଷୟିତ୍ରୀ ଉପସ୍ଥିତ ଥିଲେ ।

ବିଜାତଳା ବ୍ଲକ୍ ର ଗୋଷ୍ଠି ଶିକ୍ଷା ଅଧିକାରୀ ନେପାଲ ମୁଣ୍ଡା କୁହନ୍ତି ପ୍ରାୟ ଦିର୍ଘ ୧୦ ବର୍ଷ ରୁ ଉର୍ଦ୍ଧ ହେବ ମୁଁ ନିରନ୍ତର ଭାବେ ଏହି ବ୍ଲକ୍ ରେ କାର୍ଯ୍ୟ କରି ଆସିଛି । ସମସ୍ତ ବିଦ୍ୟାଳୟ ର ଶିକ୍ଷକ ଶିକ୍ଷୟିତ୍ରୀ ସମସ୍ତେ ମିଶି ମୋ ସହ କାମ କରନ୍ତି । ମୋର ଥିବା ଅବସ୍ଥାରେ ମୋ ବ୍ଲକ୍ ରେ ଥିବା ବିଦ୍ୟାଳୟ ର କୌଣସି ଅସୁବିଧା ହେବାକୁ ଦେଇନି କିନ୍ତୁ ଦୁଃଖ ର ବିଷୟ ମୁଁ ସରକାର କୁ କହିବି ଏହି ଅଫିସ୍ ରେ ବର୍ଷେ କାମ କରି ଅନ୍ୟ ଗୋଷ୍ଠି ଶିକ୍ଷା ଅଧିକାରୀ ପ୍ରମୋସନ ପାଉଛନ୍ତି । ମୁଁ ଦଶ ବର୍ଷରୁ ଉର୍ଦ୍ଧ କାମ କଲି ମୋତେ କିଛି ମିଳିଲା ନାହିଁ । ଯଦି ସରକାର ଦୃଷ୍ଟି ଦେବେ ତା ହେଲେ ମୋ ପରେ ମୋର ଭାଇ ମାନେ ଏହାର ଲାଭ ଉଠାଇ ପାରିବେ ।

ସେହିପରି ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ନିରୁପମା ମହାନ୍ତି କୁହନ୍ତି ମୁଁ ଅନେକ ଜାଗା ରେ କାମ କରିଛି କିନ୍ତୁ ୨ବର୍ଷ ହେବ ଏଇଠି କାମ କଲି ,କେବେ ବି କୌଣସି ଅସୁବିଧା ହୋଇନି । ସମସ୍ତେ ମିଳି ମିଶି କାମ କରନ୍ତି । ମୁଁ ଭଗବାନ ଙ୍କୁ ପ୍ରାର୍ଥନା କରିବି ଏହି ବ୍ଲକ ରେ ଥିବା ସମସ୍ତ ବିଦ୍ୟାଳୟ ର ଆହୁରି ଉନ୍ନତି ହେଉ ।
ଯୁକ୍ତ ୨ ବିଜ୍ଞାନ ମହାବିଦ୍ୟାଳୟର ଛାତ୍ରଛାତ୍ରୀଙ୍କୁ ସମ୍ବର୍ଦ୍ଧନା

ଆନନ୍ଦପୁର ଉପଖଣ୍ଡ ଶୈଲଙ୍କ ମା ତାରିଣୀ ଯୁକ୍ତ ୨ ବିଜ୍ଞାନ ମହାବିଦ୍ୟାଳୟ ଚଳିତ ବର୍ଷ ଯୁକ୍ତ ୨ ବିଜ୍ଞାନ ରେ ଛାତ୍ରଛାତ୍ରୀ ସଫଳତା ଲାଭ କରି ଛନ୍ତି । ଯାହା ପାଖାପାଖି ଜିଲ୍ଲା ର କଲେଜ ମାନଙ୍କ ମଧ୍ୟରେ ରେକର୍ଡ ସୃଷ୍ଟି କରିଛି । ଏହି କଲେଜ ର ମୋଟ ୪୨ ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ ସମସ୍ତେ ଉତ୍ତୀର୍ଣ୍ଣ ହୋଇଛନ୍ତି । ଛାତ୍ରଛାତ୍ରୀ ଙ୍କ ମଧ୍ୟରୁ ୫୦୦ ରୁ ଉର୍ଦ୍ଧ୍ବ ନମ୍ବର ରଖି ୮ ଜଣ ଛାତ୍ରଛାତ୍ରୀ A1 ଉତ୍ତୀର୍ଣ୍ଣ ହୋଇଥିବା ଛାତ୍ରଛାତ୍ରୀ ଦେବାଶିଷ ଜେନା ,ଦୀପାରାଣୀ ସାହୁ ,ଇତିଶ୍ରୀ ରାଉତ ,ରାଜେନ୍ଦ୍ର ରାଉଳ ସ୍ୱୀକୃତି ସୁପ୍ରଭା ସା ,ଶ୍ରୁତି ଶ୍ରାବଣୀ ବରାଳ ,ଉସାଶ୍ରୀ ସାହୁ ,ସୁଭଦ୍ରା ସାହୁ, ଭଲ ନମ୍ବର ରଖି ଛାତ୍ରଛାତ୍ରୀ ରଖିଛନ୍ତି।

