ଡଲଫିନ୍ ସଂରକ୍ଷଣରେ ଓଡ଼ିଶାର ବଡ଼ ସଫଳତା: ୨୦୨୫-୨୬ ଡଲଫିନ୍ ଗଣନାରୁ ମିଳିଥିବା ତଥ୍ୟ ଅନୁଯାୟୀ, ଚିଲିକା ସମେତ ଓଡ଼ିଶା ଉପକୂଳରେ ୭୬୫ଟି ବିଭିନ୍ନ ପ୍ରଜାତିର ଡଲଫିନ୍ ଚିହ୍ନଟ ହୋଇଛି। ଚିଲିକା ହ୍ରଦରେ ଏରାୱାଡି ଡଲଫିନ୍ଙ୍କ ଉପସ୍ଥିତିରୁ ଆରମ୍ଭ କରି, ଗହୀରମଥା ସାମୁଦ୍ରିକ ଅଭୟାରଣ୍ୟରେ ହମ୍ପବ୍ୟାକ୍ ଡଲଫିନ୍ ପର୍ଯ୍ୟନ୍ତ, ଓଡ଼ିଶାର ଡଲଫିନ୍ ସଂରକ୍ଷଣ ପ୍ରଚେଷ୍ଟା ବିଶ୍ୱରେ ପରିଚିତ ହୋଇଛି। ପିସିସିଏଫ୍ (ବନ୍ୟପ୍ରାଣୀ)ର ପ୍ରେମ୍ କୁମାର ଝାଙ୍କ ଅନୁସାରେ, ଏହି ସଫଳତା କେବଳ ସଂଖ୍ୟା ନୁହେଁ, ଏହା ସୁସ୍ଥ ସାମୁଦ୍ରିକ ଓ ଉପକୂଳବର୍ତ୍ତୀ ଇକୋସିଷ୍ଟମ, ଦୃଢ଼ ସଂରକ୍ଷଣ ବ୍ୟବସ୍ଥା, ଓଡ଼ିଶାର ସ୍ଥାନୀୟ ଲୋକ ଓ ବନ୍ୟପ୍ରାଣୀଙ୍କ ମଧ୍ୟରେ ବଢ଼ୁଥିବା ସହଅବସ୍ଥାନର ପରିଣାମ।
ଜାନୁଆରି ମାସରେ କରାଯାଇଥିବା ଡଲଫିନ୍ ଗଣନାରୁ ଜଣାପଡ଼ିଛି ଯେ ରାଜ୍ୟରେ ମୋଟ ୨୦୮ଟି ଏରୱାଡି ଡଲଫିନ୍ ରହିଛନ୍ତି । ସେଥିମଧ୍ୟରୁ ୧୫୯ଟି କେବଳ ଚିଲିକାରେ ଦେଖାଯାଇଥିବାବେଳେ ରାଜନଗରରେ ୯ଟି ଚିହ୍ନଟ ହୋଇଛନ୍ତି । ଏହି ଦୁଇ ରେଞ୍ଜ ବ୍ୟତୀତ ବାଲେଶ୍ବର ବନ୍ୟପ୍ରାଣୀ ଡିଭିଜନ୍ରେ ୧୫, ବ୍ରହ୍ମପୁର ବନ୍ୟପ୍ରାଣୀ ଡିଭିଜନ୍ରେ ୧୩ ଓ ପୁରୀ ବନ୍ୟପ୍ରାଣୀ ଡିଭିଜନ୍ରେ ୧୨ଟି ଡଲଫିନ୍ ନଜରକୁ ଆସିଥିଲେ । ସର୍ଭେ ସମୟରେ ଚିଲିକା ହ୍ରଦରେ ବିଲୁପ୍ତପ୍ରାୟ ଏରାୱାଡି ଡଲଫିନ୍ଙ୍କ ବହୁ ଆବାସ ସ୍ଥଳ ରହିଥିବା ଦେଖାଯାଇଛି । ଚିଲିକାରେ ବାସ କରୁଥିବା ଡଲଫିନ୍ ସାମୁଦ୍ରିକ ପ୍ରଜାତି ବନ୍ୟପ୍ରାଣୀ(ସୁରକ୍ଷା) ଆଇନ ୧୯୭୨ ଅଧୀନରେ ଆସୁଥିବାରୁ ସେମାନଙ୍କ ବାସସ୍ଥାନ ବିକଶିତ ଦିଗରେ ପଦକ୍ଷେପ ନିଆଯାଉଛି । ରାଜନଗର ବନ୍ୟପ୍ରାଣୀ ଡିଭିଜନରେ ଏମାନଙ୍କ ସଂଖ୍ୟା ବହୁତ କମ୍ ରହିଛି । ତେବେ ବ୍ରହ୍ମପୁର, ପୁରୀ ଓ ବାଲେଶ୍ବର ବନ୍ୟପ୍ରାଣୀ ଡିଭିଜନ୍ରେ ଏରାୱାଡିଙ୍କ ଉପସ୍ଥିତିକୁ ନେଇ ବିଶେଷଜ୍ଞମାନେ ବେଶ୍ ଆଶାବାଦୀ ରହିଛନ୍ତି ।
