ସରକାରୀ ବସ୍ ଉପରେ ଗୁଳିମାଡ଼ । ଏଭଳି ଘଟଣା ଦେଖିବାକୁ ମିଳିଛି କୋରାପୁଟ ଜିଲ୍ଲା ବୈପାରୀଗୁଡ଼ା ନିକଟରେ । ଏକ ସରକାରୀ ବସ୍ ଉପରକୁ ଗୁଳିମାଡ଼ ହୋଇଥିବା ବେଳେ ଏଥିରେ କେହି ମୃତାହତ ହୋଇନାହାଁନ୍ତି । ପୋଲିସ ଘଟଣାର ତଦନ୍ତ ଜାରି ରଖିଛି ।
ସୂଚନା ଅନୁସାରେ ଗତକାଲି ରାତିରେ ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (OSRTC)ର ଏକ ଏସି ଡିଲକ୍ସ ବସ୍ ମାଲକାନଗିରି ଜିଲ୍ଲା ବାଲିମେଳାରୁ ବାହାରିଥିଲା । ବ୍ରହ୍ମପୁର ଅଭିମୁଖେ ଯାଉଥିବା ବେଳେ ଗୁଳିମାଡ଼ ହୋଇଥିଲା । ବୈପାରୀଗୁଡ଼ା ଥାନାଠାରୁ ମାତ୍ର ୧୦୦ ମିଟର ଦୂରରେ ବସ୍ ଉପରକୁ ଗୁଳିମାଡ଼ କରିଥିଲେ ଦୁର୍ବୃତ୍ତ । ଗୁଳି ବସ୍ର ଗୋଟିଏ ପାର୍ଶ୍ୱ ଝରକାରେ ବାଜିଛି । ବସ୍ ଯାତ୍ରୀମାନେ ଏହାକୁ ନେଇ ଭୟଭୀତ ହୋଇଥିଲେ । ଘଟଣା ସମ୍ପର୍କରେ ବୈପାରୀଗୁଡ଼ା ପୋଲିସକୁ ଖବର ଦିଆଯାଇଥିଲା ।
ତେବେ ଏଭଳି ଗୁଳିମାଡ଼ କିଏ ଓ କାହିଁକି କଲା ତାହା ଏଯାଏ ସ୍ପଷ୍ଟ ହୋଇନି । କେହି ପୂର୍ବ ଶତ୍ରୁତାରୁ ଏଭଳି କରିଥିବା ସନ୍ଦେହ କରାଯାଉଥିବା ବେଳେ ମାଓବାଦୀମାନେ ମଧ୍ୟ ଏଭଳି କାମ କରିଥାଇପାରନ୍ତି ବୋଲି ସନ୍ଦେହ କରାଯାଉଛି । ଗୁଳିମାଡ଼ର କାରଣ ଅସ୍ପଷ୍ଟ ରହିଛି । ତେବେ ପୋଲିସ ଏହି ଘଟଣାର ତଦନ୍ତ ପ୍ରକ୍ରିୟାକୁ ତ୍ୱରାନ୍ୱିତ କରିଛି ।