ରାଜ୍ୟସଭା ନିର୍ବାଚନରେ ‘କ୍ରସ୍ ଭୋଟିଂ’କୁ ନେଇ ଚର୍ଚ୍ଚାରେ ଥିବା ବାଙ୍କୀ ବିଧାୟକ ଦେବୀରଞ୍ଜନ ତ୍ରିପାଠୀ ଏବେ ନିଜ ଗଡ଼ରେ ନିଜର ଦବଦବା ଦେଖାଇଛନ୍ତି। ଭୁବନେଶ୍ୱରରେ ବିଜେଡି କର୍ମୀଙ୍କ ବିରୋଧର ସମ୍ମୁଖୀନ ହେବା ପରେ, ବାଙ୍କୀରେ ହଜାର ହଜାର ସମର୍ଥକଙ୍କ ଗହଣରେ ଏକ ବିଶାଳ ଶୋଭାଯାତ୍ରା କରି ସେ ନିଜର ରାଜନୈତିକ ଶକ୍ତିର ପରିଚୟ ଦେଇଛନ୍ତି।
ଏହି ଶୋଭାଯାତ୍ରାରେ ବିଜୁ ଜନତା ଦଳର ପତାକା ବଦଳରେ କେବଳ “ବିଜୁ ପଟ୍ଟନାୟକ ଅମର ରହେ” ଲେଖାଥିବା ପତାକା ଦେଖିବାକୁ ମିଳିଥିଲା। ଜାତମୁଣ୍ଡିଆ ଛକରୁ ବାଙ୍କୀ ବଜାର ପର୍ଯ୍ୟନ୍ତ ଏକ ବିଶାଳ ବାଇକ୍ ଶୋଭାଯାତ୍ରା ଅନୁଷ୍ଠିତ ହୋଇଥିଲା। ସ୍ଥାନୀୟ ମହିଳାମାନେ ଫୁଲମାଳ ପିନ୍ଧାଇ ବିଧାୟକଙ୍କୁ ଭବ୍ୟ ସମ୍ବର୍ଦ୍ଧନା ଜଣାଇଥିଲେ। ବିଧାୟକଙ୍କ ସମର୍ଥକମାନେ କହିଛନ୍ତି ଯେ, ଦେବୀରଞ୍ଜନ ବିଜୁ ବାବୁଙ୍କ ନୀତି ଓ ଆଦର୍ଶକୁ ସମ୍ମାନ ଜଣାଇ ରାଜ୍ୟସଭା ନିର୍ବାଚନରେ ନିଜର ମତ ସାବ୍ୟସ୍ତ କରିଛନ୍ତି। “ବାଙ୍କୀର ବିକାଶକୁ ଆଗକୁ ନେବା ସହ ଜନସାଧାରଣଙ୍କ ସେବା କରିବା ମୋର ମୁଖ୍ୟ ଲକ୍ଷ୍ୟ। ଲୋକଙ୍କ ଏହି ଅକୁଣ୍ଠ ସ୍ନେହ ଓ ଶ୍ରଦ୍ଧା ମୋତେ ଆଗକୁ ବଢ଼ିବାକୁ ପ୍ରେରଣା ଦେଉଛି।”ଏହି ଶକ୍ତି ପ୍ରଦର୍ଶନ ମାଧ୍ୟମରେ ବିଧାୟକ ଏହା ସ୍ପଷ୍ଟ କରିଛନ୍ତି ଯେ, ଦଳୀୟ ସ୍ତରରେ ଯାହା ବି ବିବାଦ ଥାଉ ନା କାହିଁକି, ନିଜ ନିର୍ବାଚନ ମଣ୍ଡଳୀରେ ତାଙ୍କର ଲୋକପ୍ରିୟତା ଏବେ ବି ଅକ୍ଷୁଣ୍ଣ ରହିଛି।