କଲେଜ ର ଅଧ୍ୟକ୍ଷ ଓ ଅଧ୍ୟାପିକା ,ଅଧ୍ୟାପକ ପ୍ରଥମ ବର୍ଷ ର ଛାତ୍ରଛାତ୍ରୀ ମାନଙ୍କୁ କଲେଜ ପକ୍ଷରୁ ପୁଷ୍ପଗୁଚ୍ଛ ମାନପତ୍ର ଓ ଉପଢ଼ୌକନ ଦେଇ ସମ୍ଭର୍ଦ୍ଧନା କରାଯାଇଛି lଏଥିରେ କଲେଜର ଚ୍ୟାୟାରମ୍ୟାନ ଚନ୍ଦ୍ର ଶେଖର ନାୟକ କଲେଜ ଛାତ୍ରଛାତ୍ରୀ ମାନଙ୍କୁ ଶୁଭେଚ୍ଛା ଜଣେଇବା ସହ ଉତ୍ତୋରତର ଉଣ୍ନତି କାମନା କରିଛନ୍ତି l ଏହି ସମ୍ଭର୍ଦ୍ଧନା ଉତ୍ସବରେ କଲେଜର ଅଧ୍ୟାପକ, ଅଧ୍ୟାପିକା , କର୍ମଚାରୀ ଓ ଅଭିଭାବକ ଉପସ୍ଥିତ ଥିଲେ।ତେବେ ଏହି କଲେଜରେ ପାଠପଢ଼ି ଉର୍ତ୍ତିଣ୍ଣ ହୋଇଥିବାରୁ ଛାତ୍ର ଛାତ୍ରୀ ମାନେ ଗର୍ବ ଅନୁଭବ କରୁଥିବା କହିଛନ୍ତି ।
ଜୀବନ ବଞ୍ଚିବା ପାଇଁ ଝରଣାପାଣି ସାହା, ଶିକ୍ଷା କଥା କିଏ ପଚାରେ, ଇଏ କଣ ଆମ ଅସ୍ମି…?

ଦୁର୍ଗମ ନିୟମଗିରି ପାହାଡରେ ଅବସ୍ଥିତ ଗାଇଲଙ୍ଗା ଗ୍ରାମରେ ପ୍ରାୟ ୧୬ ଟି ଜନଜାତି ପରିବାର ବସବାସ କରନ୍ତି । ଦୁର୍ଗମ ଇଲାକା ବୋଲି ଏଠାରେ ନା ଅଛି ସ୍ବଚ୍ଛ ପାନୀୟ ଜଳ, ନା ଅଛି ସ୍ବାସ୍ଥ୍ୟ ସେବା, ନା ଅଛି ଶିକ୍ଷାର ବ୍ୟବସ୍ଥା। ଏହି ପାହାଡ଼ିଆ ଅଞ୍ଚଳ ପାଇଁ ଏସବୁ ପାଲଟିଛି ସାତ ସପନ।

ସ୍ୱାଧୀନ ଭାରତ ୭୭ ବର୍ଷ ଅତିକ୍ରମ କରିସାରିଲାଣି ହେଲେ ଆଜି ବି ସ୍ବଚ୍ଛ ପାନୀୟ ଜଳ ନପାଇ ହନ୍ତସନ୍ତ ବଣ-ପାହାଡ଼ ଘେରା ରାୟଗଡ଼ା ଜିଲ୍ଲା ଅନ୍ତର୍ଗତ ମୁନିଗୁଡା ବ୍ଲକ ଅଧିନସ୍ଥ ମୁନିଖୋଲ ପଞ୍ଚାୟତର ଗାଇଲଙ୍ଗା ଗ୍ରାମର ଅଧିବାସୀ । ସୁବିଧା ନାଁରେ ସେମାନଙ୍କ ପାଖରେ ଯାହା ପହଂଚିଛି ସେକଥା ନ କହିବା ଭଲ । ଆଜି ବି ପାନୀୟ ଜଳ ପାଇଁ ଗ୍ରାମର ମହିଳା ଝରଣା ପାଣି ଉପରେ ନିର୍ଭରଶୀଳ । ପାଣିପାଇଁ ନିଜ ଜୀବନକୁ ବିପନ୍ନକରି ହିଂସ୍ର ବନ୍ୟଜନ୍ତୁ ଭରା ଜଙ୍ଗଲ ରାସ୍ତାରେ ସେମାନଙ୍କୁ ଦୈନିକ ୪ କିମିରୁ ଉର୍ଦ୍ଧ୍ବ ରାସ୍ତା ଅତିକ୍ରମ କରିବାକୁ ପଡୁଛି । ଗତ ୨୧/୨୨ ମସିହାରେ DKDA,OPELIP ସଂସ୍ଥା ତରଫରୁ ଗ୍ରାମବାସୀଙ୍କୁ ଏକ ପାଇପ୍ ଯୋଗେ ଝରଣା ପାଣି ଯୋଗାଇ ଦିଆଯାଇଥିଲା; କିନ୍ତୁ ତାହା ଦୀର୍ଘ ତିନି ବର୍ଷରୁ ଉର୍ଦ୍ଧ୍ବ ସମୟ ହେବ ରାସ୍ତା ଖୋଳିବା ସମୟରେ JCB ମେସିନ ଚଳାଚଳ ଯୋଗୁ ଭାଙ୍ଗିଯିବା ଫଳରେ ପାନୀୟ ଜଳର ସୁବିଧା ଠପ୍ ହୋଇଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି।

ଦୁର୍ଗମ ନିୟମଗିରି ପାହାଡରେ ଅବସ୍ଥିତ ଗାଇଲଙ୍ଗା ଗ୍ରାମରେ ପ୍ରାୟ ୧୬ ଟି ପରିବାର ବସବାସ କରନ୍ତି । ଅପହଞ୍ଚ ଇଲାକା ହୋଇଥିବାରୁ ଶିକ୍ଷାଦାନ ମଧ୍ୟ ଏହି ମାନଙ୍କ ପାଇଁ ଅପହଞ୍ଚ ହୋଇପଡିଛି। ସରକାର ଡଙ୍ଗରିଆ କନ୍ଧମାନଙ୍କ ପାଇଁ ଯୋଜନା ପରେ ଅନେକ ଯୋଜନା କରୁଛନ୍ତି ସତ କିନ୍ତୁ ଏଭଳି ଦୁର୍ଗମ ଇଲାକାରେ ଯୋଜନା ସବୁ ଫେଲ ମାରିଥିବା ଅଭିଯୋଗ କରିଛନ୍ତି ଗ୍ରାମବାସୀ। ସ୍ଥାନୀୟ ମୁନିଖୋଲ ପଞ୍ଚାୟତ ଆଶ୍ରମ ସ୍କୁଲ୍କୁ ଯିବା ପାଇଁ ହେଲେ ପ୍ରାୟ ୭ କିଲୋମିଟର ହେଉଥିବାରୁ ପିଲାମାନଙ୍କ ବାପା-ମା’ ଯିବା ଆସିବା ଭୟରେ ପିଲା ମାନଙ୍କୁ ସ୍କୁଲକୁ ଛାଡ଼ୁନଥିବା ଦେଖିବାକୁ ମିଳୁଛି। ପିଲାମାନଙ୍କ ପାଠ ପଢିବାର ବହୁ ଇଚ୍ଛା ଶକ୍ତି ଥିଲେବି ତାହା ସ୍ବପ୍ନରେ ହିଁ ସିମିତ ରହିଯାଇଥିବା ଏଥିରେ ଜଣାପଡ଼ୁଛି । ବହୁତ ଦୁଃଖର କଥା ଏହି ଭଳି ଅଞ୍ଚଳରେ ଶିକ୍ଷାର ବ୍ୟବସ୍ଥା ନଥିବାରୁ ଅଧିକାଂଶ ପିଲା ପାଠ ପଢିବା ବୟସରେ ଘରେ ବାପ-ମାଙ୍କୁ ଚାଷ ବାସ କରିବାରେ ସାହାଯ୍ୟ କରିବାକୁ ଘରେ ରହିଥିବା ଦେଖିବାକୁ ମିଳିଛି।

ପାନୀୟ ଜଳ, ସ୍ବାସ୍ଥ୍ୟ ସେବା, ଶିକ୍ଷା ଓ ଅନ୍ୟ ସମସ୍ୟାକୁ ନେଇ ଗ୍ରାମର ଭକ୍ତ ପଲକିଆ, ନିରାକାର ପଲକିଆ, ଅଭିମନ୍ୟୁ ଚିଛୁଆନ୍, ଶବର ଭାତ୍ରା, ମାଳିଧନ ପଲକିଆ, ଚିତ୍ର ସିକକା, ପାଲାଡି ଜାକେଶିକା, କାମନ୍ତି ବାଗ, ରେବତୀ ପଲକିଆ, ନିଳାବତୀ ବାଗ ପ୍ରମୁଖ ମୁନିଗୁଡା ବି.ଡି.ଓ. ଙ୍କୁ ଦାବିପତ୍ର ପ୍ରଦାନ କରିଥିଲେ । ତେବେ, ଏ ଦିଗରେ ସରକାର କିମ୍ବା ବ୍ଲକ ପ୍ରଶାସନ କେବେ କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି ଏବଂ ଅଞ୍ଚଳ ବାସୀଙ୍କ ଦୁଃଖ କେବେ ଦୁରହେବ ତାହା ଦେଖିବାକୁ ବାକି ରହିଲା।
ଓପିଏସ୍‌ସି ପରୀକ୍ଷାରେ କୃତିତ୍ବ, ଘଷିପୁରା ତଥା ଓଡ଼ିଶାର ସେବା କରିବା ସତ୍ୟବ୍ରତଙ୍କ ଲକ୍ଷ୍ୟ

ଆନନ୍ଦପୁର ପୌରାଞ୍ଚଳ ମୁରାବାଲିସ୍ଥିତ ସରସ୍ଵତୀ ଶିଶୁ ବିଦ୍ୟା ମନ୍ଦିର ଘଷିପୁରାର ପୂର୍ବତନ ଛାତ୍ର ସତ୍ୟବ୍ରତ ସାହୁ ଓଡ଼ିଶା ଲୋକସେବା ଆୟୋଗ ପରୀକ୍ଷାରେ କୃତିତ୍ବ ଅର୍ଜନ କରି ୯୫ତମ ସ୍ଥାନ ଅଧିକାର କରିଛନ୍ତି। ସେ ପ୍ରାଥମିକ ଓ ଉଚ୍ଚ ପ୍ରାଥମିକ ଶିକ୍ଷା ଶିଶୁ ମନ୍ଦିରରେ ଅଧ୍ୟୟନ କରିବା ସହ ଜାତୀୟ ଗ୍ରାମାଞ୍ଚଳ ମେଧାବୃତ୍ତି ପରୀକ୍ଷା ୨୦୧୦ ମସିହାରେ ମଧ୍ୟ ସଫଳତା ଅର୍ଜନ କରିଥିଲେ। ବିଦ୍ୟାଳୟ ତରଫରୁ ତାଙ୍କୁ ପୁଷ୍ପଗୁଚ୍ଛ ସହ ଉପଢୌକନ ଦେଇ ସ୍ୱାଗତ ସମ୍ବର୍ଦ୍ଧନା ଦିଆଯାଇ ଥିଲା ।

ଏହି ଅବସରରେ, ସତ୍ୟବ୍ରତ ତାଙ୍କର ଛାତ୍ର ଜୀବନ ଏବଂ ଗୁରୁଜୀ ଗୁରୁମା’ଙ୍କର ଭୂମିକା ସ୍ମରଣ କରିଥିଲେ । ସେ ଏ ଅଞ୍ଚଳର ବିକାଶ କରିବା ସହ ଓଡ଼ିଶାର ବିକାଶ ଦିଗରେ କାର୍ଯ୍ୟ କରିବେ ବୋଲି ସତ୍ୟବ୍ରତ କହିଛନ୍ତି। ଏହି ସଫଳତା ପାଇଁ ସେ ନିଜର ପିତାମାତା, ସମସ୍ତ ଗୁରୁଜୀ, ଗୁରୁମା’, ଶିକ୍ଷକ ବୃନ୍ଦ, ପରିବାରବର୍ଗ,ବନ୍ଧୁ ଏବଂ ସମସ୍ତ ଶୁଭାକାଂକ୍ଷୀମାନଙ୍କୁ ଶ୍ରେୟ ଦେଇଛନ୍ତି ।

ସତ୍ୟବ୍ରତଙ୍କୁ ସ୍ୱାଗତ ସମ୍ବର୍ଦ୍ଧନା ଦିଆଯିବା ଅବସରରେ, ପରିଚାଳନା ସମିତିର ସଂପାଦକ ରଶ୍ମୀ ରଞ୍ଜନ ନନ୍ଦ, ସଭାପତି ମଦନମୋହନ ରାଉତ, କୋଷାଧ୍ୟକ୍ଷ ଅକ୍ଷୟ କୁମାର ସାହୁ, ଉପ-ସଭାପତି ଚନ୍ଦ୍ରିକା ସାହୁ, ସଦସ୍ୟ ବିନୋଦ ବିହାରୀ ସେଠୀ, ପୂର୍ବତନ ସଂପାଦକ ଶୁକଦେବ ସାହୁ, ପୂର୍ବତନ ସହ-ସଂପାଦକ ବାବୁଲି ଚରଣ ବେହେରାm ପ୍ରଧାନ ଆଚାର୍ଯ୍ୟ ବାବାଜୀ ପଣ୍ଡାm ଓ ସମସ୍ତ ଗୁରୁଜୀ ଏବଂ ଗୁରୁ ମା’ ପ୍ରମୁଖ ଉପସ୍ଥିତ ଥିଲେ।
ଶିକ୍ଷକଙ୍କ ବଦଳି ପ୍ରତ୍ୟାହାର ଦାବିରେ ଛାତ୍ରଛାତ୍ରୀଙ୍କ ଧାରଣା, ପାଠପଢା ବନ୍ଦ

ଆଉ କିଛି ଦିନ ପରେ ସୁଜିତ ସାର ବିଦ୍ୟାଳୟ ଛାଡି ଅନ୍ୟତ୍ର ଚାଲିଯିବେ । ଆଉ ଛାତ୍ରଛାତ୍ରୀ ମାନେ ଦେଖିପାରିବେନି ସୁଜିତ ସାରଙ୍କ ପାଠ ପଢାଇବାର ଶୈଳୀ । ଯାହାକୁ ନେଇ ବିଦ୍ୟାଳୟ କ୍ୟାମ୍ପସରେ ଛାତ୍ରଛାତ୍ରୀଙ୍କ ମଧ୍ୟରେ ନୈରାଶ୍ୟ ଭାବ ଦେଖିବାକୁ ମିଳିଛି । ତେଣୁ ସେମନା ସାରଙ୍କୁ ବଦଳି ନକରି ସେହିଠାରେ ରହି ପାଠ ପଢାଇବାକୁ ନିବେଦନ କରିଛନ୍ତି । ଅଭଳି ଚିତ୍ର ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା କୁଜଙ୍ଗ ବ୍ଲକ ଅଧୀନ ମୁଥାପଦା ସରକାରୀ ଉଚ୍ଚ ବିଦ୍ୟାଳୟରେ । ସାରଙ୍କୁ ବଦଳି ନକରିବାକୁ ନିବେଦନ କରି ଛାତ୍ରଛାତ୍ରୀ ମାନେ କ୍ଲାସରୁମ୍ ଛାଡି ବିଦ୍ୟାଳୟ ବାହାରେ ବସି ନାରାବାଜି କରୁଛନ୍ତି ।

ତେବେ ସୂଚନା ଅନୁଯାୟୀ, ବିଦ୍ୟାଳୟର ବିଜ୍ଞାନ ଶିକ୍ଷକ ସୁଜିତ ବିଶିଙ୍କ ବଦଳିକୁ ନେଇ ପିଲାମାନେ ଦୁଖରେ ଭାଙ୍ଗି ପଡ଼ିଥିଲେ । ପ୍ରିୟ ଶିକ୍ଷକଙ୍କ ବଦଳି ପ୍ରତ୍ୟାହାର କରିବାକୁ ପାଠ ପଢା ଛାଡି ସମସ୍ତ ଛାତ୍ର ଛାତ୍ରୀ ଧାରଣାରେ ବସି ରହିଥିଲେ । ଘଟଣାକୁ ନେଇ ଆମ ପ୍ରତିନିଧି ବ୍ଲକ ଶିକ୍ଷା ଅଧିକାରୀ ଙ୍କ ପ୍ରତିକ୍ରିୟା ଜାଣିବାକୁ ଚାହିଁଥିବା ବେଳେ ସେ ଆଜିର ଘଟଣା ବିଷୟରେ ଅବଗତ ନଥିବା ବେଳେ ଯେଉଁ ଶିକ୍ଷକଙ୍କ ବଦଳି କଥା କୁହାଯାଉଛି ତାହା ମ୍ୟୁଚୁଆଲ ଟ୍ରାନ୍ସଫର ବେସିସରେ ଅର୍ଡର ହୋଇଛି । ଆମେ କିଛି କରିପାରିବୁନି । ତେବେ ବିଦ୍ୟାଳୟର ଅନ୍ୟ ଷ୍ଟାଫ୍ ମାନେ ମଧ୍ୟ ସୁଜିତି ବିଶିଙ୍କ ବଦଳିକୁ ନେଇ ପିଲାମାନେ ଭାଙ୍ଗିପଡିଥିବା କହିଛନ୍ତି । ତେବେ ଶିକ୍ଷକ ସୁଜିତ ବିଶି ପିଲାଙ୍କ ଏପରି ଅବସ୍ଥା ଦେଖି କଣ କରିବେ ସ୍ଥିର କରିପାରୁ ନାହାନ୍ତି ।

ଛାତ୍ରଛାତ୍ରୀ ମାନେ ପ୍ରିୟ ଶିକ୍ଷକଙ୍କୁ ଛାଡିବାକୁ ନାରାଜ । ଏଭଳି ସ୍ଥିତିରେ ପିଲାଙ୍କ ପାଠ ପଢ ରେ ବ୍ୟାଘାତ ସୃଷ୍ଟି ହେଉଥିବା ବେଳେ କେତେ ଦିନ ଛାତ୍ରଛାତ୍ରୀ ଧାରଣାରେ ବସୁଛନ୍ତି ଏବଂ ଏହାର ଆସୁ ସମାଧାନ କଣ ହେଉଛି ତାହା ଦେଖିବାକୁ ବାକି ।
ଅଜଣା ଗାଡି ଧକ୍କାରେ କଲେଜ ଛାତ୍ରଙ୍କ ମୃତ୍ୟୁ

ଅନୁଗୋଳ ଜିଲ୍ଲା ନାଲକୋ ଥାନା ଅନ୍ତର୍ଗତ କାଣ୍ଡସର ଠାରେ ଥିବା ଓଁ ବିଦ୍ୟା ଭାରତୀ ଆବାସିକ ମହାବିଦ୍ୟାଳୟ ର ଜଣେ ଛାତ୍ରଙ୍କ ର ଏକ ଅଜଣା ଗାଡି ଧକ୍କା ରେ ମୃତ୍ୟୁ ହୋଇଛି |ମୃତକ ଛାତ୍ର ଜଣକ ହେଲେ ଦେବଗଡ ଜିଲ୍ଲା ଛେପିଲିପାଲି ଗ୍ରାମ ର ହରି ଚନ୍ଦ୍ର ସ୍ୱାଇଁ ଙ୍କ ପୁଅ ରୁପେଶ ସ୍ୱାଇଁ | ରୁପେଶ ଗତ ଏକ ବର୍ଷ ହେବ ଓଁ ବିଦ୍ୟା ଭାରତୀ ଆବାସିକ ମହାବିଦ୍ୟାଳୟ ରେ ରହି ପାଠ ପଢୁଥିଲେ , ଚଳିତ ବର୍ଷ ସେ ଯୁକ୍ତ ଦୁଇ ବିଜ୍ଞାନର ଦ୍ୱିତୀୟ ବର୍ଷ ରେ ପାଠ ପଢୁଥିଲେ ।ଯେହେତୁ କଲେଜ ଟି ସମ୍ପୂର୍ଣ ଆବାସିକ ଥିଲା ତେଣୁ ଏହି କଲେଜ ର ହଷ୍ଟେଲ ରେ ହିଁ ରୁପେଶ ରହି ଆସୁଥିଲେ ।

ଆଜି ସକାଳେ ରୁପେଶ ଙ୍କ ବାପା ହରି ଚନ୍ଦ୍ର ସ୍ୱାଇଁ ଙ୍କ ନିକଟକୁ ହଷ୍ଟେଲ ର ୱୟଡେନ ଫୋନ କରି ଜଣାଇଥିଲେ କି ଆପଣଙ୍କ ପୁଅ ର ଏକ ଦୁର୍ଘଟଣା ହୋଇଛି , ସେ ହସିପିଟାଲ ରେ ଅଛି, ଆପଣ ଶୀଘ୍ର ଆସନ୍ତୁ । ହରିଚନ୍ଦ୍ର ଦେବଗଡ ରୁ ଅନୁଗୋଳ ହସ୍ପିଟାଲ କୁ ଆସିଲା ବେଳକୁ ଜାଣିବାକୁ ପାଇଲେ ଯେ ତାଙ୍କ ପୁଅ ର ମୃତ୍ୟୁ ହୋଇ ସାରିଛି । ତେବେ କଲେଜ କର୍ତ୍ୟୁପକ୍ଷ ଙ୍କୁ ପଚାରିବାରୁ ସେ କହିଥିଲେ କି ଆପଣଙ୍କ ପୁଅ ରାତି ପ୍ରାୟ ୧.୧୫ ସମୟରେ ହଷ୍ଟେଲ ରୁ ସାର ଙ୍କ ଗାଡି ଧରି ପଳାଇଯାଉଥିବା ବେଳେ ୫୫ ନମ୍ବର ଜାତୀୟ ରାଜପଥ ର ଟାଟା ସୋରୁମ ନିକଟରେ ଏକ ଅଜଣା ଗାଡି ଧକ୍କା ଦେଇଥିଲା ଯାହା ଫଳରେ ଆମେ ତାକୁ ସେଠାରୁ ଆଣି ହସ୍ପିଟାଲ ଭର୍ତି କରିଥିଲୁ ଓ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଥିଲେ |

ତେବେ ଘଟଣା ଟିକୁ ନେଇ ପରିବାର ପକ୍ଷରୁ କଲେଜ କର୍ତ୍ୟୁପକ୍ଷ ଙ୍କ ଅବହେଳା ଦର୍ଶାଇ ନାଲକୋ ଥାନାରେ ଏକ ଲିଖିତ ଅଭିଯୋଗ ହୋଇଛି , ରୁପେଶ ଙ୍କ ବାପା ଙ୍କ ଅଭିଯୋଗ କି କଲେଜ ର ଦାୟିତ୍ୱ ହୀନ ପାଇଁ ତାଙ୍କ ପୁଅ ର ମୃତ୍ୟୁ ଘଟିଛି |ରାତି ସମୟରେ ସେ କାହିଁକି ହଷ୍ଟେଲ ରୁ ବାହାରକୁ ଗଲା ?ଯଦି ଯିବାର ଥିଲା ତେବେ ଗାଡି କେଉଁଠୁ ପାଇଲା ଓ ଗାଡି ର ଚାବି ତାକୁ କିଏ ଦେଇଥିଲା ?ହଷ୍ଟେଲ ରୁ ତାଙ୍କ ପୁଅ ଗଲା ସମୟରେ ୱୟଡେନ କଣ କରୁଥିଲେ ? ରୁପେଶ ଏକା ଯାଇଥିଲା କି ତାଙ୍କ ସହ ଆଉ କିଏ ଥିଲା।ଏଭଳି ଅନେକ ଅଭିଯୋଗ କରିଛନ୍ତି | ଏ ଘଟଣାକୁ ଚପାଇ ଦେବାକୁ ବହୁ ଦଲାଲ ମଧ୍ୟ ଲାଗି ପଡିଛନ୍ତି।
‘ସୁଦୀକ୍ଷା’ ସଂସ୍ଥା ନାଁରେ ଲୁଟିନେଲେ ଲକ୍ଷାଧିକ ଟଙ୍କା

ପିଲାଙ୍କୁ ପାଠ ପଢ଼ାଇବା ସହିତ ମହିଳାଙ୍କୁ ରୋଜଗାର ଦେବାକୁ କହି ଲକ୍ଷାଧିକ ଟଙ୍କା ଲୁଟି ନେଲେ ‘ସୁଦୀକ୍ଷା’ ନାମକ ସଂସ୍ଥା । କେନ୍ଦ୍ରାପଡା ଜିଲ୍ଲା ଗରଦପୁର ବ୍ଲକ ଅଞ୍ଚଳରୁ ୭୦୦ରୁ ଉର୍ଦ୍ଧ ମହିଳାଙ୍କ ଠାରୁ ଟଙ୍କା ଲୁଟିନେଇଥିବା ଅଭିଯୋଗ ହୋଇଛି । ପିଲାଙ୍କୁ ଉନ୍ନତ ମାନର ଶିକ୍ଷା ଓ ମହିଳାଙ୍କୁ ମାସିକ ରୋଜଗାର ଯୋଗାଇବାର ପ୍ରଲୋଭନ ଦେଖାଇ ସୁଧୀକ୍ଷା ନାମକ ସଂସ୍ଥା ବେଆଇନ ଅର୍ଥ ଆଦାୟ କରିଥିବା ଘଟଣା ଏବେ ସାମ୍ନାକୁ ଆସିଛି । ଏହି ସଂସ୍ଥାର ଚେର ରାଜଧାନୀରୁ ଗ୍ରାମାଞ୍ଚଳ ପର୍ଯ୍ୟନ୍ତ ଲମ୍ବିଥିବା କହିଛନ୍ତି ଲୁଟର ଶିକାର ହୋଇଥିବା ମହିଳା ମାନେ । ଅଭିଯୋଗ ମୁତାବକ, ମହିଳାଙ୍କୁ ଏହି ସଂସ୍ଥାରେ ମାସ ମାସ ଧରି ନିଜ କାର୍ଯ୍ୟରେ ଲଗାଇ ଦରମା ନଦେଇ ଓଲଟା ସଂସ୍ଥାର କର୍ମଚାରୀ ମହିଳା ମାନଙ୍କୁ ଧକମ ଚମକ ଦେଇ ଭୟଭୀତ କରିଥିବା ନେଇ ମହିଳା ମାନେ ଗଣମାଧ୍ୟମକୁ କହିଛନ୍ତି । ଗରଦପୁର ଅଞ୍ଚଳର ସ୍ଵାଗତିକା ଗ୍ରହଚାର୍ଯ୍ୟ ନାମକ ଜଣେ ମହିଳା ଏବଂ ସୁଦୀକ୍ଷା ନାମକ ସଂସ୍ଥାର ମୁଖ୍ୟ ପ୍ରତାପ ଚନ୍ଦ୍ର ସାହୁ ପ୍ରଥମେ ଗରଦପୁର ଅଞ୍ଚଳର ପ୍ରଚାର ଆରମ୍ଭ କରିଥିଲେ । ବିଭିନ୍ନ ସ୍ଥାନରେ ସୁଦିକ୍ଷା ଆପକୁ ବ୍ୟାନର ଓ ଡାକବାଜି ଯନ୍ତ୍ର ଦ୍ୱାରା ପ୍ରଚାର ପ୍ରସାର କରି ମହିଳା ମାନଙ୍କୁ ମିଟିଂ ଜରିଆରେ ରୋଜଗାରର ପ୍ରଲୋଭନ ଦେଖାଇ ଅର୍ଥ ଆଦାୟ କରି ସଂସ୍ଥାକୁ ଦେବା ପାଇଁ କହିଥିଲେ ।

ଏହି ସଂସ୍ଥା ପ୍ରତ୍ୟକ ପଞ୍ଚାୟତରେ ସ୍କୁଲ ଖୋଲି ପିଲାଙ୍କୁ ପାଠ୍ୟ ପୁସ୍ତକ ସହ ଅନଲାଇନ କ୍ଲାସ ଜରିଆରେ ସହଜ ପାଠ ପଢା ଯୋଗାଇ ଦେବ ବୋଲି କହିଥିଲା । ଏହି ପାଠ ପଢା ବାବଦକୁ ପ୍ରଥମେ ଫର୍ମ ପୂରଣ କରିଥିବା ବ୍ୟକ୍ତିଙ୍କ ଠୁ ୪ରୁ ୫ ହଜାର ଟଙ୍କା ଲେଖାଏଁ ଆଦାୟ କରିଥିଲା । ଏହା ସହ ସଂସ୍ଥାକୁ ଆହୁରି ଅଗ୍ରସର କରିବା ପାଁଇ ମହିଳା ମାନଙ୍କୁ ବିଭିନ୍ନ ପଦ ପଦବୀ ପ୍ରଦାନ କରି ସମାନଙ୍କୁ ଆଇ କାର୍ଡ ଦେଇଥିଲା । ବିଭିନ୍ନ ପଦବୀ ଅନୁସାରେ ୭୫୦୦ରୁ ୨୫୦୦୦ ପର୍ଯ୍ୟନ୍ତ ଦରମା ପ୍ରଦାନ କରାଯିବ ବୋଲି କହିଥିଲା ସଂସ୍ଥା । ସଂସ୍ଥା ପକ୍ଷରୁ ମହିଳା ମାନଙ୍କୁ ନିଯୁକ୍ତି ପତ୍ର, ଆଇ କାର୍ଡ ଓ ମାସିକ ଖାତା ପ୍ରଦାନ କରାଯାଇଥିଲା । ହେଲେ ଗରଦପୁର ବ୍ଲକର ସାତ ଶହରୁ ଉର୍ଦ୍ଧ ମହିଳାଙ୍କ ଠାରୁ ଟଙ୍କା ନେଇ ସେମାନଙ୍କୁ ମାସ ମାସ ଧରି କାର୍ଯ୍ୟରେ ଲଗାଇ ମଧ୍ୟ ସଂସ୍ଥାର କର୍ମଚାରୀ ଆଉ ଧରା ଛୁଆଁ ଦେଉନାହାନ୍ତି । ମାସିକ ଦରମା ତ ଦୂରର କଥା ପିଲାଙ୍କ ପାଠ ପଢା ବାବଦ ନେଇଥିବା ଅର୍ଥ ରାଶିକୁ ବି ଫେରସ୍ତ କରିନାହିଁ । ଟଙ୍କା ଫେରସ୍ତ ପାଁଇ ସଂସ୍ଥାର ମୁଖ୍ୟ କହୁଥିବା ପ୍ରତାପ ଚନ୍ଦ୍ର ସାହୁ ଏବଂ ତାର ସହଯୋଗୀ ସ୍ଵାଗତିକା ଗ୍ରହଚାର୍ଯ୍ୟଙ୍କୁ କହିଲେ ସେମାନେ ଓଲଟା ମହିଳାଙ୍କୁ ଧମକ ଦେଇଥିଲେ । ଯାହାକୁ ନେଇ ଠକାମୀର ଶିକାର ହୋଇଥିବା ମହିଳା ମାନେ ଶେଷରେ ନିରାଶ ହୋଇ ପାଟକୁରା ଥାନାରେ ଲିଖିତ ଅଭିଯୋଗ କରିଛନ୍ତି ।
ବିଜେପୁର ଅଭିଯୋଗ ଶୁଣାଣିରେ ୭୮ ମାମଲା ପଞ୍ଜିକୃତ

ବଦଳିଛି ସରକାର। ହେଲେ ବଦଳିନି ବ୍ୟବସ୍ଥା। ପୁରୁଣା ସରକାର ଅମଳର ଜିଲ୍ଲାପାଳଙ୍କ ଅଭିଯୋଗ ଶୁଣାଣିକୁ ନୂଆ ସରକାର ଜାରି ରଖିଛନ୍ତି। ଏହିକ୍ରମରେ ବରଗଡ଼ ଜିଲ୍ଲା ବିଜେପୁର ପଞ୍ଚାୟତ ସମିତି କାର୍ଯ୍ୟାଳୟ ପରିସରରେ ଜିଲ୍ଲାପାଳଙ୍କ ଅଭିଯୋଗ ଶୁଣାଣି ଶିବିର ଅନୁଷ୍ଠିତ ହୋଇଯାଇଛି । ଉକ୍ତ ଶିବିରରେ ଜଳସେଚନ, ବିଦ୍ୟୁତ୍ ଯୋଗାଣ, ଶିକ୍ଷା, ପାନୀୟ ଜଳ ଯୋଗାଣ, ରାସନ କାର୍ଡ, ଧାନ ବିକ୍ରୀ, ଭତ୍ତା , ରାସ୍ତା ନିର୍ମାଣ ଆଦି ସମାସ୍ୟା ଅଧାରିତ ସମୁଦାୟ ୭୮ ଗୋଟି ଅଭିଯୋଗର ଶୁଣାଣି ହୋଇଛି। ସେଥିରୁ ୬୬ଟି ବ୍ୟକ୍ତିଗତ ଏବଂ ୧୨ ଟି ସାମୁହିକ ସମସ୍ୟାର ଅଭିଯୋଗ ଶୁଣାଣି କରାଯାଇଛି। ଲୋକଙ୍କ ସମସ୍ୟା ତୁରନ୍ତ ସମାଧାନ କରିବା ପାଇଁ ବିଭାଗୀୟ ଅଧିକାରୀଙ୍କୁ ଜିଲ୍ଲାପାଳ ନିର୍ଦେଶ ଦେଇଛନ୍ତି । ହେଲେ ଏହି ଅଭିଯୋଗ ଶୁଣାଣି ଶିବିରକୁ ଆସିଥିବା ଲୋକଙ୍କ ମଧ୍ୟରେ ଶିବିରର ବ୍ୟବସ୍ଥାକୁ ନେଇ କେତେକାଂଶରେ ଅସନ୍ତୋଷ ଦେଖିବାକୁ ମିଳିଛି

ଉକ୍ତ ଶିବିରରେ ଜିଲ୍ଲାପାଳ ଆଦିତ୍ୟ ଗୋଏଲ , ଆରକ୍ଷୀ ଅଧିକ୍ଷକ ପ୍ରହଲ୍ଲାଦ ସହାୟ ମୀନା, ପଦ୍ମପୁର ଅତିରିକ୍ତ ଜିଲ୍ଲାପାଳ, ଜିଲ୍ଲା ପରିଷଦ ମୂଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀ ଏବଂ ପଦ୍ମପୁର ଉପଜିଲ୍ଲାପାଳ ଉପସ୍ଥିତ ରହି ଲୋକଙ୍କ ଅଭିଯୋଗ ଶୁଣିଥିଲେ ।